Pachamama(እምዬ መሬት)

Issues and Articles of General Interests including topics related to religion

Pachamama(እምዬ መሬት)

Postby ኖሞናኖቶ » Thu Sep 05, 2013 3:37 pm

‹‹የአካባቢ ተፅዕኖ ግምገማችን በጣም ደካማ ነው››

ዶ/ር ሚሊዮን በላይ የመልካ ኢትዮጵያ መሥራችና ዋና ዳይሬክተር
መልካ ኢትዮጵያ የአካባቢ ጥበቃ፣ ደን ጥበቃና ተያያዥ የሆኑ ጉዳዮች ላይ የሚሠራ መንግሥታዊ ያልሆነ አገር በቀል ድርጅት ነው፡፡
እኤአ በ2004 ለተቋቋመው መልካ መሥራችና ዋና ዳይሬክተር የሆኑት ዶክተር ሚሊዮን በላይ የመጀመርያ ዲግሪያቸውን ከአዲስ አበባ ዩኒቨርሲቲ በባዮሎጂ አግኝተዋል፡፡ የማስተርስ ዲግሪያቸውን ደግሞ በቱሪዝም ኤንድ ኮንዘርቬሽን እንግሊዝ አገር ከሚገኘው ከኬንት ዩኒቨርሲቲ ሲያገኙ የዶክትሬት ዲግሪያቸውን ደግሞ በኢንቫይሮመንታል ኤዱኬሽን ደቡብ አፍሪካ በሚገኘው ሮድስ ዩኒቨርሲቲ ሠርተው አግኝተዋል፡፡ ስለ መልካ አጠቃላይ የሥራ ሂደት ዶ/ር ሚሊዮንን ምዕራፍ ብርሃኔ አነጋግራቸዋለች፡፡
ሪፖርተር፡- መልካ ምንድን ነው ሚሠራው?
ዶ/ር ሚሊዮን፡- መልካ ከሚሠራቸው ሥራዎች ውስጥ አንዱ ግለሰቦች በተለይም ተማሪዎች ከተፈጥሮ ጋር ቁርኝት እንዲኖራቸውና ተፈጥሮን እንዲረዱ ማድረግ ነው፡፡ ሌላው የካርታና የሞዴል ሥራን ማስተዋወቅ ነው፡፡ ይህም ኅብረተሰቡ ተቀናጅቶ በአንድ ላይ እንዲገናኝ፣ ለዕቅድ እንዲጠቅም፣ የመንግሥት አካልና ህብረተሰቡ ተገናኝቶ በአንድ ልብ እንዲሠራ፣ የአባቶች ዕውቀት ለልጆች እንዲተላለፍና ለሌሎችም ሥራዎች የምንጠቀምበት ነው፡፡ ሌላው ተግባራችን ሸካ ደን፣ ባሌ እና መናገሻ (ሱባ ደን) ላይ እንሠራለን፡፡ የሸካ ደን በአሁን ሰዓት ባዮስፊር ሆኗል፡፡
ሪፖርተር፡- ባዮስፊር የሚለውን ቃል እንዴት ያስረዱታል?
ዶ/ር ሚሊዮን፡- ባዮስፊር የእንግሊዝኛ ቃል ነው፡፡ እንግዲህ የባህልም ሆነ ሌላ ዓይነት የሆኑ ብዙ ዓይነት የደን አጠባበቅ መንገዶች አሉ፡፡ ከእነዚህ ውስጥ አንዱ ባዮስፊር ነው፡፡ ደኑ ውስጥ የኢንቨስትመንት ወይም ደግሞ የአካባቢው ማኅበረሰብ ሕጋዊ በሆነ መልኩ ደኑን የሚጠቀምበት ለብቻው የተከለለ ቦታ አለ፡፡ እዚያው ደን ውስጥ የማይነካና የተጠበቀ ለምርምር የሚውል ቦታ አለ፡፡ በእነዚህ ቦታዎች መካከል ያለ ከሁለቱም የአጠባበቅ ሥርዓቶች የሚጋራ ሦስተኛም ቦታ አለ፡፡ ስለዚህ ይህ የአጠባበቅ መንገድ ለጥበቃ፣ ለትምህርትና ለዕድገት የሚያገለግል ነው፡፡ ይህንን የባዮስፊር ሥራ በምንሠራባቸው በሦስቱም ደኖች (በባሌ፣ ሸካና በመናገሻ ወይም ሱባ ደን) እንሠራለን፡፡
ሸካ ደንን ባዮስፊር ለማድረግ የተለያዩ ጥናቶች ተሠርተው ደኑን በተመለከተ የዓለም አቀፍና የአገር ውስጥ ሕጎችን ለኅብረተሰቡና ለመንግሥት አካላት አሰልጥነናል፡፡ በዚህም መሠረት ብዙ ውሳኔዎች ስለተስተካከሉ ደኑን የሚጨፈጭፉ በእስር ይቀጣሉ፡፡ ስለዚህ የሕግ አፈጻጸሙ እንዲጨምር አስተዋጽኦ አድርገናል፡፡ ቢሆንም ግን የአካባቢው ኅብረተሰብ በጣም የነቃ ነው፡፡ የጎሳ መሪዎች ተደራጅተው አስፈላጊውን ነገር ያደርጋሉ፡፡ የደኑን ሙሉ በሙሉ የሆነውን ይዞታ በካርታ ሠርተናል፡፡ ያ ሁሉ መሠረት ሆኖ የሸካ ደን ባሁኑ ሰዓት ‹‹የባዮስፊር ሪዘርቭ›› ሆኖ በዩኔስኮ ተመዝግቧል፡፡ በሸካና በተቀሩት ሁለት ደኖች ውስጥ ተማሪዎችና ሌሎች በሥራ ላይ የሚገኙ ግለሰቦች ቆይታ እያደረጉ ስለ ደን ያላቸው ልምድና እውቀት እንዲጨምር የደኖቹ አዋቂዎች ከሆኑ ሽማግሌዎች ጋር በመተባበር እናስተምራለን፡፡ ይህ በመሆኑ ግለሰቦቹ በደኖቹ ውስጥ ስላሉ የዕፀዋት ዝርያዎችና ባህላዊ ጥቅሞቻቸው እንዲሁም ደን ማለት ምን ማለት እንደሆነ ተጨማሪ ዕውቀትን እንዲጨብጡ እናደርጋለን፡፡
የሱባ ደን እየተመናመነ አደጋ ላይ ያለ ደን ነው፡፡ ይሄ ደን እንዲጠበቅ ዙሪያው ያሉ ትምህርት ቤቶች የደኑ አፍቃሪ እንዲሆኑ እያደረግን ነው፡፡ በተጨማሪም የአፈርና ውኃ ጥበቃ እንሠራለን፡፡ እዚሁ ደን ውስጥ ተራቁቶ የነበረውን ደን በዛፎች እንዲሸፈን እያደረግን ነው፡፡ ከሱባ ትይዩ የሚገኝ ፋአታ የሚባል ተራራ ላይ መሠረታዊ ሥራ የሠራን ነው፡፡ በአካባቢው ያሉ ገበሬዎች የሚዘሯቸው የስንዴና ገብስ ዘሮችን በተጨማሪ እንዲያገኙ፣ የዘር አቅርቦታቸው እንዳያቋርጥ የዘር ባንክ እንዲቋቋምላቸው በማድረግና የአፈርና ውኃ ጥበቃ ሥራንም ላይ እየሠራን ነው፡፡ ይህ በመሆኑ መሬቱ እንዲድን፣ ኅብረተሰቡ እንዲደራጅ፣ የገበሬው ዘር እንዲመለስ አድርገናል፡፡ እንዲሁም ኦርጋኒክ የሆኑ የገበሬዎች ምርት እንዲጨምር እያደረግን ነው፡፡ እዚህ ተራራ ላይ በተቀናጀ መልኩ ርብርብ እየተደረገ ስለሆነ ቢያንስ ቢያንስ በአምስት ዓመት ጊዜ ውስጥ ለምሳሌነት የሚቀርብ የደን ቦታ ይሆናል፡፡ አሁንም ለውጥ እያሳየ ነው፡፡
ሪፖርተር፡- የአካባቢ ጥበቃን በተመለከተ አገሪቷ ስላለችበት ሁኔታና ስላላት የደን ይዞታ ወይም ሁኔታ መረጃው ይኖርዎታል፡፡ እርሶ ስለሁኔታው እንዴት ያስረዳሉ?
ዶ/ር ሚሊዮን፡- ደንን በተመለከተ በአንድ በኩል አዎንታዊ የሆነ ነገር አለ፡፡ ይህም በጣም ብዙ ቦታ ችግኝ እንዲፈላ እየተደረገ ነው፡፡ መንግሥት በፕሮግራም ይዞ በብዙ ቦታዎች ላይ የአንድ ወር የሥራ ጊዜ እንዲኖራቸው አድርጎ ሰዉ እየወጣ በተፋሰስ ሥራ ላይ እየተረባረበ ነው፡፡ እንደ አገር ለአሥር አሥራ አምስት ዓመታት ተጠናክሮ ከቀጠለ ለውጥ ይመጣል የሚል ስሜት አለኝ፡፡ ከዚህም ባሻገር የኅብረተሰቡ አስተሳሰብ ከመቼውም በላይ እየተቀየረ ነው፡፡ ይህ ማለት ግን ኅብረተሰቡ ደን እንደሚያስፈልግ እያወቀ ያለው አሁን ነው ማለት አይደለም፡፡ ማኅበረሰቡ ደን እንደሚያስፈልግ የማወቅ ችግር ኖሮበት አያውቅም፡፡ መንግሥትም ደንን የጨፈጨፈን የሚቀጣውን ሲቀጣ የሚመከረውንም ሲመከር አይተናል፡፡ በሌላ በኩል ደግሞ የዕድገት ሁኔታችንን ሁላችንም ያልተወያየንበትና ግልፅ ስላልሆነ ያለው ደን አደጋ ላይ ነው፡፡ ምክንያቱም በዕድገት ጉጉት ለኢንቨስትመንት የሚሰጡ ገና ያልተጠኑና የማናውቃቸው ቦታዎች አሉ፡፡ ይህ ግን በጣም ያሳዝነኛል፡፡ ማደግ አንድ ነገር ነው፡፡ ነገር ግን ታስቦበት እዚህ ጋ አደጋ ሲፈጠር እዛ ጋ መልሱን እሰጣለሁ ብሎ መሄድ አስፈላጊ ነው፡፡ የአካባቢ ተፅዕኖ ግምገማችን በጣም ደካማ ነው፡፡ እኛ እንደ መልካ ከፖሊሲ አውጪውም ሆነ ከፖሊሲ አስፈፃሚው ጋር በስፋት ሠርተናል፡፡ አንድ ሕግ ብቻውን ይዘን (የአካባቢ ተፅዕኖ ግምገማን በተመለከተ) የሕጉን ድክመት አይተን በሕጉ ድክመት ላይ የጋራ ግንዛቤ እንዲኖር አድርገን ከዛም በጋራ ግንዛቤው ላይ በወጣው መረጃ ላይ ተመሥርተን ሕጉን አሻሽለን ለፓርላማውም ሆነ ለሚመለከተው የመንግሥት አካል ሰጥተናል፡፡ ሌላው ደግሞ በስድስት ክልሎች ላይ ያሉ የዘርፍ ቢሮዎች አንድ ላይ ተቀምጠው አካባቢን በተመለከተ እንዴት ማስተዳደር (ኢንቫይሮመንታል ገቨርናንስ) እንዳለባቸው እነርሱ በጠየቁት መሠረት አንድ ዶክመንት አዘጋጅተንላቸዋል፡፡
ሪፖርተር፡- በኢንቨስትመንትና በልማት አማካይነት ደኖች መጨፍጨፋቸው አደጋ ነው ተብሏል፡፡ በተጨማሪም ሰዎች ለግል ጥቅማቸው ሲሉ ዛፎችን ይቆርጣሉ፡፡ ይህንን ከመታደግ አኳያ ደንን ለመጠበቅ መኖር የሚገባው ተነሳሽነት እንዲኖር ምን አስተዋጽኦ አላችሁ?
ዶ/ር ሚሊዮን፡- ማኅበረሰቡ ላይ መሠራት ያለበት ደንን የመጠበቅ መነሳሳት ኖሮ ያለውን ችግር መቅረፍ ነው፡፡ አንድ ሰው ምን ቢያደርግ ሕይወቱ እንደሚቀየር ያውቃል፡፡ የሚቀረው ወይም የሚጎለው ግን ዕርምጃ መውሰድ ነው፡፡ ማኅበረሰብ ማለት እንደዚያ ነው፡፡ ስለዚህ ዋናው ነገር ማነሳሳት ስለሆነ ቅድም የገለፅኩት ካርታ ለዚያ ነው የምንጠቀምበት፡፡ ካርታን ስንሠራ ከ50 ወይም ከ60 ዓመታት በፊት ቦታው ምን ይመስላል? ቦታው ባሁኑ ሰዓት ያለው ይዘትስ ምን ይመስላል? የሚለውን ሠርተን ስናሳያቸው ትልቅ ድንጋጤን ይፈጥርባቸዋል፡፡ ይህ የሚሆነው ደግሞ ከደኑ መጠቀም የነበረባቸውን ብዙ ነገር ስላጡ ነው፡፡ ስለዚህ ሁለት አቅጣጫዎችን እንሠራላቸዋለን፡፡ የመጀመሪያው ይህንን ቦታ አስተካክለን ብንለውጠው ምን ይፈጠራል የሚል፡፡ ሁለተኛው ደግሞ ቦታው በዚሁ መልኩ ቢቀጥል ምን እንሆናለን የሚል ነው፡፡ ስለዚህ ሁለተኛው አማራጭ ውጤቱ አስፈሪ ስለሆነ የመጀመሪያው አቅጣጫ ላይ ስለሚስማሙ ዕርምጃዎች መውሰድ ይጀምራሉ፡፡ እኛ በምንሠራባቸው ቦታዎች ላይ ያደረግነው ያንን ነው፡፡ ስለዚህ ኅብረተሰቡ እንዲነሳሳ እየሠራን ነው፡፡ ማንኛውም የኢትዮጵያ ኅብረተሰብ ግን ስለደን አስፈላጊነት የዕውቀት ችግር የለበትም፡፡ አሁን ለምሳሌ አዲስ አበባን ለማፅዳት ምን መደረግ እንዳለበት የማያውቅ የአዲስ አበባ ነዋሪ የለም፡፡ ችግሩ የብዙ ነገሮች አንድ ላይ አለመገጣጠም ነው፡፡
ሪፖርተር፡- ከምትሠሯቸው ሥራዎች ውስጥ አንዱ ተማሪዎችን ወይም ደግሞ በተለያዩ ሥራዎች ላይ የተሰማሩ ባሙያዎችን በየደኑ እየወሰዳችሁ ከሦስት እስከ አምስት ቀናትን በማቆየት ‹‹ሰኚ›› በተሰኘ ፕሮግራም ማስተማር ነው፡፡ የዚህ እንቅስቃሴያችሁ ዓላማውምና የፕሮግራሙ ይዘት ምንድን ነው?
ዶ/ር ሚሊዮን፡- የመጀመሪያው ነገር ደን ውስጥ መቆየት ማለት ምን ማለት እንደሆነ እንዲያውቁትና ለደኑ ተገቢ የሆነ ባሕሪ እንዲኖራቸው እናዘጋጃቸዋለን፡፡ ከዚያ በኋላ ጠዋት ላይ ከተፈጥሮ ጋር የሚያገናኛውን ጨዋታዎችን ከተጫወቱ በኋላ በደኑ ውስጥ የእግር መንገድ እንዲሄዱ እናደርጋለን፡፡ የእግር መንገድ ሲሄዱ የደኑ አዋቂ ሽማግሌዎች ተሳታፊዎቹ ስለሚያዩት ዕፅዋት እንዲነግሯቸው እናደርጋለን፡፡ የፕሮግራሙ አንዱ ዓላማ ግለሰቦቹ ከተፈጥሮ ጋር እንዲገናኙ ሲሆን፣ ሌላው ደግሞ ስለ ባህል (ዕፀዋቱ ስላላቸው ባህላዊ ትርጓሜና ጠቀሜታ) እንዲያውቁ ማድረግ ነው፡፡ ከዚያ ደኑ ውስጥ ገብተው የተወሰነ ጊዜ ይኖራቸዋል፡፡ በዚህ ጊዜ ውስጥ ራሳቸውን (ሕይወታቸውን) ይፈትሻሉ፡፡ ይህን የምናደርግበት ምክንያት ከራሱ ጋር ያልታረቀ ሰው ለአካባቢው ማኅበረሰብም ሆነ ለተፈጥሮ አይበጅም የሚል አስተሳሰብ ስላለ ነው፡፡ ስለዚህ ይሄኛው ነጥብ ሰው ከራሱ ጋር እንዲታረቅና ሕይወቱን እንዲያሻሽል የሚረዳ ነው፡፡ ከዚያ በኋላ ምሽት ላይ ለተሳታፊዎቹ ሽማግሌዎቹ ተረት ይነግሯቸዋል፡፡ ተረቶች ጊዜ አልፈው የሚሄዱና ውስጣቸውም ብዙ ትምህርት ያላቸው በመሆናቸው ከዚያ እንዲማሩ እናደርጋለን፡፡ ሌሊቱን ጨለማውን እንዲለማመዱና ለማረፊያነት የተዘጋጀውንም ካምፕ ተራ በተራ (ለአንድ ሰዓት) እንዲጠብቁ ይደረጋል፡፡ ይህም ሒደት ከራሳቸው ጋር እንዲገናኙ፣ ከዚህ በፊት ሲፈሯቸው የነበሩትን ነገሮች እንዲያስወግዱ የምናደርግበት ነው፡፡ ፕሮግራሙ እነዚህን እንቅስቃሴዎች ያካተተ ነው፡፡
ሪፖርተር፡- ፕሮግራሙን መቼ ጀመራችሁት?
ዶ/ር ሚሊዮን፡- ስኚ የተጀመረው እ.ኤ.አ. በ2005 ነው፡፡ ከዚያን ጊዜ ወዲህ ብዙ ቡድኖችን አሠልጥነናል፡፡ ነገር ግን በግምት በአማካይ ወደ 160 ቡድኖችን አሠልጥነናል፡፡
ሪፖርተር፡- እንግዲህ በ160 ቡድኖች ውስጥ ብዙ ግለሰቦች ይካተታሉ፡፡ እነዚህ ግለሰቦች ከሰኚ ሥልጠና በኋላ ያሳዩት ውጤታማነት እንዴት ነው?
ዶ/ር ሚሊዮን፡- የመጀመሪያው ውጤት ልጆች ላይ የምናየው ነው፡፡ ኅብረተሰቡ ውስጥም ገብተው ለዋጭና መሪ ይሆናሉ፡፡ ዱርዬ፣ ማጅራት መቺ፣ ሰካራም፣ ለቤተሰቦቻቸው አስቸጋሪ የነበሩ ወጣቶች በሰኚ ፕሮግራም ካለፉ በኋላ ሙሉ በሙሉ ተለውጠዋል፡፡
ሪፖርተር፡- ሰኚ ማለት ምን ማለት ነው? የሰኚ ሥልጠናን የጨረሱ ሰዎች ምን የሚል ሰያሜ ይሰጣቸዋል?
ዶ/ር ሚሊዮን፡- ሰኚ ማለት ምርጥ ዘር ማለት ነው፡፡ ሠልጣኞቹ ደግሞ የአካባቢ ተሟጋቾች ይባላሉ፡፡
ሪፖርተር፡- ደን ጥበቃን በተመለከተ እንደ መልካ ምን መደረግ አለበት ይላሉ?
ዶ/ር ሚሊዮን፡- አንደኛ ሕጉ መጥበቅ አለበት፡፡ በዚህም ምክንያት እኛ በምንሠራባቸው ሦስት ቦታዎች ላይ የሕግ አስከባሪውን ኃይል እናሠለጥናለን፡፡ ሁለተኛው የደኖቹ ዙሪያ በደኖቹ አፍቃሪዎች እንዲታጠር እናደርጋለን፡፡ ይሄ የሚቀጥለው ትውልድ ላይ (ትምህርት ቤቶች ላይ) የምንሠራው ትልቅ ሥራ ነው፡፡ ሦስተኛው ኅብረተሰቡ ላይ እንሠራለን፡፡ አራተኛው ደግሞ ደን ላይ ጥገኛ የሆኑ ሰዎች ሕይወታቸው እንዲቀየር በተወሰነ መልኩ አስተዋጽኦ እናደርጋለን፡፡ ለምሳሌ ደን ይቆርጡ የነበሩ ሴቶች የሥራ ፈጠራ ሥልጠና ተሰጥቷቸው የሥራ ዘርፋቸውን ለውጠው ሕይወታቸውን የቀየሩ አሉ፡፡ እንደመልካ እነዚህ ነገሮች በይበልጥ መጠናከር አለባቸው እንላለን፡፡
ሪፖርተር፡- ሥራዎቻችሁ ላይ ያሉባችሁ ተግዳሮቶች ምንድን ናቸው?
ዶ/ር ሚሊዮን፡- መንግሥትን በተመለከተ ሥራዎችን የሚያስፈፅሙ አካላት በየጊዜው ይለዋወጣሉ፡፡ በስብሰባም በጣም ይጠመዳሉ፡፡ ስለዚህ ሥራን ለማስፈፀም አስቸጋሪ ይሆናል፡፡ ሦስተኛው መንግሥታዊ ያልሆነ ድርጅት በመሆናችን ገንዘብ ከአሜሪካና ከአውሮፓ ጭነን የመጣን የሚመስላቸው የኅብረተሰቡ አካላት አሉ፡፡ በተጨማሪም ከዚህ በፊት ማኅበረሰቡ ላይ እንሠራለን ብለው ገብተው የነበሩ መንግሥታዊ ያልሆኑ ድርጅቶች ያታለሏቸው አሉ፡፡ እኛ እምነታቸውን እስከምናገኝና እስኪያውቁን ድረስ እንሠራለን፡፡ ኅብረተሰቡ ውስጥ ያሉ አስቸጋሪ ነገሮች ተቀርፈው አያልቁም፡፡ ግን ፍቅራቸው ሁሌም እንድንሠራ ያደርገናል፡፡ በገንዘብ እጥረትም የምንፈልገውን ያህል ሰፍተን መሄድም ትንሽ ከባድ ነው፡፡
ሪፖርተር፡- በቅርብ ርቀት መልካ ምን ለመሥራት አቅዷል?
ዶ/ር ሚሊዮን፡- አንደኛ ጋምቤላ ገብተን መዥንገር ዞን ውስጥ ያለውን ጎደሬ ደን እንደ ሸካ ደን የባዮስፊር ደን እንዲሆን መሥራት እንፈልጋለን፡፡ ሌላው ደግሞ አገራችን ውስጥ ኬሚካል መር እርሻ ሳይሆን የተፈጥሮ እርሻ ብቻ እንዲኖር እንሠራለን፡፡ ሦስተኛው የሰኚ ፕሮግራም በሦስት ደን ብቻ የተወሰነ ሳይሆን ብዙ ቦታዎች ላይ እንዲኖሩ ለማድረግ ማኑዋሎችን እያዘጋጀን ነው፡፡
ምንጭ፦http://ethioclimatechange.blogspot.com/2013/09/blog-post.html
ኖሞናኖቶ
ጀማሪ ኮትኳች
ጀማሪ ኮትኳች
 
Posts: 93
Joined: Sun Aug 01, 2010 8:17 pm

Postby ኖሞናኖቶ » Thu Sep 12, 2013 6:05 pm

ኢትዮጵያ ናአይስላንድ በከርሰ ምድር ሀይል ጥናትና የዘርፉን ልማት አቅም ለመገንባት የመግባቢያ ስምምነት ተፈራረሙ፡፡
አይስላንድ በአለማቀፍ የልማት ኤጀንሲዋ በኩል በኢትዮጵያ በኩል የሚካሄዱ የከረሰ ምድር ሀይል(geothermal energy) አቅም የመለየትና ቴክኒካው የአቅም ግንባታ ድጋፍ ለማድረግ ያስችላታል፡፡
ስምምነቱ በአይስላንድ መንግስትና በአለም ባንክ የሚያካሄዱ የከርሰ ምድር የሀይል ልማት ፕሮጀክት አንዱ ክፍል እንደሆነ ተወስቷል፡፡
ኢትዮጵያ እስከ 5 ሺህ ሜጋዋት የሚደርስ ከፍተኛ የከርሰ ምድር ሀይል አቅም እንዳላትም ተገልጾዋል፡፡ የአሁኑ ስምምነትም ኢትዮጵያ ከካርቦን ልቀት ነፃ የሆነ የሀይል አቅርቦት አቅም ለማሳደግ የሚደረገውን ጥረት ያሳድገዋልም ተብሏል፡፡
ስምምነቱ ኤጀንሲው በሩዋንዳ ከሚያካሄደው ተመሳሳይ ፕሮጀክት ቀጥሎ ሁለተኛው ነው ተብሏል፡፡

http://ethioclimatechange.blogspot.com/ ... st_12.html
ኖሞናኖቶ
ጀማሪ ኮትኳች
ጀማሪ ኮትኳች
 
Posts: 93
Joined: Sun Aug 01, 2010 8:17 pm


Return to Warka General

Who is online

Users browsing this forum: Jamnegow, JohnyPeva and 4 guests