የዳሞት ግጥሞች

Topics related to cultures, arts, languages, arts such as humor, music, traditional literary genres of poems, ግጥም ፣ ቅኔ ፣ ተረትና ምሳሌ)

Postby ኦኑፈያሮ » Sat Apr 02, 2011 10:25 am

ሠላም !



የአንድነት ዋርካ በትዝታ ሜዳ የተኖረለታ

ሠላም የደስታ ምንጭ የመኖር አለኝታ

ቢጠጡት የማያልቅ የዘላለም ውሃ

ሠላም የውበት ምንጭ ደግሞም የፍሰሃ

ሠላም አብነት ነው መርምሮ ላወቀው

ለሕሊና ጭንቀት የልብ ዕረፍት ነው

የማስተዋል ጎጆ የጥበብ ጎዳና

ሠላም ድምቀት አለው ግሩም ንጽህና

የድህነት አውታር የመኖር አለኝታ

የትብብር ጽዋ የተስፋ ገበታ

ሠላም ለሠው ልጆች የዘላለም ደስታ

የጸና ግንብ ነው ደግሞም ያለም ዋልታ
ኦኑፈያሮ
ኮትኳች
ኮትኳች
 
Posts: 170
Joined: Thu Aug 04, 2005 1:52 pm

Postby ኦኑፈያሮ » Tue Apr 19, 2011 7:01 am

ኢትዮጵያዊው አፈር አንተ የናሳው ጀግና

ሞትን ለምን መረጥክ ሥራ እያለህ ገና

ቸክችከህ ቸክችከህ በመመራመሪያው በወረቀትህ ላይ

የንድፍህን ውጤት አዲስ መገረሚያ ድንቅ ነገር ሳናይ

አንተ ያበሻ ፈርጥ አንተ የናሳው ጌታ

ለምን ተለየኸን እንደ ቀልድ በዋይታ

ቅጣው ተባልክ እንዴ ባዘን ያዳምን ዘር

በቅርጫት ኳስ ሰበብ የተጓዝክ ወዳፈር

እንግዲህ ማን አለን አንተን ተመስሎ የሚያስጠራን ባለም

መንኮራኩር ሰርቶ ጨረቃ አናት ደርሶ ስለ እኛ የሚያልም

ማን አለን ያላንተ ያፍሪካ አባውራ ቁንጮ የሚያደርገን

ያው ካንተ ቀብር መልስ ወገን መግቢያ ጠፍቶት ጎርፍ አጥለቀለቅን

አንተን የመሰለ የምርምር ንጉስ የምርምር ጌታ

ነፍስህን እንዲምር የሠራዊት ጌታ

ከመለመንና ከመጸለይ ውጭ ጧትም ሆነ ማታ

አቅሙ ስለሌለን ሸኘንህ በዋይታ

አቅም የለን እኛ ናሳን በግሩ አቁመን አለምን ማስገረም

ላሳር ከቅጣው ውጭ እንዳንተማ የለም

ያ የተረገመ ኳስ የሚነጥርበት የቅርጫት ጨዋታ

አንተን አስቀረብን እንደ ቀልድ በዋይታ

እንደሚወራው ግን ላንተ ሕይዎት መጥፋት የሠው እጅ ካለበት

ሠማይና መሬትን የፈጠረ እግዚያብሄር ያለርህራሄ እጥፍ ይፍረድበት
ኦኑፈያሮ
ኮትኳች
ኮትኳች
 
Posts: 170
Joined: Thu Aug 04, 2005 1:52 pm

Postby ኦኑፈያሮ » Thu Apr 21, 2011 2:32 pm

የተኮነነች ጻድቅት



የገጠሯ እመቤት ችግር ያጎደፋት
ለሲኦል የሾማት ከጽድቅ የገደፋት
እድል አለቅልቆ ከሠው ታች የደፋት
ለግረት የሾማት ማዳት የሸለማት
ያች የትዳር ሰማት
ሆድ ለጀርባ ሆነን ዛሬ ብርቃትም
በስም በስል እንጅ ባካል ባላያትም
ያው ትታየኛለች የገጠሯ ቆዲ
ቀሚሷ ቡትቶ መቀነቷ ጋዲ
ያችዋ አይኔ አንዳንዴ ያያታል ፈልጎ
እንደውል ክፉ ልጥ ቆዳዋ ጠውልጎ
የረሀብ ምች አዝሏት አንጀቷ ተልጎ
ያው እምባ ስትዘራ ብሶት ስታዘምር
ድህነትን ልትንድ ድካም ስትከምር
ያልጸደቀች ጻድቅት በሆድዋ ነፍሰጡር በወገቧ እመጫት
እየው ደሟ ሲፈስ አጋሙ ሲቆርጣት ጋሬጣው ሲነጫት
እከክ ችፌ አጥቅቷት ቅማል ቅጫም ወርሷት
ችግር በጥፍሩ አንቋት ችጋር ባፉ ጎርሷት
ይኸው ዛሬ ደግሞ ተነስታ ማለዳ
እሩቅ ከወንዝ ወርዳ ውሃ ልትቀዳ
ትልቁን ማድንጋ አንግታ በጠፍር
እይዋት ስትራመድ እግሯ ቁር ሲደፍር
ከዚያ ስትመለስ ላሞች አገናኝታ
ባሏን ቁርስ አብልታ ቤት ጋጡን አጽድታ
ወዲያው ነፍሷን አጥታ ቁልቁል ስትጋልብ
እንጨት ትወርዳለች እሳት ልትቀልብ
እየው ያች ጻድቅት ሳትውጥ ምራቋን
ጅጇን እያጠባች እረፍትም ሳያምራት
ለጉዳቷ ካሳ ለግብሯ ወሮታ ለጽድቋ ብድራት
ምሳ አቆየሽ ብሎ ያ ባል እንዳይወግራት
ጊዜው በመርፈዱ ልቧን ገብቶት ፍራት
ማሳ እየጋገረች ደግሞ ለማት እራት
ጥሬ በቆሎዋን አቅርባ በቁና
ቅንጨ ለመከካት ወፍጮዋን ደቅና
ልጇን ተሸክማ ነውና ግዳጇ
ወፍጮ እየዛወረች ገል በመሰለ እጇ
ብሶቷን ስታዜም ያቻት ከነ መጇ
እንዲህ ስትዋትት ለራቧ ማብረጃ
አንድ ዝግን ጥሬ መቆርጠሟን እንጃ
እዚህ እሩቅ ሆኘ አትኩሬ ሳያት
ኑሮዋ አልተሻለም ከሷ እናት ከኔ አያት
እንጀራ ጠፍቶባት እንዲህ ስትባዝን
አንጀት ስትበላ እይዋት ስታሳዝን
በ2000 አመት እንዲህ ስትኖሪ
ማዘር ባንች ላይፍ አይ አም ቬሪ ሶሪ
ጥሬ እያረረብኝ በንዲህ ያለ ግረት
ቆመሽ መላወስሽ ጠንካራ ነሽ ብረት
በፈረንሳይ በህንድ ባሜሪካን አገር
ሮማ ብንወጣ ኩባ ብንሻገር
ስሙ በጠፋበት ፖቨርቲ ሐንገር
እንደዚህ እንዳንች ቆዳው እስኪከስል
ቀን ሌቱን ግሮ ነፍሱ እስክጸላሰል
ችጋር ያማቀቀው ቅጫም የወረሠው
በፈረንጆች ሃገር አይኖርም አንድ ሠው
ግን አንድ ቀን ድንገት ትግስቷ ቢሟጠጥ
ወደኋላ አትልም ሃቁን ለማፍረጥረጥ
ኧረ ለመሆኑ ልጄ ሆይ ምን አልኩህ
መጣፊያና ክርታስ አስይዠ የላኩህ
የተደበቀውን የመሰልጠን ጥበብ
ከሠው በመጠየቅ ከመጣፍ በማንበብ
ብላቱን ዘዴውን በወረቀት ጥፈህ
የችግር መዳኒት በለሲቱን ቀጥፈህ
አምጥተህ አገር ቤት ከትውልድህ ሠፈር
እንድታለማይ እዚህ በኛው አፈር
ይህን ያህል አመት በመማር ስትፈጅ
ሞፈር መብሳት ሳትችል መኪና ሳታበጅ
እራስህን ጠልተህ እንድትሆን ነው ፈረንጅ ?
አየ አለመታደል ድካሜ እሳት ገባ
ዘላለምክን ታዝለህ በምጽዋት አንቀልባ
አዎ ያቻትና የሷ ድንቁርና ከኔ እውቀት ባይብስም
ግረቷን እየጋርኩ ላቧን ባላብስም
አዎ እጠራታለሁ አውቃታለሁ በሥም
ጠረኗን እንድምግ ወተቷን እንድጋት
እሷ እንዳልሸሸችኝ ያኔ ስፈልጋት
ዛሬ አለሁ ባልላት እሷ ስትፈልገኝ
ኑሮዋ ሞቶባት ለቅሶዋ ባልገኝ
እንዳዘለች ጡሬ ብድር ባልመልስም
ጉድጓድ እስክገባ መቸ እረሳታለሁ
ጻድቋን ተኮናኝ በሥም አውቃታለሁ
ያቻት ያች ግልቱ በሩቅ አያታለሁያች
ያች ያልጸደቀች ጻድቅት ያች የወላድ መካን
ያች የኑሮ ካስማ ያች የሃዘን ድንኳን
ያሳር ካብ ተጭኗት ቁጣ መRእት ሥማ
ኑሮዋ ሞቶባት ሙሾ ስታሰማ
ከባህር ተጠምቶ ሲተርፉት ተርባ
ወርቀዘቦ እያላት ያዘን ማቅ ደርባ
ያቻት ከማጀት ውስጥ ከተራራው ጀርባ
እግሮቿን አጣሟት የውርጩ ቁርጥማት
አንጀቷን አድፍሯት የበረሃው ጥማት
ያችው ከሳቱ ላይ ጠቁራ እንደ ድስት ጥፊያ
ያችው ከማጀት ውስጥ ከስላ እንደ መጋፊያ
ገላዋ ለስልሶ አልባሷ ባያምርም
እናቴ ለማለት አንደበቴ ቢያፍርም
ያቻት ምስሏን መስላ አመዳይ አጥልቋት
ስትል ክስም ክስም በግር ባልመስላት
ድራቷን ባልከፍልም
አውቃታለሁ በሥም
ከቤት ሳይሞላላት ከደጅ ላታስታጉል
ያቻት ከማሳው ውስጥ አረም ስትጎለጉል
.................................

...................................
ኦኑፈያሮ
ኮትኳች
ኮትኳች
 
Posts: 170
Joined: Thu Aug 04, 2005 1:52 pm

Postby ኦኑፈያሮ » Thu Apr 21, 2011 3:22 pm

ያበሳ እዳ አጥልቋት እስካንገቷ ድረስ
ብታረጅ አትጦር ብትወልድ አትታረስ
እርቧት ስትበላ አሟት ሳትታከም
ያቻት ከቃርሚያው ውስጥ ነዶ ስትሼከም
የቆላ አራሙጫ የበጋ ትኩሳት
አናቷን የዋይ ዶፍ እግሯን የሼዋ እሳት
ንፍርም ፍምም ሆኖ ቆልቶ እየጠበሳት
እንጨት ትሰብርና ድብሏን አንግባ
ትንፋሽዋ እስኪቆረጥ ሲንቆረቆር ላቧ
ዳገቱን ስትሮጥ በጊዜ ልትገባ
ያ ስለቷም ባልጩት እግሯን ቢበሳት
እዩ ያች ደሐ ጥቁር ደም ሲፈሳት
ከዚያ እልፍ ስትል ነገር ሲፈልጋት
ከታች ተቀብሎ ያጋም እሾህ ወጋት
እቤቷ ስትደርስ በሁለት እግር አንክሳ
ደም የሚያዠው ቁስሏን በሞራ ተኩሳ
አመድ ደምድማበት በማበሻ ጠብሳ
የደፈቃትን ላብ በቀሚሷ አብሳ
እንዲህ ስትዋትት ለራቧ ማብረጃ
አንድ ዝግን ጥሬ መቆርጠሟን እንጃ
ለሠው ቀን መሽቶለት ማታ ቀን ሲጨልም
በንቅልፍ እፎይ ብሎ ብሩስ ተስፋ ሲያልም
እንደዳፉር ጋንጩት ብቻዋን ተቀምጣ
ያቻት ከምድጃ ዳር መጄሌ ስታበስል እሾህ ስታወጣ
ሁሌ ማታ ማታ እሷ እንቅልህ አታውቅም
ስትባዝን ውላ በተረፈ አቅም
የልጆቿን ልብሶች ሰብስባ ስጠቅም
ወይም እፎይ ብላ ከምታንቀላፋ
እንዝርቷን አብጅታ ባዘቶዋን ነድፋ
ያች የቀየዋ አድባር የቤቱ መጋቢ
ፈትል ትፈትላለች ለራሷ ነጠላ ላባውራው ጋቢ
ያች ችግር ገቢ ያች የሳት ማንኪያ
አንዴ ብትሰበር የለላት መተኪያ
ያች የሠው ውርጋጥ ያች የኔ መሳቂያ
ያች ገበና ከታች ሚስጥር መደበቂያ
ቢሰድቧት አትመልስ ቢስቋት አኩራፊ
ሱሷ ጥረት ግረት ምሷ የባል ጥፊ
የሕይዎቷ ቅመም የእንባ እንጥፍጣፊ
ማጌጫዋ ማዲያት ምግቧ ትርፍራፊ
ነጭ ላብ አፍስሳ ጥቁር መልክ አትራፊ
መጠሪያዋ ደዌ ቀብሯ ባንድ እራፊ
እዚህ እሩቅ ሆኘ አትኩሬ ሳያት
ኑሮዋ አልተሻለም ከሷ እናት ከኔ አያት
እንጀራ ጠፍቶባት እንዲህ ስትባዝን
አንጀት ስትበላ እዮዋት ስታሳዝን
ግን አንድ ቀን ድንገት ትግስቷ ቢሟጠጥ
ወደኋላ አትልም ሃቁን ለማፍረጥረጥ
ገላህ ስለናቸ ያለህ ቢመስልህም
እንደተቀጽላ ከታች ሥር የለህም
በማይሰምር ምኞት ልብህ ተንጠልጥላ
ከሥር ሥር ሳጸድ ከላይ ሳትሆን ጥላ
ሠው እየተከተልክ አንተ ሠው ሳታክል
የደረቀ ለታ የለጠፈህ ተክል
ዛፍ ሆነህ ሳጸፋ ዘር ሆነህ ሳትበቅል
ወድቀህ ትቀራለህ እንደ ሰባር ቅል
እኔ ግን ኮስምኘ ገላየ ቢደቅም
ስሬ ስር አውጥቶ አይደርቅም
ደግሞም ሰምቻለሁ የንሳሃ አባቴ
መጣፉን አምጥተው ዘርግተው ከፊቴ
የግዚያብሄርን ትዛዝ ምንጭ ሳያዛቡ
እንደተረዳሁት መንፈሴ እንዳወቀው
በሥጋው ተጉላልቶ በነፍስ የሚልቀው
በምድር የራበው ነው በቁሙ ያነባ
ዘላለም የሚስቅ ሰማይ ቤት ሲገባ
ትለኛለች ደፍራ አውቃለሁ አመሏን
ልቧ ቅሬታ ሲያዥ ሲጓጉተው ቁስሏን
አዎ ያቻትና የሷ ድንቁርና ከኔ ወተት ባይከስም
ግረቷን እየጋርኩ ላቧን ባላብስም
አዎ እጠራታለሁ አውቃታለሁ በሥም
ጠረኗን እንድምግ ወተቷን እንድጋት
ዛሬ አለሁ ባልላት እሷ ስትፈልገኝ
ኑሮዋ ሞቶባት ሃዘኗ ባልገኝ
እንዳዘነች ጦሬ ብድር ባልመልስም
እንደ ልጅ ልመረቅ ጉልበቷን ባልስምም
ጉድጓድ እስክገባ መች እረሳታለሁ
ጻድቋን ተኮናኝ በሥም አውቃታለሁ
ያቻት ያች ገልቱ በሩቅ አያታለሁ
ኦኑፈያሮ
ኮትኳች
ኮትኳች
 
Posts: 170
Joined: Thu Aug 04, 2005 1:52 pm

Postby ኦኑፈያሮ » Tue May 10, 2011 3:13 pm

ጩኸት !


አልጋው ተጨነቀ

አለ ቋቋ ቋቋ

ብሶቱን ለማውራት

እያጠረው ቋንቋ

ወይም ከሚስቲቱ

ወይ ከባልየው

የሚሰማ ጠፍቶ

ጩኸቱን የሚሰማው

ሁሉም ባዲስ አለም

ጭልጥ ብለው ሄድው

የፈለገ ቢጮኽ

ማንስ ሊያዳምጠው

ምናልባት አንድ ሠው

ግድግዳ ለግቶ

ቢደርስለት እንጅ

ኡኡታውን ሰምቶ

በርግዶ ቢገባ

ወይም በር አንኳኩቶ

ወይም በፍቅር

ወይ በዱላ ነርቶ

ካልገላገለው በቀር

ጉዳቱን አውቆለት

ምንም ዋጋ የለው

የደንቆሮ ጩኸት
ኦኑፈያሮ
ኮትኳች
ኮትኳች
 
Posts: 170
Joined: Thu Aug 04, 2005 1:52 pm

Postby ኦኑፈያሮ » Tue May 17, 2011 3:09 pm

የልጅ ጥሮተኛ !


አቅሙ የደከመ አንዳች ሳይሰራ

ታታሪ ለወሬ ተግባር የሚፈራ

መሆንን የማይችል መስሎ የሚኮራ

ከ አዎንታ እርቆ አሉታ እሚዘራ

እራሱን ዘንግቶ ስለ ሠው እሚያወራ

ለፍቶ መለወጥን አምርሮ እሚጠላ

ማረፍ የሚፈልግ በሌሎቹ ጥላ

መደበቅ የሚሻ በብርቱዎች ከለላ

ያለድካም ሚመኝ ምቾትና ተድላ

ያን አፍላ ጉልበቱን አቅፎ የሚተኛ

ሳይሰራ መክበርን የሚሻ ሕልመኛ

ያለድጋፍ መቆም የማይችል ጉደኛ

በዎላጅ እርዳታ የሚኖር ጉረኛ

መሥራት እየቻለ የሠው እጅ ጠባቂ

ሃብት ብልጽግናን ሳይሰራ ናፋቂ

በቤተሰብ ትከሻ ተንጠልጥሎ ኗሪ

የልጅ ጥሮተኛ አርጎታል ፈጣሪ
ኦኑፈያሮ
ኮትኳች
ኮትኳች
 
Posts: 170
Joined: Thu Aug 04, 2005 1:52 pm

Postby ኦኑፈያሮ » Sat Jun 18, 2011 6:59 am

መድሃኒት አለው ዎይ የሥልጣን በሽታ
የዳነ አላየሁም የማታ የማታ
ካላንገላዎደ አውርዶ ካልጣለ
ከስልጣን በሽታ የዳነ የታለ?
ኧረ አሁንስ በቃኝ ይከተል ተረኛ
አያሰኝም እኮ የሥልጣን መጋኛ
ልቡ የቆሰለ ሆ ብሎ ሲነሳ
መግቢያ መውጫ ማጣት ያኔ ነው አበሳ
ጆሮን ይደፍንና አይኑንም አውሮ
አይሰማ አያዳምጥ የሕዝቡን ሮሮ
ችግርና ግፉ እጅግ የበዛበት
ልክ እንደ ማእበል ሲወጣ ባንድነት
መድፍና መትረየስ ታንኩ ቢብተለተል
ከሥልጣን በሽታ የዳነ ሠው የታል
ይኸው አየናቸው ተዋርደው ሲረክሱ
በቃን ቢሉ ኖሮ ከዚህ ባልደረሱ
የሥልጣን በሽታ ያደርጋል ወራዳ
እያንደፋደፈ በቅሌት በረንዳ
በግልጽ በደንብ አይተን እንረዳ
እስቲ አምባገነኖች ባግቦን ተመልከቱ
የታሪኩን ምሁር ባለዶክትሬቱ
በክብር ቢለመን እምቢ በማለቱ
የሥልጣን በሽታ እያንደፋደፈ
በከንቱ ተመትቶ ተይዞት ታረፈ
ይኸው ጋዳፊንም እያንፏቀቀው ነው
ሳይገድል የማይለቅ መጥፎ በሽታ ነው
ሠውነትን ሁሉ በጣም ያከረፋል
አይዞህ ያለው ሁሉ ካጠገብ ይጠፋል
እንደው ጥርስን ነክሶ በቃኝ ካለማለት
ለስልጣኝ በሽታ የለውም መድሀኒት
ለሃገር ለወገን ለመፍጠር ሠላም
ከበቃኝ በስተቀር መድሃኒት የለም
ኦኑፈያሮ
ኮትኳች
ኮትኳች
 
Posts: 170
Joined: Thu Aug 04, 2005 1:52 pm

Postby ኦኑፈያሮ » Sat Jul 02, 2011 3:02 pm

እናት ዓለም !

ግርማ ሞገሴ ነሽ እምዬ እናቴ
ስራብ እንጀራየ ስጠማ ወተቴ
ያኔም ነሽ ኩራቴ ዳግም ነሽ ኩራቴ
የብርሃንሽ ጸዳል ለሠራ አካላቴ
መቼም እወድሻለሁ እስከለተ ሞቴ
ሳለሁ በዝች አለም አለኝ የምለው ሠው
ከፈጣሪ በታች እናቴን ብቻ ነው
ጋሻ መከታዬ ውበቴ ስስቴ
አምሳያ የሌለሽ ብቸኛዋ እናቴ
እንደዚህ እላለሁ ፈጣሪ አምላኬን
ምኞቴን ተረድቶ ከሰማው ጸሎቴን
አኑራት እላለሁ እማምዬ እናቴን
ከልቤ ማህደር መቸም የማልፍቅሽ
አንችን መሳይ ፍጡር ወደር አቻ የሌለሽ
ፍቅርና ደግነት ፈጣሪ ያደለሽ
[/u]ውበት የተሞላች እጅጉን ያማረች
ቸርነት ተላብሳ ፍቅርን ይዛለች
ከአለም እስካለም ዝናዋ ይሰማ
የትም አይገኝም ከቶ እንደ እማማ
ለራሴ ሳትይ እራስሽን ጥለሽ
እሩህሩህ ለልጅሽ የሚጣፍጥ ፍቅርሽ
እንደዚህ እላለሁ ፈጣሪ አምላኬን
ምኞቴን ተረድቶ ከሰማው ጸሎቴን
አኑራት እላለሁ እማምዬ እናቴን
ኦኑፈያሮ
ኮትኳች
ኮትኳች
 
Posts: 170
Joined: Thu Aug 04, 2005 1:52 pm

ሰላም

Postby ዋኖስ » Sat Jul 02, 2011 4:41 pm

አሜን::

ጸሎተሕ ተሰምቶ እንዲኖሩ እማማ:

ከእርሳቸዉ ልብ-ዉረስ:

ሩሕሩሕ ሁን አንተም: ተሳሰር በመንፈስ:

ከአምላክሕ ተስማማ::



ከመልካም ምኞት ጋ!



ኦኑፈያሮ wrote:እናት ዓለም !

ግርማ ሞገሴ ነሽ እምዬ እናቴ
ስራብ እንጀራየ ስጠማ ወተቴ
ያኔም ነሽ ኩራቴ ዳግም ነሽ ኩራቴ
የብርሃንሽ ጸዳል ለሠራ አካላቴ
መቼም እወድሻለሁ እስከለተ ሞቴ
ሳለሁ በዝች አለም አለኝ የምለው ሠው
ከፈጣሪ በታች እናቴን ብቻ ነው
ጋሻ መከታዬ ውበቴ ስስቴ
አምሳያ የሌለሽ ብቸኛዋ እናቴ
እንደዚህ እላለሁ ፈጣሪ አምላኬን
ምኞቴን ተረድቶ ከሰማው ጸሎቴን
አኑራት እላለሁ እማምዬ እናቴን
ከልቤ ማህደር መቸም የማልፍቅሽ
አንችን መሳይ ፍጡር ወደር አቻ የሌለሽ
ፍቅርና ደግነት ፈጣሪ ያደለሽ
[/u]ውበት የተሞላች እጅጉን ያማረች
ቸርነት ተላብሳ ፍቅርን ይዛለች
ከአለም እስካለም ዝናዋ ይሰማ
የትም አይገኝም ከቶ እንደ እማማ
ለራሴ ሳትይ እራስሽን ጥለሽ
እሩህሩህ ለልጅሽ የሚጣፍጥ ፍቅርሽ
እንደዚህ እላለሁ ፈጣሪ አምላኬን
ምኞቴን ተረድቶ ከሰማው ጸሎቴን
አኑራት እላለሁ እማምዬ እናቴን
ዋኖስ
ዋና ውሃ አጠጪ
ዋና ውሃ አጠጪ
 
Posts: 1552
Joined: Tue Nov 16, 2004 2:39 pm
Location: Mars

ሮሮ በ"ፌዝ-ቡክ"

Postby ዋኖስ » Fri Jul 08, 2011 3:09 pm

ሮሮ በ"ፌዝ-ቡክ"




ገምሶና አለስልሶ መሬቱን ገበሬ፤

ያዘጋጃል ለዘር ፤ ለጤፍ፣ ለበርበሬ።

ጊዜና ወራቱን "በልጉን" ቀን ጠብቆ፣

“አደራ!" በማለት
ከሠማይ "ዶልዷሌን" በአንድ ዓይን አጮልቆ፣

ዘር ዘርቶ ይገባል፤ በሰኔ በሐምሌ ከጭቃ ጋ አጣብቆ፣

የነገዉን ተስፋ፤ ቡቃያዉን ሽቶ፣ አዲስ ትዉልድ ናፍቆ።

የአረም፤ የኩትኳቶዉ ወራቱ እንደባተ፣

ደፋ፣ ቀና ብሎ ፤ የአዲስ ሰብል መዓዛ ናፍቆ እያሸተተ፣

አረሙን፣ ተባዩን፣ አዕዋፍ- አራዊቱን ህሉን ተከላክሎ፣

በዓመት መጨረሻ ፤ ዓይን-ሆዱ ይጠግባል፤ ይደሰታል ዘሎ።

ይሕ ሁሉ መከራ፣ ያ! ሁሉ ሰቀቀን፣

በሌለበት አገር የክረምት ዝናቡ፣ የበጋ ሐሩሩ፣

የተዘሩ ልጆች ከእኛው ዉስጥ ማሕፀን፣

"የቴክኖሎጅ-አረም " ፣ የባሕል-ሽንቁሩ፤

ዘር እንዳያሳጣን፤ ለልጅ አስተዳደግ ምንድን ነው? ምስጢሩ።




ዳሞት
ዋኖስ
ዋና ውሃ አጠጪ
ዋና ውሃ አጠጪ
 
Posts: 1552
Joined: Tue Nov 16, 2004 2:39 pm
Location: Mars

የዛሬ ሰዉ

Postby ዋኖስ » Mon Jul 11, 2011 3:40 pm

የዛሬ ሰው:

ያለፈዉን ሲያመሰግን: ሲያደንቅ:

የዛሬዉን ሲያንቋሽሽ: ሲንቅ:

መጪዉን በጉጉት ሲናፍቅ: ሲጠብቅ:

ደስ ሳይለዉ: ተያይዞ መዉረድ መቅ::

ዳሞት
ዋኖስ
ዋና ውሃ አጠጪ
ዋና ውሃ አጠጪ
 
Posts: 1552
Joined: Tue Nov 16, 2004 2:39 pm
Location: Mars

መንትዮቹ

Postby ዋኖስ » Sun Jul 17, 2011 7:19 pm

መንትዮቹ:



አንድ ማንኪያ ፍቅር፤ ዘጠኝ ስኒ ተስፋ፣

አንድ "ድርጎ" ፀባይ፤ ሳቅሽን ግን በአካፋ፣

ዝቀሽ ስጭኝና `ምከፍለዉ በኋላ፣

ላሳይሽ ምስጢሩን "የቅናትን ሒሳብ" የፍቅርን ፎርሙላ።

======//======



ፀባይሽ፤

እምነ-በረድ አይደል፤ አልጠርብ በመዶሻ፣

ሥብራቱ አይታይ፣ አልወስድሽ ሐኪም ቤት፤ አልጠራ ወጌሻ፣

አላስተካክለዉ አልቀጥር "ኢንጂነር"፣

የ "ሰማዩ-አናጺ" የሰራሽን ነገር።

እንዲያዉ ፈጥሮ፣ ፈጥሮ፣

ጀምሮ ጀምሮ፣ ከዉስጥም ጀምሮ፣

ከላይም ጀምሮ፤ በጅምር ትቶሻል ሲያስበዉ ተማሮ።

=====//=====

ዳሞት
ዋኖስ
ዋና ውሃ አጠጪ
ዋና ውሃ አጠጪ
 
Posts: 1552
Joined: Tue Nov 16, 2004 2:39 pm
Location: Mars

የተስፋ ሥንቅ!

Postby ዋኖስ » Mon Jul 25, 2011 2:19 pm

"የተስፋ ሥንቅ!"



ምላስ፣ ከናፍሬን እንደ "ጀላቲ" መጥጬ፣

ዓይኖቼ ዉኃ እንዳቆሩ፣ በምናብ-ዓለም ሰምጬ፣

ደረቅ-ሕዋ ዉስጥ ዓይኔን እንደጦር ሰክቼ፣

ላይከደኑም በልጥጬ፣

ድምፅ፣ ሳቅሽን ተርቤ፣

ጣፋጭ ሐተታ ጦማርሽን እንደጨረስኩ አንብቤ፣

“የተስፋ-ሥንቅ!” ብዬ አልኩሽ፤ በሐሳቤ፣

ቃለ-ጦማርሽ ፈዉሶኝ፤ ቋሳዊ-ፍቅርሽን አንግቤ።

ዳሞት

ዋኖስ
ዋና ውሃ አጠጪ
ዋና ውሃ አጠጪ
 
Posts: 1552
Joined: Tue Nov 16, 2004 2:39 pm
Location: Mars

ሰላም

Postby ዋኖስ » Fri Aug 19, 2011 2:36 pm

ለመላው የዋርካ አፍቃሬ-ክርስቲያኖች! እንኳን ለደብረ-ታቦር (ቡሄ) በዓል በሰላም አደረሳችሁ::


ባለጠጎቹ:




የምንተነፍሰዉን ዓየር

ቢቸበችቡት ኖሮ በዶላር

ቆጣሪ በተከሉልን ከእንጥላችን መባቀያ ሥር::

ከዚያም:

"እዘጋዋለሁ!" የሚለዉ ዛቻቸው

እየከፈልንም ገድሎ በጨረሰን ፍራቻዉ::

ዳሞት
ዋኖስ
ዋና ውሃ አጠጪ
ዋና ውሃ አጠጪ
 
Posts: 1552
Joined: Tue Nov 16, 2004 2:39 pm
Location: Mars

Postby ኦኑፈያሮ » Tue Sep 06, 2011 6:57 am

ለፈጣሪ የተጻፈ ደብዳቤ !

በሠማያት ያለህ በዐርያም
መልዕክቴ ይድረስህ መድህን የአለም
ሃጥያት እየሰራ ሠው ሁሉ እየዋሸ
ፍጥረት አዘነብህ በነጋ በመሸ
እንደ ሠው ጌታዬ ምድር ተበላሸ
በሃጥያት በተንኮል ተበላሽቷል ምድር
ይህን ተወውና አዲስ ነገር ፍጠር
ለሃጥያት ለበደል ሕዝብህ ተነሳሳ
በፈቀደው ሄደ ሕግህንም እረሳ
ፍርድህም ዘገዬ ሁኔታው ተዛባ
ሴት ከወንድ ቀርቶ ወንድ ከወንድ ተጋባ
ጽፈህ የሰጠኸን ሕግህም ተጣሰ
በሀጢያት በዝሙት ምድር እረከሰ
ክፋት ምቀኝነት ዝሙቱ ተስፋፋ
ትልቅ ሠው መካሪ አስታራቂ ጠፋ
በስምንተኛእ ሽህ አሁን ባለንበት
የወንጌል ሰባኪው የሀይማኖቱ ብዛት
በየአውራጎዳናው በየመንገዱ ዳር
ሳያውቁ ማጠንጠን ሳይማር ማስተማር
ለገንዘብ መገዛት በሀሰት መመስከር
ከዚህ ሁሉ ስቃይ ከዚህ ሁሉ ነገር
ምነው ብታደርገው አዲስ ቢሆን ምድር
ያኔ መጄመሪያ መሬት ስትፈጠር
አሸብርቃ ደምቃ ባረንጓዴ በሳር
በነጋ በመሸ ከጧት እስከ ማታ
ሕይዎት ያድስ ነበር የአበባው ሽታ
ሠው የሚባል ፍጡር በምድር ላይ ያለ
ደኑን መነጠረ ሳሩን አቃጠለ
አራዊቱን ሁሉ አሳድዶ ገደለ
በቆሻሻ ሞላ ዓለም ተበከለ
የሠው መጥፎ ሥራ አእምሮን አዙሮ
አለቀሰች ምድር ኡኡ አለ ተፈጥሮ
ብርዱ ቸነፈሩ ጩኸቱን አሰማ
በቆሻሻ ሞላ ወንዙ ሁሉ ገማ
ያኔማ በጫካው አእዋፎች ሲያፏጩ
ቁልጭ ጥርት ብሎ ሲንቆረቆር ምንጩ
ምድር ስትፈጠር ያኔ በፊትማ
ውሀው ሁሉ ንጹህ አየሩ ጤናማ
አሁን በዚህ ዘመን ተፈጥሮም ጨከነ
ነፋሱ መትረየስ ውሀው መርዝ ሆነ
የበሽታው አይነትኧረ ምኑ ቅጡ
ኤድስና ኮሌራው ትውከቱ ተቅማጡ
ተፈጥሮን የሠው ልጅ ስለተቃወመ
ተፈጥሮ ከሠው ጋር ጦርነት ገጠመ
እስቲ ልጠይቅህ አንተ መድህን የዓለም
ለምን ተቃጠሉ ገሞራና ሠዶም
ድንገት ሳያስቡት በሳት ውስጥ የቀሩ
ከዚህ የባሰ ግፍ እነሱስ ምን ሠሩ
ስለዚህ አንድየ አለሁኝ ካልክሳ
ሁሌ ዝም አትበል ድምጽህን አሰማ
እኔ ያየሁትን ይህንን ጽፌያለሁ
መልሱን ካንተ ደግሞ ቶሎ እጠብቃለሁ
ኦኑፈያሮ
ኮትኳች
ኮትኳች
 
Posts: 170
Joined: Thu Aug 04, 2005 1:52 pm

PreviousNext

Return to Warka Culture and Literature - ዋርካ ባህልና ሥነ ጽሑፍ

Who is online

Users browsing this forum: Bing [Bot] and 1 guest