ይህን ያውቁ ኖሯል ?

Topics related to cultures, arts, languages, arts such as humor, music, traditional literary genres of poems, ግጥም ፣ ቅኔ ፣ ተረትና ምሳሌ)

Postby ማህቡብ » Thu Dec 30, 2010 11:07 am

ፈራሚ-አፈራራሚ ደጋፊዎቻቸዉ ደጋግመዉ እንዳሉት «ስታርት» የተሰኘዉ ዉል የኑክሌር ጦር ቦምብን ለመቀነስ በሃያ-አመት ዉስጥ ከተደረጉት ስምምነቶች ሁሉ እጅግ ጠቃሚ ነዉ።ዩናይትድ ስቴትሱ ወግ አጥባቂ የሪፐብሊካን ፓርቲ ፖለቲከኞች ግን የዉሉን ጠቃሚነት ለመቀበል ከሚያዚያ እስከ ታህሳስ ማሰላሰል፥ የፈራሚዎቹን ማብራሪያ ማድመጥ-ማዉጣት ማዉረድ ነበረባቸዉ።

የኋላ ኃላ አፀደቁት።ታሕሳስ-ሃያ ሁለት።የዉሉ መፅደግ ለፕሬዝዳት ኦባማ የዉጪ መርሕ ታላቅ ድል-አንዳዶች እንዳሉት ደግሞ ለፕሬዝዳንቱ የጋና ሥጦታ ነበር።ኦባማም ደስታቸዉን አልሸሸጉም።

«በቅድሚያ በዚሕ የምክር ቤቱ የሥራ ዘመን ልዩ ትኩረት የሚሰጠዉ የብሔራዊ ፀጥታ መርሔን-የስታርት ስምምነትን ለማፅደቅ ዲሞክራቶችና ሪፐብሊካኖች በጋራ በመስማማታቸዉ ተደስቻለሁ።ይሕ የጦር መሳሪያን ለመቆጣጠር ለሁለት አስርታት ከተደረጉት ጥረቶች ሁሉ በጣም ጠቃሚዉ ነዉ።ካደጋ ይጠብቀናል፥ ከሩሲያ ጋር የኑክሌር አረሮቻችን ያስቀንሰናል።»

ኦባማ-«ካደጋ ያድነናል» ያሉት ዉል ፕራግ ላይ በፈረሙ በሰባተኛዉ ወር ሊዝቦን-ፖርቱጋል ለተሰሰቡት የሰሜን አትላንቲክ የጦር ቃል-ኪዳን ድርጅት (ኔቶ) አባል ሐገራት አቻዎቻቸዉ አዲስ ፀረ-ሚሳዬል ሚሳዬል አብረን መስራት አለብን እያሉ ነበር።ሐያላኑ አሮጌዉን ለመቀነስም አዲሱን ለመስራትም በመስማማታቸዉ እንደተደሰቱ አመቱ ተገባደደ።

ሚያዚያ አስር የፖለንዱ ፕሬዝዳት ሌሕ ካቺይንስኪ-ባለቤታቸዉ እና ዘጠና ሰወስት ባለሥልጣኖቻቸዉ በአዉሮፕላን አደጋ አለቁ።ድፍን ፖላንድ ደነገጠ፥-አዘነም።

የኢይጃፊጃላላጆይኩል-አይስላንድ እሳተ ጎመራ የተተጎለቆለዉ ጥቅጥቅ ጢስ ጠለሰ የምዕራብና የሰሜን አዉሮጳን የአዉሮፕላን ጎዞ ቀጥ አደረገዉ።የትንሿ ደሴት-ጢስ የትልቁን አለም ትላልቅ መሪዎችን ጭምር ማስገበሩ እንዳስደነቀ የቻይናዋ ቂንጉሺይ ግዛት በመሬት መንቀጥቀጥ አደጋ ሰወስት ሺሕ ዜጎችዋን ቀበረች።መቶ ሺሕ ተፈናቀሉባት።

ሚያዚም ለፍፃሜዉ አራት ፈሪ አለ።ምዕራቡ አለም በወንጀለኝነት የሚያወግዝ፥ አለም አቀፉ ፍርድ ቤት የሚያድናቸዉ የሱዳኑ ፕሬዝዳንት ዑመር ሐሰን አልበሽር ለተጨማሪ ዘመነ-ሥልጣን ተመረጡ።የደቡብ ሱዳኑ መሪ ሳልቫ ኪርም በድጋሚ ተመረጡ።

ሱዳን ምርጫ ሲደረግባት በሃያ-አራት አመት ታሪኳ የመጀመሪያዉ ነበር።ተቃዋሚዎች የምርጫዉን ሒደት ሲያወግዙ፥ የዉጪ ታዛቢዎችም አልረኩበት።የታይላንድ መንግሥት ለወራት የርዕሠ-ከተማ ባንኮኮን ማዕከል የተቆጣጠሩት ተቃዋሚዎቹን በጦር ሐይል በተነ።ግንቦት አስራ-ዘጠኝ።

በለበሱት ቀይ ሸሚዝ-ስም በሚጠሩት ሠልፈኞችና በፀጥታ አስከባሪዎች መካካል ለስልሳ ዘጠኝ ቀናት በተደረገዉ ግጭት ዘጠና-ሁለት ሰዉ ተገድሏል።ግንቦት ሃያ-ሁለት።ከዱባይ የተነሳዉ የሕንድ የመንገደኞች አዉሮፕላን ማንጋሎር ለማረፍ ሲሞክር ተፈጥፍጦ አንድ መቶ ሐምሳ ስምንት መንገደኞችን ገደለ።

አደጋዉ ለምክር ቤት እንደራሴዎች ምርጫ ከሚዋከበዉ ኢትዮጵያዊዉ ጆሮ ቡዙም አልገባም ነበር።በሰወስተኛዉ ቀን መረጠ።ጠቅላይ ሚንስትር መለስ ዜናዊ የሚመሩት ገዢ ፓርቲ-የኢትዮጵያ ሕዝቦች አብዮታዊ ዲሞክራሲያዊ ግንባርና ተባባሪዎቹ አንዳዶች እንዳሉት በቅርብ ዘመኑ የምርጫ ታሪክ የአለምን ክብረወሰን ሰበሩ።ዘጠና-ዘጠኝ ነጥብ-ስድስት በመቶ ድል።

የዋነኛዉ ተቃሚ የኢትዮጵያ ፌደራላዊ ዲምራሲያዊ መድረክ ሊቀመንበር ፕሮፌሰር በየነ ጴጥሮስ እንዳሉት የምርጫዉ ሒደት-ዉጤት የተጭበረበረ ነበር።«መንግሥት ካላጭበረበረ በስተቀር በሌላ መንገድ ሊያሸንፍ አይችልም።»

የአዉሮጳ ሕብረት የታዛቢዎች ቡድንም የምርጫዉን ሒደት «የገዢዉ ፓርቲ ተፅኖ ያየለበት» እና «አለም አቀፍ የምርጫ መመዘኛን የማያሟላ ብሎታል።»

ሕንድ ለአዉሮፕላን አደጋ ሙታኗ ያፈሰሰችዉ እንባዋ ሳይደርቅ-እንባ ወለደባት።ምዕራባዊ ግዛትዋን ቤንጋልን እና ባንግላዴሽን የመታዉ አዉሎ-ንፋስ ሰወስት መቶ-ሰላሳ ሰዉ ገደለ።አንድ ሚሊዮን አፈናቀለ።

ግንቦት ሰላሳ አንድ።የእስራኤል ጦር ለጋዛ ፍልስጤማዉያን እርዳታ የጫነች አንዲት መርከብን ወርሮ-ዘጠኝ-እርዳታ አቀባዮችን ገደለ።ስምንቱ የቱርክ አንዱ አሜሪካዊ ነበሩ።እርምጃዉ ለርዳታ ሰራተኞች በሙሉ አስደንጋጭ፥ ለቱርክ ደግሞ አስቆጪ ነበር።ከሙስሊም ሐገራት ሁሉ ከእስራኤል ጋር ጥሩ ግንኙነት የነበራት የቱርክ ጠቅላይ ሚንስትር ጠይብ ኤርዶገን ከእንግዲሕ በቃን አይነት አሉ።

«የዛሬዉ ዕለት የመሠረታዊ ለዉጥ ዕለት ነዉ።ከዛሬ በሕዋላ ምንም ነገር እንደ የእስካዛሬዉ እንደማይሆን ግልፅ ነዉ።በዓለም ፊት፥ በአለም አቀፍ ባሕር ላይ ሰዎችን የሚገድል እብሪተኛ መንግሥት ጥፋቱን ተቀብሎ ይቅርታ ሳይጠይቅ አለም አቀፉን ማሕበረሰብ በሙሉ አይኑ ለማየት ማፈር አለበት።»

ኪርጊስታን ሁለት ሺሕ ሕይወት ያጠፋዉ የጎሳ ግጭት ተቀጣጠለባት።ሰኔ-አስር።በማግስቱ የአብዛኛዉ አለም አይን-ጆሮ ወደና ደቡብ አፍሪቃ ላይ ተቀሰረ።የአለም እግር ኳስ ግጥሚያ። አፍሪቃ-ደቡብ አፍሪቃ ወር የፈጀዉን ግጥሚያ ለመጀመሪያ ጊዜ አስተናገደች።ዋንጫዉን ግን ለመጀመሪያ ማድሪድ ገባ።ስጳኝ ፈነጠዘ።

ስጳኞችን ያስቦረቀዉን-ግጥሚያ በቴሌቪዥን ለመመልከት የዩጋንዳ-ርዕሠ ከተማ ካምፓላ በሚገኙ ምግብ ቤቶች የታደሙ ሰባ-ዘጠኝ ሰዎች በአጥፍቶ ጠፊዎች በቦምብ አለቁ።ለጥቃቱ የሶማሊያዉ ደፈጣ ተዋጊ ቡድን አሸባብ ሐላፊነቱን ወስዷል።

ሐምሌ-ሃያ ስምንት።አንድ የፓኪስታን የመንገደኞች አዉሮፕላን ኢስላማባድ አጠገብ ተከሰከሰ።አንድ መቶ አርባ-ስድስት መንገደኞቹ ሞቱ።ፓኪስታኖች የአዉሮፕላኑ አደጋ ዜና በቅጡ ሳይሰሙ አንድ አምስተኛ ግዛታቸዉ በዉሐ ተዋጠ።ሁለት ሺሕ ያሕል ሕዝብ አለቀ።ሁለት ሚሊዮን ተፈናቀለ።

ፓኪስታን ዉሐ ተግታ ዉሐ ሲለብቃት ሩሲያን ሙቀት አግሟት እሳት ያስተፋት ገባ።ከባዱ ቃጠሎዉና ጢሱ በመቶ የሚቆጠሩ ሰዎችን ገደለ።

ኢራቅ ከቦምብ ፍንዳታዉ ሽብሩ ፋታ መጋቢት መግቢያ ላይ የምክር ቤት ምርጫ ተደርጎባት ነበር።በሕጋዊ መንግሥት ሳይመሰረትባት ሰባት አመት ከተቆጣጠራት የአሜሪካ ጦር አብዛኛዉ ተሰናበታት።ነሐሴ- አስራ ዘጠኝ።ዩናይትድ ስቴትስ ያወጀችዉ ዉጊያም በይፋ አበቃ።
ድምፅ
«ማክሰኞ፣-ከሰባት አመታት በሕዋላ፥ ዩናይትድ ስቴትስ ኢራቅ ላይ የከፈተችዉ ዉጊያ ያበቃል።እና የኢራቁን ጦርነት ለማጠናቀቅ ሐላፊነት የተሞላበት እርምጃ ትወስዳለች።»

በስድስተኛዉ ቀን ኢራቅ በሐያ-ሥፍራ በተጣሉ ቦምቦች ተሸበረች።ስላሳ-አራት ሰዉ ተገደለ።ሞቃዲሾም እንደ ባግዳድ ተሸበረች።ስድስት የምክር ቤት እንደራሴዎች ተገደሉ።

የእስራኤልና የፍልስጤም መሪዎች የዩናይትድ ስቴትሱን ፕሬዝዳት መሐል አቁመዉ ዋሽንግተን ዉስጥ ሠላም ለማዉረድ ቃል ገቡ።ተጨባበጡም።መስከረም ሁለት።ግን ቃል-መጨባበጡ እንደ ልጆች የእቃ እቃ ጨዋታ በወር እድሜ ፈረሰ።
SELAM + FIKR MINGIZEAM LENANTE YIHUN
ማህቡብ
ኮትኳች
ኮትኳች
 
Posts: 264
Joined: Thu Aug 18, 2005 3:17 pm

Postby ማህቡብ » Thu Dec 30, 2010 11:16 am

አፍቃኒስታን ታሊባን የተወገደበትን አስረኛ አመት ለማክበር ዕለታት ሲቀራት ሁለተኛዉን የምክር ቤት ምርጫ አስተናገደች።መስከረም-አስራ ስምንት።የድሮዋ ሐገር በዉጊያ፥ ሽብር ትንቅንቁ መሐል የሙስናዉ ቅሌት፥ የምርጫ ዉዝግብ፥ ደግሞ ለወጉ የድርድር ሐሳብ እንደ ወዘወዛት ሁለት ሺሕ አስርን ድሮ ልትል-አራት ቀን ቀራት።የኖርዌዉ የኖቤል ኮሚቴ የአመቱን የሠላም ሽልማት ለታሠረዉ ለቻይናዊ የመብት ታጋይ ለሊዩ ዢያኦቦ ሰጥተ።

«የኖርዌዉ የኖቤል ኮሚቴ የሁለት ሺሕ አስሩን ኖቤል የሠላም ሽልማትን ለረጅም ጊዜ አመፅ-የሌለበት ትግል ላደረጉት ለሊዩ ዢያኦቦ እንዲሰጥ ወስኗል።»

ዉሳኔዉ የቻይናን ሐይል ቁጣ ቀስቅሶ ጠንካራ የዲፕሎማሲ ጡንጯንዋን አስዘረጋት።ቿይና በኖሮዌ ላይ ማዕቀብ ስትጥል ሕዳር በተከናወነዉ በሽልማቱ ድግስ ላይ የአስራ-ሰባት ሐገራት ተወካዮች እንዳይገኙ አሳደመች።በሠላም የኖቤል ሽልማት ታሪክ ለሁለተኛ ጊዜ ተሽላሚ ወይም ተወካዮቹ በሌሉበት ተደገሠ።

የዘንድሮዉ የኖቤል ሽልማት ለእስረኛዉ ቻይናዊ የመንግሥት ተቃዋሚ መሰጠቱ ከመታወጁ ሁለት ቀን ቀደም ብሎ ኢትዮጵያዊቷ የተቃዋሚ ፓርቲ መሪ ወይዘሪት ብርቱካን ሚዴቅሳ ከእስር-ቤት ተለቀቁ።ለቤተሰብ-ደጋፊዎቻቸዉ ደስታ፥ ፌስታም ነበር።የኖቤል-ሽልማት ድግሱ-የዲፕሎማሲ ብቀላዉ ዘመቻ በጋመበት መሐል ሌላዋ ኖቤል የሰላም ሽልማት አሸናፊ፥ የበርማ ተቃዋሚ ፓርቲ መሪ አዉን ሳንሱቺ ከቁም እስረኝነት ተለቀቁ።ሕዳር-አስራ ሰወስት።ራንጉን ወይም ያንጉን በጭፍራ ቀለጠች።


የያንጉን ጄኔራሎች በምርጫ ድል ማግስት ያደረጉትን ማድረጋቸዉ-«ከአዲስ አበቦች ተምረዉ ይሆን?» የጠየቀ አይጠፋም ግን እንደ ብርቱካን የወደፊት የፖለቲካ አቋም ሁሉ እስካሁን አልተሰማም።

አዉስትሬሊያዊዉ የኮምፒዉተር አዋቂ ጁሊያ አሳዥ የመሠረቱት ዊኪሊክስ የተሰኘዉ አምደ መረብ በኢራቅና አፍቃኒስታን ዉስጥ የተገደሉትን ሰዎች ብዛት፥ የጦርነቱን እና ያገዳደላቸዉን ሚስጥር ሲዘከዝከዉ ጉድ አሰኝቶ ነበር።የአለም በተለይ የዩናይትድ ስቴትስ ፖለቲከኛና ዲፕሎማቶች በአደባባይ የሚሉትን በሚስጥር የማፍረሳቸዉን የተቃርኖ ሚስጥር ሕዳር ላይ ሲያፍረጠርጠዉ ግን ጉዱን-ጉድ ዘለቀዉ ከማለት ሌላ ሌላ ቃል ለጊዜዉ አልተገኘም።አለም ሥለ መሪዎቹ ያለዉን አመመለካከት በሰአታት እድሜ የለወጠዉ ሚስጥር መፍጋቱ ለአለም ዘዋሪዎች በርግጥ አሳፋሪ-አናዳጅም ነበር።

«ይሕ (ሚስጥርን) ማዉጣቱ በአሜሪካ የዉጪ ጥቅም ላይ የተፈፀመ ጥቃት ብቻ አይደለም።በአለም አቀፉ ማሕበረሰብ፥ በወዳጅነትና ትብብር፥ በድርድርና ዉይይት፥ በአለም ደሕንነት እና ምጣኔ ሐብት ትብብር ላይም የተሰሰነዘረ ጥቃት ነዉ።»

የመረጃ ቴክኖሎጂ ጉድን በዘለቀ ጉድ አለምን ጉድ እንዳሰኘ-የአምደ መረቡ መስራች በአስገድዶ መድፈር ተከሰዉ ብሪታንያ ፍርድ ቤት ቀረቡ።እስራኤል በታሪኳ አጋጥሟት በማያዉቀዉ እሳት ሥትጋይ-አዉሮጳ ከሰላሳ አመት ወዲሕ በመታዉቀዉ በረዶ ስትቀዘቅዝ-ምዕራብ አፍሪቃዊቷ ሐገር ኮትዲቯር በምርጫ ዉጤት ዉዝግብ ትታበጥ ገባች።በትንሹ መቶ ሰባ ሰዉ ተገድሏል።

በምርጫዉ አሸንፌያለሁ የሚሉት ፕሬዝዳት ሎራ ግባግቦ ከተቃዋሚዎቻቸዉ ይልቅ ሠላም አስከባሪ ጦር ያሰፈረዉን የዉጪዎቹን ነበር-ያወገዙ-የረገሙት።

«ከኛ ፍላጎት ዉጪ እነዚሕን ወታደሮች እንዳሠፈራችሁ ለመቀጠል ከፈለጋችሁ፥ ከናንተ ጋር መስራት አንፈልግም።»

የካካዎዋ-እመቤት ምርጫ ደም ሲፈስባት የጋና ባሕር ጠረፍ ነዳጅ ይዛቅበት ያዘ።ታሕሳስ አስራ-አምስት።በሳምንቱ በጎርጎሮሱ ቀመር የሚያሰላዉ ዓለም ገናን አከበረ።
SELAM + FIKR MINGIZEAM LENANTE YIHUN
ማህቡብ
ኮትኳች
ኮትኳች
 
Posts: 264
Joined: Thu Aug 18, 2005 3:17 pm

Postby ስማያት » Sat Jan 15, 2011 8:38 pm

በብርኃን ጨረር ፍጥነት ወቅት የሴኮንድ ጊዜ በጽናት ላይ ካሉብት የሴኮንድ ጊዜ እንደሚበልጥ አልበርት አነስታይን አስረድቷል :: ማለት እንግዲህ በብርኃን ጨረር ስንጓዝ የምናረጅብት ግዜ በጽናት ላይ እያለን ከምናረጅበት ግዜ እጅግ ይበልጣል :: መሬት በብርኃን ጨረር ፍጥነት የምትጓዝ ፕላኔት ብትሆን ኖሮ ለሺህ አመታት ህያው ሆነን የምንኖር ፍጡራን እንሆን ነበር ማለት ነው ::
ስማያት
ኮትኳች
ኮትኳች
 
Posts: 133
Joined: Tue Aug 18, 2009 7:53 am

Postby ስማያት » Sat Jan 15, 2011 10:10 pm

ንቅናቄ (motion) የሚባለው ተፈጥሯዊ ክስተት በሂሳብ ቀመር መሰረት መዳረሻው የተነበያል እንጂ, አንድ አካል በሚነቃነቅበት ግዜ በዙሪያውና በውስጡ የሚከሰተው አካላዊ ለውጥና ለንቅናቄ የሚያበቃው ጉዳይ ምን እንደሆነ አተገለጸም::

ነባራዊ የምርምር ታሪክ የሚስረዳን, የፊዚክስም ሆነ ሌሎች ተመራማሪዎች ይህንን ርዕስ በቅጡ አልተጋፈጡትም የሚል ነው:: አዳዲስ የሰገል (የሳይንስ) ጥናቶች በጊዜያችን ይህንን ርዕስ ተጋፍጠው ለመረዳትና ለማስረዳት እየሞከሩ ቢሆንም በአሁኑ ግዜ አንዳችም ድምዳሜ አልተገኘም::

አበሾች ለዚህ አይነት ምርምር የተካንን ነን እና ይኽንን ርእስ ለመፋለም እና ጉዳዩንም አስሶ መልስ ለማግኘት ለምትሹ ሜዳውም ፈረሱም እነሆ::
ስማያት
ኮትኳች
ኮትኳች
 
Posts: 133
Joined: Tue Aug 18, 2009 7:53 am

Postby ማህቡብ » Wed Feb 02, 2011 3:35 pm

ዘመን በርቆ ዘመን ሲጠልቅ ቀሪው ታሪክ ነው

ደወሉ በርግጥ ከቱኒዝ በፊት ካይሮ ላይ ነበር ያቃጨለዉ።2006።የሰማዩ ብልጥ አበረሪ-ጀግና ተዋጊ ፥ የምድሩ ድንቅ ገዢ የሐይለኞች ጥሩ ታዛዥ ባፍታ ፀጥ አደረጉት

እርገጠኛ መሆን በርግጥ ያሳስታል።ቤን ዓሊን ተከታይ ተረኛዉ ሆስኒ ሙባረክ አይደሉም ማለት ደግሞ ጅልነት ነዉ።የቱኒዚያዉ ሕዝባዊ አመፅ የሐገሪቱን የሃያ-ሰወስት ዘመናት መሪ አሸቅንጥሮ በጣለ ማግሥት እኛም እንደ ብዙዎች ላነሳነዉ ጥያቄ ከወደ ካይሮ መልስ የሚገኝ መስለል። ካይሮን የሚገለባብጠዉ፣ አልጀርስ፣አማንን የሚያስደልቀዉ ሕዝባዊ ቁጣ ሰነዓንም እያስጓራት ነዉ።የግብፅ መሰንበቻ መነሻችን፤ የሐያሉ አለም አቋም ማጣቀሻ፣ የቱኒዝ-ካይሮ ቀዳሚ-ተከታዮች ሁለትም አንድምነት፣ የአሰላሹ-ተቀራራቢነት ግምት፣ ማጣቃሻ፣ አስተምሕሮቱ መድረሻችን ነዉ ላፍታ አብራችሁን ቆዩ።

ደገኛዉ ኢትዮጵያዉ እንደ ነባር ልምድ-ባሕሉ ወቃዉን ሰብል-ምርት መጠን የሚለካ-የሚያሠላበት ሰርግ የሚደግስበት ወር ባተ ጥር-ሁለት ሺሕ ሰወስት። ክርስቱያኑ ጥምቀት ሊል ነዉ።ቱኒዝ በወይራ ፍሬ አበባ ሥም በየሰየመችዉ ሕዝባዊ አመፅ እንደታመሰች ነበር።የጃሲሚን አብዮት ጎመራ።

ዘይን አል-አቢዲን ቤን ዓሊ ግን የሕዝባዊዉን ማዕበል ግፊት ሐያልነት፥ የደወሉን ድምፅ ሰቅጣጭነት አልሰሙትም።ወይም ሃያ-ሰወስት ዘመን የኖሩበት ብልጣብጥነት፥ ጉልበት፥ ሥልጣን መስሚያቸዉን ደፍኖት ነበር።(አሁንና ካሁን በሕዋላ እንደ ጎሮጎሮሳዉ እንቁጠር) ጥር አስራ አንድ ቱኒዚያን ያጥለቀለቀዉን ሕዝባዊ አመፅ ልክ ሃያ ሰወስት-ዘመን እንደለመዱት ሁሉ የወንጀለኞች ሴራ-ሻጥር አሉት።
ካይሮ ባለፈዉ ሳምንት።ሆስኒ ሙባረክ ባለፈዉ ባለፈዉ አርብ።

«ዛሬና ባለፉት ቀናት የተፈፀመዉ ድርጊት አብዛኛዉን የግብፅ ሕዝብ እያሰጋ ነዉ።ሥር ዓተ-አልበኝነት፥ አመፅ ጥፋቱ በጣም አሳሳቢ ነዉ።የሐገሪቱን እና የሕዝቡን ፀጥታና ደሕንነት ለማስከበር የመጀመሪያዉን ሐላፊነት የምወስደዉ እኔ ነኝ።ሕዝቡ በስጋትና ፍርሐት እንዲኖር አልፈቅድም። በፍፁም አልፈቅም።»

አልፈቀዱም።በትንሽ ግምት ዘጠና አምስት ሰዉ ተገደለ።የቱኒዝ-ግብፅ ሕዝብ ጥያቄ ፍላጎት በርግጥ ከሁለትነት ይልቅ አንድነቱ የጎላ ነበር።የጭቆናዉ ሰንሰለት-ይበጠስ፥ የሙስናዉ ክምር ይናድ፥ ችግር-ሥራ አጥነት ይወገድ ከሁሉም በላይ ገዢዎቹን በቃችሁን አይነት ጥያቄ።


ደወሉ በርግጥ ከቱኒዝ በፊት ካይሮ ላይ ነበር ያቃጨለዉ።2006።የሰማዩ ብልጥ አበረሪ-ጀግና ተዋጊ ፥ የምድሩ ድንቅ ገዢ የሐይለኞች ጥሩ ታዛዥ ባፍታ ፀጥ አደረጉት።ሁለት ሺሕ ስምንት ተደገመ። የፈርዖኖቹ ዉርስ አልተቻሉም።መሐመድ ሆስኒ ሰይድ ሙባረክ።የሰብአዊ መብት ተሟጋቾች የፖለቲካ እስረኛዉን ብዛት ይቆጥራሉ።ያኔ አስራ-ሰባት ሺሕ ነበር።

እስረኞችና የእስረኞች ቤተሰቦች የእስር ቤቱን ስቃይ ሰቆቃ ያወራሉ።ከንቱ ጩኸት።ሙባረክ እንደነበሩበት ከምዕራቦች በሚንቆረቆርላቸዉ የገንዘብ፥ የፖለቲካ ድጋፍ ያሸቸዉን እንዳደረጉ ቀጠሉ።እንደ ሁለት ሺሕ ስድስቱ ሁሉ የሁለት ሽሕ ስምንቱን የተቃዉሞ ሠልፍ መሩ አደራጁ ያሏቸዉን የእስላማዊ ወንድማማች ማሕበር መሪዎችን በአሸባሪነት ሥም አስቀፈድደዉ ድጋሚ አመከኑት።

የመብት ተሟጋቾች አልቦዘኑም።ግን ያዉ ቁጥር ነዉ-የሚያሰሉት።የእስረኛ ቁጥር ሰላሳ ሺሕ ደረሰ ብለዉ ነበር-ያኔ።ልክ እንደ ግብፅ ሕዝብ ጥያቄ-ጩኸት ሁሉ የሰማቸዉ የለም።እንዲያዉም ሕዳር ሁለት ሺሕ አስር በተደረገዉ የይስሙላ ምርጫ እንደ እዉነተኛ ባለድል ብቅ አሉ ሰዉዬዉ።

«የምርጫ ኮሚሽኑና የግብፅ ሲቢክ ማሕበረሰብ አባላት የተከታተሉት ምርጫ ነፃ እና ትክክለኛ በመሆኑ ደስተኞች ነን።መምረጥ ከሚችለዉ ሕዝብ ከፍተኛ ቁጥር ያለዉ በምርጫዉ መሳተፉ ተረጋግጧል።»

ለሰላሳኛ አመት ሊገዙ አሸነፉኩ-ወይም ፓርቲዬ አሸነፈ አሉ።ጥሪ-ማስጠንቀቂያዉን መስሚያ ጆሮ አልነበረባቸዉምና።

ጥር አስራ አንድ ቱኒዚያ-እና ፓሪስ

ቱኒዝ፥ ቤን ዓሊ ደወሉን ሰሙ።በትክክል ያደመጡት ግን አልመሰሉም።እራሱን እያቃጠለ፥ እየተገደለ፥ እየተደበደበ የቱኒዚያ አደባባይን ያጥለቀለቀዉን ሕዝብ ጥያቄ ለማድበስበስ ሞከሩ።ጥርም አስራ ሁለት ዓለ።


በሰወስተኛዉ ቀን ግን እብስ አሉ።አርብ ጥር አስራት።ለቱኒዚያዉያን በርግጥ ፌስታ።


አመፅ ቁጣዉን ቀድሞ የጀመረዉ የግብፅ ሕዝብ በቱኒዞች ተቀደመ።ዓለም ማነሕ ባለተራ እያለ ሲጠይቅ ግብፃዊዉ እዚያ የሆነዉ-እዚሕ የማደገምበት ምን ምክንያት አለ-ይል ገባ።

ሰዉዬዉ ግን እንቢኝ እንዳሉ ነዉ።ቤን ዓሊ በመጨረሻዉ ሰአት መጀመሪያ የወጣቶች አከታትለዉ የፀጥታ ሚንስትሮቻቸዉን እየሻሩ-እየሾሙ ማስፈራሪያ፥ ጥይት-ዱላ አፈሳ ያልበገረዉን ሕዝባዊ አመፅ ለማዳፈን እንደሞከሩ ሁሉ ሙባረክም ካቢኔያቸዉን ይጠጋግኑ ገቡ።

«መንግሥት (ካቢኔዉ) ሥልጣን እንዲለቅ አዝዣለሁ።የወቅቱን ሁኔታ በተመለከተ ቅድሚያ ሰጥቶ መፍትሔ የሚፈልግ አዲስ መንግሥት እመሰርታለሁ።»

መሠረቱ።ቤን ዓሊ ሙባረክ ሁለትም አንድምነታቸዉን ዳግም አስመከሩ።ድሮም እንዲያ ነበሩ።

ግብፃዊዉ ቆፍጣና ፓይለት፣በ1973ቱ የአረብ-እስራኤሎች ጦርነት የሐገራቸዉን አየር ሐይል በጀግንነት ለማዋጋታቸዉ ዉለታ ለአየር ሐይሉ ጠቅላይ ማርሻልነት ሲሾሙ፣የጦርነቱን ሚስጥር እያነፈነፈ ለቱኒዚያ ጦር ሲያጮልግ የነበረዉ የሐገሪቱ ወታደራዊ ደሕንነት ሐላፊ ለሙያ ብቃት ቅልጥፍናቸዉ-ሽልማት በሞስኮ የቱኒዚያ ወታደራዊ አታሼነትን ተሾሙ።

ግብፃዊዉ ፓይለት የሐያል፣ ሥልታዊ፣ ታሪካዊ፣ ትልቅ አረባዊ-አፍሪቃዊቱን ሐገር ሁለተኛ ትልቅ ሥልጣን በያዙ ሰሞን በግብፅ የዩናይትድ ስቴትሱ አምባሳደር ኸርማን ኢልትስ እንደ ዲፕሎማሲዉ ወግ በሌላ ቀጠሮ አሳበዉ ዘና-ቀላል እንዳሉ ከግብፁ ዉጪ ጉዳይ ሚንስትር ከኢስማኢል ፋሒሚ ቢሮ ገቡ።እያዋዙ ጠየቁ።«እኝሕ ሰዉ እንዴት ናቸዉ።»

ፋሒሚ አላመነቱም «እንደ ዋዛ እንዳታየዉ በሳዳት የተመረጡ የሳዳት ሰዉ ነዉ» መለሱ።ከዚያን ጊዜ ጀምሮ አሜሪካኖች፥ እስራኤሎችም እንደ ዋዛ አላዩዋቸዉም። ሙባራከም ለአሜሪካኖች ታዛዥ ለእስራኤሎች ታማኝ ሸሪክ እንደሆኑ ሰላሳ-ዘመን አስቆጠሩ።አሜሪካኖች አሁንም በሙባረክ ላይ አልጨከኑባቸዉም።ከሙባረክ ሟች ስርዓት ጋር ዘላቂ ጥቅማቸዉ እንዲሞት ግን ዋሽንግተኞች አይፈቅዱም።

«ይሕንን የግብፅን ችግር ለማስወገድ የሐይል እርምጃ መልስ አይደለም።ሥለዚሕ መንግሥት የሐይል እርምጃ ከመዉሰድ መታቀብ አለበት።አደባባይ የወጣዉ ሕዝብም ከአመፅ መጠንቀቅ አለበት። እንደሚመስለኝ ሕዝቡ ተገቢ ቅሬታዉን የሚገልፅበት መንገድ መኖር አለበት»

ድሮ፥-ሙባረክ የምክትል ፕሬዝዳንነቱን ሥልጣን በጨበጡ በሁለተኛዉ አመት የስምንት አመት ታናሻቸዉ ቱኒዚያዊዉ ብልጣብልጥ ሠላይ መኮንን የትንሺቱን ዉብ ታሪካዊ አረብ-አፍሪቃዊት ሐገር የብሔራዊ ደሕነንነት ዳይሬክተር ሆኑ።1977።
የአዉሮፕላን አብራሪ፥ የምድር ጦር አስተማሪነትን ግብፅና ሶቬት ሕብረት የተማሩት ሙባረክ ትልቁን ወንበር የሚጠቀልሉበትን ጊዜ-ሥልት ሲያዉጠነጥኑ፥ የወታደራዊ ደሕንነትን ሙያ ፈረንሳይና ዩናይትድ ስቴትስ የተማሩት ቤን ዓሊ በፖላንድ የቱኒዚያ አምባዳር ሆነዉ-ከቱኒዝ ራቁ።

ከወደ ደቡብ አረቢያ ግን ሰወስተኛ አምሳያቸዉ ድንገት ብቅ አሉ።አሊ አብደላ ሳላሕ።የአንደኛ ደረጃ ትምሕርታቸዉን ያላጠናቀቁት የሰሜን የመኑ አስር ዓለቃ በጠንካራ ጎሳቸዉ ድጋፍ ወደ ሰነዓ ቤተ-መንግሥት ማንጋጠጥ የጀመሩ።

ሰኔ-1977 የሰሜን የመኑ ፕሬዝዳት አሕመድ ዓል ጋሺሚ ተገደሉ።አስር አለቃ ዓሊ አብደላ ሳላሕ የካይሮ፥ ቱኒዝ ታላላቆቻቸዉን ቀድሞዉ የመሪነቱን ሥልጣን ጠቀለሉ።ሐምሌ-1977።
በአራተኛዉ አመት ፕሬዝዳት አንዋር አሳዳት ተገደሉ።ሙባረክ በቅርብ የተመኙትን ቤተ-መንግሥት ተቆጣጠሩት።1981።
ፈረንሳዮች-ፈረንሳይ የተማሩ፥እንደ ፈረንሳዮች የሚያስቡትን ወጣት መኮንን የቱኒዚያን ቤተ-መንግሥት እንዲጠቀልሉ መፈለጋቸዉ አልቀረም። ግን ፈረንሳዮችን የተዋጉ፥ ሐገራቸዉን ከፈረንሳዮችን ነፃ በማዉጣታቸዉ የሚወደዱትን ፕሬዝዳት ቡርጊባን ለማስወገድ ፓሪሶች በቀጥታ ጣልቃ መግባቱ ከጥቅሙ ይልቅ ጉዳቱ እንደሚያመዝን ጠንቅቀዉ ስለሚያዉቁ አላማ ፍላጎታቸዉን በአልጀርስ እና በሮም ወዳጆቻቸዉ በኩል ሊያስፈፅሙ አንድ ሁለት ይሉ ገቡ።

የቀድሞዉ የኢጣሊያ የወታደራዊ ደሕንነት ሐላፊ ፉልቪዮ ማርቲኒ በ1999 ሲነጋሩ «ቡርጊባ በቤን ዓሊ እንዲተኩ ከ1985 እስከ 1987 ድረስ መለስተኛ መፈንቅለ መንግሥት ብጤ አደራጅተን ነበር» አሉ።ዓሊ አብደላ ሳላሕ-የሰነዓን ቤተ-መንግሥት በተቆጣጠሩ በአስረኛዉ አመት፥ ሙባረክ የካይሮን በጠቀለሉ በስድስተኛዉ አመት ቤን አሊ ቱኒዚያ-እና ቱኒዞችን ጨምድደዉ ያዙ።1987።

የቱኒዚያ ሕዝባዊ አመፅ ቤን ዓሊ ከሃያ ሰወስት ዘመነ-ሥልጣናቸዉ ሲያሸቀነጥራቸዉ ወደ ፈረንሳይ ወዳጆቻቸዉ ነበር የኮበለሉት።ፓሪሶች-ከሞተ ጋር ጥቅማቸዉን መግደል አልፈለጉም።ልክ እንደ ቱኒዚያ ሕዝብ ሁሉ «ዞር በል አሏቸዉ»።ሙባረክስ? ዓሊ አብደላሕስ ቡተፈሊቃ እና ሌሎችስ? ሌላ ጊዜ ለመታዘብ ያብቃን።ለዛሬዉ ቸር ያሰማን።
SELAM + FIKR MINGIZEAM LENANTE YIHUN
ማህቡብ
ኮትኳች
ኮትኳች
 
Posts: 264
Joined: Thu Aug 18, 2005 3:17 pm

የበዳዮች መጨረሻ

Postby ሱልጣን » Wed Feb 02, 2011 5:29 pm

የግፈኞች መጨረሻ........ምን ይሆን ብለው ያስባሉ?አይጨነቁ!!!
ኦክቶበር 2/2011
ካይሮ...ሚዳነ ተህሪር..ከሌሊቱ 6 ሰአት.....
መካከለኛው ምስራቅ እና ጉዳዩ ይመለከተኛል ያለ የአለም ህዝብ ሁሉ የግብጹ ፕሬዝዳንት ክይሮን እና ሌሎችንም ከተሞች ጨምሮ በ8 ሚሊዮን ህዝብ ያጥለቀለቀውን ሰላማዊ ሰልፍ በተመለከተ አሳሳቢ ንግግር አደርጋለሁ ሲሉ በቴሌቪዥናቸው አስነገሩ::
ሁሉም በተጠንቀቅ እና በጉጉት ብሎም በ እርግጠኝነት የሚጠብቀው አንድ ነገር ነበር!!''ለሀገሬ እና ለህዝቤ ስል ከስልጣን ወርጃለሁ..........''የሚለውን የመጨረሻ እስትንፋስ!!!
ከዚያ በፊት ብቸኛ የአረቦች ሚዲያ የሆነው አልጀዚራ ጣቢያ ፕሬዝዳንቱ ምን ይናገሩ ይሆን?በማለት የፖለቲካ ተንታኞችን እና ውስጥ አዋቂ ምንጮችን ማነጋገሩን አልቦዘነም::የሁሉም ማለት ይቻላል ..ሰውየው መሄዴ ነው ከማለት ውጭ አማራጭ የለውም በማለት ተነበዩ....
የብልጥን መንገድ የሚያውቀው ብልጥ ነው እና ዶክተር ሙስጦፋ የሚባሉት የጥንት የሙባረክ አማካሪ ሊሆን የሚችለውን መላምት እንደወረደ በማስቀመት የጀዚራ ጋዜጠኖችን ግራ አጋቡ::''ሙባረክን በግል እስከማውቀው ድረስ ስልጣን እለቃለሁ አይልም....ምናልባት ወደፊት አልወዳደርም የሚል ቃል ብቻ ይተነፍስ ይሆን እንጅ!ምክንያቱም ጸባዩ ከወታደር ቤት ስለመጣ ኩራተኛ እና በተፈጥሮው እጅ የማይሰጥ አይነት ነው በማለት ተነበዩ::
የመጨረሻው ሰአት ሲደርስ ይህን መላምት ያላጣጣለ አንድም ሰው አልነበረም::
የዚህ ሀተታ አቅራቢ እንኳ እንደ አቅሚቲ ሙባረክ በህመምም ሆነ በሌላ ምክንያት ከስልጣን መውረዱ እንደሚበሰር እርግጠኛ ስለነበር ያለወትሮ እስከ ግማሽ ሌሊት አፍጥቶ ይከታተል ነበር!! ነገር ግን ፖለቲካ እና እግር ኳስ ጫወታ ባለቀ ደቂቃ የሚያመጡት ነገር አይታወቅም እና በጉጉት ሲጠበቅ የነበረው ንግግር ገርሞ ገርሞ የሚገርም ሆኖ ተጀመረ........
''የተከበራችሁ የሀገሬ ህዝቦች ሆይ ....
አንዳንድ አመጸኞች ያስነሱት ብጥብጥ ወደ ሌላ ተቀይሮ የህዝቦች ሰላም መነሳቱን ተረድቻለሁ::
እኔ ድሮም ቢሆን የስልጣን ጥም ስለሌለኝ የቀረኝን የስልጣን ዘመን ጨርሸ ስልጣን አስረክባለሁ....
ከዚህ ውጭ ግን እረብሻ እፈጥራለሁ የሚል አካል ካለ
እኔም እንደ እናንተ በግብጽ ዜግነቴ በጦርነትም ይሁን በሰላም ጊዜ የታገልኩባት ሀገር ስለሆነች በምድሯ እስክሞት ድረስ እጸናለሁ::
እስከአሁን ተቃዋሚዎች ችግር አለበት ይሉት የነበረው ቻርተር ፓርላማውን ጠርቸ አወያያለሁ::የጀመርኩትን ነገር ቋጭቼ ነው ስልጣን የምለቀው......ከዚህ ውጭ ግን ሰላም ወይ ጦርነት የመምረጥ መብታችሁ በጃችሁ ነው......
ጥፋተኞችን እና መዝባሪዎችን ለመቅጣት ፖሊሶቼን አዝዛለሁ ''በማለት የአንዞ እንባ አይሉት ተስፋ የቆረጠ ጀግንነት አንጸባረቁ::
ሚዳነ ተህሪር ተብሎ በሚጠራው የነጻነት አደባባይ የተሰባሰበ 2 ሚልዮን ህዝብ የሙባረክን ንግግር ከግማሽ ውጭ አላዳመጠም::
እቀጥላለሁ ማለታቸውን እንደሰማ.....አንተ ሳትሄድ እኛ አንሄድም....በሰላም መሄድ ካላማረብህ አፍንጫህን ተይዘህ ወርደህ በሰራኸው ወንጀልም ለፍርድ እናቀርብሀለን...በማለት ህዝቡ አሁን ሂድልን ሲል አምርሮ ተጯጯኸ!!!
የብዙ ሰው ወሽመጥ በሙባረክ ንግግር ተቆረጠ!!
የዘመናችን የቱርክ አንበሳ ረጀብ አርዶጋንድሮውንም ሙባረክን ህዝብ ካልፈለገህ ስልጣኑ ይይቅርብህ ብሎ መክሮት ነበረና አሁንም አቅጣጫህን አስተካክል በማለት ተጣራ!!
አሜሪካውያንም የተለመደውን ደባቸውን ከመጋረጃ በስተጀርባ እየሸረቡ ለህዝብ ይምሰል ግን ስልጣን ርክክቡ ቶሎ ይፈጸም አሉ!ምክንያቱም አሁን ምክትል ፕሬዝዳንት የተደረገው ጉልቻ ቢለዋወጥ ወጥ አያጣፍጥም እንዲሉ ከሙባረክ ያላነሰ /አደገኛ የፖለቲካ ሰው ነውና!!!ለአሜሪካም የማይጎረብጥ ጮሌ ነውና!!!
ተቃዋሚ ሀይሎች ሙባረክ ከስልጣን ሳይወርድ ድርድር የሚባል ነገር የለም ብለው ደመደሙ::
አይነጋ የለም ነጋ...ብዙም አዲስ ነገር አልተስተዋለም::
ይህን ጽሁፍ እየሞነጫጨርኩ ባለሁበት ረቡእ እለት ግን የመንግስት ቅጥረኞች
ቢላዋ እና አንዳንድ መሳሪያ ይዘው ሙባረክን በመደገፍ የነጻነት አደባባዩ ላይ በመሄድ ጸብ አጫሩ::
በጉዳዩም ወደ 230 ሰው ቆስሎ 100 ያክሉ ወደ ሆኦስፒታል ተወሰደ!!!
ህዝቡ ነገ አርብ የሙባረክን መጨረሻ የሚያበስረው ሶናሜ ላይ እንገናኝ በማለት ፎከረ!!
ከሀዲውም ሙባረክም ሰልፉን እንዴት እንደሚያሰናክል እና ቀንደኛ ተቃዋሚዎችን እንዴት ዘብጥያ እንደሚያወርድ እያሰላሰለ አርቆ መቆፈሩን ተያያዘው::
ብዙ አቅል ያላቸው ሰዎች አርቀህ አትቆፍር ....ፖለቲካ አይታወቅም እና አንተ ብትገባ እንኳ በቀላሉ አትወጣም ሲሉ መከሩ!ገሰጹ!!!
ሙባረክ ግን ገገመ.......ለነገሩ ቤተሰቦቹን እና ከመቶ በላይ ሻንጣ በግል አውሮፕላን ወደ ለንደን ከሸኘ ውሎ አድሯል እና የህዝብ ደም መፋሰስ ድሮም ለሱ ምኑም አይደለም እና ሰላማዊ እንቅስቃሴውን እንደ አመጽ ቆጥሮ በአጭሩ እንደሚቀጨው እንደቱኒዚያ መሪ ወይም እንደጸሀይ ግባት
እየዛተ ይገኛል.......:አንድ መሳሪያ እና አንድ ሰው እስኪቀር እዋጋለሁ ያሉት ወገናችንም አንድ ሰው ሳይጎድል ወዴት እና እንዴት እንደሄዱ ሚስጥሩ እስከ አሁን አልገባንም...ለነገሩ ደግ ሄዱ....የአንድ ሰው ደም ከመፍሰስ መዳኑም ትልቅ ነገር ነው::
የዘይነል አቢዲን ሀገር ጥሎ መሄድ እንደ ክብር ይቆጠር ዘንድ ሁስኒ ሙባረክ አንገራገሩ::
ትናንት ሳዳም (ረሂመሁሏህ) ሀገር ጥለው ሂድ ሲባል በኩራት አሻፈረኝ ብሎ ሀገሩን ለውርደጥ አንጡራ ሀብቷን ለምዝበራ ዜጎቹን በባእድ እጅ ለውርደት እና ለስደት አበቃ!!
ኢራቅ ከዛሬ የለበጣ ፈገግታዋ የትናንት የሳዳም ጊዜ መሪር ሀዘኗ ይሻላት ነበር!! እንዲህ እንደአሁኑ ማንም አይዘባነንባትም ነበረና!!!!!
ነገር ግን የበዳዩች መጨረሻ ከዚህ አይዘልም እና የካይሮው ሽሜም በ82 አመታቸው ካፖርት እና ጃኝጥላ መርጠው ገዝተው ከልጅ ልጆቻቸው ጋር በሰላም እሳት እየሞቁ በመቆዘም ፋንታ እንደውም ልጃቸውን ለማንገስ ቆርጠው ተነሱ!!
አሁን ባለቀ ሰአት እንኳ ስለ ልጃቸው ምንም ነገር ትንፍሽ አላሉም....ማን ያውቃል እሳቸው አልወዳደርም ቢሉ በልጃቸው ሊገዙ ያስቡ ይሆናል......አይድረስ አሉ!! ነገሩ ከደረሰ በኍላ ሆነ እንጅ :!: :!:
ግብጽ በጆግራፊ አቀማመጧ የሰላሟ መደፍረስ በቀጥታም ይሁን በተዘዋዋሪ የአለምን ህዝብ ስለሚነካ ሁሉም ከመጋረጃ በስተጀርባ ሙባረክን በፍጥነት አውርዶ ሌላ አሻንጉሊት መንግስት ለመተካት እየተንደፋደፈ ይገኛል...ቢንዚንም አሻቀበ....የካምፕዴቪድ ስምምነትም አደጋ ላይ ሆነ....በስዊዝ ካናል የሚያልፉ መርከቦችም ከሙባረክ በኍላ የሚመጣው መንግስት እንደኢራን አክራሪ ቢሆን ምን መላ ይኖራል በሚል ሁሉም ተረበሸ!
እውነታው ግን አትልቅ አሻንጉሊት ሰዶ ትንሽ መተካት በአካፋ የተከለከለ ዲሞክራሲ በማንካ ማቅመስ እንጅ ሌላ እንደማይሆን ሁሉም ያውቃል.....
ቀጠሯችን ከነገ በስትያ አርብ ሲሆን የበዳዮች ፍጻሜ እንደሚሆን ይጠበቃል.......ምክንያቱም .....በዚህ አረመኔ መንግስት አይን የታዩ ተቃዋሚዎች(ሰልፈኞች)በሰላም ወደቤት ሄደው ሰላም መኖር አይቻላቸውም እና የጀግና ሞት ለመሞት ቆርጠው ተነስተዋል.....
የቱኒዚያ ህዝብ ታሪክ ሰራ.....የግብጽ ህዝብም ይደግመዋል ተብሎ ይጠበቃል.....
ችግሩን ውስብስብ የሚያደርገው ቁምነገር ቢኖር ሁለት ሚሊዮን ሰልፈኛ መንግስት በቀላሉ ማውረድ ከቻለ....ነገም በኔ የሚሉ የአረብ መንግስታት ከሙባረክ ጎን በጀርባ አጥር በመቆም መንግስቱ እጅ የሚሰትበትን ጊዜ እያራዘሙ ይገኛሉ......
ብልጦች የየመን እና የአልጀሪያ እንዲሁም የሱዳን መንግስታት ግን ከአሁኑ ህዝባቸውን ለማስደሰት ሽር እንጉድ እያሉ ይገኛል.....
ነገስ......ነገማ ሌላ ቀን ነው ....የበዳዮችን መጨረሻ ለማየት የአርብ ሰው ይበለን........
ውድ ማህቡብ
የሀሳብህን ጅረት ወደሌላ ቀይሬው ከሆነ ይቅርታህን አትንፈገኝ......
ህዝብ ምንጊዜም ቢሆን ታሪክ ይሰራል::የጉዳዩ ባለቤት እራሱ ነው እና.......::
የሰላማዊ ሰልፍ ካልኩሌሽን ግን በሁሉም ሀገር አይሰራም..........ዳቦ የተነፈገ ህብረተሰብ ግን ጩኸቱም ካንጀቱ ስለሆነ ረሀብ ከሚገለው እየበላ በጦርነት ቢያልቅ ይመኛል....
እስኪ ቸርነቱ ሰፊ የሆነው አላህ ሀገራችንን ሰላም ያድርግልን........
ኢትዮጵያ ....ምድራዊ ገነት!!!!!!
ህዝቦቿም ያለ እምነታቸው እንኳ ቢሆን የራበውን አጉራሽ የታረዘውን አልባሽ.....መጠጊያ ጋሻ ነበሩ......::
የአሁኑ ትውልድስ....ምን ያስባል.....
መልሱን ብናገር ለቀባሪ ማርዳት ይሆንብኛል እና ትቸዋለሁ...........::
ሰላም ሁኑ..................... :arrow:...... :!:
HONESTY~TRUSTWORTHINESS~SINCERITY
''Whoever is carless with in small matters....
Cannot be trusted in important affairs''
ሱልጣን
ኮትኳች
ኮትኳች
 
Posts: 260
Joined: Wed Sep 03, 2003 11:38 am

Postby ማህቡብ » Wed Feb 09, 2011 6:52 am

ሰላም እንደምን ከረማችሁ !! ወንድሜ ሡልጣን አመሰግናለሁ ለመሳጭ ዘገባህ::


ዘመን በርቆ ዘመን ሲጠልቅ ቀሪው ታሪክ ነው።


የሕዝቡ ፅናት፥ቁርጠኝነት-ግን የገዢዎቹን ሥልጣን እየገዘገዘ፣ የአፍሪቃና የአረብ ብጤዎቻቸዉን በነግ በኔ እያሸማቀቀ፣ የአለም-ሐያል ፖለቲከኞችን አቋም ግራ ቀኝ እያላጋ እንደ ሼክ-ቀሳዉስት ያፀልያቸዉ ይዟል::

የግብፅና የሱዳንን ንጉስ የቀዳማዊ ፋርቁን ዘዉዳዊ ሥርዓት በ1952 አስወግደዉ የካይሮን ቤተ-መንግሥት መጀመሪያ በተዘዋዋሪ-ኋላ በቀጥታ የተቆጣጠሩት ሌትናንት ኮሎኔል ገማል አብድናስር የአረብ-አፍሪቃን የእስከዚያ ዘመን ፖለቲካዊ ሥርዓት ለበጎ ይሁን ለመጥፎ ቀይረዉታል።ናስርና ተከታዮቻቸዉ ሥልጣን የያዙበት ሐምሳ ዘጠነኛ አመት ሊዘከር ወራት ሲቀሩት ዘንድሮ በገዢዎቹ ላይ ያመፀዉ የግብፅ ሕዝብ የግብፅ-አፍሪቃን የአረብ-ዓለምን የሐምሳ ዘጠኝ ዘመን ፖለቲካዊ ጉዞ መቀየር አለመቀየሩ በርግጥ አለየም።የሕዝቡ ፅናት፥ቁርጠኝነት-ግን የገዢዎቹን ሥልጣን እየገዘገዘ፣ የአፍሪቃና የአረብ ብጤዎቻቸዉን በነግ በኔ እያሸማቀቀ፣ የአለም-ሐያል ፖለቲከኞችን አቋም ግራ ቀኝ እያላጋ እንደ ሼክ-ቀሳዉስት ያፀልያቸዉ ይዟል።የአመፁ ግመት መነሻ፣ አስተጋብኦቱ መጣቃሻ፣ የሐያሉ አለም አቋም መረሻችን ነዉ ላፍታ አብራችሁን ቆዩ።

የቱኒዝያዉን እዉነት፥ የግብፅ ሕዝብን ብሶት ምሬት በቅጡ የሚያዉቁት ሕዝባዊዉ አመፅ አሁን ከደረሰበት እንደሚደርስ ለመገመት ብዙ ማሰብ-ማሰላሰል አላስፈለጋቸዉም ነበር።የዚያኑ ያክል ያቺን ጥንታዊ፥ ታሪካዊ፥ ታላቅ፥ ሥልጡን አረብ-አፍሪቃዊት ሐገርን እንደ ምክትል ፕሬዝዳት ሥድስት አመት እንደ ፕሬዝዳት ሠላሳ አመት የገዙትን የፕሬዝዳት ሆስኒ ሙባረክን የአገዛዝ ሥልት-ይትብሐል፥ ከምዕራቦች በጣሙን ከዩናይትድ ስቴትስ የሚደረግላቸዉን ዙሪያ መለስ-ድጋፍ የሚያዉቁት ሕዝባዊ አመፁን መድረሻ መጠራጠራቸዉ አልቀረም።

ያምሆኖ በሙንስተር-ጀርመን ዩኒቨርስቲ የአረብና የእስልምና ጥናት ተቋም ሐላፊ ቶማስ ባወር ባለፈዉ ሳምንት ማክሰኞ እንዳሉት የአካባቢዉን ማሕበረ-ምጣኔ ሐብታዊ ይዞታ የሚያዉቁ ወገኖች የሕዝቡን ጥያቄ ተገቢነት፥ ለተገቢዉ ጥያቄዉ ተገቢ መልስ ለማግኘት የነበረና ያለዉን ፅናት ለመረዳት ጊዜ አልፈጀባቸዉም።

«ከትናንት ወዲያ ትንሽ ተጠራጥሬ ነበር።ዛሬ ግን ከእንግዲሕ ለየትኛዉም ተቋም፥ ለተቃዋሚዉ ይሁን፥ ለጦር ሐይሉ ወደ ኋላ ማፈግፈግ የሚቻል አይመስለኝም።አሁን ሙባረክ በርግጥ መሰናበት አለባቸዉ።»

ለሙባረክ፥ ለደጋፊ፥ ታማኞቻቸዉ፥ ለአገዛዛቸዉ ተጠቃሚዎችም የሕዝቡ ብሶት፥ ምሬት
ፍላጎት፥ ፍላጉትን ገቢር ለማድረግ የነበረዉ ቁርጠኝነት፥ የአዋቂዎች ምክር-አስተያየትም ልክ እንደ ከዚሕ ቀደሙ ሁሉ ሰሞናዊ ጫጫታ አይነት ነበር።የካይሮ ገዢዎች የማፈኛ መዋቅሮቻቸዉን አቅም፥ የፖሊስ ጦር ሐይላቸዉን ዝንባሌ በትክክል አዉቀዉት ነበር ማለትም ያሳስታል።

ለሙባረክ አገዛዝ በቢሊዮን የሚቆጠር ዶላር ከማንቆርቆር እስከ ሁለንተናዊ ፖለቲካዊ ድጋፍ የሚሰጡት የምዕራባዉያን ሐገራት በጣሙን የዋሽንግተን መሪዎች የሙባረክን ሥርዓት ከሙባረክ እኩል፥የግብፅን ሕዝብ በጣሙን የወጣቱን ማሕበረ፥ፖለቲካ-ምጣኔ ሐብታዊ ችግር፥ምናልባትም ፍላጎት-መፍትሔዉን ከየትኛዉም አዋቂ በላይ አያዉቁቱም ማለት በርግጥ ጅልነት ነዉ።

የአገዛዙ አፈና፥ መረን የለቀቀዉ ሙስና፥ የኑሮ ዉድነት፥ ሥራ አጥነት ያስመረረዉ የግብፅ ወጣት የካይሮ፥ የአሌክሳንደሪያ፥ የስዌዝን አደባባዮች ማጥለቅለቅ በጀመረበት ሰሞን ግን ልክ እንደ ሙባረክ ሁሉ የዋሽንግተን ሹማምንትም የሕዝቡን ጥያቄ በትክክል ያወቁት አልመስሉም ነበር።ወይም በትክክል የሚያዉቁትን ማሳወቅ አልፈለጉም።

ከሳምንታት በፊት የቱኒዝያ ወጣቶች የቤን አሊ አገዛዝ የሚፈፅምባቸዉን ግፍ-በደል በመቃወም እራሳቸዉን ባደባባይ እያቃጣሉ ብሶት ምሬታቸዉን ሲገልፁ፥ ነፍጥ ከታጠቀዉ የአገዛዙ ጦር ጋር ሲጋፈጡ የቅድሞዋ የቱኒዚያ ቅኝ ገዢ የፈረንሳይ መሪዎች ቤን ዓሊ የሕዝቡን አመፅ የሚደፈልቁበትን አይደልምመሳሪያ ለማቀበል ቃል ይገቡ ነበር።

የፈረንሳይዋ ዉጪ ጉዳይ ሚንስትር ሚሼለ አሊዮት-ማሪ የቤን ዓሊ አገዛዝ ቀጣይነትን ለማረጋገጥ ድጋፍ ለመስጠት ቃል እንደገቡት ሁሉ የግብፅ ወጣቶች አመፅ ሕዝባዊ መልክና ባሕሪ መያዝ በመጀመረበት ባለፈዉ ጥር ሃያ-አምስት የዩናይትድ ስቴትስዋ ዉጪ ጉዳይ ሚንስትር ሒላሪ ክሊንተን «የሙባረክ መንግሥት የተረጋጋ እና አስተማማኝ ነዉ-»አሉ።በሳምንታት ልዩነት ዉስጥ የፓሪሶችን ሥሕተት ዋሽንግተኞች ደገሙት።ክሊንተን ከዋሽግተን ሥለ ሙባረክ መንግሥት የተረጋጋነት ሲናገሩ የሙባረክ ታጣቂዎች በተለይ የስዌዝና የአሌክሳንደሪያ ሠልፈኞችን ይገድሉ ነበር።የስልክ፥ ኢንተርኔት አገልግሎቶችን ዘግተዉ ነበር።

ጥር-ሃያ ሰባት ክሊንተን ሌላ መግለጫ ሰጡ።

«የግብፅ ፖሊስና ፀጥታ አስከባሪዎች በተቃዉሞ ሠልፈኞች ላይ የወሰዱት ሐይል እርምጃ በጣም አሳስቦናል።የግብፅ መንግሥት የፀጥታ ሐይሎቹን ለመቆጣጠር አቅሙ የፈቀደዉን እንዲያደርግ እንጠይቃለን።የዚያኑ ያክል ተቃዉሞ ሠልፈኞቹም ከግጭት መታቀብ እና እራሳቸዉን በሰላማዊ መንገድ መግለፅ አለባቸዉ።»

ክሊንተን ያሉትን ባሉ ማግስት የአደባባዉን ሰልፍ ከመሩት ወጣቶች አንዱ መሐመድ አብዱል ኤል ሔታ እንዳለዉ የዋሽግተኖች አቋም ወይም የክሊንተን መግለጫ ለግብፅ ሕዝብ በጣሙን ለወጣቶች አለማወቅ፥ ሥሕተት ወይም ቸልተኝነት ብቻ አልነበረም።ዋሽንግተኖች ባለቀ-ሠአትም ከሙባረክ ጎን የመቆማቸዉ ምልክት፥የግብፅ ሕዝብ ጨካኝ ገዢዎቹን ለማስወገድ በአመፁ ከመፅናት ባለፍ ከማንም ምንም ድጋፍ ያለማግኘቱ ፍንጭ ጭምር እንጂ።

«የዩናይትድ ስቴትስዋ ዉጪ ጉዳይ ሚንስትር የሙባረክ ሥርዓት የተረጋጋ ነዉ ብለዋል።የተቃዉሞ ሠልፈኛዉ ግን ከግጭት እንዲታቀብ ተናግረዋል።ሥለዚሕ እስከምናሸንፍ ድረስ በሠላማዊ የተቃዉሞ ሠልፋችን እንቀጥላለን።አደባባዮቹ የኛ ናቸዉ።»

በርግጥ ፀኑ።የታሕሪር አደባባይ፥ የካይሮ፥ አሌክሳንደሪያ፥ የሲዌዝ አደባባይ-አዉራ ጎዳኖች ድፍን ግብፅም የግብፆች ሆኑ።የሙባረክ አጋዛዝ በርግጥ አልተገረሰሰም።ሙባረክ በሰላሳ አመት ታሪካቸዉ አድርገዉት የማያዉቁትን ግን ለማድረግ ተገደዱ።ምክትል ፕሬዝዳት ሾሙ።ካቢኔያቸዉን ሽረዉ ሌላ ሾሙ። የፓርቲያቸዉን መሪነት ለቀቁ።ከስምንት ወራት በሕዋላ ቢሆንም ሥልጣን እንደሚለቁ አስታወቁ።

«ከትናንት ወዲያ ትንሽ ተጠራጥሬ ነበር።ዛሬ ግን ከእንግዲሕ ለየትኛዉም ተቋም፥ ለተቃዋሚዉ ይሁን፥ ለጦር ሐይሉ ወደ ኋላ ማፈግፈግ የሚቻል አይመስለኝም።አሁን ሙባረክ በርግጥ መሰናበት አለባቸዉ።»

ለሙባረክ፥ ለደጋፊ፥ ታማኞቻቸዉ፥ ለአገዛዛቸዉ ተጠቃሚዎችም የሕዝቡ ብሶት፥ ምሬት
ፍላጎት፥ ፍላጉትን ገቢር ለማድረግ የነበረዉ ቁርጠኝነት፥ የአዋቂዎች ምክር-አስተያየትም ልክ እንደ ከዚሕ ቀደሙ ሁሉ ሰሞናዊ ጫጫታ አይነት ነበር።የካይሮ ገዢዎች የማፈኛ መዋቅሮቻቸዉን አቅም፥ የፖሊስ ጦር ሐይላቸዉን ዝንባሌ በትክክል አዉቀዉት ነበር ማለትም ያሳስታል።

ለሙባረክ አገዛዝ በቢሊዮን የሚቆጠር ዶላር ከማንቆርቆር እስከ ሁለንተናዊ ፖለቲካዊ ድጋፍ የሚሰጡት የምዕራባዉያን ሐገራት በጣሙን የዋሽንግተን መሪዎች የሙባረክን ሥርዓት ከሙባረክ እኩል፥የግብፅን ሕዝብ በጣሙን የወጣቱን ማሕበረ፥ፖለቲካ-ምጣኔ ሐብታዊ ችግር፥ምናልባትም ፍላጎት-መፍትሔዉን ከየትኛዉም አዋቂ በላይ አያዉቁቱም ማለት በርግጥ ጅልነት ነዉ።

የአገዛዙ አፈና፥ መረን የለቀቀዉ ሙስና፥ የኑሮ ዉድነት፥ ሥራ አጥነት ያስመረረዉ የግብፅ ወጣት የካይሮ፥ የአሌክሳንደሪያ፥ የስዌዝን አደባባዮች ማጥለቅለቅ በጀመረበት ሰሞን ግን ልክ እንደ ሙባረክ ሁሉ የዋሽንግተን ሹማምንትም የሕዝቡን ጥያቄ በትክክል ያወቁት አልመስሉም ነበር።ወይም በትክክል የሚያዉቁትን ማሳወቅ አልፈለጉም።

ከሳምንታት በፊት የቱኒዝያ ወጣቶች የቤን አሊ አገዛዝ የሚፈፅምባቸዉን ግፍ-በደል በመቃወም እራሳቸዉን ባደባባይ እያቃጣሉ ብሶት ምሬታቸዉን ሲገልፁ፥ ነፍጥ ከታጠቀዉ የአገዛዙ ጦር ጋር ሲጋፈጡ የቅድሞዋ የቱኒዚያ ቅኝ ገዢ የፈረንሳይ መሪዎች ቤን ዓሊ የሕዝቡን አመፅ የሚደፈልቁበትን አይደልምመሳሪያ ለማቀበል ቃል ይገቡ ነበር።

የፈረንሳይዋ ዉጪ ጉዳይ ሚንስትር ሚሼለ አሊዮት-ማሪ የቤን ዓሊ አገዛዝ ቀጣይነትን ለማረጋገጥ ድጋፍ ለመስጠት ቃል እንደገቡት ሁሉ የግብፅ ወጣቶች አመፅ ሕዝባዊ መልክና ባሕሪ መያዝ በመጀመረበት ባለፈዉ ጥር ሃያ-አምስት የዩናይትድ ስቴትስዋ ዉጪ ጉዳይ ሚንስትር ሒላሪ ክሊንተን «የሙባረክ መንግሥት የተረጋጋ እና አስተማማኝ ነዉ-»አሉ።በሳምንታት ልዩነት ዉስጥ የፓሪሶችን ሥሕተት ዋሽንግተኞች ደገሙት።ክሊንተን ከዋሽግተን ሥለ ሙባረክ መንግሥት የተረጋጋነት ሲናገሩ የሙባረክ ታጣቂዎች በተለይ የስዌዝና የአሌክሳንደሪያ ሠልፈኞችን ይገድሉ ነበር።የስልክ፥ ኢንተርኔት አገልግሎቶችን ዘግተዉ ነበር።

ጥር-ሃያ ሰባት ክሊንተን ሌላ መግለጫ ሰጡ።

«የግብፅ ፖሊስና ፀጥታ አስከባሪዎች በተቃዉሞ ሠልፈኞች ላይ የወሰዱት ሐይል እርምጃ በጣም አሳስቦናል።የግብፅ መንግሥት የፀጥታ ሐይሎቹን ለመቆጣጠር አቅሙ የፈቀደዉን እንዲያደርግ እንጠይቃለን።የዚያኑ ያክል ተቃዉሞ ሠልፈኞቹም ከግጭት መታቀብ እና እራሳቸዉን በሰላማዊ መንገድ መግለፅ አለባቸዉ።»

ክሊንተን ያሉትን ባሉ ማግስት የአደባባዉን ሰልፍ ከመሩት ወጣቶች አንዱ መሐመድ አብዱል ኤል ሔታ እንዳለዉ የዋሽግተኖች አቋም ወይም የክሊንተን መግለጫ ለግብፅ ሕዝብ በጣሙን ለወጣቶች አለማወቅ፥ ሥሕተት ወይም ቸልተኝነት ብቻ አልነበረም።ዋሽንግተኖች ባለቀ-ሠአትም ከሙባረክ ጎን የመቆማቸዉ ምልክት፥የግብፅ ሕዝብ ጨካኝ ገዢዎቹን ለማስወገድ በአመፁ ከመፅናት ባለፍ ከማንም ምንም ድጋፍ ያለማግኘቱ ፍንጭ ጭምር እንጂ።

«የዩናይትድ ስቴትስዋ ዉጪ ጉዳይ ሚንስትር የሙባረክ ሥርዓት የተረጋጋ ነዉ ብለዋል።የተቃዉሞ ሠልፈኛዉ ግን ከግጭት እንዲታቀብ ተናግረዋል።ሥለዚሕ እስከምናሸንፍ ድረስ በሠላማዊ የተቃዉሞ ሠልፋችን እንቀጥላለን።አደባባዮቹ የኛ ናቸዉ።»

በርግጥ ፀኑ።የታሕሪር አደባባይ፥ የካይሮ፥ አሌክሳንደሪያ፥ የሲዌዝ አደባባይ-አዉራ ጎዳኖች ድፍን ግብፅም የግብፆች ሆኑ።የሙባረክ አጋዛዝ በርግጥ አልተገረሰሰም።ሙባረክ በሰላሳ አመት ታሪካቸዉ አድርገዉት የማያዉቁትን ግን ለማድረግ ተገደዱ።ምክትል ፕሬዝዳት ሾሙ።ካቢኔያቸዉን ሽረዉ ሌላ ሾሙ። የፓርቲያቸዉን መሪነት ለቀቁ።ከስምንት ወራት በሕዋላ ቢሆንም ሥልጣን እንደሚለቁ አስታወቁ።

ፕሬዝዳት ሩዘቬልት የጀርመን ናትሲ ፋሽስቶችን የተዋጉ፥ ያሸነፉት፥ አይዘናወር ኮሪያ ልሳነ ምድር የፒዮንግ-ዮንግ፥ የሞስኮ ቤጂንግ ኮሚንስቶችን የተዋጉት፥ጆን ኤፍ ኬኔዲ-ኩባ ላይ ለመዋጋት የዛቱት፥ ኒክስነን ቬትናም የተዋጉት-ዲሞክራሲን የሚረግጡ አምባገነናዊ ሥርዓቶችን ለማስወገድ በሚል ነበር።ፕሬዝዳት ሮናልድ ሬጋን እንደዘመናቸዉ ፈሊጥ በርሊን ድረስ መጥተዉ የሶቬት ሕብረቱ አቻቸዉ የበርሊን ግንብን እንዲያፈርሱ የተማፀኑት የምሥራቅ አዉሮጳ ሕዝብ ፍላጎት በኮሚንስቶች ሥርዓት እንደታፈነ መቀጠል የለበትም በሚል ምክንያት ነበር።

«አቶ ጎርቫቾቭ እባክዎ ይሕን ግንብ ይናዱት»

ሬጋን የተወለዱበት መቶኛ አመት ሊከበር ሰወስት ቀን ሲቀረዉ ባለፈዉ ሐሙስ የዩንይትድ ስቴትሱ ፕሬዝዳት ባራክ ኦባማ ለግብፅ ሕዝብ የአደባባይ ጩኸት-ጥያቄ እንደ ልዕለ ሐያል የዲሞክራሲ ቀንዲል ሐገር ትልቅ ፖለቲከኛ እቅጩን መልስ ከመስጠት ይልቅ እንደ አል-አዛሐር መሻኢኮች፥ ዶዓ-ሶላት፥ እንደ አሌክሳንደሪያ ቀሳዉስት ፆም-ፀሎት ይሉ ገቡ።

«የግብፁ አመፅ-ግጭት እንዲቆም፥ የግብፅ ሕዝብ መብትና ፍላጎት እንዲሳካ፥ በግብፅም በመላዉ አለምም አዲስ ዘመን እንዲበርቅ እንፀልያለን።»

የሕዝቡ አመፅ ሲግም፥ የአገዛዛቸዉ ጠንካራ መሠረት ሲፍረከረክ ግን የዋሽንግተን ብራስልሶች አቋምም የግድ መቀየር ነበረበት።ተቀየረ ወይም የተቀየረ መሰለ።አርብ ብራስልስ።

«እዉነቱን ለመናገር እስካሁን የተወሰዱት እርምጃዎች የግብፅ ሕዝብ ፍላጎትን አላሟሉም።ዛሬ እኛ የአዉሮጳ መሪዎች ሥርዓት የጠበቀ ሽግግር እንዲኖር ለመርዳትና ለማገዝ ዝግጁነታችንን ማሳየት፥ በጋራ መቆም እና ማድረግ አለብን።እንደሚመስለኝ ከሁሉም ይበልጥ ዛሬ በካይሮ አደባባዮች የሚፈፀመዉን በመንግሥት የተደገፈ ግጭትና የሐይል እርምጃ ወይም ገንዘብ የሚከፈላቸዉ ጋጠ ወጦች ተቃዉሞ ሰልፈኞችን መደብደባቸዉን ስናስተዉል ግብፅ እና ገዢ ሥርዓቷ የቀራቸዉን ታማኝነት ወይም ብሪታንያን ጨምሮ ከምዕራብ የሚገኙትን ድጋፍ እንደሚያጡ ግልፅ መልዕክት መተላለፍ አለበት።»

የብሪታንያዉ ጠቅላይ ሚንስትር ዴቪድ ካምሩን።የግብፅ አደባባዮች በሕዝብ እንደ ተጨናነቁ ነዉ።ሰልፈኛዉ «የስንብት ቀን ባለዉ» በአርቡ የተቃዉሞ ሠልፉ ያነሳዉ ጥያቄም ከጥር ሃያ አምስት ጀምሮ ካነሳዉ የተለየ አልነበረም።አንድ ነዉ።ሁሲኒ ሙባረክ ከስልጣን ይዉረዱ።

አርብ ካይሮ እና ብራስልስ ሲመሽ ዋሽንግተን ነጋ።ፕሬዝዳት ባራክ ኦቦማ።የሐሙሱ አልነበሩም።ግብፅ መለወጥ አለባት አሉ።አሁን።

«የግብፅ የወደፊት እጣ ፈንታ በሕዝቧ ይወሰናል።የሽግግር ሒደቱ አሁኑኑ መጀመር እንዳለበትም ግልፅ ሊሆን ይገባዋል።ሽግግሩ ለግብፅ ሕዝብ ሁለንተናዊ መብቶችን የሚያስከብር፥ ከነፃና ፍትሐዊ ምርጫ የሚያደርስ መሆን አለበት።የዚሕ ሽግግር ዝርዝር አፈፃፀም በግብፃዉያን መረቀቅ አለበት። እንደተረዳሁት አንዳድ ዉይይቶች ተጀምረዋል።»

አሁን ይባል እንጂ ሽግግሩ መቼና እንዴት እንደሚሆን በርግጥ አይታወቅም።ምዕራቡ አለም ሠልፉን ከግብፅ ሕዝብ ጎን ለማስተካከል መጣሩን መግለፁ ግን እየተደጋጋመ ነዉ።ቅዳሜ።የጀርመንዋ መራሔተ መንግሥት አንጌላ ሜርክል።

«እኛ የአዉሮጳ ሕብረት አባላት ትናንት በጋራ እንዳልነዉ ሕዝባዊዉን ጥያቄ ለመርዳት አዲስ ወዳጅነት መመሥረት አለብን።እኛ የሰሜን አፍሪቃ ጎረቤቶች ነን።»

ፕሬዝዳት ገማል አብድናስር በ1960ዎቹ ፥-ሕዝባችን ሐገር ወዳድ ነዉ።በሚሊዮን የሚቆጠር ዶላር ከምትሰጡት አንድ የድጋፍ ቃል ብትነግሩት ይመርጣል አይነት ብለዉ ነበር።ናስር በከፈቱት ቀዳዳ ገብተዉ፥ ሳዳት ካደላደሉት መንበር ሰላሳ አመታት የተቀማጠሉበት ሙባራክ በሕዝባቸዉ ግፊት መሰናበታቸዉ የርግጥ ያሕል እዉነት እየመሰለ ነዉ።ቤን ዓሊ አንድ፥ ሙባራክ ሁለት፥ የሚባልበት፥ አሰላሹ የሚጠየቅበት ጊዜም ሩቅ አይመስልም።ሕዝባዊዉ አመፅ የምዕራቡ መርሕ፥ የአረብ-አፍሪቃ ሥርዓት ሙሉ በሙሉ መቀየር አለመቀሩን ግን ያዉ ጊዜ ነዉ ነጋሪዉ።
SELAM + FIKR MINGIZEAM LENANTE YIHUN
ማህቡብ
ኮትኳች
ኮትኳች
 
Posts: 264
Joined: Thu Aug 18, 2005 3:17 pm

Postby ሱልጣን » Thu Feb 10, 2011 6:57 am

ሀሙስ ፌብሩዋሪ 10/2011
የግበጽ አመጽ ከተቀጣጠለ 17 ኛውን ቀን የያዘ ቢሆንም የሚቀጥሉት ከሳምንት ያነሱ ቀናት እጅግ አስቸጋሪ እና ፈታኝ:በግብጽ ታሪክ ደግሞ ለሌሎች ህዝቦች ምሳሌ ሊሆን የሚችል ነገር እንደሚከሰት ይጠበቃል:
የሙባረክ መንግስት በጣዕረሞት ላይ እያለ ሌሎችም አብረውት እንዲሞቱ ስሌቱን እየቀመረ ባለበት ወቅት ለህዝብ ይቆማሉ የተባሉት ወታደሮቹ በመቶ ወይም በሽ የሚቆጠሩ ሰልፈኞችን ወደ ሚስጥራዊ እስር ቤት በመውሰድ እያሰቃዩ እንደሆነ ዘ ጋርዲያን የሚባለው ሚዲያ የአይን ምስክሮችን ጠቅሶ ዘግቧል::
የ እስራኤል እና የሜሪካ ታማኝ የሙባረክ ምክትል ሱለይማን የግብጽን ወታደር ለማዘዝ ባደረጉት ሙከራ ከወታደሮች አዛዥ ጋር ያለመግባባት እንደተፈጠረ ቢነገርም ቅሉ ወታደሩ ግን የቲቪ ጣቢያውን እና ቤተመንግስቱን ለመጠበቅ ቆርጦ የተነሳ ይመስላል::
የግብጽ ህዝብ ግን ዛሬ ሌላ ቀን ነው በማለት ሰላማዊ ተቃውሞው እንደ ሰደድ እሳት በተለያዩ ቦታዎች እየተዛመተ ባለበት ወቅት ወታደሩ የመንግስትን የስልጣን ቆይታ ለማራዘም እና ሰልፈኞችን ለመበተን አንዳንድ እርምጃዎች ቢወስድ አደገኛ የሆነ ደም መፋሰስ ከመከሰቱ ውጭ የሙባረክ መንግስት እድሜ ያጥር እንደሆን እንጅ ሌላ ተአምር እንደማይፈጠር ይገመታል::
አሜሪካ ምንጊዜም ቢሆን ዘላቂ ወዳጅ ወይም ጠላት የሌላት በመሆኑ እንደጥቅሟ ሁኔታ የምትንከረባበስ ስለሆነች የፖለቲካው ማእበል ወደ ሀገራቸው እንዳይዛመት የሚፈሩ አንዳንድ የአረብ መንግስታት የሙባረክ እድሜ እንዲረዝም የማይፈነቅሉት ድንጋይ የለም::ምክንያቱም የ እሱ እድሜ ማጠር የነሱን እድሜ እጅግ በጣም ያሳጥረዋል እና!!
የግብጽ ህዝብ በወታደሩ የነበረው እምነት እንደተጠበቀ ቢሆንም የሰልፈኞች በነጻነት አደባባይ ብቻ መወሰን ወታደሩን ረጅም ትንፋሽ እንዲኖረው ያደረገ ሲሆን ወታደሩ ለመወሰን በሚገደድበት ሁኔታ አመጹ ካልቀጠለ በስተቀር የመንግስትን ቀዝቃዛ ጦርነት ስልት መከተሉ እንደማይቀር ይገመታል....
ወታደሩ ለሀገር እና ለወገን የሚያስብ ከሆነ እስከ አሁን ይህን ያክል መታገስ እንዳልነበረበት ብዙዎቹ ይናገራሉ::
ሁስኒ ሙባረክ እና ቢጤዎቻቸው ይህ አፋኝ ስር አት ቢወገድ ለፍርድ እንደሚቀሩ ስለሚያውቁ አጥፍቶ ለመጥፋት የማይወጥኑት ተንኮል እንደሌለ ህዝቡ ተረድቷቸዋል::
በአንድ ነገር ግን እርግጠኛ መሆን ይቻላል..የግብጽ ህዝብ የራሱን ዜጋ ማታለል እንደማይችል እና ብልጥ ለብልጥ አይን ፍጥጥ እንደሆነ .....ህዝቡ ወደቤቱ ቢመለስ የሚጠብቀውን ነገር ስለሚያውቅ የአለም ህዝብ እያየው ለነጻነት ሲል በካሜራ ፊት ሞትን መምረጡ አጠያያቂ አይሆንም::
ምንጊዜም ቢሆን ድል በምኞት አይገኝም::
የግድ መስዋ እትነት ያስፈልጋል...ይህንን ደግሞ የግብጽ ህዝብ ጠንቅቆ ያውቃል::ረብሻውንም ቢሆን መንግስት ወይም ወታደሩ እስኪጀምረው እንጅ እንደሰደድ እሳት ተጥለቅልቆ አገዛዙን ለአንዴ እና ለመጨረሻ ጊዜ ድባቅ መምታቱ እና ለፍርድ ማቅረቡ አይቀርም::
የንጉሱ ሀብት እስከ ሰባ ቢሊዮን በሚገመትበት በአሁኑ ወቅት የግብጽ ጠቅላላ እዳ 40 ቢሊዮን ብቻ በመሆኑ በመንግስት ስም የአንድ ገለሰብ ግማሽ ንብረት የሀገሪቱን ጠቅላላ እዳ መሸፈን መቻሉ የሚገርም ነው::
አውሮፓ እና አሜሪካ ለፍሪካ ህእግሮች በተለይም ለሙስሊሙ አለም ደንታ የሌላቸው በመሆኑ ሁሉም ድምጻቸውን አጥፍተዋል....ምክንያቱም ሁሌም አላማቸው ሙስሊሙ ከሙስሊሙ ቢባላ እና ህዝቡ በጦርነት እንዲቀነስ የዘወትር ፍላጎታቸው ነው::
በሚቀጥሉት ከሳምንት ባነሱ ቀናት የግብጽ አብዮት ተቀጣጥሎ እና በስራ ማቆም አድማ ታጅቦ ሰልፈኞችን ለመበተን የሚደረገው ሙከራ በ እሳት ላይ ቤንዚን ጭሮ የነገሮች ፍፃሜ እንደሚቃረብ እና ድሉ ለግብጽ ነጻ አውጭ ሰልፈኛ እንደሚሆን ይጠበቃል::
ወደ ጉዞው ማጠቃለያ ምእራፍ እየተቃረብን እንገኛለን.......ቀጣዩ ጥያቄ ከግብጽ በኍላ.....ተረኞች እነማን ይሆናሉ.....?
ለግብጽ ህዝብ ሰላም እና መረጋጋትን :እድገት እና ብልጽግናን እንመኛልን ::
HONESTY~TRUSTWORTHINESS~SINCERITY
''Whoever is carless with in small matters....
Cannot be trusted in important affairs''
ሱልጣን
ኮትኳች
ኮትኳች
 
Posts: 260
Joined: Wed Sep 03, 2003 11:38 am

Postby ሀዲስ » Sat Feb 12, 2011 10:41 am



በቱኒስና በግብፅ ለተካሂዱት አመጾች መንስኤ የሆኑት ግንባር ቀደሞቹ ራሳቸው መሪዎቿ ናቸው - ቢን ዓሊና ሙባረክ:: ከዚያም ውጭ ያሉ የፓለቲካ: የኢኮኖሚ: የሚሊታሪና የባሕል ተፅዕኖ አድራጊዎች ወይም በሶሻሊስት ቋንቋ አድሏዊ ኢምፔሪያሊስቶች!!

የነፃነት ጮራ ከቱኒስ ፈንጥቃ ግብፅን አድምቃ.............የትም አላበቃ እያለች አልጀሪያንና የመንን ገልመጥ....ገልመጥ እያደረገች ነው:: ወደየት ትመነጥቅ ይሆን? ሁ ኢዝ ኔክስት? ግብፃውያን ለመላው ዓለም መሪዎች በተለይም ለጨቋኝና አምባገነን አስተዳደር ትርጉም ያለው መልዕክት አስተላልፈዋል:: ደስ የሚለው: ይህ መልዕክት ያልገባው ደለንቱ የለም:: ምንም እንኳን አልጠግብ ባዩ አጋሙዳው ሙባረክ ለመረዳት አስራ ስምንት ቀናት ቢፈጁበትም! የአገር መሪን ሕዝብ ሥልጣን እንደሚያስጨብጠውና ሕዝብ እንደሚያሰናብተው ግብፃውያኑ በገሃድ አሳይተዋል:: ሥንብቱ በክብር ወይም በውርደት ሊሆን እንደሚችልም አስተምረዋል:: የአሜሪካ የአሻንጉሊት መንግስት ጤና ይስጥልኝ.........አዲዮስ!
ይህ ዓለም በአንክሮ የተከታተለው የአስራ ስምንት ቀናት ታሪካዊ የተቃውሞ ሰልፍ: የሶስት መቶ ሰዎችን ሕይወት አሳልፎ አንድ ቁሳዊ የሆነ ለውጥ አስገኝቷል:: ለውጥ ህይወትን የመሰለ ክቡን ነገር መስዋዕት ማድረግ ይጠይቃል::

የግብፅ ሕዝብ አንድነቱ የተናጋና በጥልቅ ርዕዮተዓለም የተከፋፈለ ሕብረተሰብ አይደለም:: አንድነት ኃይል መሆኑን ተረድቷል:: አንድነት ደግሞ የተቀራረበ የሕዝብ አመለካከት: መተሳሰብና ቆራጥነትን ይጠይቃል:: ሌላው ትልቁ ምሳሌ የጦር ሠራዊቱ አቋምና በዚህ አስቸጋሪ ወቅት የተጫወተው ሚና ነው::

ይህ የአመጽ ለውጥ እየተምዘገዘገ ሊቢያን ሽው አድርጎ አልጀሪያን ሳይነቀነቅ አይቀርም:: የአልጀሪያው ዓብዱልዓዚዝ ባትሪውን ሪቻርጅ አድርጎ በተጠንቀቅ ቆሟል:: ወደ ምስራቅ ተወንጭፎ ሱዳን ላይ አጉረምርሞ የመን ደርሷል:: የየመኑ ዓሊ ዓብደላ ሣለህ ጎማው ሣይተነፍስ ቀደም ብሎ አንዳንድ ምርጣ ምርጥ የለውጥ ምልክቶች እያስተዋወቀ ይገኛል:: ለነገሩ ሕዝቡም ብልጣ ብልጥ ነው:: አዲስ የነፃነት ዋዜማ ይሁንልን:: አሜሪካንን ኧረ ስለ ጉልበታችሁ አምላክ ብለን ሳንለማመጥ ኖረን በሠላም የምንሞትበትን ጊዜ ያምጣልን::

ሳዑዲ ዐረቢያ በእንግድነት :? ተሸሽገው የሚኖሩ የቀድሞው የፓኪስታኑ መሪ ነዋዝ ሸሪፍና (አሁን ተመልሰዋል) እንዲሁም በቅርቡ የፈረጠጡት የቱኒስያው ዘይን ቢን ዓሊ ይገኛሉ:: ሙባረክና ሌሎችም ወደ ሳዑዲያ ማቅናቱ ይቀላቸዋል የሚል ወሬ ይናፈሳል:: ይህ ከተከሰተ በሚቀጥሉት ሁለት ዓመታት በሳዑዲ ዐረቢያ የሚገኙ የአውራ መንገዶች ሥያሜ እንደሚከተለው ሊሆን ይችላል::

ነዋዝ ሸሪፍ ደርሶ መልስ አውቶቡስ ተራ
ዓብዱል ዓዚዝ ባትሪ ቻርጀር
ዘይድ ቢን ዓሊ የቁንጅና ሳሎን
አል ሀሪሪ ኮፊ ሾፕ
ሙባረክ ፉል ቤት
ጋዳፊ ድንኳን መገጣጠሚያ
ዓሊ ዓብደላ ሣለህ ጎሚስታ
አል በሺር ዘመናዊ ሉካንዳ


ሀዲስ
ኮትኳች
ኮትኳች
 
Posts: 231
Joined: Sat Dec 18, 2004 6:29 am
Location: united states

Postby ማህቡብ » Tue Feb 15, 2011 2:47 pm

ዘመን በርቆ ዘመን ሲጠልቅ ቀሪው ታሪክ ነው


መንፈሳዊው መጽሀፍ ኢያሪኮ በጩኸት ፈረሰች አለ። ያኔ። ጥንት! ዘንድሮ የቱኒዝና የካይሮ ቤተመንግስታት በጩኸት ፈረሱ። የቱኒዙን የሳምንት የካይሮውን የ18 ቀናት ጩኸት መንግስታቱን ለግብዓተ መሬት ዳረገው።

በእርግጥ የቱኒዚያው የ23 ዓመት የቤን ዓሊ ዘመን ያከተመው ብሶት በወለደው የህዝብ ጩኸት ነው። የ30 ዓመቱ የሆስኒ ሙባረክ ወንበርም የተወገደው በህዝብ ቁጣ ነው። በ18 ቀናት ቁጣ። የፈረንጆቹ 2011 አዲስ አብዮት ይዞ ብቅ ብሏል። በእስከአሁንም ሁለት የሰነበቱ መሪዎችን አሰናብቷል። በእርግጥም 2011 ፍትህ ዲሞክራሲና ነጻነት ለተራቡ ህዝቦች የምስራች ዘመን ይዞ የመጣ መስሏል። ሰላም ጤና ይስጥልን። ቱኒዚያ ተጀምሮ ግብጽ የተጋጋመው የህዝብ ቁጣ፤ ወደ አልጄሪያና የመን ተዛምቷል። ይህ ሰሜን አፍሪካን እየናጣት ያለው አብዮት መንግስታትን ማፈናቀል ብቻ ሳይሆን ስደትንም አስከትሏል። የዕለቱ ማህደረ ዜና መነሻውን የሰሞኑ የህዝብ ቁጣ መድረሻውን የቁጣው ውጤቶች ላይ በጣሙንም የኢጣሊያዋን ደሴት ላምፔዱሳን ውጥረት ውስጥ መግባቷ ላይ አተኩሮ ጥቂት ደቂቃዎችን አብሮአችሁ ይቆያል።

በዓለማችን በስልጣን ለረጅም ዓመታት የቆዩ መሪዎች 15 ነበሩ- እስከ 2010 መጨረሻ። እስከ ባለፈው ታህሳስ ወር ድረስ። ከ15ቱ 13ቱ የሚገኙት አፍሪካ ውስጥ ሲሆን ሁለቱ በእስያ የመንንና ባህሬን የሚመሩት ናቸው። ከእነዚህ ስልጣን ጠገብ ዕድሜ ካላቸው መሪዎች የሊቢያውን ሞአመር ጋዳፊን የሚስተካከል የለም። ጋዳፊ 42ኛ ዓመታቸውን ይዘዋል- ቤተመንግስት ከገቡ። የኢትዮዽያው ጠቅላይ ሚኒስትር መለስ ዜናዊ 20 ዓመታትን በማስቆጠር ከ15ቶቹ ውስጥ ገብተዋል። በእርግጥ 2011 ያቀጣጠለው የህዝብ ቁጣ በስልጣን ላይ ዓመታትን በከረሙት ላይ ያነጣጠረ መስሏል። በእስከአህንም 2ቱን አስወግዷል። የቱኒዚያው ቤን ዓሊና የግብጹ ሆስኒ ሙባረክ ከተጣበቁበት፤ የሙጥኝ ብለው ከሰነበቱበት መንበራቸው ተፈናቀሉ። የሁለት መሪዎች ወግ--የቤን አሊና ሙባረክ። የሁለት ሀገራት ወግ --የቱኒዚያና ግብጽ። የሁለት ከተሞች ወግ--የቱኒዝና ካይሮ። ዓለም 2011 ከገባ ጀምሮ የነጻነትን ታላቅነት ሲመሰክር ሰነበተ። የህዝብ ቁጣ በእርግጥ ታሪክ ሰርቷል። ኢያሪኮ በጩኸት ፈረሰች። ቱኒዝናካይሮም የተጣበቃቸውን በጩኸት ተላቀቁት።

የቱኒዚያውና የግብጹ ህዝባዊ አመጾች ከሚያለያያቸው ይልቅ የሚያመሳስላቸው ይልቃል። ሁለቱም የህዝብ ብሶች የወለዳቸው ናቸው። ሁለቱም በአንድ መሪ፤ በአንድ ፓርቲ ለዓመታት መመራት ያንገሸገሻቸው ናቸው። ሁለቱም በተቃዋሚ ፓርቲዎች ያልተመሩ፤ ድንገት የህዝብ ቁጣ ፈንድቶ የተቀሰቀሱ የተቀጣጠሉ ናቸው። ወጣቶች የመሩዋቸው፤ ሴቶች አደባባይ ወጥተው የከረሙባቸው፤ ህጻናት ድምጻቸውን ያሰሙባቸው አመጾች ነበሩ። በእርግጥ ሁለቱም ውጤታማ ሆነዋል። ቱኒዚያ ላይ ሲጀመር ወደ ሌሎች ሀገራት ላሊዛመት እንደሚችል ፍንጭ ነበረው። 23 ዓመት በስልጣን የቆዩት ቤን ዓሊ እግሬ አውጪኝ ብለው ሲፈረጥጡ፤ ካይሮ ትኩሳቱ ጀመራት። ማህበራዊ የመገናኛ ብዙሃን በሆኑት ፌስ ቡክና ቲውተር የተጠራሩት ግብጻውያን እንደ ቱኒዚያዎቹ ይሳካላቸዋል ብሎ ያስበ፤ የገመተ ብዙም አልነበረም። ካይሮ ቱኒዝን አይደለችም፤ ሙባረክም ቤን ዓሊን አይደሉም የሚሉ ድምጾች ጎልቶው ሲወጡ፤ የካይሮው ታሂር አደባባይ ታሪክ ሊሰራበት የመጀመሪያው ቀን ላይ አረፈ። ጥር 25 2011 ዕለቱ ማክሰኞ። የቱኒዚው ጩኸት ካይሮ ላይ ተደገመ።

በእርግጥ የመጀመሪዎቹ ቀናት የሙባረክን ወንበር የሚነቀንቁ አይመስሉም ነበር። በካይሮ፤ በአሌክሳንድሪያ፤ በስዌዝ፤ እና በሌሎች የግብጽ ከተሞች ማክሰኞ የተጀመረው ህዝባዊ ቁጣ ከፖሊስ ጋር እያጋጨ እያላተመ ዘለቀ። ሙባረክ ከስልጣናቸው እንደማይወረዱ ግን በመጪው ምርጫ እንደማይወዳደሩ ገለጹ። በዘመነ ስልጣናቸው ያልነበረ የምክትል ፕሬዝዳንት መዋቅር አውጥተው የደህንነት ሃላፊያቸውን ማስቀመጣቸውን ገለጹ። የሙባረክ እርምጃ የታህሪር አደባባይን ከጩኸት የሚያስጥለው አልነበረም። አንድ ሳምንት አለፈ። ሁለተኛውም ተከተለ። ሙባረክም ከቤተመንግስት ህዝቡም ከታሂር አደባባይ ንቅንቅ አላሉም። የግብጽ ጦር ኃይል፤ ተቃውሞውን ያስተነፍሳል ተብሎ ሲጠበቅ በተቃራኒው የገለልተኝነት ሚናው ይዞ፤ ሙዚየሞችን ከመጠበቅ አንዳንዴም ተቃዋሚ ሰልፈኞችን ከሙባረክ ደጋፊዎች ጥቃት ሲከላከል ታየ። በእርግጥ የግብጽ ጦር ሚና ለአፍሪካውያን መሪዎች ትምህርት የሰጠ ነው የሚል አስተያየት ከየቦታው ይሰማ ነበር። የሆኖ ሆኖ ዓለም የህዝብ ጉልበት የቱን ያህል ጠንካራ፤ አንዲም ከተነሳ የሚበግረው እንደሌለ ከመመስከር ሌላ ምንም ያለው የለም። የሁለተኛው ሳምንት መጨረሻ አርብ እንደ ብዙዎች ግምትና ተስፋ ሙባረክ የቤን ዓሊ እጣ ፈንታ ይገጥማቸዋል የሚል ነበር። ሰልፈኞቹም ዕለቱን ስም ሰጥተው አደባባይ ወጡ።ዴይ ኦፍ ዲፓርቸር- የስንብት ቀን- ለሙባረክ። ሆኖም ዕለቱ እነደስሙ ሙባረክ የተሰናበቱበት አልሆነም። እሳቸው ከመላው ዓለም የሚደርስባቸውን ግፊት ችላ ብለው ወንበሩን የሙጥኝ ማለት መወሰናቸውን እንጂ እንደሚሰናበቱ ፍንጭ እንኳን አልሰጡም። በመንግስታቱ ድርጅት ሪፖርት የ300 ሰዎች ህይወት የጠፋበት፤ በሺዎች የሚቆጠሩ የቆሰሉበት አመጽ ግን ቀጠለ።

የዓለም ዓይንና ጆሮ ወደ ካይሮ በተለይም ታህሪር አደባባይ ላይ ካነጠጠረ ሶስተኛ ሳምንቱን ያዘ። ሙባረክ ለህዝቡ ጥሪ ጀርባቸውን እንደሰጡ ናቸው። 17ኛው ቀን ምሽት ላይ ለህዝባቸው ንግግር እንደሚያደርጉ ሲታወቅ የሰልፈኞች እምነት ዓለም በሞላ የጠበቀው የሙባረክን የስንብት ንግግር ነበር። ማምሻውን በመንግስት ቴሌቪዥን ብቅ ያሉት ሙባረክ ግን እስከመጪው መስከረም ስልጣን እንደማይለቁ፤ ዳግም ገለጹ። በታህሪር አደባባይ ቤቱን ትቶ ድንኳን ተክሎ በተቃውሞና ጩኸት የከረመው ሰልፈኛ ዳግም በቅጣ ተቀጣጠለ። እውነትም ቱኒዚያ ግብጽ አይደለችም። ሙባረክም ቤን ዓሊን አይደሉም።

…………………

18ኛው ቀን ዓርብ። የሙባክ የሀሙስ ምሽት እምቢኝ ከወንበሬ ንግግር የፈጠረው ንዴት ታህሪር አደባባይን፤ የአሌክሳድሪያንና ጎዳናዎች፤ የስዌዝን መንገዶች በጩኸት አመሰው። በእርግጥ 18ኛው ቀን የሙባረክ የስንበት ዕለት ይሆናል ብሎ የጠበቀ አልነበረም። ከተሾሙ ሁለት ሳምንት ያልሞላቸው ምክትል ፕሬዝዳንቱ በቴሌቪዥን መስኮት ብቅ ብለው የ30 ዓመቱ የሙባረክ ሩጫ ማክተሙን ገለፁ።

አዲዮስ ሙባረክ። ታህሪር አደባባይ በደስታ ጩኸት ቀለጠች።


ሞሃመድ ሰይድ ሆስኒ ሙባረክ። በእርግጥ ስልጣኑን ሲይዙ በታሪካዊ አጋጣሚ ነበር። 30 ዓመት ከሰነበቱበት መንበራቸውም ሲፈነገሉ በታሪካዊ የህዝብ ዓመጽ ሆኖ ያለፈው ዓርብ ተመዘገበ። አሁን በዚያ የካይሮ ቤተመንግስት ሙባረክ የሉም። ለጦር ኃይላቸው ስልጣኑን አስረክበው፤ ከወንበራቸውም፤ ከካይሮም፤ ምናልባትም አሁን አሁን እንደሚጠረጠረው ከግብጽም ምድር ዱካቸው ጠፍቷል። እሳቸው ወደ ስልጣን ሲመጡ የተወለዱ፤ በመሪነት እሳቸውን ብቻ በሚያውቁ ግብጻውያን ወጣቶች ጩኸት ለአንዴና ለመጨረሻ ጊዜ ተሰናበቱ። ዓለም ከዳር እስከዳር አጀብ ሲል ነበር የሳምንቱ የእርፍት ቀናት ያለፉት። በዓመት 1 ነጥብ ሁለት ቢሊዮን ዶላር ወታደራዊ እርዳታ የምትሰጣት አሜሪካ 18ቱን ቀናት ስትንቆራጠጥ ከረመች። ከጂሚ ካርተር ጀምሮ እስከ ባራክ ኦባማ ድረስ ከ6 የአሜሪካ ፕሬዝዳንቶች ጋር እየተጨባበጡ እየተቃቀፉ የሰነበቱት ሙባረክ ያለፈው ዓርብ ታሪካዊ መፈናቀል ሲገጥማቸው አሜሪካ የህዝብ ድምጽ ሁሌም አሸናፊ ይሆናል ነበር ያለችው። ፕሬዝዳንት ኦባማ፤ ታሪክን ሲስራ ቆመን ለመመስከር በቃን አሉ።

የሙባረክን ስንብት ተከትሎ እየተሰማ ያለው አስተያየት ብዙ መልክ አለው። በተለይ ስልጣኑን የተረከበው ወታደራዊው ቡድን ሁገሪቱን ወዴት አቅጣጫ ይመራት ይሆን የሚለው ያስፈራ ያጠራጥር ጀምሯል። አሜሪካ በአደራ ስልጣኑን የተረከበው ወታደራዊ ቡድን ከእስራዔል ጋር የተደረሰው ስምምነት ተጠብቆ እንዲቆይ እንደሚያደርግ ተስፋ አደርጋለሁ ስትል የወታደራዊ ቡድን ቃል አቀባይ ስምምነቶች በሙሉ እንደተከበሩ ይቆያሉ ብሎ አሜሪካንንም እስራዔልንም የሚያረጋጋ ምላሽ ሰጥቷል።

የወታደሩ ቃል አቀባይ የግብጽ እጣ ፈንታ ያሰጋቸውና ለ18 ቀናት አደባባይ የሰነበቱት አንዳንዶች ጥያቄያቸን በሙሉ እስኪመለስ ወደቤት አንገባም ቢሉም በወታደሮች በግድ እንዲነሱ ተደርገዋል። ወታደራዊው ቡድን በእርግጥ ህዝቡ የሚፈልገው መሆኑ እንደማይቀር፤ ስልጣን ወደ ሲቪሉ አስተዳደር እንደሚሸጋገር ለማሳመን በመጣር ላይ ይገኛል።
አሁን ሁኔታዎች እያሉ ያሉ ቢመስሉም ሰሜን አፍሪካን የናጣት የህዝብ አመጽ ያስከለውና ለውና በቀጣይም ሊያስከትል የሚችለው ፈተና ማነጋገሩ አልቀረም። በእርግጥ ቱኒዚውያንም ሆኑ ግብጻውያን ፈላጭ ቆራጮቹን መሪዎቻቸውን ተገላግለዋቸዋል። የጭቆናውን ቀንበር አራግፈዋል። ሆኖም መጪው ጊዜ ያሰቡትን የፈለጉትን፤ የሞቱለትንና የደሙለትን ሊያስገኝላቸው ስለመቻሉ እርግጠኛ አይደለም። የግብጽ ጦር ቃል አቀባይ ግን ተስፋ አላቸው። ሁሉም ነገር እየተሻሻለ ይሄዳል ይላሉ።

ሰሜን አፍሪካ የፈነዳው ህዝባዊ አመፅ ቱኒዚያንና ግብጽን ለለውጥ አብቅቶ የሚቆም አልሆነም። ተረኛው ላይ በተራ ተጀምሯል። አዚያው ሰሜን አፍሪካ አልጄሪያ የቱኒዙና የካይሮው ማዕበል ይንጣት ጀምሯል። የመንም ተራው ደርሷት እየታመሰች ናት። አልጀርስ ላይ ባለፈው ዓርብ የጀመረው ተቃውሞ ተጋግሎ ፓሊስና ህዝቡ ተጋጭቷል። አልጀርስ እንደ

የዓለም ሰሞንኛ አጀንዳ ሆኖ የከረመው የህዝብ ዓመጽ የጀመረባት ቱኒዚያ ከቤን ዓሊ በኃላ መረጋጋት የሰማይ ያህል እንደራቃት አለች። ከመቼው በላይ ወጣቱ ቱኒዚያዊ እየተሰደደ ይገኛል። ባለፉት ሁለት ቀናት የኢጣሊያዋ አነስተኛ የደሴት መንደር ላምፔዱሳ በቱኒዚያውያን ወጣቶች ተጨናንቃ ሰንብታለች። መዳረሻቸውን ወደተለያዩ የአውሮፓ ሀገራት አድርገው የወጡት እነዚህ ቱኒዚያውያን በገፍ ሆነው በጀልባ ወደ ላምፔዱሳ መጉረፍ ጀምረዋል። በ27 ጀልባዎች የተሳፈሩ 2600 ስደተኞች ያለፈው ቅዳሜ ምሽት ላምፔዱሳ ደርሰዋል። የዓለም ዓቀፉ የስደተኞች ድርጅት የኢጣሊያ ተወካይ ሲሞና ሞሲያሬሊ ናቸው።

በእርግጥ የሰሜን አፍሪካው አብዮት ውጤቱ ለአውሮፓ ሀገራትም ሁነኛ ፈተና ይዞባቸው መጥቷል። በህገ ወጥ ስደተኞች ላይ ጥብቅ እርምጃ ለመውሰድ እየተነጋገረ ያለው የአውሮፓ ህብረት የሰሞኑ የስደት ጎርፍ እንዳያጥለቀልቀው በጽኑ ሰግቷል። የኢጣሊያው የሀገር ውስጥ ሚኒስትር ሮቤርቶ ማሮኒ ገና የሚመጡ ስደተኞች ከቱኒዚያ የባህር ጠረፍ እንደሚገኙ ይናገራሉ።


የኢጣሊያው የሀገር ውስጥ ሚኒስትር ያቀረቡት የመፍትሄ ሀሳብ በእርግጥ ቱኒዚያን አስቆጥቷል። እዚያው ቱኒዚያ የባህር ጠረፍ ላይ ጣቢያ ተክለን ሰራዊት አቁመን ስደቱን እንግታው የሚለው የሚኒስትሩ ሃሳብ በቱኒዚያ ዘንድ የተወሰደው በሌላ ትጉም ነው። እናም የሚንትሩን ሃሳብ ውድቅ አድርጋለች ቱኒዚያ። በእስከአሁን አራት ቱኒዚያውያንን ውሃ በልቶአቸዋል። ብዙዎች የት እንደገቡ አልታወቀም። የላፔዱሳ ፖሊስ አዛዥ የስደቱን ጉዙ እጅግ አደገኛ ይሉታል።


በእርግጥ ኢጣሊያ እነዚህ ቱኒዚያውያን የኢኮኖሚ እንጂ የፖለቲካ ስደተኞች አይደሉም ብላ በተለያዩ አከባቢዎች ልታሰፍራቸው አቅዳለች። ይሁንና ቁጥራቸው እየጨመረ በመምጣቱ የአውሮፓ ህብረት እንዲያግዛት ጠይቃለች። ህብረቱ ሌሎች ስደተኞችን መቀበል ይቅርና ቀድመው የገቡትን ፍቃድ ያልተሰጣቸውን ወደ ሊቢያ ለመመለስ እያሰበ ባለበት በዚህን ወቅት የቱኒዚያውያኑ ስደት ሌላ ራስ ምታት ሆኖበታል። አሁን የህብረቱ የውጭ ጉዳይ ሃላፊ ካትሪን አሽተን ቱኒዚያ ይገኛሉ። ዋንኛው ትኩረታቸውም ይኸው የስደተኞቹ ጉዳይ ሊሆን እንደሚችል ይጠበቃል።

ቱኒዚያ ጀመረ ግብጽ ተከተለ። በሁለቱም የተሳካ የህዝብ ዓመጽ ተካሄደ። ተረኞቹ ሀገራት ትኩሳቱ ጀምሮአቸዋል። ህዝብ ዘንድሮ በእርግጥ በጨቋኝ መሪዎች ላይ ተነስቷል።
SELAM + FIKR MINGIZEAM LENANTE YIHUN
ማህቡብ
ኮትኳች
ኮትኳች
 
Posts: 264
Joined: Thu Aug 18, 2005 3:17 pm

Postby ማህቡብ » Tue Feb 22, 2011 3:04 pm

ዘመን በርቆ ዘመን ሲጠልቅ ቀሪው ታሪክ ነው ::


ማን ያሰልስ ይሆን?-ሕዝባዊ አመፅ

ቤንጋዚ-ተቃዋሚዉቤን አሊን፥ ከቱኒዝ፥ ሙባረክን ከካይሮ አሽቀንጥሮ የጣለዉ አዲሱ ሕዝባዊ አመፅ የአረቡን አለም እየናጠ በአዲስ ጎዳና እየዘወረዉም ነዉ። የፕሬዝዳንት ጆርጅ ደብሊዉ ቡሽና የጠቅላይ ሚንስትር ቶኒ ብሌሯ ዲሞክራሲያዊት ኢራቅም ከአዲሱ ሕዝባዊ ነዉጥ አላመለጠችም

21 02 11
እንደ መሪ እንደተከበሩ፣ እንደተፈሩ ምናልባትም እንደ ተፈቀሩ መጦርን እንቢኝ ብለዉ መገዛትን እንቢኝ ባለ ሕዝባቸዉ ተጠልተዉ፣ ተወግዘዉ፣ ከስልጣን የተወገዱት ዘይን አል አቢዲን ቢን ዓሊ ያጣጥራሉ።መሐመድ ሆስኒ ሙባረክ እንደ ጄኔራል፣ እንደ ምክትል ፕሬዝዳንት፣ እንደ ፕሬዝዳንት ከርባ አመት በላይ ከመንደላቀቅ መቀማጠል ሌላ ሌላ የማዉቀዉ አካል አእምሯቸዉን በቀሪ እድሜያቸዉ ከፍርድ ቤት ሙግት፣ ከወሕኒ ቤት አበሳ የሚያድኑ፣ያጋበሱትን ሐብት የሚበሉበትን ሥልት ያዉጠነጥናሉ።ቤን ዓሊን አስቀድሞ፣ ሙባረክን አስከትሎ ከስልጣን ያስወገደዉ ሕዝባዊ አብዮት የአልጀርስ፣ የአማንና የቴሕራን ገዢዎችን አደናግጦ፣ የራባት ገዢዎችን ደባብሶ ሰነዓ፣ ትሪፖሊ ማናማዎች ላይ ብሶ-ገዢዎቹን እያዳፋ።ማን ያሰለስ ይሆን?ሕዝባዊዉ አመፅ የባሰባቸዉን ሐገራት ቅንጭብ እዉነት እያነሳን ላፍታ እንጠይቅ።


«የሶሻሊስታዊት ሕዝባዊት ሊቢያ አረብ ጁሙሕሪያ የመስከረም አንዱ ታላቅ አብዮት አቅጣጫ አመላካች» ወይም ወንድማዊ መሪ እና የአብዮቱ አቅጣጫ መሪ» ሙአመር አል-ቃዛፊ ኒዮርክ ሲገቡ ከእስከዚያ ጊዜዉ ሁሉ ገለል፥ ቀለል፥ ዘና እንዳሉ ነበር።በዚያ ረጅም ማዕረግ ያቺን ሰፊ፥ ሐብታም ሥልታዊት ሐገር ለረጅም ጊዜ ለመግዛት የበቁበትን መፈንቅለ መንግሥት አርባኛ አመት ድል ባለ ድግስ ካከበሩ ሁለተኛ ሳምንታቸዉ ነበር።
በትልቅ-አስፈሪ ሥም ማዕረግ-ሥልጣናቸዉ ላይ ደግሞ የአፍሪቃ ንጉሰ ነገስት የሚል ዘዉዳዊ ማዕረግ ለመደረብ አንድ ሁለት እያሉ ነዉ።ተደስተዋል ወይም የተደሰቱ መስለዋል።መስከረም ሁለት ሺሕ ዘጠኝ።ዘመኑ በሙሉ እንደ ጎርጎሮሳዉያኑ አቆጣጠር ነዉ።

በርግጥም ከምዕራባዉያን ጋር መናከስ፥ መናጨቱን አቁመዋል።እንደ ሙባረክ፥ እንደ ቤን ዓሊ እንደ ቡተፈሊቃ ወይም እንደ ቢን ስዑዶች- ወይም እንደ ኸሊፋዎች «ጥብቅ ወዳጅ» ባይባሉም «ጠላት» የሚለዉ ቅፅል ተፍቆላቸዋል።እና ደስታ ብቻ ሳይሆን በራስ የመተማመን ስሜት-መፈንሳቸዉም ጠንክሯል።በተባበሩት መንግሥታት ድርጅት ጠቅላላ ጉባኤ ፊት የተባበሩት መንግሥታት ድርጅትን መተዳደሪያ ደንብ ቦጫጭቀዉ ከጣሉ-ስዊዘርላንድ እንድትቦጫጨቅ በጠየቁ ማግስት ያሉ-ያደረጉትን ከነ ምክንያቱ ለጋዜጠኞች ይዘረዝሩ ገቡ።

በቃለ መጠይቁ መሐል ታይም የተሰኘዉ ዩናይትድ ስቴትሱ ሳምንታዊ መፅሔት ዘጋቢ ሥለ መንግሥታቸዉ የሰባዊ መብት ይዞታ ጠየቃቸዉ።«ሰዉ ጀነት ብታስገባዉም መዉቀሱ አይቀርም» መለሱ የታላቁ አብዮት ወንድማዊ መሪ «እዉነቱን ልንገርሕ ሊቢያ አሁን ጀነት ናት።»

በስደት ፈረንሳይ የሚኖሩት ሊቢያዊ የመብት ተሟጋች ስሊማን ቦዉሹይጉሪይ እንደሚሉት ግን የሙዓመር ቃዛፊዋ
ወንድማዊዉ አብዮታዊዉ» መሪ «ጀነት» ለብዙዊ ሊቢያዊ «ገሐነብ» አከል ናት።

«የሊቢያ ሕዝብ ከቱኒዚያ ወይም ከግብፅ ሕዝብ የበለጠ ይሰቃያል።ሊቢያ ዉስጥ አንዴም አንዲትም የነፃነት ብልጭታ የለም።ከዚሕም በተጨማሪ ላለፉት አርባ-ሁለት አመታት አንድም ምርጫ ተደርጎ አያዉቅም።ሕዝቡ በፍርሐት ነዉ-የሚኖረዉ።ነፃነት የሚባል ነገር የለም።ሰዉ አፉን ካልዘጋ ዘብጥያ ይወረወራል።ሁኔታዉን ለማሳወቅ ምንም አይነት አማራጭ የለም።»

የያኔዉ የሃያ-ስምንት አመት ሻለቃ ሙአመር አል-ቃዛፊ የመሯቸዉ የጦር መኮንኖች መስከረም አንድ 1969 የንጉስ ሰይድ መሐመድ ኢድሪስ ቢን ሰይድ መሐመድን ዘዉዳዊ ሥርዓት ደም ባልፈሰሰበት መፈንቅለ መንግሥት ለማስወገድ የደፈሩት ከግብፁ መሪ ከኮሎኔል ገማል አድናስር ድፍረት፥ ድርጊት ተምረዉ፥ በናስር ርዕዮት-አላማ ምግባር ተማርከዉ ነበር።

ጋዛፊ ከግብፅ ገዢዎች በርግጥ ብዙ ተምረዋል።ከግብፆች የመማሩ ተራ አሁን የሊቢያ ሕዝብ ነዉ። ከግብፅ ገዢዎች ሳይሆን ከግብፅ ሕዝብ የተማረዉ ሊቢያዊ አማራጭ ያለዉ መሰለ።እንደ ግብፅ-ቱኒዚያዎች «ጀነት» እያሉ ኑሮ ሕይት ሐገሩን «ገሐነብ» ባደረጉበት ገዢዎቹ ላይ አመፀ።ቤንጋዚ ባለፈዉ ሳምንት።እንደ ቤን ዓሊ፥ እንደ ሙባረክ ሁሉ የወንድም ቃዛፊ የመጀመሪያ አፀፋም ጥይት ነበር።ግድያ።

የተገደለ-የቆሰለዉን ሰዉ ቁጥር በትክክል የሚያዉቀዉ የለም።አንዳድ ምንጮች እንደሚጠቁሙት እስከ ትናንት እሁድ ድረስ ብቻ በትንሽ ግምት ሰወስት መቶ ሰዉ ተገድሏል።የቤንጋዚዋ ነዋሪ እንደሚሉት ግን ሟች-ቁስለኛዉን ቤቱ ይቁጥረዉ።

«በትክክል ጭፍጨፋ ነዉ።በርግጥ ጭፍጨፋ ነዉ።እዚሕ የሚፈፀመዉ ድምፅ አልባ-ጭፍጨፋ ነዉ።የሞቱትን መቁጠር አትችልም።የተገደሉት ሰዎች በየስፍራዉ፥ በየቤቱ፥ በየሆስፒታሉ አሉ።ግልፅ ጭፍጨፋ ነዉ።በርግጥ ጥፋት ነዉ።»
ቃዛፊ በናስር ምግባር፥ መርሕ፥ አለማ ተማርከዉ እንደ ናስር ንጉሳዊ አገዛዝ ጠልተዉ ንጉስ ኢድሪስን አስወግደዉ የትሪፖሊ ቤተ-መንግሥትን በ1969 ሲቆጣጠሩ የዘጠኝ አመት ታናሻቸዉ ሐማድ ቢን ኢሳ አል-ኸሊፋ እንደ አሚር ልጅ ናስር የሚጠሉትን አልጋ ወራሽነትን እንደናፈቁ እንደ ናስር ወታደራዊ ሳይንስን ሊማሩ አንድ ሁለት ይሉ ገቡ።

ቃዛፊ አንዴ ከግብፅ ጋር ልዋሐድ እያሉ ናስርን ሲጨቀጭቁ፥ ሌላ ጊዜ አረብ ባንድ መሪ (በናስር) ይገዛ ሲሉ ደግሞ ሌላ ጊዜ እስራኤል-ምዕራቦችን እንዉጋ እያሉ ሲጋበዙ ልዑል ሐማድ ከብሪታንያዉ የሳንድረስትና ከዩናይትድ ስቴትሱ የፎርትሊቨንወርት የጦር ኮሌጆች ወታደራዊ ትምሕርታቸዉ አጠናቀዉ ተመለሱ።

ባሕሬንን ከ1961 ጀምረዉ የገዙትና፥ በተለይ በ1971 ከብሪታንያ ቅኝ አዛዝ ሙሉ በሙሉ ነፃ እንድትወጣ አበክረዉ የታገሉት የሐማድ ቢን ኢሳ አል-ኸሊፋ አባት አሚር ኢሳ ቢን ሳልማን አል-ከሊፋ በ1999 ሲሞቱ የያኔዉ የዩናትድ ስቴትስ ፕሬዝዳት ቢል ክሊንተን ዩናይትድ ስቴትስ «አንድ የሰላም ጥሩ ወዳጅ አጣች» ብለዉ ነበር።

የተባበሩት መንግሥታት ድርጅት ዋና ፀሐፊ የነበሩት ኮፊ አናን በበኩላቸዉ «የአካባቢዉ ታላቅ የመረጋጋት ሐይል» ብለዋቸዉ ነበር።ልዑል ሐማድ ባባታቸዉ እግር እንደተተኩ የፖለቲካ እስረኞችን ለቀቁ። ለረጅም ጊዜ የፀናዉን ያስቸኳይ ጊዜ አዋጅ በማንሳታቸዉና የሴቶችን መብት ለማስከበር ቃል በመግባታቸዉ ከምዕራባዉን መንግሥታትና ከመብት ተሟጓች ተቋማት አድናቆት ሲንቆረቆርላቸዉ ነበር።
ማናማ-ተቃዋሚዉ እንዲያዉም መንበሩን ለንደን ያደረገዉ አለም አቀፉ የመብት ተሟጋች ድርጅት አምንስቲ ኢንተርናሽናል የአሚር ሐማድን እርምጃ ለሰብአዊ መብት መከበር ከፍተኛ እመርታ በማለት አወድሶት ነበር።ባሕሬንን ለተከታታይ ዘመናት የሚገዛዉ የአናሳዉ የሱኒ የከሊፋ ቤተ-ሰብ ሥርወ መንግሥት በአብዛዉ የሺዓ እምነት ተከታይ ሕዝብ ላይ የሚፈፅመዉ ግፍ በደል ግን ለምዕራቦቹ፥ ለመብት ተቋማቱም ከቁብ የሚገባ አልነበረም።

ከሁሉም በላይ ምዕራባዉያኑ የከሊፋ ቤተሰቦች አገዛዝን ሲያደንቁ-ሲያወድሱ ባሕሬን ሙሉ ነፃነትዋን ካወጀችበት ከ1971 ጀምሮ የጠቅላይ ሚንስትርነቱን ሥልጣን የያዙት ቀድሞዉ አሚር የኢሳ ቢን ሳልማን አል-ከሊፋ አጎት ከሊፋ ቢን ሳልማን አል-ከሊፋ የትንሺቱን ሐብታም ሐገር አስተዳደር ጨምድደዉ መያዛቸዉን ማስተዋል አልፈለጉም ወይም ዘንግተዉት ነበር።

ባሕሬኖች ግን የኖሩና የሚኖሩበት አገዛዝ የሚያደርስባቸዉን በደል ታገሱት እንጂ በርግጥ ሊዘነጉት አልቻሉም፥ አይችሉምም።የባሕሬን ሕዝብ ምሬት ብሶቱን ለመግለጥ ብልሐቱን ከቱኒዚያና ከግብፅ ለመማርም ጊዜ አል-አልፈጀበትም።የአደባባይ አመፅ።ማናማ-ባለፈዉ ሳምንት።
የአሜርነቱን አልጋ በወረሱ በሰወስተኛዉ አመት በሁለት ሺሕ ሁለት የንጉስነት ዙፋን የደፉት የንጉስ ሐማድ ቢን ኢሳ አል-ኸሊፋ አገዛዝ አፀፋ እንደ ቱኒዝ፥ እንደ ካይሮ የቀድሞ ገዚዎች፥ እንደ ትሪፖሊ፥ አንደ አልጀርስ የቀድሞም ያሁንም ገዢዎች ሁሉ ጥይት ነበር።

ትንሺቱ ሐገር ከትንሽ ሠልፈኛዋ መሐል በትንሽ ግምት ሰባት ሰዉ ቀብራለች።የንጉስ ሐማድን አገዛዝ ከሚቃወሙት አንዱ አሊ ሳልማን ጥይት ለሚዘንብበት ሕዝብ ትናንት ባስተላለፉት መልዕክት እንዳሉት የባሕሬን ለዉጥ ፈላጊ ሕዝብ ብቻዉን አይደለም።

«እናንት አብነቶች ናችሁ። ድፍን አለም እናንተን እያተመለከበተ ነዉ።እናንተም ልክ እንደ ቱኒዚያዉ፥ እንደ ታሕሪሩ አደባባይ ሁሉ የፐርሉ አደባባይ አዲስ ትምሕርት ቤቶች ናችሁ።የሰላማዊ ተቃዋሚዎች እና ጥያቄያችሁን በሰላማዊ መንገድ ያቀረባችሁ ትምሕርት ቤቶች ናቸዉ።»

ሕዝባዊ አመፅ በርግጥ ሕይወት እየጠፋ፥ ደም እየፈሰሰበት ነዉ።የሊቢያ አልጋወራሽነታቸዉ በሰፊዉ የሚነገርላቸዉ ሰይፍ አል-ኢስልማ ጋዛፊ እንደዛቱት ደግሞ ተጨማሪ ሕይወት፥ አካል መጥፋቱ በሳቸዉ እምነት «መአት» መዉረዱ አይቀርም።

«እኛ ሁላችንም ታጥቀናል።ጦሩም ሕዝቡም የታጠቀ ነዉ።በመቶ ሺሕ የሚቆጠሩ ሰዎች ሲገደሉ፥ ብዙ ደም ሲፈስ እናይ ይሆናል።ሰዎች ይሰደዳሉ።ነዳጅ ዘይት ማዉጣት፥ መላክ ከማይቻልበት ደረጃ ሊደረስ ይችላል።የዉጪ ኩባንያዎች ሊቢያን ጥለዉ ይወጣሉ።ከዐለት ወደ እለት ነዳጅ ዘይት ጨርሶ ላይኖር ይችላል።»

ያም ሆኖ ቤን አሊን፥ ከቱኒዝ፥ ሙባረክን ከካይሮ አሽቀንጥሮ የጣለዉ አዲሱ ሕዝባዊ አመፅ የአረቡን አለም እየናጠ በአዲስ ጎዳና እየዘወረዉም ነዉ። የፕሬዝዳንት ጆርጅ ደብሊዉ ቡሽና የጠቅላይ ሚንስትር ቶኒ ብሌሯ ዲሞክራሲያዊት ኢራቅም ከአዲሱ ሕዝባዊ ነዉጥ አላመለጠችም።ማን ያሰልስ ይሆን?
SELAM + FIKR MINGIZEAM LENANTE YIHUN
ማህቡብ
ኮትኳች
ኮትኳች
 
Posts: 264
Joined: Thu Aug 18, 2005 3:17 pm

Postby ማህቡብ » Tue Mar 01, 2011 6:29 am

ዘመን በርቆ ዘመን ሲጠልቅ ቀሪው ታሪክ ነው ::


የዘመነ-ቃዳፊ የመጨረሻ መጀመሪያ

ተቃዋሚዎች-ኔዘርላንድስየሊቢያ ሶሻሊስት ጀምሕሪያ የመስከረም አንዱ ታላቅ አብዮት መሪ-የከንግዲሕ እርምጃቸዉ 6.5 ሚሊዮን ሕዝባቸዉን ማወክ፥ ተቃዋሚያቸዉን መግደል፥ ከአፍሪቃ አረተኛዋን ሰፊ፥ ሐብታም ሐገር ሊቢያን በጎሳ ጠርዝ የሚከፋፍል እንዳይሆን በርግጥ ያሰጋል።

የሊቢያ ሕዝብ አመፅ ኮሎኔል ሙአመር ቃዛፊን አሽቀንጥሮ እንደ ጎረቤቶቹ በድል ማሳረጉ በርግጥ አላጠራጠረም።የሊቢያ ሕዝብ ከቱኒዚያና ከግብፅ ጎረቤቶቹ ዘር፥ባሕል እምነት ድንበር መጨቆን-በጨቋኞች ላይ ማመፅን የመጋራቱን ያክል በጎሰኝነት ስሜቱ፣በአሰፋፈር ታሪኩ ይለያል።ቃዛፊም ከቤን ዓሊ፣ ከሙባረክ ጋር የመመሳሰላቸዉን ያክል የሕዝባቸዉን ስሜት-ታሪክን፥ ሐብቱን ለመመዝበሪያ፣ ለመግደያነት በማዋል ይለያሉ።የተባበሩት መንግስታት ድርጅት ዋና ፀሐፊ ፓን ጊ ሙን እንዳሉት ሊቢያ ላይ ጊዜ በጠፋ ቁጥር ብዙ ሕይወት ይጠፋል።ይሕ ነዉ፣የማያጠራጥረዉ ሕዝባዊ ድል በቃዛፊ ዉድቀት እስኪረጋገጥ የሚያስጨንቀዉ።የቃዛፊን ፖለቲካዊ ዳራ፣ የጭካኔቸዉን ልክ፣ ከሊቢያ ሁኔታ ጋር አጣቅሰን፣ የጭንቀቱን ሰበብ-ምክንያት ላፍታ እንቃኛለን አብራችሁኝ ቆዩ።

እንደ ጦር መኮንን የዉጊያ ስልት ማርቀቅ ማዉጣቱ ሆኖላቸዉ አያዉቅም።እንደ ተራ ወታደር ግን ደፋር ናቸዉ።እንደ ሐገር መሪ በመርሕ-ጥናት ላይ የተመሠረተ የአመራር ዘዴ፣ ራዕይ ብልሐትን-አያዉቁትም።አያዉቃቸዉምም።የሚሉ የሚያደርጉት በሌሎች ዘንድ ለሚሰጠዉ ፍቺ፣ በሐገር ሕዝባቸዉ፣ በራሳቸዉም ላይ የሚስከትለዉን ጥቅም-ጉዳትን የማሰብ፣ ማስተንተን-መጠንቀቅ አያዉቁም።

እንደ ኮሚኒስት ካድሬዎች የሚጠሉትን እያወገዙ፣ የሚወዱትን እያወደሱ፣ ጣታቸን እየወዘወዙ፣ ክርናቸዉን-ቁልቁል እደፈቁ፣ ወይም ጭብጣቸዉን ሽቅብ እያጓኑ መፈከር፣ለረጅም ጊዜ መደስኮርን ግን በርጥ ተክነዉበታል።አርባ ሁለት ዘመን እንደኖሩበት ባለፈዉ ሰኞም-እንደ ጦር መኮንን ባልነደፉት ስልት እንደ ወታደር ሊዋጉ፣ እንደ መሪ ሳይጠነቀቁ፣ እንደ ተራ ካድሬ
በሕዝባቸዉ ላይ ፈከሩ።


በዛሬዉ መካከለኛዉ ምሥራቅ ባቢሎኖች ለመጀመሪያ ጊዜ ያገኙትን ጭቃ ብጤ ነገር ቻይኖች ዉሐን እትንነዉ ጨዉ ለማምረቻነት፣ ጃፖኖች ለማቀጣጠያ፣ ፋርሶች ለመብራት ሲጠቀሙበት ዘመነ-ዘመናት አስቆጥራል።የጥንቱ ሰዉ ከጨዉ፣ ከሸክላ፣ እኩል እንኳን ያልቆጠረዉ ያ-ማዕድን ባቢሎኖች ባወቁት በአራት ሺኛዉ ዓመት ሥልጣኔ ለወለደዉ የሰዉ ልጅ ፍላጎት ወሳኝነቱ ሲረጋገጥ-የመጀመሪያ መገኛዉ መዛቂያዉም ሆነ።መካከለኛዉ ምሥራቅ።ነዳጅ ዘይት።

ከ1905 (ዘመኑ በሙሉ እንደ ጎሮጎሮሳዉያኑ አቆጣጠር ነዉ) ጀምሮ በተደረገዉ ጥናትና ቁፋሮ ከሚወጣዉ ነዳጅ ዘይት የሚዛቀዉ ዶላር የዚያን በረሐማ ምድር ሕዝብን ጥንታዊ ሥልጣኔ እዉቀቱን፤ ለማዳበር፣ኑሮዉን ለማሻሻል፣ ከእልምና መስፋፋት ጀምሮ ባካባቢዉ የፀናዉን ፖለቲካዊ ሥርዓት ለመቀየር ከበቂ በላይ በሆነ ነበር።

ሐብቱን የሚቆጣጠሩት ገዢዎች ድንቁርና፣ ስግግብነት፣ የቅኝ ገዢዎች ሻጥር፣ ከወግ አጥባቂዉ የአረብ ነባር ባሕልና ሐይማኖት ጋር ተዳምሮ ጥቂት የደሳ፣ ድንኳን መንደሮችን ወደ ሕንፃ ከተማነት፣ ጥቂት ግመል ጎታቾችን ወደ ነጋዴነት ከመቀየር ባለፍ የአዲሱ ዘመን ትልቅ ሐብት የሕዝቡን አስተሳሰብ፣ ኑሮ፣ ፖለቲካዊ ሥርዓትን ብዙም ሳይለዉጥዉ ዓለም በሁለት ጦርነቶች ደቅቃ ሁለቴ ተለወጠች።

ከሁለተኛዉ የአለም ጦርነት ፍፃሜ እንዳዲስ የተለወጠዉ አለም አዲስ ከመሠረታት እስራኤል ጋር አረቦች የገጠሙት ጦርነት፣ የቅኝ አገዛዝ ፍፃሜ፣ የኮሚንስቶች መጠናከር በአረቦች ዘንድ ያሰረፀዉ አዲስ አስተሳሰብ ግን ለአብዛኞቹ የዚያ ምድር የእስከዚያ ዘመን ገዢዎች የፍፃሜቸዉ መጀመሪያ ነበር።አዲሱ አስተሳሰብ የሱዳን፤ የቱኒዚያ፣ የአልጄሪያ፣ የሞሮኮ፥ የየመን ሕዝብን የፀረ- ቅኝ አገዛዝ ትግልን ሲያጠናክር ኮሎኔል ገማል አብድናስር የመሯቸዉ የግብፅ መኮንኖች የንጉስ ፋሩቅን ዘዉዳዊ አገዛዝ አስወግደዉ ለስልጣን አበቃ።1952።

ናስር ካይሮ ላይ የለኮሱት የለዉጥ ማዕበል የኢራቅ፥ የሶሪያ እና የሊባኖስ ገዢዎችን ጠራርጎ የናስርን ፍልስፍና የሚያቀነቅኑ ጦር መኮንኖችን ከየአብያተ-መንግሥቱ ሲዶል፣ሱዳንን፣ ቱኒዚያን፣ አልጄሪያን፣ ሞሮኮንና ብጤዎቻቸዉን ነፃ አዉጥቶ የናስር መርሕ አድናቂዎች የየሐገራቸዉን ሥልጣን የሚቆጣጠሩበትን ሥልት እንዲያዉጠነጥኑ በር ከፈተ።

ናስር በ1967ቱ የአረብ እስራኤሎች ጦርነት በደረሰባቸዉ ሽንፈት የተደናገጡትን የአረብ መሪዎችን ለማበረታት በዉጤቱም የአረብ አንድነት ለማጠናከር ለሁለት አመት ያሕል ያደረጉት ጥረት መስመር እየያዘላቸዉ ነዉ።መስከረም አንድ-1969 ።የዚያን ቀን ካይሮ ላይ በጠሩት የግንባር መስመር ሐገራት ጉባኤ ላይም የዮርዳኖስ፣ የሶሪያ፣ የኢራቅ፣የሱዳንና የአልጄሪያና የሞሮኮ መሪዎች ተገኝተዋል።ናስር ተደስተዋል።

ናስር የሚሉትን ብለዉ፣ ዮርዳኖሱ ንጉስ ሁሴንን ማብራሪያ በጥሞና ሲያዳምጡ ረዳቸዉ አናጠባቸዉ ።ብጫቂ ወረቀት አቀበላቸዉ።«የንጉስ ኢድሪስ መንግሥት ተገለበጠ» ትለለች ወረቀቷ።«ገልባጮቹ ማናቸዉ?» ጠየቁ ናስር።«ብዙም አይታወቁም ጌታዬ።» አንሾካሾከ ረዳታቸዉ።« ከመግለጫቸዉ እንደተረዳነዉ ግን መርሐቸዉ ነፃነት፣ሶሻሊዝም እና አንድነት የሚል ነዉ።»

የሊቢያ መፈንቅለ-መንግሥት መሪዎች መርሕ-የሳቸዉ መርሕ ነዉ።ተደሰቱ ወይም የተደሰቱ መሰሉ።የሃያ-ሰባት አመቱን ሻምበል ግን ካይሮ ቀርቶ ቤንጋዚም ዉስጥ የሚያዉቅ አልነበረም።ንጉስ አስወግደዉ ስልጣን በያዙ በአርባኛ አመታቸዉ የአፍሪቃ ንጉሰ-ነገስትነኝ አሉ።«ነፃነት» ብለዉ ሥልጣን ይዘዉ የሕዝባቸዉ ነፃነት እንዳፈኑት።ዘንድሮ በአርባ ሁለተኛ አመቱ ነፃነት የጠየቀዉን ሕዝብ ጥይት ያዘንቡበት ያዙ።


ከቃዳፊ ቅጥረኞች ጥይት ያመለጠዉ፥ ከጋዳፊ አገዛዝ የተላቀቀዉ የሰሜን-ምሥራቃዊ ሊቢያ ሕዝብ በርግጥ ነፃ ወጣሁ እያለ ነዉ።«ሁሉንም ተቆጣጥረናል።ፖሊስ ጣቢያዉን፥ የመንግሥት መሥሪያ ቤቶችን፥ መንገዶችን ሁሉንም እየተቆጣጠርን ነዉ።---ነፃነት፥ በስተመጨረሻዉ ነፃወጣን»

ሌላ ሥፍራ ግን በአስር ቀናት እድሜ በትንሽ ግምት ከአንድ ሺሕ በላይ ሰዉ በቃዛፊ ደጋፊ-ታጣቂ፥ ቅጥረኞች ተገድሏል።ማስገደል-ማሸበር ለቃዛፊ እንግዳ አይደለም።የኖሩበት ነዉ።

ለቃዛፊ አመራር አገዛዛቸዉን የተቃወመ የትም ቢሆን መጥፋት አለበት።አለም አቀፉ የሰብአዊ መብት ተሟጋች ድርጅት አምንስቲ ኢንተርናሽናል በ1987 እንዳስታወቀዉ ከ1980 እስከ 1987 በነበረዉ ሰባት አመት ብቻ ቃዛፊ ዉጪ የተሰደዱ ሃያ-አምስት እዉቅ ተቃዋሚዎቻቸዉን እያሳደኑ አስገድለዋል።

ከዚያ በሕዋላ የተገደለዉን በትክክል የሚያዉቀዉ የለም።ቃዛፊ ዛሬም ያስገድላሉ።የናስርን መርሕ አንግበዉ እንደናስር ደም-ባልፈሰሰበት መፈንቅለ መንግሥት ሥልጣን በያዙ ማግሥት ሊቢያ ከግብፅ ጋር መዋኸድ አለበት ብለዉ ግብፅ ከሚገኝ አንድ መስጊድ ዉስጥ እስከ መመሸግ ደርሰዉ ነበር።ከናስር ምክትል እና ከኋላ አልጋ ወራሻቸዉ ከአንዋር አሳዳት የበለጠ ናስርን የሚወድ ለመርሐቸዉ የሚገዛ ነበር ማለት በርግጥ ያሳስታል።

ሳዳት በ1981 በሰዉ እጅ መገደላቸዉን እንደሰሙ «ለፈፀሙት በደል» አሉ ቃዛፊ «ተገቢ ቅጣት» ነዉ።«በደል» ያሉት ሳዳት የአረብን ሕዝብ ፍላጎት ጥሰዋል ነዉ።ዛሬ አርባ ሁለት አመት የጨቆኑት ሕዝባቸዉ ነፃነቱን ሲጠይቃቸዉ ግን አሸባሪ አሉት።የሕዝቡን ጥያቄ ከዉጪ ሐይላት ወረራ እኩል ቆጥረዉት ለሊቢያ ነፃነት ከኢጣሊያ ቅኝ ገዢዎች ጋር የተፋለሙትን የነፃነት አርበኛ ዑመር ሙክታርን እያወደሱ ደጋፊያቸዉ በሰላማዊ ሰልፈኛዉ ላይ እንዲነሳ አዘዙ።
«ሊቢያን ለመታደግ፥ነዳጅ ዘይቷን ከዘረፋ፥ ማንነታችንን ከጥፋት፥ ነፃነትና፥ክብራችንን ለማዳን ተዋጉ።»

ጮኸት ፉከራቸዉ በርግጥ የጣር ነዉ።ያገዛዝ ሕልቅታቸዉ እስኪጠፋ ብዙ ሕይወት-አካል ለማጥፋት መዛታቸዉ ነዉ አሳሳቢዉ።ከአርብነት ይልቅ የበርበር ነገድነቱ ከሚጫጫነዉ ከአናሳዉ የቃዳፋ ጎሳ የሚወለዱት ቃዛፊ-ከፖሊቲካ እዉቀታቸዉ ማነስ በተጨማሪ የጎሳ የበታችነት ስሜትም እንደተጠናወታቸዉ ነዉ። ሥልጣን እንደያዙ የሐገሪቱን ርዕሠ-ከተማ አብዛሐዉ የቀድሞዉ ንጉስ ኢድሪስ ጎሳ ከሚኖርባት ከቤንጋዚ ወደ ትሪፖሊ ያዙሩት ከትላልቆቹ ጎሳዎች ሕዝብ የሚነሳባቸዉን ተቃዉሞ ሽሽት ነበር።
የትሪፖሊ «ደጋፊዎች»
ሕዝባዊ አመፅ በተነሳ በሰወስተኛዉ ቀን የቤንጋዚ ሕዝብ ከተማይቱን ከቃዛፊ አስተዳደር ሙሉ በሙሉ ግን በቀላሉ ማላቀቅ በሕዝቡ ቋንቋ ነፃ ማዉጣት የቻለዉም የሰዉዬዉ የአገዛዝ ተፅኖ እዚያ አካባቢ ልል በመሆኑ ነዉ።ሕዝባዊ አመፅ ተቀጣጥሎ የጋዛፊ አገዛዝ በብዙዎቹ የሰሜን ምሥራቅ ሊቢያ ከተሞች ተወግዷል።በርካታ የሊቢያ ጦር አባላት፥ ባለሥልጣናትና ዲፕሎማቶች የቃዛፊን አገዛዝ እየከዱ የተቃዋሚዉን ጎራ እየተቀየጡ ነዉ።

ቃዳፊ የሚወለዱበት የአል-ቃዳፍ ጎሳ አባላት ግን አሁንም ለታላቁ አብዮት መሪ ታላቅ ድጋፋቸዉን እየሰጡ ነዉ።ኮሎኔሉ በተደጋጋሚ እንዳሉት ላአልጋ ወራሽነት ያጯቸዉ ልጃቸዉ ሰይፍ አል-ኢስልም ደግሞ በቀደም እንዛቱት ያለ ብዙ ደም መፋሰስ እንደ ቤን ዓሊ መሰደድ፥ ወይም እንደ ሙባረክ ሙባረክ ሥልጣን መልቀቅ የለም።


«እቅድ ሀ፥ እቅድ ለ እና መ-አለን።እቅድ ሀ-ሊቢያ መኖርና መሞት ነዉ።እቅድ ለ-ሊቢያ መኖርና መሞት ነዉ።እቅድ መ-ሊቢያ መኖር እና መሞት ነዉ።»

መርሐቸዉ አንድነት ነፃነትና ሶሻሊዝም ነበር።ግን ቻድን ወርረዋል።ለዉደት የለመኗትን ግብፅን ለመዉጋት በ1977 ጦር አዝምተዉ ተሸንፈዋል።የዩጋንዳዉን አምባገነን መሪ ኢዲ አሚንን ደግፎ ታንዛኒያን እንዲወጋ ያዘመቱት ጦር ስድስት መቶ ወታደሮቹን እዚያዉ ቀብሯል።ከኢትዮጵያ-እስከ ሶማሊያ፥ከሱዳን እስከ ኮንጎ፥ ከኒካራጓ-እስከ ፊሊፒንስ የሚገኙ ሐገራትን ባደቀቀዉ የመገጠል ወይም የርስ በርስ ጦርነት እጃቸዉን ዶለዋል።ከፍልስጤም ነፃ አዉጪዎች እኩል፥ የሰሜን አየርላንድ፥ የባስክ፥ የሎችንም ተገንጣይ ሐይላት አስታጥቀዋል።

ከ1980 አጋማሽ ጀምሮ በርሊን ዳንስ ቤት፥ ሎከርቢና ኒጀርን ሰማይ ላይ ብዙ ሕይወት ባጠፋዉ የሽብር ጥቃት ሰበብ ዩናይትድ ስቴትስ የፈፀመችባቸዉ ድብደባ፥ የግድያ ሙከራ ተረስቶ፥ 3.66 ቢሊዮን ዶላር ከፍለዉ፥ የኑክሌር መርሐ-ግብራቸዉን መነቃቅረዉ በአሸባሪነት መወንጀል፥መቀጣቱ ተፍቆላቸዉ የምዕራቦችን ልብ እንዳገኙ ብራስልስ መጥተዉ ነበር።

ለአዉሮጳ መሪዎች ባደረጉት ንግግር በርካታ ሐገራት ባወደመና በከፋፈለዉ ዉጊያ እጃቸዉን ያስገቡበትን ምክንያት «ታሪካዊ ሐላፊነት» አሉት።«ሐላፊነታችንን ተወጥተናል።የነፃነት ተዋጊዎች ነፃነታቸዉን ያገኙ ዘንድ አሰልጥነናል።ይሕ ታሪካዊ ሐላፊነታችን ነዉ ብለን እናምናለን።»

ተቃዋሚዎች-ካይሮየሊቢያ ሶሻሊስት ጀምሕሪያ የመስከረም አንዱ ታላቅ አብዮት መሪ-የከንግዲሕ እርምጃቸዉ 6.5 ሚሊዮን ሕዝባቸዉን ማወክ፥ ተቃዋሚያቸዉን መግደል፥ ከአፍሪቃ አረተኛዋን ሰፊ፥ ሐብታም ሐገር ሊቢያን በጎሳ ጠርዝ የሚከፋፍል እንዳይሆን በርግጥ ያሰጋል።የተባበሩት መንግሥታት ድርጅት ዉግዘት፥ ቅጣትን የሚሰሙበት፥ የሕዝባቸዉን አመፅ የሚያስተናግዱበት ብልጠት፥ እዉቀት፥ ስብዕናዉም ያላቸዉ አይምስልም።
SELAM + FIKR MINGIZEAM LENANTE YIHUN
ማህቡብ
ኮትኳች
ኮትኳች
 
Posts: 264
Joined: Thu Aug 18, 2005 3:17 pm

Postby ወርቅነች » Tue Mar 01, 2011 4:21 pm

በርቱ...ቀጥሉበት...በአላሁ አክበር የጀመረው መቆሚያው ባፍሪካ ና በዓለም ያሉትን ግፈኛ መሪዎችን ሁሉ ከጠራረገ በህዋላ ነው.....ምእራቡ ና አሜሪካ ሁለተኛ አባት ና በነጻነት ትግል ላይ ለመፈናጠጥ የሚያደርጉት ሙከራ ከመክሸፉም ሌላ አያሰጋም....ክሊንተን አፏን ዘግታ መኖር ካልቻለች...የሚዘጋ ይዘጋታል...ኦባማ ከጥቁሩ አባቱ ሌላ ነጭ አባት እየፈለግ መሆኑ ግልጽ ቢሆንም በታሪክ ማእበል ፊት መቆም ክሰረት መሆኑን ገና ያልተረዱ ብዙ አሉና ቀድመን መገኝት አለብን...መንገዱ ግን ሩቅ መሰሎ ለሚታያቸው ተሰፋ ከመስጠት ሌላ ማበረታታቱ ተገቢ ነው...

ጀሚላ ከቸርችል ጎዳና የባሕሬኑ ሕዝብ ላ ሱኒ ላሺዒ ኩሉና ባህሬኒ ብሎ ተንስቷል ትላላች
ወርቅነች
ዋና ኮትኳች
ዋና ኮትኳች
 
Posts: 967
Joined: Sun Oct 03, 2010 10:05 am

Postby ማህቡብ » Wed May 11, 2011 7:03 am

በዓለም ከሚገኙት ተራራዎች በከፍተኛነቱ የሚታወቀው በሂማሊያ ተራሮች ከፍተኛ ጫፍ ማውንት ኤቨር የተባለው ደቡባዊ ኤሲያ በቲቤ እና በሚካል ወሰን ላይ የሚገኘው ነው :: ተራራው ስሙን ያገኘው የእንግሊዝ ማሃንዲስ ወታደር ከነበረው ከሰር ጆርጅ ኤቨረስት እንደሆነ ይነገራል:: ይህ ሠው እንግሊዞች ህንድን በቅኝ ግዛት በሚያስተዳድሩበት ጊዜ ከ 1829 እስከ 1743 የቅየሳ ማሃንዲስ ነበር እንግዲህ በዚህ ሥራው ላይ እያለ ነው ማውንት ኤቨረስት መሆኑን ያወቀው:: የሂማሊያ ተራራዎች ከፍተኛ ጫፍ በዚህ ምክኒያት በሱ ሥም እንዲሰየም ሆኗል በየጊዜው ትክክለኛነቱን ለማረጋገጥ የተነሱ ተመራማሪዎች ነበሩ ይሁንና በ1954 እንደ አውሮፓዊያኑ የዘመን ቀመር እንደገናም ደግሞ በ1990 አመተ ምህረት በተደረገው ጥናት ትክክል መሆኑ ተረጋግጧል:: የሐገሩ ሰዎች ኔፓሊያዊያን 'ሳጋርማታ' ይሉታል ትርጉሙም የሰማይ ግንባር እንደማለት ነው ማውንት ኤቨረስት ለመውጣት የቻለ የመጀመሪያው ሠው እንግሊዛዊው ስረ ኤድሞንድ ሂለሪ ይባላል:: ይህ ሠው ከጉዞ ጓደኛው ቴንሲንግ ኖርጌ እና ከመሪዎቻቸው ከሀገሩ ተወላጆች ኪቪ እና ቫካር ጋር በመሆን ስንቶች ሕይዎይታቸውን ያጡበትን የሂማሊያ ጉዞ ከተራራው ጫፍ ላይ በመድረስ አሸናፊነታቸውን አስመስክረዋል ጊዜው እንደ አውሮፓዊያኑ የጊዜ ቀመር ግንቦት 29 1953 አመተ ምህረት ላይ ነበር::

ኤድሞንድ ሂለሪ የተወለደው እንደ አውሮፓዊያኑ የጊዜ ቀመር ሐምሌ 20 1919 አመተ ምህረት ነው በሁለተኛው የዓለም ጦርነት ወታደር ነበር :: እንግዲህ ከዚህ በኋላ ነው የጉዞው ተመራማሪ የሆነው በጥር ወር ላይ እንደ አውሮፓዊያኑ የጊዜ ቀመር በ2008 በ89 ዓመቱ ከዚህ ዓለም በሞት ተለይቷል መልካም ሥም ከመቃብር በላይ ይውላል እንዲሉ በሥራው ሲታወስ ይኖራል ማለት ነው ::
SELAM + FIKR MINGIZEAM LENANTE YIHUN
ማህቡብ
ኮትኳች
ኮትኳች
 
Posts: 264
Joined: Thu Aug 18, 2005 3:17 pm

Postby ማህቡብ » Tue Dec 27, 2011 3:15 pm

ዘመን በርቆ ዘመን ሲጠልቅ ቀሪው ታሪክ ነው

የቱኒዚያ ሕዝባዊ አመፅ ሲግም-የሠረቀዉ የጎርጎሮሳዉያኑ ሁለት ሺሕ አስራ-አንድ፣ የጃፓኖችን የዕዉቀት-ሥልጣኔ ምጥቀት በተፈጥሮ ክርን አስደቁሶ፣ ዓለምን ለሰልፍ እንዳሳደመ፣ በሞስኮዎች ሰልፍ ሊጠልቅ ሳምንታት ቀሩት::

ለፍልስጤሞች፥የነፃነት-ጥያቄያቸዉ ለስልሳ-አራተኛ ዓመት የመዳፈኑ-ፅልመት ነዉ።ለዘመናት የደደረዉ የዓረብ ፖለቲካዊ ሥርዓት ግን ሠላማዊ-ትግልን ከጦርነት በቀየጠ ማዕበል መጥለቅለቁ እርግጥ ነዉ። ለአፍቃኖች በቦምብ-ጥይት ያረሩበትን ዘመን-ባንድ ከመጨመር ሌላ-ዘንድሮም አምና ነዉ። ሐያሉ ዓለም ቢን ላደንን እና ቃዛፊን የመግደል-ማስገደሉ ደስታ፣ በሥልተ-ምርቱ ንቅዘት-ክሰረት መጨናጎሉ ግን ሐቅ ነዉ።የቱኒዚያ ሕዝባዊ አመፅ ሲግም-የሠረቀዉ የጎርጎሮሳዉያኑ ሁለት ሺሕ አስራ-አንድ፣ የጃፓኖችን የዕዉቀት-ሥልጣኔ ምጥቀት በተፈጥሮ ክርን አስደቁሶ፣ ዓለምን ለሰልፍ እንዳሳደመ፣ በሞስኮዎች ሰልፍ ሊጠልቅ ሳምንታት ቀሩት።ከሰሐራ-በስተደቡብ ያሉትን የአፍሪቃ ሐገራትና አዉሮጳን ትተን በተቀረዉ ዓለም አመቱን የተከናወኑትን አበይት ፖለቲካዊ ሁነቶች ባጭሩ እንቃኛለን።ላፍታ አብራችሁኝ ቆዩ።


ለብራዚሎች የዛሬዉ አርጌ ዓመት የአዲስነቱ ብርቀት ገፊ ነበር።የሪዮ ዲ ሔኖሮ ክፍለ ግዛት የወረደበትን ዝናብ ማስተናገድ አቅቶት ምድር፥-ጉባ፣ ኩይሳዉ ተንዶ ከዘጠኝ መቶ በላይ ሰዎችን ገደለ።ጥር አስራ አንድ።

ለቱኒዚያ ሕዝብ ግን አመቱ ገደኛ ብጤ ነበር።ጥር አስራ-አራት።እርግጥ ነዉ የፕሬዝዳት ዘይን ኤል አቢዲን ቤን ዓሊ ሥርዓት በደል-ግፍ-አንገፍግፎት እራሱን በእሳት ያጋየዉ መሐመድ ቡአዚዚ ከሞተ፥ የዚያን ቀን አስረኛ ቀኑ።የቡአዚዚን ዓላማ አንግበዉ ሲታገሉ የዚያ ሥርዓት ታጣቂዎች የጥይት እራትየሆኑት በመቶ የሚቆጠሩ ወጣቶችም የዚያን ዕለቱን ሁነት ለመታዘብ አልታደሉም።

ትግል፥ ፍልሚያ መስዋዕትነታቸዉ ግን ከንቱ አልቀረም።ቱኒዚያን ለሃያ-ሰወስት ዘመን ፈጥርቀዉ የገዟት ቤን ዓሊ ሥልጣን ሐገራቸዉን ጥለዉ ፈረጠጡ።ቲዚያ ፈነደቀች።ሕዝቧ ቤን ዓሊን በምግባራቸዉ ጠራቸዉ «ገዳይ» እያለ---


የቱኒዚያ ሕዝብ በሰላማዊ የአደባባይ ትግል ጥር-ላይ የተቀዳጀዉን ድል-ጥቅምት ሃያ ሰወስት በታሪኩ ለመጀመሪያ ጊዜ በነፃነት በሰጠዉ ድምፅ አጠናከረዉ።የዲሞክራሲያዊ ሥርዓት ጀምር።

የትኒሺቱ ዓረባዊት ሐገር ሕዝብ አብዮት በድፍን ዓረብ ለመሰራጨት አፍታ-አልፈጀም።የትልቂቱን የጥንታዊቱን፥የሐያሊቱን ሐገር ሕዝብ ያክል ግን የፀና ወይም የቀናዉ አልነበረም።የግብፅ ሕዝብ።
ጥር-ሃያ አምስት ድፍን የግብፅ ከተሞች በሕዝብ ማዕበል ተጥለቀለቁ።በተለይ የካይሮዉ ተሕሪር አደባባይ።
ካይሮ-ተሕሪር

«ሆስኒ ሙባረክ ይዉደም።ዳቦ፥ ነፃነት፣ ሰብአዊ መብት፥ ወይም አመፅ»

የፕሬዝዳንት ሆስኒ ሙባረክ መንግሥት እንደ ብዙ ብጤዎቹ ሁሉ ሕዝባዊዉን አብዮት ለማዳፈን በመቶ የሚቆጠሩ ሰልፈኞችን አስገደለ።በሺሕ የሚቆጠሩ አሳሰረ።ብሶት ያስቆጣዉ ሕዝብ በተለይም ወጣቱ ግን አልተበገረም።ግድያ፣ አፈና እመቃዉን፣ በገንዘብ የማባበሉን ሴራዉ እየበጣጠሰ ለዉሎ አደር-አመፅ ተሕሪር አደባባይ ከተመ።

የካቲት አስራ-አንድ።የሆስኒ ሙባረክ የሰላሰ ዘመን ሥርዓት ተገነደሰ።አፈና፥ ጭቆና ሥቃይ ሰቆቃ ያንተከተከዉ ሕዝብ የዚያን ቀን የድል ብስራት፥ የተስፋ ደስታ ያንተከትከዉ ገባ።


የሙባረክ አገዛዝ መንኮታኮት ለግብፅ ሕዝብ ታላቅ ድል፣ በአንገናዊ አገዛዝ ለሚሰቃየዉ ለዓረብ ለአፍሪቃ ሕዝብ ጉሉሕ አብነት፥ ከሁሉም በላይ ታማኞቻቸዉን ቀስ በቀስ ላጡት ለምዕራባዉን ከፍተኛ አስተምሕሮት ነበር።የቱኒዚያና የግብፅ ሕዝብ ትግል ከድል ዋዜማ እስኪደርስ ለቱኒዝና ለካይሮ ታማኞቻቸዉ ዙሪያ መለስ ድጋፍ ሲሰጡ የቆዩት የፓሪስ፣ የለንደን-ዋሽግተንና የተከታዮቻቸዉ ሐገራት መሪዎች የየሐገሮቻቸዉን ጥቅሞች ከታማኞቻቸዉ ሥርዓቶች ጋር መቅበር እንደሚያፈልጉ የዚያን ዕለት በግልፅ አስታወቁ።

ከመጪዉ ጋር ሠልፋቸዉን ለማሳመር የዩናይትድ ስቴትሱ ፕሬዝዳት ባራክ ኦባማ ዋናዉ የመጀመሪያዉም ናቸዉ።የካቲት አስራ-አንድ።


«በሕወታችን ታሪክ ሲፈፀም ለማየት የምንታደልባቸዉ ጥቂት አጋጣሚዎች ናቸዉ።ይሕ ከነዚያ አጋጣሚዎቹ አንዱ።ይሕ ከነዚያ ጊዚያቶች አንዱ ነዉ።የግብፅ ሕዝብ ተናገረ፥ድምፁ ተሰማም።እና ግብፅ ከእንዲሕ የእስከንግዲሕዋ አትሆንም።»

ግብፅ በርግጥ የነበረችዉን አልሆነችም።ያ ጀግና ሕዝብ ግን የአብዮቱን ዉጤት፥ሙባረክን ከተኩት ጄኔራሎች እጅ ፈልቅቆ ለማዉጣት ግን ዳግም መታገል፣ ተጨማሪ ወጣቶቹን መስዋዕት ማድረግ ነበረበት።ሆስኒ ሙባረክና ሙባረክን የተኩት ጄኔራሎች ከዘጠኝ መቶ በላይ ወጣቶች አስገድለዋል። ሕዝቡ ግን በዳግም ትግል-ተጨማሪ መስዋዕትነቱ ጄኔራሎቹን አንበርክኮ-ሕዳር ላይ ለመጀመሪያዉ ዲሞክራሲያ ምርጫ ድምፁን ሰጠ።ዳግም ድል።

የአልጄሪያ ገዢዎች በድርድር-አታለዉ፥ የሞሮኮ፥ የዮርዳኖስና የኦማን ነገስታት በጥገናዊ ለዉጥ፣ ደልለዉ፥ የኩዌት፣ የስዑዲ አረቢያና የቀጠር ነገስታት በገንዘብ አባብለዉ የየሐገራቸዉን ሕዝባዊ አብዮት አዳፈኑት።የየመንና የባሕሬን ሕዝብ ግን በቱኒዚያና በግብፅ ብጤዎቹ አቋም ፀና።ዓረብ በሕዝባዊ አብዮት ሲናጥ፣ ተፈጥሮ ግን የዓለምን ትኩረት ከመካከለኛዉ ምሥራቅ ወደ ሩቅ ምስራቅ ወረወረችዉ።ጃፓን።

መጋቢት አስራ-አንድ።የሳይስንስ ቴክኖሎጂይቱ ምድር፣ የዓለም ሁለተኛይቱ ሐብታም ሐገር በተፈጥሮ ቁጣ ፊት ኢምንት ሆነች።ምሥራቃዊ ግዛትዋን ያርገፈገፈዉ የመሬት መንቀጥቀጥ ከባሕር ነዉጥ ጋር ተዳምሮ አስራ-ስድስት ሺሕ ሕዝብ ፈጀ።አራት ሺሕ እስካሁን የደረበት አልታወቀም። በብዙ ቢሊዮን የሚቆጠር ሐብት ንብረት ወደመ።

አደጋዉ ካጠፋዉ ሕይወት፥ ሐብት ንብረት በላይ ፉኮሺማ የነበሩ የኑክሌር ማዕከላትን ማፈራረሱ ለዓመታት የማይነቀል መዘዝ ያስከትላል መባሉ ነዉ-ትልቁ ስጋት።አደጋዉ እንደ ኑክሌር ማዕከላቱ ሁሉ የሥልጣናቸዉን መሠረት አናግቶ ከጠቅላይ ሚንስትርነት ያስወገዳቸዉ ናኦቶ ካን ያኔ እንዳሉት ሥጋቱ የሚቃለልበት ጊዜ-አለመታወቁ ነዉ-የእስካሁኑ ጭንቀት።

«የአቶም ጨረሩ ያደርሳል የተባለዉ አደጋ ሙሉ በሙሉ እስኪወገድ ድረስ ሰወስት፥ አምስት ምናልባትም በብዙ አስርታት የሚቆጠር አመታት ይፈጅ ይሆናል።የሐገሪቱ የአቶሚክና የሐይል አጠቃቀም ሥለሚቀጥልበት ሁኔታ በጃፓን ሕዝብ መካካል አስቸኳይ ዉይይት ማድረግ በጣም አስፈላጊ ነዉ።»
እንዲሕ ነበሩ የአዉቶሚክ ቦምብን ዘግናኝ ጥፋት የቀመሰችዉ ብቸኛ ሐገር በኑክሌር ጨረር ሰዉ፣ እንስሳ እፅዋትን በማንጨርጨር ፉኮሺማ-ቼርኖቤልን ይቀድማል-ይከተላል እንዳሰኘ ሁለት ሺሕ አስራ-አንድ ከፍፃሜዉ ደረሰ።

ምዕራባዉያኑ ሐገራት የራባት፣ የአልጀርስ፣ የአማን፣ የኩዌይት፣ የሪያድ፣ የዶኸ፥ የማናማ ወዳጆቻቸዉ የየሕዝባቸዉን አመፅ ማፈናቸዉን ሲደግፉ፣ የሰነዓ ታማኞቻቸዉን እመቃ በአደራዳራኒት ሰበብ አለፉት።

መጋቢት አስር፥ የቤንጋዚ ሕዝብ እንደ ጎረቤቶቹ ለተቃዉሞ አደባባይ ወጣ።አመፁ ብልጭ ከማለቱ የሕዝቡ ጥያቄ ተገቢነት፣ የሙዓመር ቃዛፊ ሰብአዊ መብት ረጋጭነት፣ አረመኔ፣ ጨፍጫፊነት የፓሪስ፥ ለንደን፥ የዋሽንግተን፥ ዶሐ የጧት ማታ አብይ ርዕሥ ሆነ።

የፓሪስ፣ ለንደን ዋሽግተን መሪዎች ሊቢያን የሚወጉ-ምናልባትም አንዳዶች እንደሚሉት «የነዳጅ ሐብቷን የሚቆጣጠሩበትን» ሕጋዊ ሽፋን ለማግኘት ሲራወጡ፣ የሪያድ፣ የዶሐ፣ የኩዌይት፣ የአቡዳቢ ታማኞቻቸዉ፥የማናማ ብጤያቸዉን እንዲረዳ ያዘመቱት ጦር፥ የማናማን አደባባይ ያጥለቀለቀዉን ሕዝብ በታንክ-ሔሊኮብተር ይጨፈልቀዉ ገባ።የሩቁ ታዛቢ አይደለም ሰልፈኛዉ እራሱ ይሕ ይሆናል ብሎ አላሰበም ነበር።የማይታማን አሉት አንዱ።


«ዛሬ ከጠዋት ጀምሮ የምናየዉ የማይተማን ነዉ።ተዋጊ ሐፓቺ ሔሊኮብተሮች ሠልፈኛዉን ከሰማይ ከበዉታል፥ ወታደሮቹ ይደበድቡታል።አምቡላንሶች ቁስለኞችን እንዳያነሱ፥ ሐኪሞች ሆስፒታል የደረሱ ቁስለኞችን እንዳያክሙ ወደ ሆስፒታል እንዳይገቡ ተከልክለዋል።ሥለዚሕ የዚሕ ዓለም ሕዝብ እንዲረዳን እንጠይቃለን።እኛ ሰላማዊ ሰዎች ነን።ተገቢ መብታችንን እንጂ ሌላ ነገር አልጠየቅንም።»

ማናማ በደም ጨቀየች። ሰማንያዎች ረገፉ።ብዙ መቶዎች ቆሰሉ።ለሰብአዊ መብት መከበር፣ ለዲሞክራሲ ፅናት ቆመናል የሚሉት የዋሽግተን፣ ለንደን፣ ፓሪስና የተባባሪዎቻቸዉን መሪዎችን ያስጨነቀዉ የሊቢያ እንጂ የባሕሬን ሕዝብ አልነበረም።

መጋቢት አስራ-ሰባት።የቃዛፊን ጨቋኝነት በአርባ-ሁለተኛዉ ዓመት ያወቁ-የመሰሉት ምዕራባዉያን ሐገራት በሊቢያ ላይ የበረራ-እግድ የተሰኘዉን ማዕቀብ በፀጥታዉ ጥበቃ ምክር ቤት አሥፀደቁ። በሳልስቱ ሊቢያ በምዕራባዉን ቦምብ-ሚሳዬል ትነድ ገባች።


መጋቢት ሃያ-አንድ፥-የፈረንሳይ፥ የብሪታንያና የዩናይትድ ስቴትስ ጦር የሊቢያን አየር ሐየር ሐይል በአራት ቀን እድሜ ማሽመድመዱን የዩናይትድ ስቴትሱ ጠቅላይ ኤታማዦር ሹም ማይክ መለን አስታወቁ።


«ቃዛፊ ከእንግዲሕ ተዋጊ አዉሮፕላንም ሆነ ሔሊኮብተር ማብረር አይችሉም።ሥለዚሕ የበረራ እግዱ ሙሉ በሙሉ ገቢራዊ ሆኗል ማለት እንችላለን።»

የበረራ እገዳዉ ሙሉ በሙሉ ገቢር ከሆነ-ድደባዉ መቆም ነበረበት።ግን የፀጥታዉ ጥበቃ ምክር ቤት ዉሳኔ ወትሮም ሰበብ እንጂ አላማ ሥላልነበር የዉሳኔዉ አስፈፃሚዎች ፍላጎት ዓላማ ከግብ እስኪደረስ የፈረንሳይ፥ የብሪታንያና የዩናይትድ ስቴትስ ጦር የጀመረዉን ድብደባ የሰሜን አትላንቲክ ጦር ቃል ኪዳን ድርጅት (ኔቶ) ተረክቦ ሊቢያን መረምረሙን ቀጠለ።

የኔቶ-ጦር ካየር፥ ከባሕር በሚያዘንበዉ ቦምብ ሚሳዬል፥ የቃዛፊ መንግሥትና በኔቶ የሚደገፉት አማፂያን ከምድር የሚረጩት መድፍ፥ ጥይት-ሊቢያና ሊቢያዉያንን ሲያጋዩ የየመን ሕዝብ የሰላሳ-ሁለት ዘመኑን ፈላጭ-ቆራጭ ሥርዓት ይገዘግዘዉ ያዘ።የፕሬዝዳት ዓሊ አብደላሕ ሳሌሕ ሥርዓት-ማርጀት ማፍጀቱን ከቀድሞዉ የሥርዓቱ አገልጋይ ከመሐመድ አቡልአሆም ቀድሞ የመሰከረ አልነበረም።


«በአደባባይ የምናየዉ፥ ወጣቶቻችን ለእዉነኛ ፍትሕ የሚያደርጉትን የተቃዉሞ ሠልፍ ነዉ።ከዚሕ ተምረን ለዉጡን መቀበል አለብን።ወደድንም ጠላንም ለዉጡ አይቀርም።»

የየመን ሕዝብ ትግል አላባራም።የዓሊ አብደላሕ ሳሌሕ ፀጥታ አስከባሪዎች የገደሉት-ሰላማዊ ሰዉ ቁጥር በትንሽ ግምት ከአራት መቶ በልጧል።ሳሌሕም ቆስለዋል። ለየመን ሕዝብ እንደ ባሕሬን ሁሉ የደረሰለት ግን የለም።ከሕዝባዊዉ አብዮት መሪዎች አንዷ ታላቁን የሰላም ኖቤል ሽልማት ከሌሎች ጋር ተጋርታለች።አቡልአሆም የተነበዩት ለዉጥ ግን እስካሁን የለም።

ግንቦት አንድ።ሊቢያ ከምድር ካየር-መንደዷን ቀጥላለች።የመን በሕዝቧ ጩኸት፥ በገዢዎቿ ጥይት ትተረማሰለች።የዓለም ወዛደሮች ዓመታዊ ግብራቸዉን በየአደባባዩ ሰልፍ-አድረሰዉ ሲመለሱ ከዋሽግተን ያልተጠበቀ ዜና ተሰማ።፡
«እንደምን አመሻችሁ።በዛሬዉ ምሽት ለአሜሪካ ሕዝብና ለመላዉ ዓለም የሚከተለዉን ዘገባ አሰማለሁ።ዩናይትድ ስቴትስ ባደረገችዉ ዘመቻ-በሺ ለሚቆጠሩ ንፅሐን ወንዶች፥ ሴቶችና ሕፃናት ሕይወት ተጠያቂ የሆኑትን አሸባሪዉ የአልቃኢዳ መሪ ኦስማ ቢን ላደን ተገድለዋል።»

የድል-ብስራት።ከብዙዎቹ የአረብ ሕዝብ ዘግይቶ በገዢዎቹ ላይ ያመፀዉ የሶሪያ ሕዝብ ትግል ለወራት ብልጭ ድርግም ሲል አዝግሞ-ሰኔ ላይ ድብልቅልቁ ወጣ።


የሕዝቡ ተቃዉሞ ሲግም ምዕራባዉያን ሐገራት የፕሬዝዳት በሽር አልአሰድን መንግሥትና ባለሥልጣናቱን በተከታታይ ማዕቀብ ቀጡ።የአረብ ሊግም እንዲሁ።የተባበሩት መንግሥታት ድርጅት ባለፈሰዉ ሳምንት እንዳስታወቀዉ የአሰድ መንግሥት አመፁን ለመደፍለቅ በወሰደዉ እርምጃ የተገደሉት ሰዎች ቁጥር አራት ሺሕ ደረሰ።አመፁም፥እመቃዉም፥ ማዕቀቡም ቀጥሏል።

የአረብ ሕዝብ የየሐገሩን የዘመነ-ዘመናት ፓለቲካዊ ሥርዓት ለመለወጥ እየወደቀ-ሲነሳ ፍልስጤሞችም የዘመናት ጥያቄቸዉን እንደገና አነሱት።ኒዮርክ ።የተባበሩት መንግሥታት ድርጅት ጠቅላላላ ጉባኤ መስከረም-ሃያ ሁለት።
«የተከበሩ ፕሬዝዳት፥ ንግግሬን ከመጀመሬ በፊት፥-እንደ ፍልስጤም መንግሥትና እንደ ፍልስጤም ነፃ አዉጪ ድርጅት ፕሬዝዳትነቴ፥ ርዕሠ-ከተማዉን እየሩሳሌም ያደረገ፥ የድሕረ-ሰኔ አራት 1967ቱ ድንበር የሚያዋስነዉ የፍልስጤም መንግሥት፥ የተባበሩት መንግሥታት ድርጅት ሙሉ አባል እንዲሆን ለዋና ፀሐፊ ፓን ጊ ሙን ማመልከቴን አስታዉቃለሁ።»

ፕሬዝዳት ማሕሙድ አባስ።አባስ በይፋ-ከማመልከታቸዉ በፊት የፍልስጤሞችን ጥያቄ ፕሬዝዳት ባራክ ኦባማ አዳፍነዉት ነበር።መስከረም

«ለብዙ አስርታት የቆየዉን ግጭት ለማስወገድ አጭር-አቋራጭ እንደ ሌለ አምኛለሁ።ሰላም ከባድ ሥራ ነዉ።ሠላም በተባበሩት መንግሥታት ድርጅት መግለጫና ዉሳኔ አይርድም።እንዲሕ ቀላል ቢሆን ኖሮ እስካሁን ሰላም በፀና ነበር።»

እስራኤል የተመሠረተችዉ ግን በተባበሩት መንግሥታት ድርጅት መግለጫና ዉሳኔ ነበር።ኦባማ ያዳፈኑትን የፍልስጤሞች የአባልነት ጥያቄ የእስራሉ ጠቅላይ ሚንስትር ቤንያሚን ኔታንያሁ ጨርሶ ቀበሩት።

ኒዮርክ የታደሙት የአለም-ፖለቲከኛ ዲፕሎማቶች ሥልሳ-ሰወስት ዓመት እንደለመዱት እስራል፥ ፍልስጤም ሲሉ የካፒታሊስቱ ሥርዓት፥ በተለይም የገንዘብ ተቋማቱ ብዝበዛና ገፈፋ ያንገሸገሻቸዉ ወጣቶች-እዚያዉ ኒዮርክ ለተቃዉሞ አደሙ።መስከረም አስራ-ሰባት የኒርክ ወጣቶች ዙኮቲ በተሰኘዉ አደባባይ እንደዘበት የጀመሩት አድማ-ተቃዉሞ ድፍን ዓለምን አዳርሷል።ሰሞኑን ግን ከመንግሥታቱ ጫና ጋር የሰሜኑ ንፍቀ-ክበብ ብርድ አቀዝቅዞታል።


መስከረም አስራ-ዘጠኝ የፓኪስታን ግዛት በጎርፍ ተጥለቀለቀች።አራት መቶ ሰላሳ-ሰዉ ሞተ።ብዙ ሺዎችን አፈናቀለ።ጥቅምት አምስት፥-አሜሪካዊዉ የኮፒዉተር ሊቅና አፕል የተሰኘዉ የኮፒዉተር ፕሮግራምም ፈላስማ፥ የኩባንያዉ መስራች ስቲቭ ጆብስ በሐምሳ ስድት አመታቸዉ ሞቱ።

እንደገና ሊቢያ።የምዕራባዉን ጦር ቦምብ-ሚሳዬሉን ማዝነብ ሲጀምር-ለሙዓመር ቃዛፊ መጀመሪያ ቃል ነበር።


«ለሊቢያ ከነዚሕ አይጦችና ቅጥረኞች እኔና ጓዶቼ እጅግ በጣም እንሻላለን።በስተመጨረሻዉ መስዋዕት እሆናለሁ።»

ዎል-ስትሪትን አንቆጣጠርቃልም-ገቢር ሆነ።ጥቅምት ሃያ። የሊቢያ የአርባ አንድ አመት ገዢ ሲርት-ተወልደዉ ሲርት ተገደሉ።ስልሳ ዘጠኝ አመታቸዉ ነበር።የሊቢያዉ ጦርነት ባንዳዶች ግምት ከሰላሳ ሺሕ በላይ ሰላማዊ ሰዉ አልቋል።

ዓለም፥ አረብ፥ ጃፓን፥ ቢን ላደን-ቃዛፊ፥ ፍልስጤም እስራኤል ሲል ችላ ያላት አፍቃኒስታን አስር አመት የለመደችዉን የእልቂት ፍጅት ዑደት በሰላም-ተስፋ ለማጀብ ያሕል ዓለም ቦን ላይ ለጉባኤ ታደመላት።ታሕሳስ-አምስት። በሳምንቱ ሩሲያ ዉስጥ የምክር ቤት አባላት ምርጫ ተደረገ።

በምርጫዉ የቀድሞዉ ፕሬዝዳት፥ ያሁኑ ጠቅላይ ሚንስትር፥ የወደፊቱም እጩ ፕሬዝዳት ቭላድሚር ፑቲን የሚመሩት ፓርቲ አሸንፏል ተባለ።ተቃዋሚዎች ግን ሐሰት አሉ።በመቶ ሺሕ የሚቆጠር ደጋፊያቸዉን ለተቃዉሞ ሰልፍ-በድሮዎቹ ቀይ አደባባዮች አሰለፉት።ቅዳሜ።


እና በአደባባይ ሰልፍ-የተጀመረዉ ሁለት ሺሕ አመት፥ ከአፍሪቃ በስተቀር የአደባባይ ሰልፍን በመላዉ ዓለም አዳርሶ-ባደባባይ ሰልፍ ሊያበቃ-አራት ፈሪ አለ ዛሬ።ዑደቱ ቀጥሏል። በዘመኑ ለምታሰሉ መልካም አዲስ አመት።

SELAM + FIKR MINGIZEAM LENANTE YIHUN
ማህቡብ
ኮትኳች
ኮትኳች
 
Posts: 264
Joined: Thu Aug 18, 2005 3:17 pm

PreviousNext

Return to Warka Culture and Literature - ዋርካ ባህልና ሥነ ጽሑፍ

Who is online

Users browsing this forum: No registered users and 2 guests