አይ ኤስ እስልምናን ይወክላልን?

Issues and Articles of General Interests including topics related to religion

አይ ኤስ እስልምናን ይወክላልን?

Postby ጎነጠ » Mon May 01, 2017 2:38 pm

አይ ኤስ እስልምናን ይወክላልን? (ክፍል 1)
የኢራቅና የሦርያ እስላማዊ መንግሥት (ISIS) ወይም እስላማዊ መንግሥት (IS)፣ በአረብኛ ደግሞ ዳዕሽ የተሰኘው የሽብርተኞች ቡድን እስልምናን እንደማይወክልና ድርጊቱም ደግሞ እስላማዊ እንዳልሆነ፣ እንዲያውም እስልምናን የሚፃረር እንደሆነ ሲነገር እንሰማለን፡፡ ነገር ግን የብዙዎችን ሕይወት እየቀጠፈ የሚገኘው ይህ የነፍሰ ገዳዮች ስብስብ ተግባር እውን እስልምናን የሚፃረር ነውን? እስላማዊ ጽሑፎችስ እንዲህ ዓይነቱን ተግባር ይኮንናሉ ወይንስ ያበረታታሉ? አይ ኤስ እስላማዊ ከሆነ ለምንድነው ሙስሊሞችም ጭምር ሰለባዎቹ የሆኑት? ብዙ ሙስሊሞችስ ለምን ይሆን ድርጊቱን በመኮነን እስላማዊ አለመሆኑን የሚገልፁት? አይ ኤስ የእንግሊዝ፣ የአሜሪካና የእስራኤል የስለላ ድርጅቶች ሴራ መሆኑን የሚያሳይ መረጃ ኤድዋርድ ስኖውደን ይፋ ማድረጉን በተመለከተ የተናፈሰው ወሬ እውነት ነውን? የፖለቲካ መሪዎች ለምንድነው የእስልምናን ሰላማዊነት የሚሰብኩት? በዚህ ጽሑፍ ለነዚህ ጥያቄዎች ምላሾችን እንሰጣለን፡፡

የአይ ኤስ አነሳስ

አይ ኤስ ወይም ዳዕሽ የተስፋፋው በሦርያ የተፈጠረው ግጭት እና በኢራቅ ያለው ደካማ የመንግሥት ይዞታ በፈጠረለት ምቹ ሁኔታ እንደነበር ይታወቃል፡፡ ነገር ግን ከዚያ ቀደም ብለው በነበሩት ዓመታት ይህ ድርጅት የአልቃኢዳ ክንፍ ሆኖ በአካባቢው ይንቀሳቀስ ነበር፡፡ አቡ ሙሳብ አል ዛርቃዊ የተሰኘው መሪው በአሜሪካ የአየር ጥቃት በ2006 እንደ ጎርጎሮሳውያኑ አቆጣጠር እስከተገደለበት ጊዜ ድረስ የንፁሃን ወገኖችን አንገት እየቀላ ቪድዮዎችን ያሰራጭ ነበር፡፡ ይህ ኢ-ሰብኣዊ ድርጊት ከኢራቅ ወረራ በኋላ የተቀዛቀዘ ቢሆንም የሽብር ቡድኑ አይ ኤስ በሚል ሥም እንደገና ተመልሶ ከመጣ በኋላ መሰል ቪድዮዎችን በተሻለ ጥራትና በብዛት እየቀረፀ መልቀቁን ተያይዟል፡፡ ከሦርያና ከኢራቅ ባሻገርም በብዙ ሃገራት ንፁሃን ዜጎች ላይ የግፍ ክንዱን አሳርፏል፡፡ የቅርብ ጊዜ ሰለባዎቹ ደግሞ በሊብያ የሚገኙ ክርስቲያን ኢትዮጵያውያን ስደተኞች ሆነዋል፡፡ ከዚህም የተነሳ በሃገሪቱ ላይ ከባድ የኀዘን ድባበድ ሰፍኗል፡፡ የአይ ኤስ መኖር ለዓለም ሕዝብ ይፋ የሆነው ከሦርያ ወደ ኢራቅ በመግባት በአስገራሚ ፍጥነት የኢራቅን ሰራዊት እየበታተነ ብዙ አካባቢዎችን መቆጣጠር በጀመረበት ጊዜ ነበር፡፡ ይህም ውስጥ ለውስጥ ለረጅም ጊዜያት ዝግጅት ሲያደርግ እንደነበርና የጥንካሬ ደረጃውን ካረጋገጠ በኋላ በራሱ ፈቃድ ሀልዎቱን ይፋ ማድረጉን ያመለክታል፡፡ በአካባቢው ሽብርተኛ ድርጅቶች እንደሚንቀሳቀሱ ቢታወቅም ነገር ግን ይህን ያህል ጥንካሬ፣ አደረጃጀትና ትጥቅ ያለው ሽብርተኛ ድርጅት መኖሩ ለምዕራባውያኑ የስለላ ተቋማት እንኳ ሳይቀር ድንገተኛና አስደንጋጭ እንደነበር መረዳት አያዳግትም፡፡ ይህም የቡድኑ አደገኛነት ምን ያህል እንደሆነ አመላካች ነው፡፡

አይ ኤስ እስላማዊ ነውን?

ይህ መልስ የሚሻ የብዙዎች ጥያቄ ነው፡፡ በአጭር ቃል አይ ኤስ እስላማዊ ነው፡፡ አባላቱ በእስልምና ያደጉና ብዙዎቹ እስልምናን በሚገባ ያጠኑ ሙስሊሞች ናቸው፡፡ አቡበከር አል-ባግዳዲ (ኢብራሂም አወድ ኢብራሂም አል በድሪ) የተሰኘው መሪያቸው በእስላማዊ ጥናቶች ከባግዳድ ዩኒቨርሲቲ ፒ.ኤች.ዲ. የተቀበለ ነው፡፡ የኢትዮጵያውያኑን ጭፍጨፋ በሚያሳየው ቪድዮ ውስጥ ሲናገር የሚታየው የሰዑዲ አረብያ ዜግነት እንዳለው የሚነገረው አነስ አል-ነሽዋን (የሚስጥር ሥሙ አቡ ማሊክ አል-ተሚሚ) ደግሞ በሸሪኣ ህግ የማስተርስ ድግሪ ያለው ነው፡፡ እነዚህ ሰዎች እስልምናን የማያውቁ፣ በስሜት የሚነዱ የመንደር ዱርዬዎች አይደሉም፡፡ እነዚህ እስልምናን ጠንቅቀው የሚያውቁ፣ ለእምነታቸው ሲሉ የተሻለውን ኑሯቸውን በመተው ጦርነት ውስጥ የገቡ ሙስሊም ሊቃውንት ናቸው፡፡ ያልተማሩና በአንድ ሰው ስብከት በቀላሉ የሚወሰዱ መሃይማንም አይደሉም፡፡ ብዙዎቹ በምዕራብ ሃገራት ውስጥ ኑሯቸውን የመሰረቱ፣ ፊደል የቆጠሩና ጥሩ ገቢ የነበራቸው ናቸው፡፡ ለምሳሌ ያህል የአይ ኤስ ዋና አራጅ የሆነው መሐመድ ኤምዋዚ (የቅርብ ጓደኛው ለሽብር ተግባር ሲንቀሳቀስ ተይዞ ኢትዮጵያ ውስጥ በእስር ላይ ይገኛል) የኮምፒውተር ሳይንስ ባለሙያና የእንግሊዝ ዜግነት ያለው ሰው ነው፡፡ ስለዚህ እነዚህን ሰዎች እስልምናን የማያውቁ፣ ያልተማሩ ተራ ወሮበሎች አድርጎ መፈረጅ እውነታን የሚፃረር ነው፡፡

አይ ኤስ የሚጠቀሟቸው ቃላት (Vocabulary) እስላማዊ ናቸው፡፡ ደቢቅ የሚለው የመጽሔታቸው ሥያሜ በሦርያ ውስጥ ከሚገኝ የቦታ ሥም የተወሰደ ሲሆን በእስላማዊ ትንቢቶች መሰረት በሙስሊሞችና በክርስቲያኖች መካከል የመጨረሻው ጦርነት ይደረግበታል ተብሎ የተነገረ ቦታ ነው፡፡ አል-ፉርቃን የሚለው የቪድዮ ፕሮዳክሽን ሥያሜ “መመርያ” የሚል ትርጉም ያለው ሲሆን የቁርኣን ሌላኛው መጠርያ ነው፡፡ ቃሉም በቁርኣን ውስጥ ለበርካታ ጊዜያት ተደጋግሞ ተጠቅሷል፡፡ የኢትዮጵያውያን ስደተኞቹን ጨምሮ የእርድ ቪድዮዎችን እየቀረፀ የሚያሰራጨው ይኸው የአይ ኤስ የሚድያ ክንፍ ነው፡፡ የአይ ኤስ ሥያሜ፣ የአባላቱ መጠርያዎች፣ ቅፅል ሥሞቻቸው፣ የዘመቻ ሥያሜዎቻቸው፣ ወዘተ. ሁሉ እስላማዊ ናቸው፡፡ እስላማዊ ያልሆነ ንግግር አይጠቀሙም፡፡ በእርድ ቪድዮዎቻቸው ውስጥ የሚገኙት ንግግሮች ፍፁም እስላማዊ ናቸው፡፡ ለምሳሌ ያህል የኢትዮጵያውያን ክርስቲያኖችን ጭፍጨፋ በሚያሳየው የእርድ ቪድዮ ውስጥ አነስ አል-ነሽዋን (አቡ ማሊክ አል-ተሚሚ) የተሰኘው አሸባሪ የሚከተለውን የዛቻ መልዕክት አስተላልፏል፡፡ መልዕክቶቹ ከቁርአን የተውጣጡ ሲሆኑ አነጋገሩም እስላማዊ ቋንቋን የተላበሰ ነው፡-

“በሁሉም ቦታዎች የሚገኙትን ክርስቲያኖች ኢንሻ አላህ እስላማዊው መንግሥት እንደሚስፋፋ እንነግራቸዋለን፡፡ በምሽጎቻችሁ ውስጥ በደህና ብትቀመጡም እንኳን [እስላማዊ መንግሥት] ያገኛችኋል፡፡ የሚሰልሙ ሰዎች ሰላምን ያገኛሉ፤ የዚሚን ደረጃ የሚቀበሉ ሰዎችም በሰላም ይኖራሉ፡፡ ነገር ግን የኛን መመርያ የማይቀበሉ ሰዎች ከሰይፍ ስለት በስተቀር ከኛ የሚቀበሉት ሌላ ነገር የላቸውም፡፡ ወንዶች ይገደላሉ፤ ሴቶችና ህፃናት ደግሞ ባርያዎች ይሆናሉ እንዲሁም ገንዘቦቻቸው እንደ ጦር ዘረፋ ይወረሳል፡፡ ይህ የአላህና የነቢዩ ትዕዛዝ ነው፡፡ ከፍታ የአላህ ነው፤ እንዲሁም የምዕመናን ነው፡፡ ነገር ግን አስመሳዮች አይገነዘቡም፡፡”

(ዚሚ ከአቅም በላይ የሆነን ግብር (ጂዝያ) እየከፈሉ በእስልምና አገዛዝ ሥር በውርደት የሚኖሩ ክርስቲያኖችና አይሁዶች ናቸው፡፡ ሥርኣቱ ዚማ በመባል የሚታወቅ ሲሆን ሰዎቹ ደግሞ ዚሚ የሚል ስያሜ ተሰጥቷቸዋል፡፡ ይህንን ነጥብ ወደ ኋላ እንመለስበታለን፡፡)

የአይ ኤስ ጥቁሩ ባንዲራ የጥንት ሙስሊሞች በጂሃድ ወቅት የሚጠቀሙት ባንዲራ ነው፡፡ በላዩ ላይም በአረብኛ ተጽፎ የምናየው ሌላ ነገር ሳይሆን ሸሃዳ (የእስልምና የእምነት አቋም) ነው፡፡ “ላ ኢላ ሀኢለላ መሐመደን ረሱልአላህ” (ከአላህ በስተቀር አምላክ የለም መሐመድም መልእክተኛው ናቸው) የሚል ነው፡፡ ይህ የአንድ ሙስሊም የመጀመርያና የመጨረሻ ቃሉ ነው፡፡

አይ ኤስ አለባበሳቸው፣ አመጋገባቸው፣ የጋብቻ ሁኔታቸው፣ ጢም አቆራረጣቸው፣ ሙስሊም ካልሆኑት ሰዎች ጋር ያላቸው መስተጋብር፣ የማህበረሰብ አደረጃጀታቸው፣ ባጠቃላይ የኑሮ ዘይቤያቸው ሁሉ ፍፁም እስላማዊ ነው፡፡ ከእስልምና ጋር የሚጣረስ፣ በመሐመድ ሱና (ምሳሌነት) ያልተረጋገጠ፣ በቁርአንና በሐዲሳት ያልፀደቀ ምንም ነገር የላቸውም፡፡

ለሚያደርጉት ለእያንዳንዱ ነገር ቁርኣንና ሐዲሳትን ጨምሮ እስላማዊ ምንጮችን ይጠቅሳሉ፡፡ የቁርኣንን አተረጓጎም በተመለከተ የሱኒ ነባር ሐታቶችን (Classical Sunni Commentators) ይጠቀማሉ፡፡ ምናልባት እስላማዊ ቃላትን መጠቀማቸውና እስላማዊ የኑሮ ዘይቤዎችን መከተላቸው በራሱ ትክክለኛ ሙስሊሞች ሊያደርጋቸው አይችልም የሚል ሐሳብ ሊነሳ ይችላል፡፡ ይህ አባባል የተወሰነ እውነታነት አለው፡፡ የእነዚህ ሰዎች ድርጊቶች በእስላማዊ የመመርያ መጻሕፍት መደገፋቸው እስካልተረጋገጠ ድረስ ትክክለኛ ሙስሊሞች ናቸው ብሎ መናገር አዳጋች ነው፡፡ ነገር ግን እነዚህ ሰዎች የሚፈፅሟቸው ነገሮች ሁሉ ፍፁም እስላማዊ መሆናቸውን ቁርኣንና ሌሎች እስላማዊ ምንጮችን ያነበበ ሰው ሁሉ የሚያውቀው እውነታ ነው፡፡ ከእስልምና የወጣ ምንም ነገር አላደረጉም፡፡ ነገር ግን ችግሩ ብዙ ሰዎች ስለ እስልምና ያላቸው መረጃ በመገናኛ ብዙኃን በሚነገሩ ፖለቲካዊ ትክክለኝነትን (Political Correctness) በተከተሉ ንግግሮችና ሙስሊም አቃቤ እምነታውያን በሚናገሯቸው የተቀመሙ ንግግሮች ላይ የተመሰረተ መሆኑ ነው፡፡ በዚህ ብዙ ድምፆች ውዥንብሮችን በሚፈጥሩበት ዘመን ዋናዎቹን ምንጮችና የእምነቱን መስራች የመሐመድን ሕይወት ካላጠናን በስተቀር የእስልምናን ትክክለኛ ገፅታ ማወቅ ቀላል አይሆንም፡፡ የሚፈፀሙ የሽብር ጥቃቶችንም የእምነቱን ሽፋን በመጠቀም የተወሰኑ የግል ጥቅም አሳዳጆች ወይንም እምነቱን በተሳሳተ መንገድ የተረዱ ሰዎች እንደሚፈፅሙት የውንብድና ተግባር ልንቆጥር እንችላለን፡፡ ይብዛም ይነስም እንዲህ ዓይነት ሰዎች በሁሉም እምነቶች ውስጥ እንደሚገኙ ይታመናልና፡፡

ዛሬ አንድ ክርስቲያን ተነስቶ በእምነቱ ሥም የሽብር ተግባር ቢፈፅም ድርጊቱ ክርስቲያናዊ አለመሆኑን መጽሐፍ ቅዱስን በመጥቀስ ማስረዳት እንችላለን፡፡ ለድርጊቱ ማፅደቅያ ደግሞ የመጽሐፍ ቅዱስን ጥቅሶች ቢጠቅስ ከአውድ ውጪ እንደጠቀሰና በተሳሳተ መንገድ እንደተረጎመ በማስረዳት ልናርመው እንችላለን፡፡ የእምነታችን ጀማሪና ፈጻሚ የሆነው ጌታችን ኢየሱስ ክርስቶስ እንዲህ የሚል የማያወላዳ ትዕዛዝ ሰጥቶናልና፡- “ባልንጀራህን ውደድ ጠላትህንም ጥላ እንደ ተባለ ሰምታችኋል። እኔ ግን እላችኋለሁ፥ በሰማያት ላለ አባታችሁ ልጆች ትሆኑ ዘንድ ጠላቶቻችሁን ውደዱ፥ የሚረግሙአችሁንም መርቁ፥ ለሚጠሉአችሁም መልካም አድርጉ፥ ስለሚያሳድዱአችሁም ጸልዩ፤ እርሱ በክፎዎችና በበጎዎች ላይ ፀሐይን ያወጣልና፥ በጻድቃንና በኃጢአተኞችም ላይ ዝናቡን ያዘንባልና። የሚወዱአችሁን ብትወዱ ምን ዋጋ አላችሁ? ቀራጮችስ ያንኑ ያደርጉ የለምን? ወንድሞቻችሁንም ብቻ እጅ ብትነሡ ምን ብልጫ ታደርጋላችሁ? አሕዛብስ ያንኑ ያደርጉ የለምን? እንግዲህ የሰማዩ አባታችሁ ፍጹም እንደ ሆነ እናንተ ፍጹማን ሁኑ።” ማቴዎስ 5፡43-48

አንድ ክርስቲያን ከዚህ የጌታችን የኢየሱስ ክርስቶስ ትዕዛዝ በማፈንገጥ የሽብር ድርጊቶችን ቢፈፅም በክርስቲያኖች ዘንድ በፅኑ ይወገዛል፡፡ ክርስቲያን ተብሎም ሊጠራ አይችልም፡፡ በእስልምና ግን እንዲህ አይደለም፡፡ እውነተኛና ትክክለኛ የመሐመድ እስልምና አይ ኤስን በመሳሰሉት የጥላቻ ቡድኖች እየተተገበረ የሚገኘው እንጂ በተከሸኑ ቃላት ተሽሞንሙኖ በሚድያዎች፣ በፖለቲከኞችና በሙስሊም አቃቤ እምነታውያን የሚሰበከው “ክርስትና የተነሳ” እስልምና አይደለም፡፡ ቁርኣንና የመሐመድን ግለ ታሪክ ቀረብ ብለን ብንመለከት መሐመድ በአይ ኤሶች “እንደተሠገወ” እና በዘመናችን “እንደተገለጠ” ማስተዋል እንችላለን፡፡ በአል-አዝሃር ዩኒቨርሲቲ የእስልምና ታሪክ ፕሮፌሰር የነበሩትና እስልምናን በመተው ክርስትናን የተቀበሉት ማርክ ገብርኤል (በቀድሞ ሥማቸው ሙስጠፋ) የቁርኣንን አስተምህሮና የእስልምናን ታሪክ በተመለከተ የሚከተለውን ይላሉ፡-

“በቁርአን ውስጥ የተገለጠው አምላክ፣ አላህ አፍቃሪ አባት አይደለም፡፡ ሰዎችን በተሳሳተ መንገድ መምራት ይፈልጋል (ሱራ 6፡39፣ 126)፡፡ በእርሱ ወደ ተሳሳተ መንገድ የተመሩትን አይረዳቸውም (ሱራ 30፡29)፡፡ ገሃነምንም ለመሙላት ይጠቀምባቸዋል (ሱራ 32፡13)፡፡ እስልምና በሴቶች ላይ፣ ሙስሊም ባልሆኑት ላይ፣ በክርስቲያኖች ላይ እና በተለይም ደግሞ በአይሁዶች ላይ አድሎን በማድረግ የተሞላ ነው፡፡ ጥላቻ የኃይማኖቱ አካል ነው፡፡ የእኔ ልዩ የጥናት መስክ የሆነው የእስልምና ታሪክ የደም ወንዝ በመባል ብቻ ነው ሊገለፅ የሚችለው፡፡”[1]

ዛፍና ፍሬው

ሙስሊም ሽብርተኞች በዓለም ዙርያ የሚፈፅሟቸውን ፀረ ሰላም ድርጊቶች በመጥቀስ እስልምና የሰላም ሃይማኖት አለመሆኑን ስንናገር “የአንድ ሃይማኖት ተከታዮች በሃይማኖታቸው ይለካሉ እንጂ ሃይማኖት በተከታዮቹ አይለካም” የሚል አባባል በተደጋጋሚ ይጠቀስልናል፡፡ ይህ አባባል ከፊል እውነትን እንጂ ሙሉ እውነትን ያዘለ አይደለም፡፡ በክርስትና ታሪክ ውስጥ እንደሆነውና ዛሬም አልፎ አልፎ እንደሚታየው አንዳንድ የእምነቱ ተከታዮች የነውጠኝነት ድርጊቶችን ቢፈፅሙ እነዚህን ሰዎች በእምነቱ መለካት ይኖርብናል እንጂ እምነቱን በነዚህ ሰዎች መለካት የለብንም፡፡ እስልምናም ቢሆን እንደ ክርስትና ዓይነት አልፎ አልፎ ብቻ የሚታዩ የነውጠኝነት ታሪኮች ቢኖሩት ኖሮ አባባሉ ይሰራል ነበር፡፡ ነገር ግን ይህ አባባል ለእስልምና ለምን እንደማይሰራ ከማየታችን በፊት ክርስትናን በተመለከተ ሙስሊሞች ብዙ ጊዜ የሚጠቅሷቸውን ሁለት ጉዳዮች ግልፅ አድርገን እንለፍ፡፡

ሙስሊም ወገኖች ብዙ ጊዜ በመካከለኛው ዘመን በአውሮፓ ታሪኮች ውስጥ የተፈፀሙትን የመስቀል ጦርነቶች (ክሩሴድ) በመጥቀስ የክርስትናን ሰላማዊነት አጠያያቂ ለማድረግና ከእስልምና ጋር ለማነፃፀር ይሞክራሉ፡፡ ክሩሴዶች እንዴት ተጀመሩ የሚለውን ወደ ኋላ መለስ ብለን ብናጠና ግን ሃቁ ይገለጥልናል፡፡ ለክሩሴዶች መቀስቀስ ምክንያት የሆኑት የሙስሊም ወራሪ ኃይላት እንጂ ክርስቲያኖች አልነበሩም፡፡ ዛሬ እስልምና ተደላድሎ የተቀመጠባቸውን የመካከለኛው ምስራቅና የሰሜን አፍሪካ ሃገራትን ስንመለከት የክርስቲያን ሃገራት የነበሩና በእስላም ወራሪ ኃይላት ተደምስሰው የክርስትና ታሪካቸው እንዲጠፋ የተደረገ መሆኑን መረዳት እንችላለን፡፡ ለዚህ ደግሞ ዛሬም ድረስ የሚታዩት የጥንታውያን አብያተ ክርስቲያናት ፍርስራሾችና ከብዙ የግፍ ስራዎች በእግዚአብሔር ተዓምር ድነው ክርስትናቸውን ጠብቀው የሚገኙት ቅሬታዎች ምስክሮች ናቸው፡፡ ሙስሊሞች እነዚህን ሃገራት ያሰለሙት በሰይፋቸው እንጂ በመጽሐፋቸው አልነበረም፡፡ እስፔን ድረስ በመዝለቅ ጎሮሯቸው ላይ ሰይፉን ያስቀመጠውን ይህንን እስላማዊ የጂሃድ ወረራ ለመቋቋም እና ልክ እንደ ዛሬዎቹ የአይ ኤስ ወታደሮች ጨካኝ በነበሩት ጂሃዲስቶች እጅ ለወደቁት የመካከለኛው ምስራቅ ክርስቲያን ወንድሞቻቸው የድረሱልን ጥሪ ጩኸት ምላሽ ለመስጠት የነበራቸው አማራጭ ኃይልን መጠቀም እንደነበረ ስለተሰማቸው የአውሮፓ ክርስቲያኖች የጦርነት ዘመቻዎችን በማድረግ ምላሽ ሰጡ፡፡ ነገር ግን ክርስቲያኖች በዚያ የታሪክ አጋጣሚ የተፈጠረውንና በክርስትና ላይ ጥቁር ጠባሳን ጥሎ ያለፈውን ድርጊት ሲያስቡ ዛሬም ድረስ ይፀፀታሉ፡፡ የአውሮፓ ቤተ ክርስቲያንም በተደጋጋሚም ይቅርታ ጠይቃለች፡፡ ሙስሊሞች ግን አንድም ጊዜ ለይቅርታ ጥያቄው ዕውቅና ሰጥተው አያውቁም፡፡ የጦርነቱ ቀስቃሾችና አሸናፊዎች እነርሱ ሆነው ሳሉ ነገሩ ከተፈፀመ ከአያሌ ምዕተ ዓመታት በኋላም ቢሆን ያነሱታል፡፡ የክርስቲያኖች የይቅርታ ጥያቄ የመነጨው ሰይፍን መጠቀም ከክርስቶስ ትምህርት ጋር የሚጣረስ መሆኑን ከማመን እንጂ እነርሱ የፈፀሙት በደል ሙስሊሞች ከ7ኛው ክፍለ ዘመን ጀምሮ በክርስቲያኖች ላይ ከፈፀሙት በደል ጋር የሚነፃፀር ሆኖ አይደለም፡፡ ቢሆንም ግን ሰይፍ የክርስቶስ ትምህርት ባለመሆኑ የክርስቶስ ቤተ ክርስቲያን በታሪክ አጋጣሚ እንደዚያ ዓይነት መንፈሳዊ ዝቅጠት ውስጥ መግባቷ በእጅጉ የሚያሳዝን ነው፡፡ ሌላው ሙስሊሞች ክርስትናን ወደ እስልምና ደረጃ ለማውረድ የሚጠቀሙት ምሳሌ ሂትለር በአይሁዶች ላይ የፈፀመውን ግፍ ነው፡፡ በርግጥ ሂትለር ለእኩይ ተግባሩ የቤተ ክርስቲያንን ድጋፍ ለማግኘት ጥረት አድርጓል፡፡ “ማይን ካምፍ” በሚለው መጽሐፉም ውስጥ የሚያደርገውን ሁሉ የሚያደርገው “ለጌታ” ብሎ መሆኑን ተናግሯል፡፡ ነገር ግን ሂትለር ጥንታዊውን የአርያኖች አረማዊ (Pagan) እምነት የሚከተል እንጂ ክርስቲያን ስላልነበረ ልክ እንደዘመኑ ዲፕሎማቶች በጽሑፉ ውስጥ አሳሳች ምልከታ የሚሰጡ ቃላትን በመጠቀም ራሱን ክርስቲያን ለማስመሰል ሞክሯል፡፡ የሚገርመው ነገር ግን ሂትለር ክርስትናን ለጀርመናውያን “ውድቀት” ተጠያቂ በማድረግ እስልምናንና መሐመድን እያሞካሸ የተናገረባቸው ጊዜያት መኖራቸው ነው፡፡ በአንድ ወቅት “የእስላም ህዝቦች ከፈረንሳይ ህዝብ ይልቅ ለኛ (ለናዚዎች) መቼም ቢሆን ቅርበት አላቸው” በማለት ተናግሮ ነበር፡፡[2] ጀርመኖች የክርስትናን የፍቅር መንገድ ከመከተል ይልቅ የእስልምናን የጦረኝነት መንገድ ቢከተሉ ኖሮ ለእነርሱ የተሻለ እንደነበርም በቁጭት ተናግሯል፡፡ ሙስሊሞች የታውርስን ጦርነት ቢያሸንፉና አውሮፓን ቢያሰልሙ ኖሮ የተሻለ እንደነበርም ተናግሯል፡፡ በሂትለር ግምት መሰረት አረቦች የአውሮፓን የአየር ፀባይ መቋቋም ስለማይችሉ ሰፊውን የእስልምና ግዛተ ዓለም የመቆጣጠር እድሉ የጀርመኖች ይሆን ነበር፡፡[3] የሂትለር “ማይን ካምፍ” በ1930 ዓ.ም. “የኔ ጂሃድ” በሚል ርዕስ ወደ አረብኛ የተተረጎመ ሲሆን በአሁኑ ወቅት በአረቡ ዓለም ውስጥ በምርጥ ሽያጭነት 6ኛ ደረጃ ላይ እንደሚገኝ መረጃዎች ያሳያሉ፡፡ ሂትለር በሚስጥር እስልምናን ተቀብሎስ እንደሆን ማን ያውቃል? ሂትለር አይሁዶችን ለማጥፋት ሞክሯል፡፡ ሙስሊሞች ደግሞ አንድ ቀን በአላህ እርዳታ አይሁዶችን ሁሉ እንደሚያጠፉ ተስፋ ያደርጋሉ፡፡ ይህ ማለት የእስልምና ትንቢቶች እውነት ከሆኑ እስልምና እያንዳንዱን ሙስሊም እጩ ሂትለር አድርጓል ማለት ነው፡፡

“የአንድ ሃይመኖት ተከታዮች በሃይማኖታቸው ይለካሉ እንጂ ሃይማኖት በተከታዮቹ አይለካም” የሚለውን አባባል እየተመለከትን ነው፡፡ ይህ አባባል ክርስትና ካሳለፋቸው ውሱን የነውጠኝነት ታሪኮች አኳያ ሲታይ በሚገባ ይሰራል፡፡ ነገር ግን ከእስልምና አንፃር አይሰራም፡፡ እስኪ እንዲህ ብላችሁ አስቡ፡፡ በዓለም ዙርያ የሚገኙ 85 ከመቶ በላይ ክብርን የማስጠበቅ ግድያዎች (Honour Killings) በአንድ የሃይማኖት ቡድን አባላት የሚፈፀሙ ቢሆኑ፤ 90 ከመቶ በላይ ሰዎችን የማረድ ተግባራት እና ሰዎች ሲታረዱ የሚያሳዩ ቪድዮዎችን ሆን ብሎ ቀድቶ የማሰራጨትን መቶ ከመቶ ድርሻ የሚወስዱት የዚሁ እምነት አባላት ቢሆኑ፤ እንዲሁም የአጥፍቶ መጥፋት የቦምብ ጥቃቶች መቶ በመቶ የሚፈፀሙት በዚሁ በአንዱ ሃይማኖት ተከታዮች ሆኖ ቢገኝ የዚያን ሃይማኖት ትምህርት ሰላማዊነት ከመጠራጠር አልፈን ሰላማዊ አለመሆኑን አፋችንን ሞልተን ብንናገር ከእብለት ሊቆጠር ይገባል ትላላችሁ? ድምዳሜያችንስ ምክንያታዊ አይደለም ሊባል ይችላል? እነዚህ ሁሉ የእስልምና ገንዘቦች ናቸውና በፍፁም አይችልም፡፡ ጌታችን ኢየሱስ ክርስቶስ በማቴዎስ ወንጌል 7፡15-20 ላይ እንዲህ የሚል መርህ አስቀምጦልናል፡-

“የበግ ለምድ ለብሰው ከሚመጡባችሁ በውሥጣቸው ግን ነጣቂዎች ተኵላዎች ከሆኑ ከሐሰተኞች ነቢያት ተጠንቀቁ። ከፍሬያቸው ታውቋቸዋላችሁ። ከእሾህ ወይን ከኩርንችትስ በለስ ይለቀማልን? እንዲሁ መልካም ዛፍ ሁሉ መልካም ፍሬ ያደርጋል፥ ክፉም ዛፍ ክፉ ፍሬ ያደርጋል። መልካም ዛፍ ክፉ ፍሬ ማፍራት፥ ወይም ክፉ ዛፍ መልካም ፍሬ ማፍራት አይቻለውም። መልካም ፍሬ የማያደርግ ዛፍ ሁሉ ይቆረጣል ወደ እሳትም ይጣላል። ስለዚህም ከፍሬያቸው ታውቋቸዋላችሁ።”

እንግዲህ በዚህ የጌታችን መርህ መሰረት እስልምና ምንም ይበል ምን በዘመናት መካከል ካፈራቸው መራራና ገዳይ ፍሬዎቹ በመነሳት መሰረቱ ሐሰትና ፀረ-ሰላም መሆኑን መስራቹም ከእግዚአብሔር ያልተላከና ሐሰትን ያስተማረ መሆኑን መደምደም እንችላለን፡፡ የኩርንችት ዘር በብርትኳን ቅጠል ተጠቅልሎ ስለተቀበረ የብርቱኳንን ፍሬ የሚያፈራ ዛፍ ወደመሆን ማደግ እንደማይችል ሁሉ ሐሰተኛ ነቢያት የሚያስተምሩት ትምህርትም ምንም ያህል ለጆሮ የሚጣፍጥና በጥሩ ቃላት የተቀመመ ቢሆን መልካም ፍሬን ማፍራት አይቻለውም፡፡ አይ ኤስና ሌሎች እስላማዊ የሽብር ቡድኖች ሁሉ የእስልምና ፍሬዎች ናቸው፡፡ ስለዚህ የእስልምና ትምህርት ባህሪ ማሳያዎች ናቸው፡፡ ነገር ግን ሙስሊሞች፣ ይልቁኑ የዚህ “የሰላም ሃይማኖት” ኢ-ሰላማዊነት እና ፃዕረ ሞት ገፅታ በግልፅ እየታየ ባለበት በዚህ ወቅት እነዚህ ቡድኖች እስላማዊ አለመሆናቸውንና እስልምናም የሰላም ሃይማኖት መሆኑን እየሰበኩ ይገኛሉ፡፡ እስልምና የሰላም ሃይማኖት መሆኑንም ለማሳየት ከቁርኣን ውስጥ የተወሰኑ ጥቅሶችን ከታሪካዊና ምንባባዊ አውዳቸው ውጪ በመጥቀስ ሊያሳምኑን ይሞክራሉ፡፡ አሳዛኙ ነገር ብዙ ሰዎች በነዚህ ከንቱ ስብከቶች ተታልለው የእስልምናን ፀረ ሰላም መሆን መጠራጠራቸው ነው፡፡ ሙስሊሞች የእስልምናን ሰላማዊነት ለማስረዳት በተደጋጋሚ የሚጠቅሷቸው ሁለት ጥቅሶች አሉ፡፡ የመጀመርያው ሱራ 2፡256 ላይ የሚገኘው ነው

“በሃይማኖት ማስገደድ የለም፡፡ ቅኑ መንገድ ከጠማማው በእርግጥ ተገለጠ፡፡”

ይህ ጥቅስ ቁርአንን የማያነበውንና የእስልምናን ታሪክና አስተምህሮ በወጉ የማያውቀውን ህዝብ ለማደናገር በእጅጉ እያገለገለ ይገኛል፡፡ ነገር ግን የቁርኣን ሐታቾች እንደሚናገሩት ይህ ጥቅስ ጊዜው አልፎበታል፡፡ እስልምና “ናሲክ” የሚባል አስተምህሮ አለው፡፡ “ናሲክ” መሻር የሚል ትርጉም ያለው የአረብኛ ቃል ሲሆን በዚህ አስተምህሮ መሰረት ሁለት እርስ በርሳቸው የሚጣረሱ የቁርኣን ጥቅሶች ቢኖሩ የኋለኛው የፊተኛውን ይሽረዋል፡፡ ይህንን በተመለከተ ኢብን ከሢር የተሰኘ ትልቅ ተቀባይነት ያለው የሱኒ ሐታች የጥቅሱን ትክክለኛ ትርጉም፤ ማለትም ሰዎች እምነታቸውን እንዲቀይሩ ማስገደድ አስፈላጊ አለመሆኑን እንደሚናገር ካብራራ በኋላ እንዲህ ይላል፡- “… ነገር ግን ይህ ጥቅስ በውጊያ ጥቅሶች ተሽሯል ስለዚህ ሁሉም የዓለም ህዝቦች ወደ እስልምና እንዲመጡ ጥሪ ሊደረግላቸው ይገባል፡፡ ማናቸውም ሰዎች ያንን ለማድረግ ፍቃደኛ የማይሆኑ ከሆነ ወይም ጂዝያን ለመክፈል እምቢ የሚሉ ከሆነ እስኪገደሉ ድረስ ውጊያ ሊደረግባቸው ይገባል…”[4]

አይ ኤስ ክርስቲያን ኢትዮጵያውኑ የተገደሉበትን ምክንያት ሲገልፅ ጂዝያን ለመክፈል ፍቃደኞች ባለመሆናቸው ይህ ፍርድ እንደተላለፈባቸው ተናግሯል፡፡ ሌሎች ብዙ ሙስሊም ሐታቾች ይህ ጥቅስ በኋለኞቹ መገለጦች መሻሩን ይገልፃሉ፡፡ ስለዚህ ጥቅሱ “ካፊሮችን” ከማደናገር የዘለለ ጥቅም የለውም፡፡

ሙስሊሞች እስልምና የሰላም ሃይማኖት መሆኑን ለማሳየት የሚጠቅሱት ሌላው ጥቅስ ሱራ 5፡32 ላይ የሚገኘው “ያለ ነፍስ (መግደል) ወይም በምድር ላይ ያለማጥፋት (ካልሆነ በስተቀር) ነፍስን የገደለ ሰው ሰዎቹን ሁሉ እንደገደለ ነው፤ ሕያው ያደረጋትም ሰው ሰዎቹን ሁሉ ሕያው እንዳደረገ ነው” የሚለው ነው፡፡ ነገር ግን ሙስሊሞች ይህንን ጥቅስ ከአውድ ውጪ ነው የሚጠቅሱት፡፡ ሙሉ አውዱ እንዲህ ይላል፡- “በዚህ ምክንያት በእስራኤል ልጆች ላይ እነሆ ያለ ነፍስ (መግደል) ወይም በምድር ላይ ያለማጥፋት (ካልሆነ በስተቀር) ነፍስን የገደለ ሰው ሰዎቹን ሁሉ እንደገደለ ነው፤ ሕያው ያደረጋትም ሰው ሰዎቹን ሁሉ ሕያው እንዳደረገ ነው ማለትን ጻፍን፡፡ መልክተኞቻችንም በግልጽ ተዓምራት በእርግጥ መጡዋቸው፡፡ ከዚያም ከዚህ በኋላ ከእነሱ ብዙዎቹ በምድር ላይ ወሰንን አላፊዎች ናቸው፡፡”

የቁርኣን ጸሐፊ ይህንን ሐሳብ የቀዳው ከአይሁድ መጻሕፍት ላይ ነው፡፡ ጥቅሱ የሚናገረው ይህ ትዕዛዝ የተሰጠው ለእስራኤላውያን መሆኑን ነው፡፡ ለሙስሊሞች ደግሞ ምን ዓይነት ትዕዛዝ እንደተሰጠ ቀጣዩ አንቀፅ ይናገራል፡- “የእነዚያ አላህንና መልክተኛውን የሚዋጉ በምድርም ላይ ለማጥፋት የሚተጉ ሰዎች ቅጣት መገደል ወይም መሰቀል ወይም እጆቻቸውንና እግሮቻቸውን በማፈራረቅ መቆረጥ ወይም ከአገር መባረር ነው፡፡ ይህ በነሱ በቅርቢቱ ዓለም ውርደት ነው፡፡ በመጨረሻይቱም ለእነርሱ ከባድ ቅጣት አላቸው፡፡” ሱራ 5፡35

ቀደም ሲል የተጠቀሰው በጎ ትዕዛዝ የተሰጠው ለእስራኤላውያን ሲሆን በማስከተል የተቀመጠው የጭካኔ ትዕዛዝ ደግሞ ለሙስሊሞች የተሰጠ መሆኑን እናያለን፡፡ አላህንና መልክተኛውን መዋጋት ማለት በእስላማዊ አተረጓጎም መሰረት ማንኛውንም ቁርኣንንና እስላማዊ ህግጋትን መፃረር እንዲሁም የመሐመድን ነቢይነት አለመቀበል ማለት ነው፡፡ “በምድር ላይ ማጥፋት” ደግሞ ለሙስሊም ማህበረሰብ እንቅፋት የሚሆን ማንኛውንም ነገር ማድረግን ያመለክታል፡፡ ይህም ደግሞ ወንጌልን መስበክን ያጠቃልላል፡፡ ስለዚህ “ሂዱና ወንጌልን ለፍጥረት ሁሉ ስበኩ” የሚለውን የጌታን ትዕዛዝ በሸሪኣ ህግ በሚተዳደር የሙስሊም ማህበረሰብ መካከል የምትተገብሩ ከሆነ በሸሪኣ ህግ መሰረት ቅጣቱ በጥቅሱ ውስጥ የተዘረዘረው ነው፡፡

“ጅብ እስኪይዝ ያነክሳል” እንደሚለው የሃገራችን ብሒል እስልምናም እነዚህን የመሳሰሉ ጥቅሶችን በመጠቃቀስ ምቹ ጊዜ እስኪመጣለት ድረስ ይሸነግላል፡፡ የበላይ መሆኑን ካረጋገጠ በኋላ ግን ትክክለኛ ገፅታውን ያሳያል፡፡ በመታረድና ለእርሱ በመገዛት መካከል ምርጫ ይሰጣችኋል፡፡ በመስለም ወይንም የተዋረዳችሁ ሆናችሁ ጂዝያን በመክፈል ትገዛላችሁ አለበለዝያ ሰይፍ ይጠብቃችኋል፡፡ ሦስተኛ አማራጭ የለም፡፡ ትገዛላችሁ አልያም ልክ እንደ ሰላሳዎቹ ሰማዕታት አንገታችሁን በካራ ትገዘገዛላችሁ፡፡ ወደ ትክክለኛው እስልምና (አይ ኤስ) እንኳን በደህና መጣችሁ! በእስልምናና በአይ ኤስ መካከል ልዩነት አለ ብሎ ማመን ራስን ማታለል ነው፡፡
I love ethiopia
ጎነጠ
ኮትኳች
ኮትኳች
 
Posts: 103
Joined: Wed Aug 03, 2005 9:07 am
Location: ethiopia

Re: አይ ኤስ እስልምናን ይወክላልን?

Postby እሰፋ ማሩ » Tue May 02, 2017 10:11 pm

ጎነጠ
በጣም ትምህርታዊ ቅንብር ነው ያቀረብክልን፡፡እኔ ደግሞ ባለፈው CNN በበጎነት ያቀረበቻለው successor የሚል ርእስ ያለው ዝጅግት ምን ያህል እምነቱ በሰይፍ እንዳደገ የሚያሳየውን ከክርስቶስ ትምህርት ሰይፍ የሚያነሰ በሰይፍ ይጠፋል ከሚለው እንደሚለይ የሚያሳየውን አቅርቤያለሁ፡፡
https://www.youtube.com/watch?v=P3O9d7PsI48
እሰፋ ማሩ
ውሃ አጠጪ
ውሃ አጠጪ
 
Posts: 1266
Joined: Mon Sep 12, 2016 8:47 pm

Re: አይ ኤስ እስልምናን ይወክላልን?

Postby humaidi » Wed May 03, 2017 2:06 am

አሰፋ ማሩ አንገት አንገቱን እያለን የምንደመሰሰውን አይሰስ የተባለውን ድርጀት በቅርቡ ከወዳጆቻን ጋር ተባብረን ከገባበት ምሸግ እያወጣን እንደሸቀዋለን ! አንተና ጎነጠ የአይሰሰ ሙፍቲዎች በለው ልክ ነህ እያላችሁ የምታጨበጭቡት ጊዚያችሁ ሲደረስ ለወያኖ አሰርክበን እንዲቀጣችሁ እናደርጋለን !!!!! ከወያኔ ጋር ወደፊት !!!!

እሰፋ ማሩ wrote:ጎነጠ
በጣም ትምህርታዊ ቅንብር ነው ያቀረብክልን፡፡እኔ ደግሞ ባለፈው CNN በበጎነት ያቀረበቻለው successor የሚል ርእስ ያለው ዝጅግት ምን ያህል እምነቱ በሰይፍ እንዳደገ የሚያሳየውን ከክርስቶስ ትምህርት ሰይፍ የሚያነሰ በሰይፍ ይጠፋል ከሚለው እንደሚለይ የሚያሳየውን አቅርቤያለሁ፡፡
https://www.youtube.com/watch?v=P3O9d7PsI48
humaidi
ዋና ውሃ አጠጪ
ዋና ውሃ አጠጪ
 
Posts: 1741
Joined: Tue Jan 03, 2006 11:50 am

Re: አይ ኤስ እስልምናን ይወክላልን?

Postby ክቡራን » Wed May 03, 2017 12:44 pm

አቶ ጎነጠ፡ አይ ኤስ እስልምናን ይወክላል ብሎ መጠየቅ በራሱ ስህተት ያለብት ይመስለኛል እስልምና ሌላ አይ ኤስ ሌላ!! እነዚህ የእስልምናን ጭንብል ለብሰው እምነቱ በሰው ዘር እንዲጠላ የሚያደርጉ እንኩዋን ለክርስቲያኑ ለስላሙም የማይመለሱ አረመኔዎች ናቸው ፡፡ አንዱ የአይሲስ አባል የወለደችውን እናቱን እባክህ ልጄ ተው ይሄ የአላህ መንገድ እይደለም ስላለቸው ባደባባይ በሰው ፊት የገደላት ታሪክ ያላቸው አረመኔዎች ናቸው፡፡ እንዴት ነው አይሲስ እስልምናን የሚወክለው ?? እዚህ ዋርካ ውስጥ ሰፋ ያለ ሃይማኖታዊ ጽሁፍ የሚጽፍ አንድ ወዳጅ ዋርካ አላት፡፡ የጽሁፍ አወራረዳችሁ በጣም ይመሳሰላል፡፡ አንዳንድ ሰው እኮ ጥሎበት በመልክም በጽሁፍም ይመሳሰላል..ሎል
ክቡራን
ዋና አለቃ
ዋና አለቃ
 
Posts: 7709
Joined: Tue Mar 04, 2008 4:24 pm

Re: አይ ኤስ እስልምናን ይወክላልን?

Postby ዘርዐይ ደረስ » Sat May 06, 2017 9:49 pm

እዚህ ላይ ክቡራን ባለው እስማማለሁ::ጎነጠ እና ዲጎኔ የሰጣችሁትን አስተያየት ሙሉ በሙሉ ለመቀበል ይከብደኛል::በእርግጥ ዳዒሽም ሆነ ሌሎች መሰል የእስልምናን ሃይማኖት እንደ ርዕዮት ዓለማቸው የሚጠቀሙ አክራሪ ድርጅቶች ሙስሊም ናቸው አይደሉም ለማለት የሚችሉት የሃይማኖቱ አዋቂዎችና መሪዎች ይመስሉኛል::በተረፈ የምዕራባዊያን የዜና ማሰራጫዎችና መጻሕፍትን ብቻ ሳይሆን በሙስሊሙ ዓለም በኩል ያለውንም ማየቱ አይከፋም::ለምሳሌም ከአሕመዲን ጀበል መጻሕፍት በተጨማሪ በሰብሪ ኢድሪስ የተጻፈውን ‚የኢስላም ትክክለኛ ገጽታን ለመገንዘብ‘ የሚለውን መጽሐፍ ማንበቡ ሳይጠቅም አይቀርም::
''ፍምን እፍ ብትላት ትነዳለች ትፍም ብትልባት ትጠፋለች ሁለቱም ሁሉ ከአንድ አፍ ይወጣሉ ::''መጽሐፈ ሲራክ 28:12
ዘርዐይ ደረስ
ዋና ኮትኳች
ዋና ኮትኳች
 
Posts: 915
Joined: Sat Oct 23, 2004 3:52 am
Location: ethiopia

Re: አይ ኤስ እስልምናን ይወክላልን?

Postby እሰፋ ማሩ » Fri Nov 03, 2017 12:20 pm

የ አይ ኤስን ትእዛዝ በተቀበለ ሽብርተኛ በኒዮርክ በደረሰው የሽብር ጥቃት 8 ሰዎች ሞቱ
(ኢሳት ዜና–ጥቅምት 22/2010) በኒዮርክ ትላንት አንድ ግለሰብ የእቃ መጫኛ መኪናን በመጠቀም ባደረሰው ጥቃት ስምንት ሰዎች ሲሞቱ ከ10 በላይ ቆሰሉ።
የሽብር ጥቃት ነው በተባለው በዚህ አደጋ ህይወታቸውን ካጡት መካከል ለጉብኝት የመጡ አምስት አርጀንቲናውያን ጓደኛሞች እንደሚገኙበት ታውቋል።
ጥቃቱን የፈጸመው የ29 አመቱ ኡዝቤክስታናዊ ከፖሊስ በተተኮሰ ጥይት ቆስሎ ወደ ሆስፒታል ተወስዷል።የትላንቱን የኒዮርክ ጥቃት የ29 አመቱ የኡዝቤክስታን ተወላጅ የተከራየውን የእቃ መጫኛ መኪና ሰዎች በቢስኪሌት በሚጓዙበት መንገድ ላይ በፍጥነት አብርሮ ሲነዳ በወቅቱ በቢስኪሌትና በእግር ሲጓዙ የነበሩ ሰዎችን ደፍጥጦ ከገደለና ካቆሰለ በኋላ ከተማሪዎች መጓጓዣ አውቶቡስ አጋጭቶ ማቆሙ ተሰምቷል።በዚህም የ8 ሰዎች ህይወት ሲያልፍ 10 ሰዎች ደግሞ ቆስለዋል። የኒውጀርሲ ነዋሪ የሆነው የኡዝቤኪስታን ተወላጁ ሳይፋሎ ሳይፓቭ ጥቃቱን ከፈጸመ በኋላ አላህ አክበር እያለ ከመኪናው በመውረድ በያዘው ሁለት የውሸት ሽጉጦች በአካባቢው ያሉትን ሰዎችና ፖሊሶችን ሲያስፈራራ ቢቆይም የበስተኋላ ግን ከአንድ የኒዩርክ ፖሊስ በተተኮሰ ጥይት ተመቶ ወድቋል።ግለሰቡ ሆዱ ላይ በጥይት ተመቶ በመቁሰሉም ወደ ሆስፒታል ተወስዷል።እንደ አውሮፓውያኑ አቆጣጠር በ2010 ወደ አሜሪካ የመጣው ሳይፋሎ ሳይፓቭ ጥቃቱን የፈጸመው በአይ ሲ ስ ስም መሆኑን መኪናው አቅራቢያ በተወው የማስታወሻ ወረቀት ለማወቅ ተችሏል።የኒዮርክ ከተማ ከንቲባ ቢል ዲብላሲዮ ድርጊቱን በሰላማዊ ሰዎች ላይ ያነጣጠረ የሽብር ጥቃት ሲሉ ኮንነውታል።የጸጥታ ባለስልጣናት በሽብር ጥቃትነት የተመዘገበውን ይህን ድርጊት በመመርመር ላይ መሆናቸውን አስታውቀዋል።የእቃ መጫኛ መኪና ለሽብር ጥቃት ሲውል ከለንደንና ከፈረንሳይ በኋላ የኒዮርኩ ለሶስተኛ ጊዜ ሲሆን ጥቃቱ ከ16 አመት በፊት በመንታ ሕንጻዎች ላይ በሁለት አውሮፕላኖች ከደረሰው ጥቃት በኋላ አስከፊው ነው ተብሏል።
የትናንትናውም ጥቃት ከ16 አመት በፊት ለደረሰው ጥቃት በተሰራውና “ፍሪደም ታወር” በመባል በሚታወቀው መታሰቢያ አቅራቢያ እንደተፈጸመ ለማወቅ ተችሏል።ከሟቾቹ ውስጥም አምስቱ ለጉብኝት የመጡ አርጀንቲናውያን ጓደኛሞች ሲሆኑ ወደ ኒዮርክ የመጡትም ከኮሌጅ የተመረቁበትን 30ኛ አመት ለማክበር እንደነበር የሀገሪቱ የውጭ ጉዳይ ሚኒስቴር አስታውቋል።የኒዮርክ ነዋሪዎች ጥቃቱ ቢፈጸምም ትላንት የተከበረውን የሀለዊን በአል አክብረዋል።
ከበአሉ ተሳታፊዎች አንዳንዶቹ ለሲ ኤን ኤን በሰጡት አስተያየት ሽብርተኞች ባህላችንን አኗኗራችንንና የዕለት ተዕለት እንቅስቃሴያችንን ሊያቆሙ አይችሉም ብለዋል።በበአሉ ላይ የተገኙት የከተማዋ ከንቲባም አሜሪካኖች በአሸባሪዎች ጥቃት ምክንያት ማንነታችንንና ባህላችንን የምንቀይር ከሆነ ሽብርተኞች አሸነፉ ማለት ነው ብለዋል።ባለፈው ጊዜ አይ ኤስ በአለም ዙሪያ ላሉ ሙስሊሞች ይህን መስሳይ የጥፋት ድርጊት እንዲያካሂዱ ትእዛዝ ማስተላለፉ ይታወሳል፡፡
እሰፋ ማሩ
ውሃ አጠጪ
ውሃ አጠጪ
 
Posts: 1266
Joined: Mon Sep 12, 2016 8:47 pm


Return to Warka General

Who is online

Users browsing this forum: No registered users and 2 guests