ጥላ ዓልባ__________(ልብ ወለድ)

[ዋናው]

ሰላም ውድ አንባቢያኖች ሆይ እነሆ ቃል በገባውበት መሰረት አዲስ ልብ ወለድ ይዤ ቀርቤያለሁ::እንደተለመደው ሁሉ ሙያዊና ሀሳባዊ አስተያይቶቻችሁ ይጠቅመኛልና አደራ__ብትችሉ ውድ ወንድሜ ዋኖስ በከፈተልኝ የአስተያየት መድረክ ላይ አስተያየቶቻችሁን ታሰፍሩልኝ ዘንድ እለምናለሁ::

ታዲያ ኮፒራይቱ በሣይበር ኢቲዮጲያ አላፊነት ቢሆንም አደራ በመተማመን ይሁን

ከብዙ ብዙ ማክበር ጋር
_______________________///______________________

(-1-)

ለንደን

ጭጋጉ ካሁን አሁን ወርዶ የሰው ራስ ሊነካ የደረሰ ይመስል ከብዷል:: ህዝቡ እጣው ነውና ኑሮውና ህይወቱ ነውና ፊቱን በጭጋጉ ላይ ከማቀጨም በቀር ምርጫ አልነበረውም ሰሀቱ ለመጨለም ባይደርስም ያቺ የማትበረክት የክረምት ጀንበር ግን የከበደውን ደመና ሸሽታ በምን አገባኝ ስሜት ወደማደሪያዋ አዘቅዝቃለች
ለንደን አኩርፋለች መዝነብ የሚፈልግ ሚመስለው አየርም ኩርፊያዋን ሊያባብስ ሁሉ እየተለዋወጠ ያናድዳታል ይሄኔ ህዝቧ በየፐቡ/መጠጥ ቤት/ ውስጥ እየተከተተ ፓይንት/ድራፍት/ ይጨብጣል ሲጋራ ያቦናል
ዘካሪያስ ሁለቱን ሲጋራ አከታትሎ እየማገ ሲተክዝ ያመጣውን ስቴላ የፓይንት ቢራ ሲጨርስ አልታወቀውም:: ያደረገውን ወፍራም የጃኬት ኮሌታ ወደጆሮግንዱ እየሳበ አንገቱን ወደደረቱ እየቀበረ ከደጅ ይዞት የመጣውን ብርድ ቀጭሞታል አህምሮው ግን ያንሰላስላል ከዛም ፊቱን አንዴ ኮስተር አንዴ ፈገግ እያደረግ ብቻውን እንደሚያወራ ሁሉ ያጉተመትማል ግን ቃሎቹ አይሰሙም::
ሰሀቱን ሲመለከት 5 ሰሀት ከ23 ሆኖዋል ጸሀይዋ ከጠለቀች ትንሽ ቆየች ዘካሪያስ ደንዳና ሠ[/list]ነት ሰፊ ትከሻው ሁሌም ያልከፋውና ያልተቸገረ ያስመስለዋል:: ጠይምና ሁሌም የራስ ጸጉሩን እየላጨው መላጣ ነው:: አጠገቡ የነበረ አንድ አገጩ ሹል እንግሊዛዊ ምናልባት ፑል መጫወት ይፈልግ እንድሆን ጠየቀው አጫዋች በመፈለጉ ዘካሪያስ ጓደኛው የምትመጣበትን ሰሀት አሰላና አንድ ጌም ቢጭወት እንደሚችል ነግሮት ሲጋራውን አጠፋና የፑሎቹን ድንጋይ የሚጠነቁልበትን ዱላ መምረጥ ጀመረ::

ፑሉን እየተጫወተ ሳለ ቫኔሳ መጥታ ፍልቅልቅ ያለ ደማቅ ሰላምታ ሰጥታው የፑሉን ጠርጴዛ አስደግፋ ከናፍርቱን ለመናፈቋ ጎርሳውና አጣጥማው መጠጧን ለመቅዳት ወደ ባርቴንደሮቹ አመራች:: ቨኔሳ ጂንጀር ጸጉር ያላት ረጅም አቋሟ ያማረ ወጣት ናት የፊቷ አወራረድና የቋንቋዋ ቃና ከደቡባዊ ብሪታኒያ መሆኗን ይናገራል ቅልጥፍናዋ ከንግሊዛዊነቷ ቢሆንም ስትናገርና ነገሮችን ስታስረዳ ርጋታዋ ይስባል

''የሰጠህኝን መጸሀፍ አልጨረስኩትም የኔ ፍቅር ዛሬ ላመጣልህ ቃል ገብቼ ነበር ይቅርታ በስልክ እንደማልችል መንገር ነበረብኝ::'' አለችው ሲጋራዋን እየለኮሰች የላይኛው ከንፈሯ ስስ ሆኖ የታችኛው ትንሽ ስጋ ከብዶት ጠልጠል ያለ ነው

''ምንም አይደለም ቫኒ ለባለቤቱ ካምስት ቀን በኅላ እንደምመልስለት ልነገረው እችላለሁ ''

አላት የዱላውን ጫፍ በመሞረጃ ጠመኔ እየሞረደ የባለጋራው አይን ሲቁለጨለጭ አስተዋወቀው ቫኔሳን:: ቫኔሳ ደክሟት ስለመዋሏ በግጽታዋ ያስታውቃል

''በጣም ደስ የሚል ዜና አለኝ ዛሬ የኔ ፍቅር''
አለችው የዘካሪያስን አይኖች ቀርዝዛ በፍቅር እያየች ስትናገር እንግሊዘኛዋ ለጆሮ ደስ ይላል ከድምጿ መረዋነት ጋር

''ምን ተገኘ ቫኒ....?''
አላት ተራው ደርሶ ፑሉን እያነጣጠረ
.
.
.
ይቀጥላል

ዋናው_________________________________________________::[/list]

[አብዮት]

::

[ፓን ሪዚኮ]

ወድ ወዳጄ ዋናው ቃልህን አክብረህ ብቅ ስላልክ ደስ እንዳለኝ ልገልጽልህ ነው ብቅ ያልኩት ቆንጆ ጅምር ነው ....ወደፊት ስትገፋ አስተያየቴን እሰጣለሁ
በርታ አባው

[ዋናው]

.(-2-)
.
.
''እናትና አባቴ ቅዳሜ ከሰሀት ለንደን የገባሉ ላንድ ሳምንት እኔጋ ናቸው ነግሬሀለው አይደል ከአሁኑ አርብ ጀምሮ ለ10 ቀን ዕረፍት እንደሆንኩኝ ጥሩ አጋጣሚ ነው አይደል ....ዘካር''
አለችው በበረዶ ጥርሷ እየሳቀች ስሙን ስትጠራው ዘካር እያለች ነው ስለሚረዝምባትና በዛውም እያቆላመጣት እሱ ቫኒ እንደሚላት ሁሉ

''ዋው ጥሩ ዜና ነው ናፍቀሻቸው ነበር አይደል? ''

''አዎ ይበልጥ ግን የናፈቅኩት አንተን ማስተዋወቁ ነበር እነሱም አንተን ማየት ጓጉተዋሉ::''

''ይሄን ያህል ቫኒ.....?''
አላት የጀመረውን ጨዋታ አሸንፎ ባለጋራውን ጨበጠና

''አዎ የኔ ፍቅር ሁሌም'ኮ ነው ስላንተ የምነግራቸው''
እያለች ዘካሪያስ የደረደረውን ኳሶች አነጣጥራ ለመበተንና ጨዋታውን ለመጀመር እያለመች

''የሚወዱኝ ይመስልሻል?''
ሳቀችና ቀና ብላ ጥቁር የተቀለመ ሽፋሽፍቷን እያርገበገበች

''ዘካር......መውደዱ የኔ ድርሻ ነው የነርሱ ድርሻ ልጃቸው የወደደችውን መተዋወቅ ብቻ ነው::''
አለችውና ወደጨዋታዋ ቀጠለች

________________________________________

ዘካሪያስ ያገሩን አፈር አራግፎ ከተሳፈረ አስራ ሁለት ዓመቶች እንደቀልድ ነጎዱ ስደት ዕጣዬ ብሎት ተሰዶት ኖረ ወደዚህ ምድር ሲመጣ ብዙ ህልሞች ነበሩት ከነዛ ህልሞች ውስጥ አሁን በደንብ እውን ያደረገው ህልም ቢኖር ቋንቋውን እንደተወላጆቹ አንብንቦ መናገሩ ነው ብሎም ግሳንግስ በሀላቸውን መውረሱ...እነኚህን ህልሞች ግን እዛ ያልማቸውንጂ እዚህ ሲፈቱ ቅዠቶች ናቸው ከማንነትጋር ያለን ጸብ አስታርቆ መኖር ደግሞ የስደት ጠበብት መሆንን ይጠይቃል ይሄንን የታደሉትም ጥቂቶች ናቸው::

የራሱ ቤት ሆኖ አልጋው ላይ በሆዱ ተደፍቶ ቴሌቭዥኑን በሪሞቱ እየጎረጎረ ፕሮግራሞችን ይቃኛል በሰሀቱ ያሉት ፕሮግራሞች ህጻናትና አረጋዊያንን የሚያስደስቱ ጥቂት የኢንተርቴመንት ፕሮግራሞች በቀር ዜና ብቻ ነበር:: ስራ ፈትነቱን የሚያማርረውም ይሄንን ፕሮግርም ሲያስተውል ነው እንግሊዞችስ አሽሙረኞች አይደሉ....
የሚፈልገውን ያህል ባይሆንም ተምሮ ወረቀቱን ይዞዋል ግን አይሰራም በቃ ቤቱስጥ ቁጭ ብሎ መጸሀፍ ማንበብና ቴሌቭዥን ማየት....
ወደ ሳሎኑ ገባና የጀመረውን መጸሀፍ አነሳና ወደ ምግብ ማብሲያ ክፍል ዘልቆ ቡና ለመጠጣት የውሀ ማፊያውን ሶኬት ሰክቶ ውሀ ጣደ ::
አንተነህ የበሩን መጥሪያ ሲያንጫርር የማዳመጫውን እጄታ አነሳና በድምጹ አረጋግጦት የበሩን መክፈቻ ተጭኖ እንዲገባ ነገረው

''በቃ አንተ ሰው አገር ዝም ብለህ ትተኛለህ አይደል...?''
አለው ገብቶ ቦርሳውን ከትከሻው እያወረደ አንተነህ ቀጭን ነው ጸጉሩ ተንጨባሮ አድጎዋል ከሰልካካ አፍንጫው ስር ያለው የሲጋራ ጢስ ያቦዘዘው ጺሙ አድጎ ከንፈሩን ጋርዶታል ብርሁ ዓይኖቹ ሲያዩ ማንነቱን ይናገራሉ

''ምን ይደረግ...ሲያነጥፉልኝ ስንፍና እንደሆን የዘሬ ነው ''
አለው ዘካሪያስ ተነስቶ እየተንጠራራ ዓይኖቹን አብሶ ማዛጋቱን ጨረሰና ሰሀቱን ገልመጥ አደረገ

''ክላስ ጨርሼ ነው ባላልከኝ አንቱሽ...?''

''እንዴ ዘኪ ሊጨልምኮ ነው...''
አለና አንተነህ ሶፋው ላይ ቁጭ ብሎ ሲጋራውን መጠቅለል ጀመረ: የዘካሪያስ ሞባይል ስታንጫርር አንተነህ አንስቶለት ወደ ምግብ ማብሲያው ክፍል ተከተለው

''ሄሎ.....''

''ሄሎ ዘካሪያስ ነህ?'' ለስላላ ይሴት ድምጽ

''አዎ ነኝ ማን ልበል?''

''ሰባዊት እባላለሁ አታውቀኝም ከኢትዮጲያ መልዕክት ይዤልህ መጥቼ ነው ''

''ማነው የላከልኝ መልህክቱን የኔ እህት?''

''ታናሽ እህትህ ሮማን ነች::''

እየተቅለሰለሰ በትህትና የትና መቼ ሊያገኛት እንደሚችል ጠይቆና ለመገናኘታቸው ድጋሚ ሊደዋወሉ ተስማምተው ስልኩን አናግሮ ጨረሰ::

''ምን ቀረህ ደግሞ ጋቢ ሳይቀር ካገርቤት አስመጥተሀል ሽሮና በርበሬውም ቤትህ ሙሉ ነው እንግዲህ የቀረህ ፀሀይ ነው እሱንም ላኩልኝ ብለህልኝ ይሆናላ.....ያንተ ነገር''
አለው አንተነህ

''እኔንንጃ አልደወለችልኝም ሮሜ......''
አለና ቡና እንደሚፈልግ ጠይቆት ለርሱም ቀዳለት::
.
.
.
ይቀጥላል::

ዋናው_________________________________________::

[sleepless girl]

ዋናውውውውውውውውው ያው እንደተለመደው ችሎታህን እያሳየህ ነውና ቀጥልበት ልልህ ነው የመጣሁት:: ግን........ቶሎ...ቶሎ ለመጻፍ ሞክር:; ብትችል በቀን 2ጊዜ! :wink: :wink: ታዲያ እኛ እንሙት እንዴ?????

አድናቂህ

[ዋናው]

(-3-)
.
.
.
ከሁለት ቀን በኅላ ነው ከአገር ቤት የመጣችው መልህክተኛ ለዛሬ አግኝቷት እቃውን ካልተቀበለ ወደ ሊድስ ሄዳ እንደምትከርም ነግራው ነበር አመሻሹ ላይ ወደ ሰሜን ለንደን ውድ ግሪን የተሰኘ ስፍራ ተቃጥረው ስልኩን የዘጋው አፍታም ያህል ሳይቆይ ቨኔሳ አንጫረረች
ቀኑ አርብ ነው የሳምንቱን አውራ ምሽት ከርሷ ጋር በቢራዎች ሞቅታ ለማለት ግብሩ ነበርና ደነገጠ::

''ሀይ ቫኒ.....''

''ሀይ ፍቅሬ ስልክህን ስሞክረውኮ ተይዞ ነበር...''

''አዎ ከአገር ቤት መልዕክት መጥቶልኝ ከነርሱ ጋር እያወራው ነበር ''
አላት በዛውም እንደማይመቸው ለመንገር መንገዱን ስትከፍትለት

''ጥሩ ነው የምትፈልገው ዕቃ መጣልህ?''

''ገና አላየውትም 5:00 ሰዓት ላይ ውድ ግሪን ተቃጥረናል ''
አላት እየፈራት

''ዛሬ'ኮ አርብ ነው ክለብ እንወጣለን አይደል?''

''አዎ ይመስለኛል....እዛ ሄጄ ለመመለስ አንድ ሰዓት ተኩል ቢፈጅብኝ ነው ቫኒ ዕቃው ቤት የሚገባ አይነት ከሆነ ተኩል ተጨማሪ ሰዓት እቆይ ይሆናል::''

''የኔን መኪና መጠቀም ትችላለህ ስታልፍ በኔ ሰፈር እለፍ ዘካር....''
አለችው ፍቃደኛነቷን በመግለጽ

ዘካሪያስ ውስጡ ዛሬን ማምሸት አልፈለገም ነበር እየሸፈተ ወደቤተሰቦቹ በሀሳቡ ሲነጉድ ብቸኝነት ያምረዋል
.
.
.
ይቀጥላል

ዋናው_________________________________::

[RASሊዮ]

/color] [i][/i

[ዋናው]

.(-4-)
.
.
.

ብቻውን ሆኖ ስለራሱ ያለፈ ሕይወቱና ስለወደፊት ማንነቱ ከራሱ ጋር ያወራል በእንግሊዝ ጨለማ ሰማይ ላይ አይኖቹን ተክሎ:
አሰልቺውን የለንደንን የመኪኖች ጭንቅንቅ እንደምንም አልፎ በቀጠሮው ሰሀት ደርሶ መኪና ማቆሚያ ሲፈልግ ሰባዊት ስልኩ ላይ ምልክት አደረግችለት:: እንደደረሰ ነግሯት ለምልክቱ መላጣነቱን ጠቁሟት መኪናውን አቆመና ውድ ግሪን የተሰኘ ባቡር ጣቢያ ጋር አመራ :
ሰባዊት እየሳቀች መጣችና ለመጨበጥ እጇን ዘርግታ

''ዘካሪያስ...?''
አለችው ፈገግ ብላ በርግጠኛነት

''ይቅርታ አይደለሁም ማን ልበል የኔ ቆንጆ...?''
አላት የጠየቀችው መላጣ ሰው

''...ውይ ይቅርታ አበሻ ስለሆንክ ተሳስቼ ሌላ ሰው መስለህኝ ነው::''
አለችው ተርበትብታ አይኖቿ ጎላ ያሉ ከመሆናቸውም የጠሩ ናቸው ዘለግ ያለ ቁመናዋና የገጿ ማማር አይንን ይስባል

''ጤና ይስጥልኝ ሰባዊት...አውቄ ሳሾፍብሽ ነው ቅቅቅ ማሾፍ ደስ ይለኛል የኔ እመቤት ''
አላት ዘካሪያስ እየሳቀ በመደንበሯ ተገርሞ

''ምን አደርኩህ በናትህ ለራሴ እንግዳ ነኝ ትጫወትብኛለህ አይደል....''
አለችና ጨበጠችው
''...ደግሞ የለንደን አበሾች ለሰላምታ እንደሚኮሩና አበሻ ማናገር እንደማይፈልጉ እዚህ የተቀበሉኝ ሰዎች ስለነገሩኝ ነው የደነገጥኩት...'' ስትለው

''ምን እዚህ እንግዳ ተቀባዩ አበሻ ሁሉ ይሄንን አባባል እየሰበከ የሚመጣውም የከረመውም አበሻ ተዘጋግቶ መገለማመጥ ብቻ ሆነኮ:: ባክሽ...ተያቸው አትስሚያቸው ሁሉም አበሻ ያገሩን ዜጋ ይፈልጋል''
አላት ያንጠለጠለችውን ከባድ ፌስታል ለማገዝ እየተቀበላት: ትንሽ ቆም ብላ ስታንገራግር
'' እርግጠኛ ነኝ ቡና ለመጋበዝ ሰሐቱ ይኖርሻል...''
አላት የራሱን ሰሀት ገልመጥ እያደረግረገ

''እምምም....የተቀብሉኝ ሰዎች ሊያስቡ ይችላሉ ወይም መደወል ይኖርብኛል::''
አለችው:: ስልኩን አቀበላት

''ግን ብዙ አንቆይም ም/ያቱም ነገ በጠዋት ወደ ሊድስ ስለምሄድ ሱቆች ሳይዘጉ መግዛት የምፈልገው ነገር አለ::''
አለችው ስልክ እየደወለች

''ምንም ችግር የለሁም ብቻ ትንሽ ቡና እየጠጣን ስለአገር ቤት እንድታወሪኝ'ንጂ ሌላ ጊዜ በደንብ እንቀጣጠርና አገርም አሳይሻለሁ...''
አላት ፈገግ ብሎ ፈገግታውን የሚያደምቁለት ግጥግጥ ያሉት ድርድር ጥርሶቹ በሲጋራ ጪስ በልዘውም የተመልካቹን ዓይን ይስባሉ:

ይዞ ያመጣላትን የስታር-ባክ ቡና ሱካሩን መጥና ጨማመርችና እያማሰለች
''ሮሜ ብዙ ጊዜ ስላንተ ታወራለች ብዙ ቆየህ መሰለኝ...?''
አለችው በንግዳነት.ስሜት.... ያይኖቿን ጉላት ሊያዳምቁ ችምችም ያሉት ቅንድቦቿ ጥግ በሚንከባለሉ ብሌኖቿ እያተኮረችው...

''መቆየት ነው የሚባለው ሠባዊት ....ኮብልዬ ይሔው የእንግሊዝ ቡዳ በልቶኝ እዚሁ ሸብቦኝ አስቀረኝንጂ....''
አላት ተንፍሶ ቡናውን እየተጎነጨ

''ለመሔድ አላስብክም.....?''

''ለመሔድ ማሰብ የጀመርኩትማ ሰባዊት.....ገና ይሔንን ጭጋግ አገር ረግጬ ብርዱን ስቀምሰው በአንድ ወሬ ነበር....''

''ኣሀ ስትመጣ አልወደድከውም ነበር?''

''በጭራሽ.........?''

''ታዲያ ለምን አልተመለስክም?''

''እኔንጃ እስካሁን አይገባኝም ....ስደት ገደለኝ ሬሳዬን ደግሞ ይዤ እናትና አባቴ ጋር መመለስ ፈራው ''
አላት እየሳቀና መላጣውን በመዳፉ እያበሰ

''አልገባኝም::''
አለችው ሠባዊት ንግግሩ አስገርሟት

''አይገባሽም ተሰደሽ ስለማታውቂ አይገባሽም ስደት መጥፎ ነው...ላንቺ የተፈጠርውን ምድር ትተሽ ለሌላው የተፈጠረውን ምድር ላይ መላመድ አስቸጋሪ ነው::''

ቡናዋን እየተጎነጨች የስሜቱን መቀያየር ስታስተውል ርህስ መቀየር እንዳለባት አስተውላ
''....ጥርሳቹና አይናችሁ ከሮሜ ጋር አንድ አይነት ናችሁ::''
አለችው ድጋሚ እያስተዋለችው
''ሮሜ'ኮ ቆንጆ ልጅ ነች አይደል እንጃ አውን አላውቅም ...''
አላት::
''ኸረ አውንም ቆንጆ ናት::''
አለችው: ፍልቅልቅ ብላ

ጥቂት ተጨዋወተው መለያየታቸው በሰሀቱ መሮጥ ሳቢያ ግድ ሆነና ለሌላ ጊዜ ከ ሊድስ ስትመለስ ድጋሚ ተቃጥረው ሊገናኙ ተነጋገሩና በመልካም ትውውቃቸው ተመሰጋግነው ዛሬን ተለያዩ::
ወዲያው ስልኩ ሲደወል የቨኔሳ መሆኑ ገብቶት ነበር:: ከ15 ደቂቃ በኃላ እንደሚደርስ ነግሯት ስልኩን አነጋግሮ ዘጋው::

ወደሷ ሲያመራ ስለፍቅሯ እያሰበ ነበር:ይወዳታል ስለምታፈቅረው ያፈቅራታል ግን ሁሌም አያምናትም ምንም ቢሆን እንግሊዝ ናት ይላል:: ፍቅሯ ሲያልቅ ምን ልትለው እንደምትችል ያስባል:: ሁሌም ከርሱ መውለድን ስትፈልግ የእንቢታ ም/ኚያቱም ይሄው ጥርጣሬው ነው:: የእንግሊዝ ክልሶችን ህይወት እጣ-ፈንታን በአብሮ ኑሮው ልምዱ ያውቀዋል ለውበት ብቻ ተዳቅለው የተፈጠሩ እንቡጦች'ንጂ ውስጣዊ ማንነታቸውና የማህበረሰብ ግጭቶች;የባህል መወዛገብ ችግሮች ስነ-ልቦናቸውን የጎዳቸው ሰዎች ናቸው::
ዘካሪያስ ደግሞ ከአብራኩ የወጣ ልጁ ይሄንን አይነት የችግር ሰለባ እንዲሆን አይፈልግም::
.
.
.
ይቀጥላል

ዋናው__________________________________::
[/list]

[ሳምሶን15]

[ሳተርን]

ዋናው,,,


እንደተለመደው ቆንጆ መጣጥፍ ነው.... ግሩም ጅምር,

[ዋናው]

(-5-)
.
.
.
ገዝቶ አንገቱን ያነቀውን የወይን ጠጅ ወደውሀላው ይዞት የበሯን መጥሪያ ሲጫነው ቨኔሳ ከውስጥ መረዋ ድምጿን አሰምታው ከፈተችለት::
ወይኑን ሲያቀብላት በፈገግታ ፍልቅልቅ ብላ ወደግንብሯ ተደፍቶ የነበረውን ጸጉሯን ወደ ውኅላዋ በራሷ እየወረወረች መሳም ስለመፈለጓ ከነፍርቱን አየች: የልምዳቸውን ተሳስመው ከውሀላዋ አስከትላው እናትና አባቷ ጋር ስትደርስ አስተዋወቀቻቸው::

''ዳድ ማም ዘካር ማለት እሱ ነው....''
ዘካሪያስ ለመልካም ትውውቅነቱ መደሰቱን በአፉ ገልፆላቸው ከፊት ለፊታቸው ሶፋው ላይ ተቀመጠ::
አባትየው ግራጫ ጸጉር አለው የፊቱ አወራረድ ረዘም ከማለቱም የአገጩ ግርጌ ላይ ተድብልብሎ የሰረጎደው መልኩ ከትንንሽ ውሃ ሰማያዊ አይኖቹ ጋር አንዳች የማድፈራት ሞገስ አለው:: ቅልጥማምነቱን ላስተዋለ ቫኔሳ በአባቷ መውጣቷን ያስታውቃል::

''ቨኔሳ ብዙ ጊዜ ታነሳሀለች...መላካም ጸባይህን ታደንቃለች::''
አለች እናቲቱ ግንፍል ያለ ፈገግታዋ ፊቷ ላይ እየፈሰሰ ብቻ ከውስጥ ይፍልቅ ከውጪ አያስታውቅምንጂ.... የጸጉሯ ቀለምና የፊቷ ገጽ እንደልጇ ሁሉ ደስ ይላል:: ርብትብትነቷ ከባሏ ጋር ሲነጻጸር ጨዋታ ፈላጊነቷን ያናገራል::

''...አዎ ቨኔሳም መልካም ጸባይ ያላት አስተዋይ ሴት ናት''
አለ ዘካሪያስ ልጃቸውን እያሞገሰላቸው: በዓይኑ ወደሁለቱም እያስተዋለ

''ምን እየሰራህ ነው አሁን ማለቴ ስራህ ምንድነው?''
አባት ጠየቀ ፒፓውን አስተካክሎ መሎከሻ እሳት ፍለጋ ኪሱን ሲዳብስ ዘካሪያስ ከኪሱ ሲያቀብለው እንደማይፈልግና የራሱ እንዳለርው ተናግሮ የራሱን መፈለጉን ቀጥሎ ለጥያቄው መልሱን መጠበቅ ጀመረ

''ለጊዜው ምንም አልሰራም ሚስተር ግራሀም''
አለ ዘካሪያስ ፈጠን ብሎ እንደማይሰሯ ከልጃቸው መስማታቸውን ያውቃል:እነርሱም ቢሆን ከልጃቸው ስራአጥነቱን መስማታቸውን ዘካሪያስ ማወቁን ያውቃሉ...

''ትማራለህ ማለት ነው?''
ቀጠለች እናቲቱ አጠር ያለ አገጯን የፈገግታ ቅርፅ ሰጥታው::

''ከአምስት ወር በፊት የመጀመሪያ ዲግሪዬን ሰርቼያለሁ:: በሚቀጥለው ኤፕሪል ወር ተመሳሳይ ትምህርቴን ለመቀጠል እያሰብኩኝ ነው....''
አለ ዘካሪያስ በሰለቸ ስሜት

''በምንድነው የተመረቅከው....ምንድነው ያጠናኸው?''
አባትዬው ጉም የመሰለ ጪስ ከፒፓው አቡኑኖ ጠየቀው:: ዘካሪያስም የራሱን ሲጋራ ለኩሶ የግሉን ጪስ አቦነነና

''በፊልም ጥበብ::''
አላቸውና ይቅርታውን ጠይቆ ወድ ፍቅረኛው ቫኔሳ ምግብ ማብሰያ ክፍሉስጥ ሄደ::
እናቲቱ የእግሩን መሔድ አይታ ወደ ባሏ ጠጋ ብላ
''ጥሩ ትምህርት ነው አይደልንዴ ውዴ?''
አለችው እያቆላመጠች እንግሊዞች ዕድሜያቸው እየገፋ በሔደ ቁጥር ፍቅራቸው እያየለ ነው የሚመጣው በዚህ ነገራቸው ደስ ይላሉ:: በጋ ሲመጣ ጎዳና ላይ ሲንሸራሸሩ የሚታዩት የዕድሜ ባለፀጋ ጥንዶች ተቃቅፈው ሲሳሳሙ ነው የሚታዩት ለቅድመ ኃያትነት ደርሰውና ጎብጠው ሳይቀር::

''ቫኒ....ይቅርታ ዛሬ ጓዳም ገብቼ ሳልረዳሽ ከነ ሚስስ ግራሀም ጋር ጨዋታ ይዤ ነው''
አላት የምግብ መበያ ሰኃኖችን ጠራርጎ እያስተካከለላት

''ምንም አይደለም ፍቅሬ መሰንበታቸው ስለማይቀር ነገና ከነገ ወዲያ ተራው ይደርስሀል::''

''እናትሽ ተጫዋች ይመስላሉ...''

''እናቴ ተጫዋች ናት አባቴ ትንሽ ዝምተኛና ነገረኛ ነው::''
አለችው

''ቫኒ..............??''
ጠራት ወደሚያስተካክለው ሹካና ቢላ እንደተደፋ

''አቤት....''

''ቤተሰቦችሽ የኔ ስራ አለመስራት ምናልባት..........''
አልጨረሰውም:
ቫኔሳ ገላምጣው መናደዷን ስታሳየው ለጥያቄው መልሱን ማግኘቱን አውቆ ለይቅርታ አቀፋትና ግንባሯን ሳማት ኩርፊያዋ ወዲያው ነው ገለል የሚልላት::

''ዘካር......ቤተሰቦቼን ያስተዋወቅኩህ እነርሱ በኔ ሕይወት እንደሚያገባቸው ለመግለጽ ፈልጌ አይደለም::''
አለችው::
.
.
.
ይቀጥላል

ዋናው______________________________________::

[ዋናው]

(-6-)
.
.
.
ዘካሪያስ ከንቅልፉ ሲነቃ የቀኑ መክበድና የካፊያው ውሽንፍር መልሶ ወደትራሱ አንገቱን አስደፍቶት ነበር የአንተነህ ቀጠሮ ግን መልሶ አነቃው:: ከቤቱ ወጥቶ አውቶብስ ተሳፈረና ወደ ካምደን የተባለው ሰፈር አመራ:: ግርግሩ እንድሁሌም ሞቅ ብሏል: ነጋዴው,ቱሪስቱ,ገቢያተኛው,ፖሊሱ,አሽሽ ሻጩ...ሁሉም ለህለት ትግባር ተሰይሟል::ይህ ስፍራ ለየት ያሉ ነጮች የሚሰባሰቡበት ስፍራ ነው:: የሚለብሱት ጥቋቁር አልባሳት,የሚያንጠለጥሉትና የሚሰካኩት ብረታብረትና አሸንክታብ,ከሚሰቀሉበት ትልቅ ባለደረጃ ጫማ ጋር ሲያስተውሏቸው ያስገርማሉ::ከጀርባቸው የሚያነግቱት ቦርሳ ያንዳንዶቹ በሬሳ ሳጥን ቅርጽ የተሰራ ነው: ዕምነታቸው የሴይጣን ስለመሆኑ ኮርተው የሚናገሩም አሉባቸው::
ገላቸው በንቅሳት ተዥጎርግሮዋል አፍንጫቸው,ቅንድባቸው,ከንፈራቸው,ጆሮዋቸው,ምላሳቸውና እምብርታቸው ተበሳስቶ ብርማ ጌጣጌጥ ተሸላልሞዋል ሁሌም የሚገርመው ግን እነዚህ መሀበረሰቦች ስለሰባዊ መብትና ስለስዎች መጎዳት ከተነሳ በግንባር የሚቆረቆሩ ናቸው:: ውስጣቸው ቅኔ ነውንጂ...የከተማይቱ ነዋሪዎች ካምደኖች ብሎ በሰፈሩ የሰየማቸው እነኚህ ሰዎች የራስ ቅላቸውን ግራና ቀኝ ሸልተው መሀሉን እንደአውራ ዶሮ ተቀልሞ የቆመ ፀጉራቸውን ከነኮተታቸው ለማየት የሚመጣን ቱሪስት ከፈገግታ በቀር እነሱ ትዝም አይላቸውም ....በራሳቸው ዓለም ሆነው ተሰባስበው ካምደን ሎክ የተሰኝ ሽቅብ የባቡር ሀዲድ የሚያልፍበት ስር የተመሰረተ ገቢያ በርጋር ድልድይ ላይ ሆነው ምናምናቸውን ያቦናሉ:: ከፊሉ ጊታር ይዞ የራሱን ሙዚቃ ይጫወታል::

ዘካሪያስ የካምደን ታውንን ግርግር አልፎ አንተነህ ቤት ደርሰ::

''ፒካሶ እንዴት ነህ?''
አለው በሩን ሲከፍትለት ደረቱን እየተሳለመ::

''አለው ይሔው እንደሌላው ደልቶኝ ባልተኛም ዘኪ...'' አለ አንተነህ ባዶ የእግሩን መዳፍ ወለሉ ሲቀዘቅዘው ነጠላ ጫማ በዓይኑ እየፈለገ

የእንተነህ መኖሪያ ቤት እንደስቱዲዮም ያገለግላል ሳሎኑ ትንሽ ሰፋ ማለቱ የስዕል መገልጊያ መሳሪያዎቹን እንዲይዝ ጠቅሞታል:: የስዕል ማቆሚያው ቅስት/ኢዝል/ ጅምር የቀለም ቅብ ይዞዋል ከበታቹ የተበታተኑ የቀለም ቲዩቦች,ቀለም ያጠቀሱ ቡርሾችና ላዩ ላይ የተለያዩ ቀለማት ፊጭጭ ብለውበት የተዥጎረጎረ ዝርግ ፓሌት ተሰበጣጥረው ይታያሉ:: የቀለሙና የሲጋራው ሽታ ተደባልቆ የአንተነህን ቤት ያንተነህን ቤት ይሸታል::

''አንተ በቃ ብርድ አትል ሙቀት አትል መጠልሰም ነው ዝም ብለህ?''
አለው ዘካሪያስ ጅምር ስራውን እያስተዋለ ዓይቶት: ዘካሪያስ አንተነህን አንዳንዴ ነው አንቱሽ ብሎ የሚጠራው ብዙ ጊዜ ፒካሶ ነው የሚለው::

''ምን ይደረግ ዘኪ ዕይታ እንደሆን ብርድ አይል ሙቀት አይል.....ብርሀን ካለ ቀለማት አሉ...''

''እኔ አይገባኝም ባክህ ያንተ የቀለም ፍልስፍና...ይልቅ የሚያምር ስራ ጀመርክ....እዚህስ ሰዕል ላይ ብርሀኑ ነው የቀደመው ቀለሙ ነው?''
አለው እየሳቀ

''እስቲ አስበው ዓይንህን ጨፍንና ለቅጽበት መልሰህ ግለጠው ራስህን ዘና አድርግና እዚህ ፔንትንግ ላይ አተኩር መጀመሪያ ቀለም ታየህ ወይስ ብርሀን?''

''ፒካሶ...... እኔ የታየኝ ቀለም ነው::''
አንተነህ ፈገግ አለና ጭብርር ጸጉሩን እያበሰ

''ካ.....ሞን ዘኪ እስቲ እንደገና ዕየው: ....''

''ይሔው አየሁት በሎሚ ቀለምና በአረንጓዴ የተተራመሰ ምስል ነው የታየኝ::''

''እንዴት ይሄንን የመሰለ ቀለም ብርሀኑ ቀድሞ ሳይመጣ ምስሉ አንተ አይን ደረሰ...?''
,''ቅቅ እንጃልህ ፒካሶ ይሄንን እነዛ እነሬምብራንት ይገብሩለት የነበረውን የቀለም አድባር ጠይቅ''

አለውና ዘኪ ወደሶፋው አመራ ::

''አማቾቼን ተዋውኩኝ ነው የምትለኝ ዘኪ?''

''ባክህ የነጭ አጣጭ'ንጅ አማች የለም ''

''አለንጂ ኖሮማ ነው የተዋውቅካቸው...''
ዘካሪያስ ትከሻውን ጭብጥ አድርጎ ፊቱን አቀጨመና
''አባቷን ግን ጥ.ል.ት አድርጌው ልሞት ነው ስሜቱ ደስ አይልም ብታየው ሂትለርን ነው የሚመስለው::''
አለው::
አንተነህ ሳቀበትና
''አበሻ አይደለህ ምንስ ቢሆን... የወንድ አማት ትፈራለህ''

''ምን ብሎ እንደጠየቀኝ ታውቃለህ?''

''ምን አለህ....?'' አለው አንተነህ የራሱን ሢጋራ ሸብልሎ
.
.
.
ይቀጥላል

ዋናው___________________________________::
[/list]

[ዋናው]

(-7-)
.
.
.
''....ሥራ ሣትሰራ አንድ አመት ስትቀመጥ መንግስት የሚከፍልህ ቤኔፊት...የስንት ሰራተኞችን ግብር ገንዘብ መሆኑን አስልተወው ታውቃለህ ወይ....ብሎ አይጠይቀኝ መሰለህ ይሄ ነጫጭባ...''

አንተነህ በዘካሪያስ ሲጋራውን እያጨሰ ሳቀበትና
''ምን ነካህ ዘኪ ምንም ቢሆንኮ እንግሊዝ ነው ይሄንን ዓይነት አቃጥል ንግግር ከነርሱ መጥበቅ አለብህ እርግጠኛ ነኝ ንዴትህን ፊትለፊቱ አላሳየህም ...''
አለው::

''እኔማ እየሳቅኩኝ አስገባውለት ፒካሶ ምን እንዳልኩት ታውቃለህ?......''
አለው ወደሶፋው ለጠጥ ብሎ እንደሁልጊዜ ልምዱ ከመላጣ ራሱ ጫፍ እስከ ማጅራግንዱ በመዳፉ እያበሰ
''...አንዱ ባንዱ ትከሻ ላይ ተንጠላጥሎ መኖርማ የዚች ፕላኔት ሚስጥር ነው...ባፍሪካ ሪሶውርስ ስንቶቹ አገር እንደበለጸጉ ብዙ ታሪክ አንብቤያለሁ:: አልኩት''

''የታባቱ እንዲህ መንገር ነው በሱ ቤት አንተን እሱ እንደሚያስተዳድርህ መንገሩ ነው ''
አለው አንተነህ ፊቱን በፈገግታ ሞልቶ::

''የሚገርምህ'ኮ እናቲቱ ጥሩ ሰው ነች ደግሞም በተማርኩት ትምህርት በጣም ነበር ተደንቃ ለቫኒ ሁሉ ልትኮሪበት ይገባል ስትል የነበረችው....ያ እርሾ ፊት አባቷ ግን ....''

''ለነገሩ አንተ ምን አገባህ የት ስታገኘው.....''

''እሱማ ቫኒም ቀድማ ነግራኛለች ባለጌነቱን ግን ታውቃለህ ፊት ለፊትህ ሊነግርህ ሲሞክር የሆነ ስሜት ይሰማሀል እንዳገሩ መንግስት በጎን ቢያስገባልህ ይሻላል::''
አለው ዘካሪያስ
.
.
.
ይቀጥላል

ዋናው_____________________________::

[ዋናው]

(ስምንት)
.
.
.
''....ኸረ ለኔስ እንደ ቫኔሳ አባት ፊትለፊት ሚሞልጨኝ ይሻለኛል: ዘኪ ቢያንስ ትጠነቀቃቸዋለህ...ግን ጥርሳቸውንና አቀራረባቸውን አይተህ ገደል የሚከቱህኮ ብዙ ናቸው::''
አለ አንተነህ::
መሀላቸው ትንሽ ጸጥታ ሲሆን አንተነህ ተነስቶ የሙዚቃ ትንንሽ ሸክላዎችን አገላብጦ የስሜቱን ከተተና ወደ ምግብ ማብሰያው ክፍል እየተከተተ

''ቡና እንጠጣና እንወጣለን ውጪውን ካየዉት ሁለት ቀን አለፈኝ::''
አለው::

''ምን ውጪውም ቤቱም ያው ጨለማ ነው ያ! የማይበረክት ሚጢጢ በጋ በመጣና ትንሽ ፀሐይዋን በጠገብናት....አሁንስ ውስጤ ሁሉ ርብሽሽብሽ ብሎብኛል ፒካሶ''
አለ ዘካሪያስ አይኖቹን በመስኮት ወደውጪ ተክሎ በኣፉ ከሙዚቃው ጋር የፒንክ ፍሎይዶችን የሚወደውን ዜማ እያዜመ (ኪፕ ቶኪንግ) የሚለውን ዜማ::

''ምነው ደግሞ ምን ሆነህ ደበርህ ዘኪ...?''

''የሆነ የማላውቀው ስሜት ይሰማኛል ልቤ ሰሞኑን ወደልጅነት ትዝታዬ ወደ በቀልኩባት ምድሬ ይሸፍታል አውሮፓ አስጠላኝ ፒካሶ ሙት ...አንተ'ኮ እድለኛ ነህ ጥሩ ሙያ አለህ ውጪህ ሲቀዘቅዝ ውስጥህን በቀለም እያሞቅክ ትኖራለህ ምናብህ ሀብታም ነው እንደኔና እንደሌላው ቁሳዊ ስሜት ውስጥህ ብዙም የለም እኛኮ ዘመን ሰለጠነ እያልን ከማሽን ጋር ውለን ከማሽን ጋር እያነጋን ህያውነታችንን ረሳነው ...ሀስበኸው ታውቃለህ....? አንዳንዴ እኔ ውሎዬን ሳስበው እኔን ራሴን የንግሊዝ መንግስት ፕሮግራም ያደረገኝ ጉዑዝ የሆንኩኝ ያህል ስሜት ይሰማኛል::''
አለ ዘካሪያስ :: አንዳንዴ ከአንተነህ ጋር በትንሽ ርህስ ተነስቶ ግራ ወደሚያጋባ ሀሳብ መሰናዘር ይደርሱና ሁለቱም የሐሳባቸው መነሻን የወጋቸው ጭብጥ ጠፍቶዋቸው ወሬ ይቀይራሉ::

''ተፈጥሮዋዊ ስሜት እንዲሰማህ ውስጥህ መታደስ አለበት ያንን መታደስ ደግሞ በምን መልኩ መሆኑን አንተ ራስህ ነው የምታውቀው::''

''ምን አይነት መታደስ ቅቅቅ ጴንጤ ልሁን...? ነው ወይስ ብራይተን ወይም ዮርክ ሂድና ከፍቅረኛህ ጋር ሰነባብተህ ና! ማለትህ ነው?''
አለው ዘካሪያስ እየሳቀ ያቀበለውን ቡና አማሰለና

''ያም ጥሩ ሀሳብ ነው ዘኪ ከቻልክ አገርህ ግባና አባድር ሄደህ ተጠመቅ::''

ዘካሪያስ ከትከት...ብሎ ሳቀና

''አገርህ ሂድ አልከኝ ፒካሶ....? አስራስንት ዓመቶች ሙሉ ያልመከርከኝን ዛሬ እንዴት......?''
.
.
.
ይቀጥላል
[/list]
ዋናው_______________________________________________::]

[አብዮት]

::