አስተያየት መስጫ በኢትዮጵያ የመጀመሪያው አጭር ልብ ወለድ

Topics related to cultures, arts, languages, arts such as humor, music, traditional literary genres of poems, ግጥም ፣ ቅኔ ፣ ተረትና ምሳሌ)

አስተያየት መስጫ በኢትዮጵያ የመጀመሪያው አጭር ልብ ወለድ

Postby እንሰት » Tue Oct 23, 2012 6:05 am

ሰላም ዋርካውያን/ዋርካውያት
በኢትዮጵያ የመጀመሪያው አጭር ልብ ወለድ የሆነውን የጉለሌው ሰካራምን ዘላለም ለግሶናል:: ተመስገን ገብሬ ነበር ጸሀፊው::

የጉለሌው ሰካራም በተመስገን ገብሬ
በ1941 ዓ.ም ህዳር 22 አዲስ አበባ ነፃነት ማተሚያ ቤት ታተመ

...
Last edited by እንሰት on Sat Oct 27, 2012 4:57 pm, edited 2 times in total.
እንሰት
ውሃ አጠጪ
ውሃ አጠጪ
 
Posts: 1213
Joined: Sun Jan 30, 2005 1:14 am
Location: united states

Re: የጉለሌው ሰካራም በኢትዮጵያ የመጀመሪያው አጭር ልብ ወለድ

Postby ዲጎኔ » Tue Oct 23, 2012 6:52 am

ሰላም ለሁላችን ይሁን
እጥፍ ምስጋና ለእንስት ይህ ቅንብር ስላገኘን::አዎን ወንጌላዊ ተመሰገን ገብሬ በጎጃሙ ተሀድሶ ቄስ ባድማ ያለው ከተቀረጹ ከነዶ/ር አዲስ አለማየሁ የሚደመር የተሀድሶ ጮራ ፍሬዎች አንዱ ነው::ይህን ግኝት መጀመሪያ ላቀረቡት የዩኒቨርስቲ ማህበረሰብ አባል ዶ/ር ፈቃደ አዘዘ ምስጋናይገባል::የወንጌላዊ ተመስገን ገብሬ ስራ በህትመት ላቀረበው የምስራች ድምጽ መገናኛ ዘዴዎችም እንዲሁ ምስጋና ይገባል::

ዲጎኔ ሞረቴው በጉለሌው ሰካራም መጣጥፍ የታነጸ

እንሰት wrote:ሰላም ዋርካውያን/ዋርካውያት
በኢትዮጵያ የመጀመሪያው አጭር ልብ ወለድ የሆነውን የጉለሌው ሰካራምን ዘላለም ለግሶናል:: ተመስገን ገብሬ ነበር ጸሀፊው::

የጉለሌው ሰካራም በተመስገን ገብሬ
በ1941 ዓ.ም ህዳር 22 አዲስ አበባ ነፃነት ማተሚያ ቤት ታተመ

ተመስገን ገብሬ በኢትዮጵያ የመጀመሪያው አጭር ልብ ወለድ (የጉለሌው ሰካራም) ፀኃፊ እንደሆነ አቶ አስፋው ዳምጤ እና አቶ ዘሪሁን አስፋው ይገልፃሉ፡፡

ክፍል ፩
በጉለሌ የነበረው የታወቀ ዶሮ ነጋዴ ማነው ብለው ከገፈርሳ እስከ ደጃዝማች ይገዙ ሰፈር ለጠየቁ ሰዎች፤ ተበጀ ሰካራሙ ተበጀ ዶሮ ነጋዴው፤ ተበጀ ነው ብለው ይነግሯቸዋል፡፡ የሕይወቱ ታሪክ ፍፁም ገድል ነው፡፡ ጢም ያለው ሽማግሌ ሰው ነው፡፡ ራሱን ጠጉር ውሃ ወይም መቀስ ነክቶት አያውቅም፡፡ ማለዳ አይናገርም፡፡ በጠርሙስ የከመረውን ከጠጣ በኋላ ሲራገም ወይም ሲሳደብ ሲፈክር ወይም ሲያቅራራ ድምጡ ከፈረንጅ ውሻ ድምጥ ይወፍራል፡፡ ቢያውቀውም ባያውቀውም ላገኝው ሁሉ ማታ ሰላምታ ይሰጣል፡፡


ቢያውቀውም ባያውቀውም ካገኝው ሁል ጋር ማታ ይስቃል፡፡ ቢውቀውም ባያውቀውም የሰላምታው አይነት እንደ ወታደር ወይም እንደ ሲቪል ቢሆን ለእርሱ እንደተመቸው ነው፡፡ ከሰላምታው ጋር ድምጥ ትሰማለችሁ፡፡ ከአፉ ከሚወጣው ከሚወጣው ግን አንድ ቃል መለየት አትችሉም፡፡


ቡን በተፈላ ጊዜ በጉለሌ በየምድጃው ሥር የሰካራም ተረት በየተጫወተ ሰው ሁሉ የተናገረ በተበጀ ላይ ነው፡፡ መልኩን አይተውት ያላወቁት ባልቴቶች እንኳ ከፍንጃል ቡን ፉት እያሉየሌላውን ሰካራም ተረት በተበጀ ላይ ያላክኩት ነበር፡፡ይህ እውነት ነበር፡፡ በጠባዩ ከተባለለት የባሰ ሰካራም ይሁን ወይም የጉለሌ ባህር ዛፍ ውስጥ ወጥቶ እንደ አዲስ እንግዳ ሰው ሆኖ ለአዲስ አበባ ታይቷል፡፡



ከዱሮ የእንጨት ጉሙሩክ አጠገብ ወደ ምሥራቅ ሲል ሲል ካለው ወንዝ ማዶ ድልድዩን ወደ ምሥራው ተሻግሮ መጀመሪያ የሚገኝው አነስተኛ ሳር ክዳን ቤት የተበጀ ቤት ማለት ያ ነው፡፡ በዚያ በቤቱ በዚያ በጉለሌ በሠፈሩ ኖረ፡፡ እንጨቱን ተሸክሞ አፈሩን ቆፍሮ ቤቱን የሰራው እርሱ ነው፡፡ ዋጋ ከፍሎ አስከድኖታል፡፡ ተበጀን ኩራት ተሰማው፡፡ ቆይቶ ደግሞ አይኖቹ እንባ አዘሉ፡፡ በጉንጩም የእንባ ዘለላ ወረደው፡፡ በግራ እጁ መዳፍ ከጉንጩ የተንከባለለውን እንባ ጨፈለቀው፡፡ ዓይኖቹ እንባ ያፈሰሱ ለራሱ ጎጆ ስላለው ነው፡፡ ሊነገር በማይችል ደስታ ልቡ ተለውስዋል፡፡


ዝናም ያባረራቸው ም ከቤቱ ጥግ ሊያጠለሉ ይችላሉ፡፡ ቤት የእግዚአብሄር ነውና ውዥብ እንዳያገኛቸው ከቤት ውስጥ ዝናቡ እስኪያባራ ይቆያሉ፡፡ ተበጀን ‹‹ ቤትህን ይባርክ ›› ሊሉት ነው፡፡



እንግዲህ መንገደኛው ሁሉ ‹‹ ይህ የማን ቤት ነው ? ብሎ ሲጠይቅ የተበጀ ሊባል ነው ›› አለ፡፡ ቀጥሎ ደግሞ ‹‹ ተበጀ የትኛው ነው ሲባል ዶሮ ነጋዴው ሊባል ነው ›› አለ፡፡ ‹‹ ዶሮ ነጋዴው የትኛው ነው ›› ሲባል ያ የጉለሌው ሰካራም ሊባል ነው፡፡ አወይ፤ እኔ ተበጀ፤ ተበላሽቻለሁ አለና ደነገጠ፡፡ ከዚህ በኋላ ስለቤቱ ክብር እንኳ መጠጥ መተው ይገባኛል አለ ፡፡ መጠጥ ለመተው ያሰበበት የመጀመሪያ ጊዜው ይህ ነው፡፡ ሰካራምነት ጉዳት መሆኑ ተሰምቶት እንደሆን ይናገር ስለ ቤት ክብር ማለቱ ግን ወደ ዳር ይቆይ፡፡ ስለ ቤት ክብር ምን ያውቃል? ዶሮ ነጋዴው ተበጀ ሰካራሙ ተበጀ አይደለምን ? ሰካራሙ ተበጀ የሰራውን የገዛ ቤቱን ከፍቶ ገበና ኩራዙን አስቀምጦ ክብሪቱን ለመጫር ሲያወጣ በሐሳብ ተሰቅዞ እንደዚህ አሰበ፡፡ መምረጥ አለብኝ፡፡ ከዚህ ቤት ያለው መጠጥ ሁሉ አንድ ሳይቀር እየወጣ ይፍሰስ፤ ከዚህ በኋላ ክብሪቱም ኩራዙም በቤት ይደር፤ በአዲሱም ቤት ብርሃን ይዙርበት፡፡ አለዚያም በአዲሱ ቤት መጠጥ ይዙርበት፤ ኩራዙም ክብሪቱ ከቤት ይውጣና ይፍሰስ፡፡ ሊደረግ የሚገባ ከሁለቱ አንዱ ነው እንጂ፤ በሰካራሙ ተበጀ ቤት መጠጥና እሳት በአንድነት ይህች ውሸት አለና ሳቀ፡፡
ከሁለቱ አንዱ ለማድረግ ሳይቆርጥ መብራቱን አቃጠለና ተቀመጠ፡፡ እንደገና ደግሞ እንደዚህ አሰበ፡፡


አያድርገውና ዛሬ ሰክሬ ይህ ቤት ቢቃጠልብኝ አመዱን አይቶ በሰካራሙ ተበጀ ላይ ለመሳቅ ድፍን ጉለሌ ነገ ከዚህ ነው የሚቆም ! ጉለሌ ምን ባለኝ? ወሬ ከማቡካት በቀር ጉለሌ ምን ሥራ አለው; ለአዲስ አበባም የስድስት ወር መሳቂያ በሆንኩ ነበር፡፡ መንገድ አላፊዎችም ነገ በዚህ ሲያልፉ አመዱን አይተው ይህ የተቃጠለው ቤት የማን ነበር ሲሉ የተበጀ ሊባል ነው፡፡ በሰካራሙ ተበጀ ቤት መጠጥና እሳት ባንድነት ይህች ውሸት ! ወደ ውጭ እንደ እርም ወርውሮት የነበረውን የመጠጥ ጠርሙስ ሁሉ በጨለማው ዳብሶ አንድ በአንድ ለቃቀማቸው፡፡
አንዱን ግን ቀና አደረገና ከአፍንጫው አስጠግቶ አሸተተው፡፡ በጠርሙሱ ቅርፅ የመጠጡን አይነት አወቀው፡፡ ዊስኪ ነበርና ስለዚህ ነው ሰው እንዳይሰማ ቀስ ብሎ የሳቀ፡፡ የጠርሙሱን ግማሽ ከጠጣ በኋላ ግን በአፉ ቡሽ ቢወትፍበት ለሳቁ መጠን የለውም፡፡ ‹‹ ጉለሌ ተኝቷልና ከዚሁ ከባሕር ዛፍ ሥር ቁጭ ብየ ብጠጣ የሚታዘበኝ የለም›› አለና አሰበ፡፡ እውነቱን ነው፡፡ ጉለሌስ ተኝቶ ነበር ነገር ግን አሁን እርሱ ጠጥቶ የሰከረ እንደሆነ ጉለሌን ሊቀሰቅሰው ነው እርሱ ከጠጣ በጉለሌ ማን ይተኛል? ጠርሙሱን ከከፈተው በኋላ ብርጭቆ ያስፈልገው እንደነበር ትዝ አለው፡፡ ሶስት የሚሆን ደኅና ጉንጭ ጠርሙሱን ከአፉ አስጠግቶ ጨለጠ፡፡ ከዚያ በኋላ የሚጠጣበት ብርጭቆ ሊያመጣ አሰበ ከዚያ በኋላ ደግሞ በሶስት ጉንጭ ምን ያህል ጠርሙሱን ቀና አድርጎ በጨረቃዋ ተመለከተ፡፡ ‹‹ግማሹን ያህል ሰርጉጀዋለሁ›› አለና በሳቅ ፈነዳ፡፡ ‹‹ ለዚህችስ ብርጭቆ ማምጣት አያሻም›› እያለ ጠርሙሱን አምቦጫቦጨው፡፡ በቀኝ ክንዱ መሬቱን ተረክዞ የቀረውን ጅው አድርጎ ወደ ውስጥ ወረወረው፡፡ ባዶውን ጠርሙስ ደግሞ በጁ እየጠነቆለ ‹‹አንተን ደግሞ ለአንድ ዶሮ ለውጩ ሞያ እይዛለሁ የዊስኪ ቅርፍቱም ዋጋ አለው አይጣልም›› አለ፡፡
‹‹እንዲሁ ሲጠጣ ሌሊቱን አጋመሰው፡፡ ቀጥሎ ከእግሩ በታች የወደቀውን ጠርሙስ እየቆጠረ ይህን ሁሉ እንደጠጣሁት አላምንምና በጉለሌ አፈርሳታ ይደረግልኝ እነናቄ እነተሰማ አጎቴም ይጠጣሉ›› አለ፡፡የጠርሙሱ መጠጥ ሁሉ እስኪያልቅ ድረስ ከዚያ ከዛፉ ሥር ተቀምጦ ያን ጠንካራ ትምባሆውን ከአፉ አላየውም፡፡ በሳቅ ጊዜ ብቻ መልሶ ዝም እስኪል ድረስ መጠጡ ወይም ትምባሆው ከአፉ ያቋርጣል፡፡ የመጠጥና የትምባሆ ጊዜው ተበጀ ይህ ነው፡፡ማለዳ በቀዝቃዛ ውሃ ታጠበ፡፡ ቋንጣም እንቁላልም ጠበሳና በዳቦ በላ፡፡ የጦም ቀን ነበር ‹‹ ለአባ ተክለ አረጋይ አልናገርምና ነፍሴ ሆይ ግድ የለም አለ››፡፡ የነፍስ አባቱን ማለቱ ነው፡፡ ምናልባት በዓመት እንኳ አንድ ጊዜ ጠየቋቸው ወይም ጠይቀውት አያውቁም፤ እርሱንም አያደርሰውም፤ እርሳቸውም ከበዓታቸው አይወጡም፤ አንዳንድ ጊዜ የዛሬውን እሑድ ዕረፍት አደርገዋለሁ ያለ እንደሆነ እግሩን ደኅና አድርጎ የሚታጠብበት ቀን ማለት ነው፡፡


ደክሞት ነበርና ደኅና እንቅልፍ ተኝቶ ነበር፡፡ ዝናሙን ነጎድጓዱን ጎርፉን ውሃ ምላቱን አልሰማም፡፡ አንዳች ነገር ሰማ፡፡ ዘፈን እና እልልታ የሰማ መሰለው፡፡ ትናንት ከጠጣው መጠጥ ኃይል መሰለውና ይህስ ዕብደት ነው እንጂ ስካር አይደለም አለና ተመልሶ ተኛ፡፡ እንደገና አዳመጠ፡፡ የእርዳታ ጥሬ ጩኸት ሰማ፡፡ ከ አልጋው ዘልሎ ከወረደ በኋላ ቤቱን ለመዝጋት ጊዜ አላገኝም፡፡ በትልቁ ወንዝ ዙሪያ ቁመው ይጮሁ የነበሩ ሰዎች የውሃው ምላት የሾገሌን ገረድ እንደጠለፋት ነገሩት፡፡ ጉርፍ የወሰደው ሾገሌን ራሱን ቢሆን ወይም የሾገሌን ገረድ ለተበጀ ማዕረግ ምኑም አይደለም፡፡


‹‹ ገረዲቱን እናንተ በመጨረሻ ያያችኋት ወዴት ነው? ›› ብሎ ጠየቀና እየጠለቀ በዋና ይፈልግ ጀመር፡፡ ስለ ሾገሌ ገረድ በትኩስ ውሃ ምላት ለመግባት አንሠዋም ያለው ጉለሌ በዳር ተሰልፎ ቁሞ ተበጀን ይመለከት ነበር፡፡ ብዙ ጠልቆ ከቆየ በኋላ ብቅአለና ‹‹ አገኝኋት መሰለኝ ›› ብሎ በዳር ላሉት ጮሆ ተናገረ፡፡ ለሰው ሁሉ ደስታ ሰጠው፡፡ ከሁሉም ይልቅ እርሱን ደስ አለው፡፡

የጠለቀውና የዋኝው ረጅም ጊዜ ስለሆነ ደክሞት ነበር፡፡ ነገር ግን ሊያወጣት ይገባዋል፡፡ ጠለቀና አገኛት፡፡ በአሸካከሙ ላይ ጥበብ ያስፈልጋል፡፡ አለዚያስ ውሃው ምላት እንደገና ይነጥቀዋል፡፡ እንደተሸከማት ውስጥ ለውስጥ ዋኝና ከዳር ብቅ አለ፡፡


ከሸክሙ ክብደት ኃይል የተነሣ ወዲያው ወደቀ፡፡ እርዳታ ተነባበሩለትና ጎትተው እርሱንም እርሷንም አወጧቸው፡፡ ተበጀ ተንዘራግቶ በብረቱ ውጋት እያቃተተ የጉለሌ ሰው በሳቅ ሲፈነዳ ሰማ- ከራሱ ነኩል ቀና አለና ‹‹ ሴትዮዋ ድናለች? ›› ብሎ በርኅራሄ ድምፅ ጠየቃቸው፡፡


አንዱ ቀረበና ‹‹ አሳማ ነው ያወጣሃው ›› አለው፡፡ የሚያቃትተው ተበጀ ከወደራሱ ቀና አለና ‹‹አሳማ?›› ብሎ ጠየቀው፡፡ ‹‹ ለመሆኑ ከእናንተ ውሃ ወሰደባችሁ ሰው ነበር ወይስ አሳማ ኑርዋል? ›› ብሎ ተበጀ ጠየቀና ያቃትት ጀመር፡፡ ጎረቤትህን እንደነፍስህ ውደድ ቢባልም ሰዎችን እነ እቲላን ነበር እንጂ የእቲላን አሳማዎች አልነበረም፡፡ እቲላ ጎረቤቱ አሳማ አርቢ ነው፡፡ ውሃው ምላት ነጥቆ ወስዶ የነበረ የእቲላን አሳማ ሳለ ያላዩትን ቢያወሩ ግድ የሌላቸው ሰዎች የሾገሌን ገረድ ውሃ ወሰዳት ብለው አውርተው የተበጀ ነፍስ ለአንድ አሳማ ነፍስ ሊያስለውጡት ነበር፡፡


መልካሙ የሰማዕትነት ሥራው ሁሉ ደግሞ እንዲሁ ርካሽ ሆኖ የሚቆጠር የሆነበት ዘወትር የሚሰክር ሆኖ ስለታወቀ ነው፡፡ በሞራልም (ግብረ ገብነት) መሠረት አደረግሁት የሚለውን ሁሉ ሳያውቀው እንደሚያደርገው ይቆጥሩበታል፡፡ ‹‹ በጎ ሥራህን ሁሉ በትኩስ መቃብር ውስጥ አፈር አልብሰው አንተ ሰው ሁን ሚስት አግባ ልጆች ይኑሩህ›› ይሉትና ይዘልፍት ነበር፡፡ ድኃ ቢሆን ወይም ባለጠጋ ሰካራም ቢሆን ወይም ትኅርምተኛ ሁሉም የጉለሌ ልጆች ነን አባታችንም ጉለሌ ነው ብሎ ራሱን ሚያኮራ እርሱ ተበጀ ብቻ ነው፡፡



ክፍል 2
ከሚያሰክር ሁሉ ትኅርምተኛ ለመሆን ብዙ ጊዜ አስቦ ነበር፡፡ ሰክሮ ያደረበት ሌሊት አልፎ ብርሃን በሆን ጊዜ ከእንግዲህ ወዲህ ‹‹መጠጥ አልቀምስም›› እያለ እየቀኑ በብርሃን ተበጀ ምለዋል፡፡ በነጋዉ የበለጠ ጠጥቶ የባሰ ሰክርዋል፡፡ ለመስከር ይጠጣል፡፡ ደስ ያለው እንዲመስለው ይጠጣል፡፡ ብስጭቱን የሚረሳ መስሎት ይጠጣል ይህ ነው ተበጀ፡፡


‹‹ ይህን መስከርህን ካልተውህ ላንተ አበ ነፍስ አልሆንህም›› ብለው የመጀመሪያ ንስሐ አባቱ ብዙ ከመከሩት በኋላ መንፈሳዊ ልጅነቱን ከርግመት ጋራ አስወግደውታል፡፡ ገረዶቹም ለርሱ ተቀጥሮ መሥራትን ከውርደት ቆጥረውት እየነቀፉት ሂደዋል፡፡ ‹‹ መጠጥ ካልተውህ አናገባህም›› ብለው እየጊዜው ለጋብቻ ጠየቋቸው የነበሩ በቁመናው አሰናብተውታል፡፡ በሰምበቴ በማኅበርም ማኀበርተኛ ለቦሞን የጠየቃቸው ነፍሱን ሳይቀር ንቀውታል፡፡ ይህ ሁሉ በእርሱ ዘንድ ከኢምንት አይቆጠርም፡፡ ያሉትን ቢሉ እርሱ ምን ቸገረው ገንዘብ እኮ አለው፣ ገንዘቡም ጥሬ ብር ነው፡፡ ባለጠጋ ነው፡፡ መስከረም የባለጠጎች ነው፡፡ ትኅምርተኛ መሆንም የድሆች ነው፡፡ እንደ ልዩ አመፅ አድርገው ለምን በእርሱ ይቆጥሩበታል? እንዲህ በተከራከረ ነበር፡፡ ነገር ግን ልዩነት አለው፡፡ እርሱ ብዙ ጊዜ ሰክሮ አውቶሞቢል በላዩ ላይ ሒዶበታል፡፡ ሰክሮ በበነጋታው ከእንቅልፉ ሲነቃ ብዙ ጊዜ ከእስር ቤት ውስጥ አድሮ ራሱን አግኝቶታል፡፡ በጉለሌ መንገድ ዳር ባሉት በብዙ የውሀ ጉድጓዶች ሰክሮ ገብቶባቸው እየተጮኸ ጉለሌ አውጥቶታል፡፡ ሰክሮ የጎርፍ ውሀ ከወሰደው በኋላ ብዙ ጊዜ እሳት አደጋ ደርሶለታል፡፡ ሰክሮ ከቤቱ መድረስ እያቃተው ከወደቀበት ባቡር ምንገድ ሳይነሳ ብዙ ጊዜ ጎርፍ በላዩ ላይ ሲሄድበት አድርዋል፡፡
ይህ ሁሉ ውርደት እና ርክሰት ነው እንጂ ክብር ከቶ አይደለም፡፡ እንግዲያውስ ክቡር ደሃ ነው ገንዘብ ስለሌለው ራሱን መግዛት ይችላል፡፡ ባለጠጋ ደግሞ መናኛ ተራ ነው፡፡ ገንዘብ ስላለው ራሱን መግዛት አይችልም፡፡ ይህን ሁሉ አሰበ፡፡ ስለኖረ ባይማር እንኳ ብዙ ከማወቅ ደርሰዋል፡፡ ‹‹ ባለጠጋ ሆነ ወይም ደሀ፣ ሰው ከራሱ የበለተ መሆን ይገባዋል››፡፡ አለ፡፡

ቤቱን ከሠራ ከአምስት ወራቶች በኋላ ጀምሮ ተበጀ መጠጥ ከቶ አልተጠጣም ስለቤቱ ክብር መጠጥ እርም ነው ማለት ጀምሯል፡፡ ያለፈውንም ዘመን መራርነት እያሰበ ተንገፍግፈዋል፡፡ አንድ ብሎ ለመጀመር ከወደቀበት ትቢያ አንስቶ ዕድሉን ሲራግፍ እነደ ራዕይ ያያል፡፡
ያበላሸው እድሉ አሳዘነው ‹‹ በዚህ እድሜየ ሁሉ ሚስትም አላገባሁ ልጅም የለኝም›› አለና አዘነ፡፡

ውሾቹ እየተባሉ ሲጫወቱ ተመለከተና ‹‹አመሌ ውሻ ነበርና ከውሾች ጋር ኖርኩ›› ብሎ ራሱን ረገመ፡፡ በውሾች ፈንታ አሁን በዚህ እድሜው ልጆቹ ዙሪያውን እየተጫወቱ ሲፈነጩ ባየ ነበር እንዲሁ አሰበ፡፡ ቀልድና ወዘበሬታ ስለሚያውቅ እንደዚህ እያለ ይቀልድ ነበረ፡፡ ጉጃም የአበባውንና የግራር ማሩን ይጭናል፡፡ የተጉለትና የአምቦ ወረዳ ጌሾውን ያቀርባል፡፡ የሆላንድ የቢራ ፋብሪካ ቢራውን ያወጣል የኢጣሊያ ፋብሪካ ወይን ጠጅ (ነቢት) ያፈላል፡፡ መደቅሳና ዘቶስ በግሪክ አገር ይጣራል በስኮትላንድ ዊስኪ ይጠመቃል፡፡ ይህ ሁሉ የሚደረገው በአራዳ የሚቀመጡትን እንዳይተማቸው ነው፡፡ በዚህም ምክንያት መዋሻዋ እንደምትጮህ ጉጉት ሰካራሞች በከተማይቱ ይጮሃሉ፡፡


‹‹በደብረ ሊባኖስ ግን ድምጡን ዘለግ አድርጎ የሚናገር ወፍ እንኳ የለም፡፡ ውሃ እንኳ የሚጠጣ በመቅነኑ ነው፡፡ በአራዳ አሁን ወይም በገዳም ምንም ገንዘብና ቢስቲን ለሌለው ውሀ ደግሞ እጅግ አድርጎ ይጣፍጣል፡፡›› ይህን የመሰለ ቀልድ ይቀለድ ነበር፡፡ ሰካራሙ ተበጀ ግን ገንዘብ እያለው ወሀ ጣፍጦታል፡፡ ልዩ በሆነው በዚያ ማታ ወደ አልጋው ወጥቶ በተኛ ጊዜ መጠጥን እርም ካደረገው አንድ አመት ከዘጠኝ ወር ከዘጠኝ ቀን እንደ ሆነው ጊዜውን ቆጥሮ አወቀው፡፡ ጊዜውንስ ማወቅ ለምን አስፈለገው? ‹‹ እንደ ጉድፍ ( ጥንብ) መጣያ ትንፋሼ ተበላሼ፤ አፌም እነደ እሬት መረረኝ ሹልክ ብየ ዛሬ ብቻ፤ ጥቂት ብቻ፤ አንድ ጊዜ ብቻ፤ እኔ ብቻ፣ ብጠጣ ምን ይጎዳል›› ብሎ ተመኝቶ ስለመበረ ነው፡፡ ነገር ግን ወደ አልጋው ወጥቶ ተጋደመ ከተጋደመም በኋላ ተነሥቶ መጠጥ ቤት ለመሄድ ከባድ ከነበረው እንቅልፉ ለበላቀቅ ታገለ፡፡ በመጨረሻ ወደ መጠጥ ቤት በሄደ ጊዜ በውኑ ወይንም በሕልሙ እንደነበረ ራሱን ተበጀ አላውቀውም፡፡
የጠጣም እነደሆነ ከሁለት መቶ ዓመት በፊት ይደረግ በነበረው የአረመኔ ቅጣት እጁን እግሩ ከመቆረጥ ይደርሳል ብሎ አላሰበም፡፡ አናጢ የጠረበው እንጨት ከቅልጥሙ ይቀጠላል ብሎ ክፉ ሕልም አላለመም፡፡ አንድ ሰካራም አንካሳ በአንድ ዓመት ስንት የእንጨት እግር ይጨርሳል ብሎ ስለዋጋው አልተጨነቀም፡፡ ደኅና ምቾት ያለው አንካሳ ለመሆንም ገንዘብ ያስፈልጋል፡፡


አንካሳው ሰው ሰካራም እንደሆን በእንጨት እግሩ በሰላም ጊዜ ይሄድበታል፡፡ በሁከት ጊዜ ደግሞ ይማታበታል፡፡ ሲማታበት ይሰበራል ሲሰበርም ሌላ የእነጨት እግር መግዛት ያስፈልገዋል፡፡ ስለዚህ የእንቸጥ እግር የሚሰሩ አናጢዮች ለደንበኞቻቸው ትርፍ መጠባበቂያ እግር በሜንጦ ሰቅለው ያስቀምጡላቸዋል ይባላል፡፡ ተበጀን እንደዚህ ያለ ሕይወት አያጋጥመውም፡፡ በበቀለች ዓምባ መጠጥ ቤት ደረጃውን ተራምዶ ተበጀ በገባ ጊዜ የጥንት ወዳጆቹ ስካሮች በእቅፍ ልይ ተነባበሩ፡፡ እንደተወደደ መሪ በጫንቃቸው ላይ ተሸክመው እየተቀባበሉት በዕልልታ ጮሁ፡፡ ከመጠጥ ቤት ጠፍቶ የነበረው ተመልሰዋልና በስካሮች ሁሉ ዘንድ ደስታ ሆነ፡፡ እንኳን በደኅና ገባህ! የመጠጥ ጠርሙሶቹን እንደ ዘንባባ ይዘው ተቀበሉት ቁማርተኛው ያረጀ ግሪክ እየሳለ ተናገረ ሁሉም በደስታ ይጮሁ ስለነበረ አንድም የሰማው የለም፡፡


ረስቶት የነበረው መጠጥ ጣዕሙን ገና ሳያውቀው ገና ከጫብቃቸው ሳይወርድ በጩኸቱም በመጠጡም ተበጀ ሰከረ፡፡ ከጫንቃቸው ወደ ቁልቁል ጣሉት ፡፡ የሕፃንነት ዘመን አልፉልና ራስህን ችነል መሄድ ይገባሃል አሉት፡፡ ሰማህ? አቅም አንሶህ መሄድ አቅቶሃልና እንደኩብኩባ እየዘለለህ መሄድ ትችል እንደሆነ ምርኩዜ ይኸውልህ ብሎ አንካሳው በየነ አቀበለው፡፡ ምረኩዙን ለመያዝና ለመጨበጥ እጁን ሲዘርር በግምባሩ ከበሬት ላ ተደፋ፡፡ እንደ ወደቀም ሳለ፤ እስኪነቃ ድረስ በመካከሉ ስንት ሰዓት አልፎ እንደነበረ ለማስተዋል አልቻለም፡፡ የመጠጥ ቤቱ እመቤት ጊዜ አልፏልና ከውጭ ጣሉትና ቤቱን ዝጉት ብላ አዘዘች፡፡


ወደቤቱ የተመለሰ መስሎት ሄደ፡፡ ማወቅ አልቻለምና ወዴት እንደሄደ ግን አላወቀም፡፡ አንድ መንገድ ሲያቋርጥ ተሰናከለና ወደቀ፡፡ ከወደቀበትም ምድር ላይ በዳሰሰ ጊዜ ለእጁ የገጠመው የባቡር ሀዲድ ነው፡፡ ቤቱ ያለ በጉለሌ ነው፡፡ የሰከረበት ደግሞ የበቀለች መተጥ ቤት ነው፡፡ መጠጥ ቤቱም ከዩሃንስ ቤተ ክርስቲያን አጠገብ ነው፡፡ ምን ያህል ቢክር ነው የጉለሌ መንገድ ጠፍቶት እስከ ባቡር ሀዲድ ድረስ ተሳስቶ የሄደ; ራሱን ይዞ ለመጮህም ራሱ ወዴት እንዳለ ማወቅ አቃተው፡፡ እንደ ቤቱ መንገድ ጠፋበት፡፡


ጥቂት መስማት ከቻለ በኋላ ጩኸት በስተ ኋላው የነፋ ነበረ የእሳት አደጋ ወይስ ባቡር ኑርዋል; እያፎደፎደ ሲሄድ ከወደ ኋላው በኩል ምን እንደገፋው አላወቀም፤ ከኋላው በኩል ትልቅ ሀይል መታው፤ ከፊቱ በኩል ቀበሮ ጉድጓድ ተቀበለው፡፡ እግሩ እንደ ብርጭቆ ነከተ፡፡ ከወደቀበትም ሌሊቱን ሁሉ ደም ከእግሩ ዘነመ፡፡ ትንኝም እንደ ንብ በላዩ ሰፎ ደሙን መጠጠው፡፡


ቀና ብሎ በአጠገቡ የወደቀውን የአህያ ሬሳ አሞራዎች ሲግጡት አየ፡፡ የቀረው ልቡ በድንጋፄ ተመታ የእርሱ እድል ከአህያው ሬሳ ዕድል ቀጥሎ ሆነ፡፡ በስካሩ ምክንያት እስከ ዘላለም ድረስ ከአህያ ሬሳ እንደ ማይሻል ተረዳው፡፡ ነገር ግን የአሁኑ መረዳት ለምን ይበጀዋል? ማወቅ የሚያስፈልግበት ጊዜ አልፏል፡፡ በሕይወቱ ሳለ እንደ ወደቀ ያህያ ሬሳ መነሳትአልቻለምና በተራው አሞራዎቹን ዓይኑን ሊመነቁሩት ነው፡፡ ሥጋውን በልተው ከጨረሱት በኋላ አጥንቱን ሊግጡት ነው፡፡ሌሊት ደግሞ ቀበሮዋች ሊረፈረፉበት ነው፡፡ ይህን እንዲያመልጥ ለመሸሽ ከወደቀበት ሊነሣ እቃተተ ሞከረ፡፡ ባልተቻለው ጊዜ ግን ተጋደመ፡፡


በደሙ ላይ እነደተጋደመ አራት ቀኖች አለፉ፡፡ እግሩ እንደቀረበታ ተነፋ፡፡ እንደ ቅጠልያ ያለ እዥ ወረደው፡፡ ከወደቀበት ያነሳው የመንግስት አምቡላንስ ባገኝው ጊዜ ፈፅሞ በስብሶ ነበር፡፡ ዶክቶር ክሪመር ባዩት ጊዜ ከሰማይ በታች ሊደረግለት የሚችል ሕክምና ምንድር ነው; ደሙ አልቅዋል፡፡ በሽተኞችን ለመርዳት በጎ ፈቃድ ካላቸው ሰዎች የተለገሰውን ደም ለሚሰክር ጥጋበኛ አልሰጥም፡፡ እርሱን መንካት መርዙን ያስፈራል ከዚህ በፊት ይህ እንዳይደርስበት እንዳይሰክር ብዙ አስጠንቅቀነው ነበር አሉ፡፡ ከንፈሩ ተንቀሳቀሰ፡፡ ላብ በፊቱ እንደ ውሀ ፈሰሰ፡፡ ለመናገር ጣረ፡፡ በመጨረሻ ግን መናገም ስይሆንለት ቀረ፡፡ ሐኪሞችም የገማውን ልብሱን ገፈፉት፡፡ እንደ ቅባትም ያለ መድኃኒት ቀቡት፡፡ ከግማሽ ሊትር የበለጠ ደም ሰጡት፡፡ በመጠጥ ከተጉዳው ከልቡ ድካም የተነሣ ኤተር ለመቀበል አለመቻሉን ከተረዱ ዘንድ የሚያፈዝ መድኃኒት ጀርባውን ወግተው ሰጡት፡፡


አንዱ ሐኪም ከጉልበቱ ይቆረጥ አለ፡፡ ሌላው ግን ሁለተኛ እንዳይሰክር ከቂጡ አስጠግቼ እቆርጠዋለሁ አለና ከቂጡ አስጠግቶ ቆረጠው፡፡ የተቆረጠውን እግሩን ከፊቱ መዝናችሁ አስታቅፉት ብሎ አስታማሚዎችን አዘዘ፡፡ እግሩን ከፊቱ መዘኑትና አሥር ኪሎ የሆነው እግርህ ይኸውልህ ታቀፈው ብለው አስታቀፉት፡፡ በዚህ ጊዜ በአጥንት የተጣሉት ውሾች በላዩ ላይ ተረፈረፉበትና በድንጋፄ ከእንቅልፉ ነቃ፡፡ ይህ ሁሉ የደረሰበት በሕልሙ እንደነበር ማወቅ አቃተው፡፡ ከአልጋው ላይ ወረደና ገረዱን ወይዘሮ ጥሩነሽን ከመኝታቸው ቀስቅሶ እየጮኸና እየተንዘረዘረ ስንት እግር ነው ያለኝ ብሎ ጠየቃቸው፡፡
ወይዘሮ ጥሩነሽም ‹‹ድሮ ስንት እግር ነበረዎ ጌታ?›› ብለው ጠየቁት፡፡


እየጮኸ ሶስት ጊዜ ‹‹ ሁለት ሁለት ሁለት ነበረኝ›› አላቸው፡፡

ሶስት ጊዜ ሁለት ስድስት ማለት ነው፡፡ ልጆቼን ያሳደገች ላም ካራት እግር የበለጠ አልነበራትም ሰለዚህ የእርስዎም እግሮች አራት ናቸው አሉት፡፡

‹‹የምሬን ነው የምጠይቅዎት;›› አለና ጮሆ ተንዘረዘረ፡፡

‹‹በእርግጥ ሁለት እግሮች አሉዎት ጌታ›› አሉት፡፡

ተበጀ እግሩን አጎንብሶ ለመሳም ሞከረና ራቀው፡፡ ወደ ሰማይ እያየ መጠጥ ማለት ለእኔ ሞት ማለት ነው አለ፡፡ ጊዜውም ሌሊት ነበር፡፡

እንደዚህ የማሉበት ሌሊት ያልፋል ብለው ወይዘሮ ጥሩነሽ መለሱለት፡፡

Source: www.zelalemkibret.wordpress.com
ዲጎኔ
ዋና አለቃ
ዋና አለቃ
 
Posts: 4752
Joined: Fri Aug 19, 2005 2:03 am
Location: united states

Postby ሙዝ1 » Tue Oct 23, 2012 11:36 am

ኤጭ ... ዲጎኔ ታበዛዋለህ ...
እንሰት የተመስገን ገብሬን (ኩዛ) ጽሁፍ ላላነበቡ ለማስነበብ እዚህ ዋርካ ላይ ስለለጠፍከዉ እንደሁልጊዜዉ አክብሮቴ ካለህበት :lol:
አይን ሁሉን ቢያይም አጠገቡ ያለዉን ቅንድብ አይቶ አያዉቅም ...
ሙዝ1
ዋና አለቃ
ዋና አለቃ
 
Posts: 3128
Joined: Wed Feb 22, 2006 9:25 am

Postby ዲጎኔ » Tue Oct 23, 2012 1:14 pm

ሰላም ለሁላችን
ሙዝነት የጎዛምኑ ወያንንታ ምነው? እኔ ጎዛምን ብሆን ጮቤ እረግጥ ቅቅ ነበር ሁለት ገጽም እጽፍ ነበር ....ምንም አላበዛሁ ሀቅ ዘረዘርኩ እንጂ!ባለፈው የጎጃሞቹ ደራሲያን ምሽት ባህር ዳር ላይ በተካሄደ ተዘክረዋል ሲያንሳቸው ነው::

ሙዝ1 wrote:ኤጭ ... ዲጎኔ ታበዛዋለህ ...
እንሰት የተመስገን ገብሬን (ኩዛ) ጽሁፍ ላላነበቡ ለማስነበብ እዚህ ዋርካ ላይ ስለለጠፍከዉ እንደሁልጊዜዉ አክብሮቴ ካለህበት :lol:
ዲጎኔ
ዋና አለቃ
ዋና አለቃ
 
Posts: 4752
Joined: Fri Aug 19, 2005 2:03 am
Location: united states

Postby ክቡራን » Tue Oct 23, 2012 1:53 pm

ወንድሜ ዲጎኔ እንደጻፈው እጠቅሳለሁ:
ዲጎኔ ሞረቴው በጉለሌው ሰካራም መጣጥፍ የታነጸ

ወንድሜ ዲጎኔ ግን በሰካራም መጣጥፍ ህይወትህ ይታነጻል ማለት ነው..? አንተና ነጯ ያላቹ ፍቅር እኮ.. :D
ክቡራን
ዋና አለቃ
ዋና አለቃ
 
Posts: 7814
Joined: Tue Mar 04, 2008 4:24 pm

Re: የጉለሌው ሰካራም በኢትዮጵያ የመጀመሪያው አጭር ልብ ወለድ

Postby እንሰት » Tue Oct 23, 2012 2:44 pm

እንደሁሌው ሁሉ ለዲጎኔ ለሙዘይድ እና ለክቡራን ስለወደዳችሁት ታሪአክዊ ፋይዳንም ስላያችሁበት በዘላለም እና በደራሲው ተመስገን ስም ደስ ብሎኛል አመሰግናለሁ::

ወንድም ዲጎኔ የታሪካዊ ፋይዳን አንዳንድ ሁነታዎች አመላክተሀል:: ዘርዘር አድርገህ ብትተርክልን ምስጋናዬ የላቀ ነው::

ዲጎኔ wrote:ሰላም ለሁላችን ይሁን
እጥፍ ምስጋና ለእንስት ይህ ቅንብር ስላገኘን::አዎን ወንጌላዊ ተመሰገን ገብሬ በጎጃሙ ተሀድሶ ቄስ ባድማ ያለው ከተቀረጹ ከነዶ/ር አዲስ አለማየሁ የሚደመር የተሀድሶ ጮራ ፍሬዎች አንዱ ነው::ይህን ግኝት መጀመሪያ ላቀረቡት የዩኒቨርስቲ ማህበረሰብ አባል ዶ/ር ፈቃደ አዘዘ ምስጋናይገባል::የወንጌላዊ ተመስገን ገብሬ ስራ በህትመት ላቀረበው የምስራች ድምጽ መገናኛ ዘዴዎችም እንዲሁ ምስጋና ይገባል::

ዲጎኔ ሞረቴው በጉለሌው ሰካራም መጣጥፍ የታነጸ


ዲጎኔ
...ባለፈው የጎጃሞቹ ደራሲያን ምሽት ባህር ዳር ላይ በተካሄደ ተዘክረዋል ሲያንሳቸው ነው ::
እንሰት
ውሃ አጠጪ
ውሃ አጠጪ
 
Posts: 1213
Joined: Sun Jan 30, 2005 1:14 am
Location: united states

Postby ዘርዐይ ደረስ » Tue Oct 23, 2012 3:46 pm

ሰላም እንሰት:-

የደራሲውን ሥም ባላስታውስም 'የጉለሌው ሰካራም' የመጀመርያው የአማርኛ አጭር ልብወለድ መሆኑን ማንበቤ ትዝ ይለኛል::በመጽሐፍ መልክ መታተሙን ግን ከአንተ ጽሑፍ ነው የተረዳሁት::ደራሲው በጋዜጣ ላይ ያወጣው ይመስለኝ ነበር::የመጀመርያው የአማርኛ አጫጭር ልቦለድ መድበል በ1948 የታተመው የታደሰ ሊበን 'መስከረም' ነው ሲባል ነበር የምሰማው::ለማንኛውም ይህን 'ፋና ወጊ' ዋርካችን ላይ አምጥተህ ስላካፈልከን ምሥጋናዬ ከፍ ያለ ነው::በነገራችን ላይ ስለደራሲው የህይወት ታሪክ የምታውቀው ነገር ካለ ብታካፍለን::መቼም ዲጎኔ ሃገሪቱ ያሏትን ታዋቂ ሰዎች ሁሉ ወደሱ ማኅበር በመሰብሰብ የታወቀ ስለሆነ የእሱን ምስክርነት መቀበል ያስቸግራል::
''ፍምን እፍ ብትላት ትነዳለች ትፍም ብትልባት ትጠፋለች ሁለቱም ሁሉ ከአንድ አፍ ይወጣሉ ::''መጽሐፈ ሲራክ 28:12
ዘርዐይ ደረስ
ውሃ አጠጪ
ውሃ አጠጪ
 
Posts: 1018
Joined: Sat Oct 23, 2004 3:52 am
Location: ethiopia

Re: የጉለሌው ሰካራም በኢትዮጵያ የመጀመሪያው አጭር ልብ ወለድ

Postby ዲጎኔ » Tue Oct 23, 2012 10:44 pm

ሰላም ለሁላችን ይሁን
ወገን እንስት ይህ ድንቅ ጸሀፊ በመገናኛ ብዙሀን በይፋ የታወቀውና ያገለገለበት ማህበር ይፋ የተደረገው በዶ/ር ፈቃደ አዘዘ አንድ ወቅት በተመራ የልብወለድ መጽሀፍት ሲምፖሲየም ላይ ነበር::የወንጌላዊ ተመስገን ቤተሰቦች አንድ ማህበር ስለነበርን መጽሀፉ በድጋሚ እንዲታተም ያቅሜን ተሳትፌያለሁ::የወ/ዊ ተመስገን ገብሬ ልጆች ጀርመን ሀገር ሲገኙ የአባታቸው ፈለግ እንዲከተሉ በካርድ ልውውጥ አድርጌያለሁ::በተጨማሪ የደራሲ ተመስገንና የተቀሩት የጎጃም ደራሲያን ዝክር የተደረገው ከሀገር ከወጣሁ ወዲህ በሬዲዮ ሰምቻለሁ::የአጭር ልብወለድ በኩር በሚለው ውይይት ተደርጎ የቁዋንቁዋዎች ጥናት ማእከሉ በተገቢ ማስረጃ ለወንጌላዊ ተመስገን ገብሬ እውቅና ሰጥቷል::የመጀመሪያው ረጅም/መደበኛ ልብወለድ ጦቢያ ደራሲ አፈወርቅ ገብረየሱስን ዝርዝር የሚያውቅ ካለ ቢዘክረን ጥሩ ነው::ሌላውን ተራ የወረደ አባባል በዚህ በተከበረ አምድ ወርጄ አልመላለስም:: የሀገሪቱ የኪነጥበብ ቅርሶች የሁሉም ሀይማኖቶች የሁሉም ብሄሮች አባላት ተዋጽኦ እንዳለበት ማሳወቁ መከባበርን መቀባበልን ህሊና ባላቸው ዘንድ ያመጣል ብየ ስለማምን ነው የወንጌላዊ ተመስገንን ማህበር እዚህ የጠቀስኩት::

ዲጎኔ ሞረቴው የጦቢያ የመጀመሪያ ታሪክ ደራሲ የተሀድሶ ሊቅ አለቃ ታዬና የኦሮምኛ መጽሀፍ ቅዱስ ተርጉዋሚ ወንጌላዊ ሂካ/ኦነሲሞስ ነሲብና የትግሪኛ መጽሀፍ ቅዱስ ተርጉዋሚ አለቃ ተወልደመድህን ተሀድሶ ማህበር


እንሰት wrote:እንደሁሌው ሁሉ ለዲጎኔ ለሙዘይድ እና ለክቡራን ስለወደዳችሁት ታሪአክዊ ፋይዳንም ስላያችሁበት በዘላለም እና በደራሲው ተመስገን ስም ደስ ብሎኛል አመሰግናለሁ::

ወንድም ዲጎኔ የታሪካዊ ፋይዳን አንዳንድ ሁነታዎች አመላክተሀል:: ዘርዘር አድርገህ ብትተርክልን ምስጋናዬ የላቀ ነው::

ዲጎኔ wrote:ሰላም ለሁላችን ይሁን
እጥፍ ምስጋና ለእንስት ይህ ቅንብር ስላገኘን::አዎን ወንጌላዊ ተመሰገን ገብሬ በጎጃሙ ተሀድሶ ቄስ ባድማ ያለው ከተቀረጹ ከነዶ/ር አዲስ አለማየሁ የሚደመር የተሀድሶ ጮራ ፍሬዎች አንዱ ነው::ይህን ግኝት መጀመሪያ ላቀረቡት የዩኒቨርስቲ ማህበረሰብ አባል ዶ/ር ፈቃደ አዘዘ ምስጋናይገባል::የወንጌላዊ ተመስገን ገብሬ ስራ በህትመት ላቀረበው የምስራች ድምጽ መገናኛ ዘዴዎችም እንዲሁ ምስጋና ይገባል::

ዲጎኔ ሞረቴው በጉለሌው ሰካራም መጣጥፍ የታነጸ


ዲጎኔ
...ባለፈው የጎጃሞቹ ደራሲያን ምሽት ባህር ዳር ላይ በተካሄደ ተዘክረዋል ሲያንሳቸው ነው ::
ዲጎኔ
ዋና አለቃ
ዋና አለቃ
 
Posts: 4752
Joined: Fri Aug 19, 2005 2:03 am
Location: united states

Postby ሙዝ1 » Wed Oct 24, 2012 8:07 am

ዲጎኔ wrote:ሰላም ለሁላችን
ሙዝነት የጎዛምኑ ወያንንታ ምነው? እኔ ጎዛምን ብሆን ጮቤ እረግጥ ቅቅ ነበር ሁለት ገጽም እጽፍ ነበር ....ምንም አላበዛሁ ሀቅ ዘረዘርኩ እንጂ!ባለፈው የጎጃሞቹ ደራሲያን ምሽት ባህር ዳር ላይ በተካሄደ ተዘክረዋል ሲያንሳቸው ነው::
ለለጠፍከዉ እንደሁልጊዜዉ አክብሮቴ ካለህበት :lol:


ስማ ዲጎ ... ታላላቅን ማክበር ጎጃም ከእናቴ ጡት ጋር እየመገበ ያስተማረኝ የማህበረሰብ ወግ ነዉ ... ... ሲበዛ ግን ኤጭ እንላለን .... ሲበዛ እንባልጋለን ... እኔ ጎጃሜ ነኝ .... ዝቅ ሲልም ጎዛምኔ ... ጎዛምኔ ስለሆንኩ የነ መላኩ በጎ ሰዉ ... ዮፍታሄ ንጉሴ .... ሀዲስ አለማየሁ ... ተመስገን ገብሬ (ኩዛ).. በዉቀቱ ስዩም ጎዛምኔ መሆን በተለዬ አይቼዉ 2 ገጽ አልጽፍም ... ልዩነታችን እዛ ጋ ነዉ ... ተወደደም ተጠላም በኢትዮጵያ ስነጽሁፍ ዉስጥ የራሳቸዉን ታሪክ ያስቀመጡ ምርጥ የኢትዮጵያ ልጆች ናቸዉ ... ያንን ነዉ ያልኩኝ .... እንዳንተ የሆነች ሰበዝ መዝዤ የኔ አላደርጋቸዉም ... ... አንተ እንደምንም ብለህ ....ወንጌላዊ ለማድረግ ትጥራለህ .... ልክ ልትሆንም ላትሆንም ትችላለህ ... ነገር ግን እዚህ ቦታ ላይ መጥቀስህ ጥቅሙ ምንድን ነዉ? የነዚህ ሰዎች ወንጌላዊ መሆን ላንተ ግራ ለገባዉ ህይወት በምንም አይነት መንገድ ጀስቲፋይ አያደርግልህም:: እንሰት የሰዉየዉን ጽሁፍ ሲያቀርብ በኢትዮጵያ ስነጽሁፍ ብሎ ነዉ ... አለቀ .... ያንተ አሰልች የመሀይም ተረት አደፍራሽ ነዉ .... ሁሌም አደፍራሽ ነህ ስልህ ምንም አልሳቀቅም:: ለዛም ነዉ በዚህች ምድር ከኔ በረዘመ ዘመን መኖርህ አክብሮትን ያልጫረልኝ ... .... በእድገቴ ሳከብረዉ የኖርኩለትን ታላቅን ማክበር አልፌ ኤጭ ያሰኘኝ .... አሁንም ልድገመዉ ኤጭ!!!!

በመጨረሻም ...
የምታዉቀዉ ታሪክ ካለ በተነሳዉ አርዕስት ዙሪያ ማብራሪያ ስጥ .... ... ስነጽሁፍ ከሆነ ስነጽሁፍ .... ፖለቲካም ከሆነ እንደዛዉ .... ሀይማኖትም እንደዚሁ .... እንደ እንቁራሪት ካንድ ቦታ ወደሌላ አትዝለል ....
አይን ሁሉን ቢያይም አጠገቡ ያለዉን ቅንድብ አይቶ አያዉቅም ...
ሙዝ1
ዋና አለቃ
ዋና አለቃ
 
Posts: 3128
Joined: Wed Feb 22, 2006 9:25 am

Re: የጉለሌው ሰካራም በኢትዮጵያ የመጀመሪያው አጭር ልብ ወለድ

Postby የተሞናሞነው » Wed Oct 24, 2012 9:47 am

ሰላም ጋሽ ዲጎኔ :lol: :lol: ሙዝ በደንብ አስተያየቴን ስለነገረህ ደግሜ አልጽፍም::

@ወንድም እንሰት ''የወንጌላዊ'' ተመስገን ገብሬን አጭር ልብወለድ ስላካፈልከን ትልቅ ምስጋና ከሰላምታ ጋር አቅርቤልሀለሁ::

ዲጎኔ wrote:ሰላም ለሁላችን ይሁን
እጥፍ ምስጋና ለእንስት ይህ ቅንብር ስላገኘን::አዎን ወንጌላዊ ተመሰገን ገብሬ በጎጃሙ ተሀድሶ ቄስ ባድማ ያለው ከተቀረጹ ከነዶ/ር አዲስ አለማየሁ የሚደመር የተሀድሶ ጮራ ፍሬዎች አንዱ ነው::ይህን ግኝት መጀመሪያ ላቀረቡት የዩኒቨርስቲ ማህበረሰብ አባል ዶ/ር ፈቃደ አዘዘ ምስጋናይገባል::የወንጌላዊ ተመስገን ገብሬ ስራ በህትመት ላቀረበው የምስራች ድምጽ መገናኛ ዘዴዎችም እንዲሁ ምስጋና ይገባል::ዲጎኔ

ሞረቴው በጉለሌው ሰካራም መጣጥፍ የታነጸ
የተሞናሞነው
ውሃ አጠጪ
ውሃ አጠጪ
 
Posts: 1129
Joined: Wed May 11, 2011 5:39 pm

Postby ዲጎኔ » Wed Oct 24, 2012 1:28 pm

ሰላም ለሁላችን ይሁን ለወያንታው ሙዘዲን ጭምር
የጸረዲሞራሲ ጎጠኛ ወያኔ አፍቃሪ ከሚያከብረኝ ጸረወያኔ የሚዘልፈኝ ይሻለኛል::ደግሞስ ከዚህ በላይ ሰብእናዬን በየጸሁፎቼ እየተከታተለ ከሚዋጋ ምን ክብር ሊገኝ!አዎን አንድ ከያኒ በጦቢያዊነቱ ያደረገውን በጎ ተዋጽኦ መዘከር ተገቢ ሲሆን የኛ ሀይማኖት የእኛ ብሄር ወርቃማው ጥሩው ሰለሞናዊ ወዘተ እየተባለ ሲለፈፍ በኖረበት ሀገር የባለብዙ ብሄር ብሄርሰቦች ሀይማኖቶች አባላት ተዋጽኦ እንዳላቸው ማውጋቱ ከተናቁትና እንደሰው ከማይቆጠሩት ለተወለደው ዲጎ ትልቅ ስራ ነው::ያንተ ጸረ ዲጎ ትችት መሰረታዊ በሆነ የፖለቲካ ልዩነት ስለሆነ እዚህ ምን ካባ አልበስህ ኪነጥበብ ብቻ እያልክ መሸወድ አትችልም::
በል ቢያምህም ቢያስመልስህም የከያኒ አፍሮን የትናንቱን ያስተረያል ከግዮን ኮንሰረት አዳራሽ ጀባ እልሀለሁ::ከቴዲ አፍሮ ዜማዎች ያስተሰረያል ብቻውን የናረ በኪነጥበብነቱ ሳይሆን የግፈኛው ወያኔ አመጣጥና የቁጭበሉ አልጋወራሽ ሀይለመለስን ማንነት ስለሚገልጽ ነው::የ ኪነጥበብ ትልቁ ሚና ለፍትህ እኩልነት መቆም እንጂ ኪነጥበብ ለኪነጥበብ ማለት በዲጎ እይታ ፌዝ ነው::ዛሬም ለዘላለም ኪነጥበብ እውነት ለመግለጥ የእውነት ጸሮችን ከአጼ እስከ ወያኔው ለመግለጥ ይውላል::
ዲጎኔ ሞረቴ ግፈኞችን ጥንትም ዛሬም ከሚፋለም ከሀቀኛ ኪነጥበብ ስብስብ ከፍቅር እስከመቃብር እስከ የልምጃት

ሙዝ1 wrote:
ዲጎኔ wrote:ሰላም ለሁላችን
ሙዝነት የጎዛምኑ ወያንንታ ምነው? እኔ ጎዛምን ብሆን ጮቤ እረግጥ ቅቅ ነበር ሁለት ገጽም እጽፍ ነበር ....ምንም አላበዛሁ ሀቅ ዘረዘርኩ እንጂ!ባለፈው የጎጃሞቹ ደራሲያን ምሽት ባህር ዳር ላይ በተካሄደ ተዘክረዋል ሲያንሳቸው ነው::
ለለጠፍከዉ እንደሁልጊዜዉ አክብሮቴ ካለህበት :lol:


ስማ ዲጎ ... ታላላቅን ማክበር ጎጃም ከእናቴ ጡት ጋር እየመገበ ያስተማረኝ የማህበረሰብ ወግ ነዉ ... ... ሲበዛ ግን ኤጭ እንላለን .... ሲበዛ እንባልጋለን ... እኔ ጎጃሜ ነኝ .... ዝቅ ሲልም ጎዛምኔ ... ጎዛምኔ ስለሆንኩ የነ መላኩ በጎ ሰዉ ... ዮፍታሄ ንጉሴ .... ሀዲስ አለማየሁ ... ተመስገን ገብሬ (ኩዛ).. በዉቀቱ ስዩም ጎዛምኔ መሆን በተለዬ አይቼዉ 2 ገጽ አልጽፍም ... ልዩነታችን እዛ ጋ ነዉ ... ተወደደም ተጠላም በኢትዮጵያ ስነጽሁፍ ዉስጥ የራሳቸዉን ታሪክ ያስቀመጡ ምርጥ የኢትዮጵያ ልጆች ናቸዉ ... ያንን ነዉ ያልኩኝ .... እንዳንተ የሆነች ሰበዝ መዝዤ የኔ አላደርጋቸዉም ... ... አንተ እንደምንም ብለህ ....ወንጌላዊ ለማድረግ ትጥራለህ .... ልክ ልትሆንም ላትሆንም ትችላለህ ... ነገር ግን እዚህ ቦታ ላይ መጥቀስህ ጥቅሙ ምንድን ነዉ? የነዚህ ሰዎች ወንጌላዊ መሆን ላንተ ግራ ለገባዉ ህይወት በምንም አይነት መንገድ ጀስቲፋይ አያደርግልህም:: እንሰት የሰዉየዉን ጽሁፍ ሲያቀርብ በኢትዮጵያ ስነጽሁፍ ብሎ ነዉ ... አለቀ .... ያንተ አሰልች የመሀይም ተረት አደፍራሽ ነዉ .... ሁሌም አደፍራሽ ነህ ስልህ ምንም አልሳቀቅም:: ለዛም ነዉ በዚህች ምድር ከኔ በረዘመ ዘመን መኖርህ አክብሮትን ያልጫረልኝ ... .... በእድገቴ ሳከብረዉ የኖርኩለትን ታላቅን ማክበር አልፌ ኤጭ ያሰኘኝ .... አሁንም ልድገመዉ ኤጭ!!!!

በመጨረሻም ...
የምታዉቀዉ ታሪክ ካለ በተነሳዉ አርዕስት ዙሪያ ማብራሪያ ስጥ .... ... ስነጽሁፍ ከሆነ ስነጽሁፍ .... ፖለቲካም ከሆነ እንደዛዉ .... ሀይማኖትም እንደዚሁ .... እንደ እንቁራሪት ካንድ ቦታ ወደሌላ አትዝለል ....
ዲጎኔ
ዋና አለቃ
ዋና አለቃ
 
Posts: 4752
Joined: Fri Aug 19, 2005 2:03 am
Location: united states

Postby ሙዝ1 » Wed Oct 24, 2012 1:55 pm

ቂቂቂ ዲጎ .... ያገሬ ሰዉ ሲተርት ቱሽም ከፈስ ተቆጠረች? ይላል ... ... ቂቂቂቂ አሁን አንተ ከፖለቲከኛ ተቆጥረህ .... አንተን በምታነሳቸዉ ግራ የተጋቡ የፖለቲካ እይታዎችህን ብቻ በመያዝ ድባቅ መምታት ይቻላል .... ችግሩ ያም ቢሆን ጊዜ ከመፍጀት ያለፈ ትርጉም የለዉም ... ደጉ ምንድን ነበር የሚልህ? ቂቂቂ እና ዲጎ ሰዉ ሆኖ ... ሰዉ ተብሎ ቂም ተቋጥሮበት አርዕስት ዘልዬ የመምታት ሙከራ ላደርግ?

ዲጎ .... ቂቂቂ ቴዲ አፍሮ እጅግ ከማደንቃቸዉና ከምወዳቸዉ የጥበብ ሰዎች እንደሆነ ዋርካ ፍቅር ላይ በግልጽ በቅርቡ ከወንድሜ ከፓንሪዚኮ ጋ ተወያይተንበታል ... ጃ ያስተሰርያልም እንዲሁ የምወደዉ ዘፈን ነዉ ... :wink: ቂቂቂ እኔን ግራ ግብት ያለኝ .... ቆይ ትንሽ ልሳቅና ቂቂቂቂ እኔን ግራ ግብት ያለኝ .... ከላይ የጻፍከዉ በምን ሂሳብ ከተመስገን ገብሬ ጋ እንደተገናኘ ነዉ .... ቂቂቂ ለመሆኑ ተመገን ገብሬ ---- ግንቦት 7 ነበር? ቂቂቂ እስኪ ትንሽ እንሳቅ ... የኔ አፍቃሪ ወያኔ መሆን ከተመስገን ገብሬ ጋ ምን አገናኘዉ .... .... ... ይልቅ የሚረባዉን ላዉራህማ .. ... ... እኔ'ኮ ያልኩኝ በኢትዮጵያዊነት ዙሪያ እንወያይ ነዉ ... .... ቂቂቂቂ ነዉ ይሄም አስተሳሰብ ወያኒያዊ ሆነ? .... ደጉ ባልጩት የሚልህ ሲቀልድ እንዳልሆነ ድሮም ይገባኛል ... .... ለመድገም ቢከብደኝም .... ደጉን ቻሌንጅ ማድረግ ግን አልችልም --- ከመቀበል ዉጭ :wink:

ለሁሉም ሰዉ እንዳይታዘብህ ... የቤቱ ቶፒክ .... የኔ መልስ ... እና ወያኔነት ግኑኝነታቸዉን አስምረህ ማስረዳትህን ስለምጠራጠር ከላይ ያለችዋን ቶሎ አንሳት ... :wink:
አይን ሁሉን ቢያይም አጠገቡ ያለዉን ቅንድብ አይቶ አያዉቅም ...
ሙዝ1
ዋና አለቃ
ዋና አለቃ
 
Posts: 3128
Joined: Wed Feb 22, 2006 9:25 am

Postby ክቡራን » Wed Oct 24, 2012 2:12 pm

ሰላም በጌታ ወንድሜ ዲጎኔ ለኔ እንደገባኝ ወንድሜ ሙዝ ምክር እንጂ ዘለፋ አይደለ ም የጻፈልህ:: እስኪ ቀስ በለህ የጻፍካቸውን ተመልከትና ቀስ ብለ ደሞ የሱን መልስ አንብበው:: ዘለፋ የለበትም:: አንድ ሰው መጽሀፍ ሲጽፍ ወይ አንድ ጥሩ ነገር ላገሩ ሲያበረክት በሰራው ስራ ላይ ከማተኮር ይልቅ ምክንያት ፈልገህ ወዳንተ ጎጥ ታስገበዋለህ:: ያ ሰው ያንተን እምነት ተከታይ ሆኖ ካላገኘሀው አስተማሪዎቹን ትፈልግና እነ እከሌ እኮ ናቸው ያስተማሩት ነው ብለህ ታጠጋጋዋለህ:: :lol: አሁንማ ሁላችንም ባንተ ቀመር ተሀድሶ ሆነናል:: :D መሀመድ ኡስማን ግሩም ድርሰት ቢጽፍ ድርሰቱ እንጂ ሙስሊምነቱ አይደለም ፋይዳው:: የሼክ እድሪስ ተማሪ ነበር ሀጂ ክቡራን ናቸው ቁርዐን ያስቀሩት ብንል ምን ዋጋ አለው..? ለማለት መሰለኝ ሙዝ አስተያየቱን የሰጠው:: እምነታቸው ላይ ሳይሆን ስራቸውን ላይ እናተኩር ማለቱ መሰለኝ ሲጠቃለል...ካጠፋሁ ይቅርታ:: :D
ክቡራን
ዋና አለቃ
ዋና አለቃ
 
Posts: 7814
Joined: Tue Mar 04, 2008 4:24 pm

Postby ዲጎኔ » Wed Oct 24, 2012 2:20 pm

ሰላም ለሁላችን
ውድ ሙዘዲን እኔንም አሳቅህኝ በእውነት ቅቅቅቅቅ ግን ማሽላ ውስጡ እያረረ ላዩ.. እነደሚባል ነው ለምን ብትል የአንተ እኔን መጎንተል ቀጥታ ከፖኦቲካ ልዩነታችን ጋር የተያያዘ ሆኖ እዚህ አቅጣጫ ስታስቀይር ትሞክራለህ:: ሌላው ሳይገባው ሲቀር ... ነው::ፖለቲካ ከማህበርሰስቡ የእለት ተዕለት ሁኔታ በተለይ ከኪነጠብብና ከስነቃል ድርጊቶች ጋር በጣም የተያያዘ ነው::ታዲያ የከያኒ ቴዲና የሙዘዲን ጽረዲጎ ትችት ግንኙነት እንዲሁ ነው:: ቴዲን እባክህ ፖለቲካው ተውና ዝም ብለህ ዝፈንል እንደምትሉት ወያንታዎች ሳይሆን በትክክል ኪነጥበብ ሲዘፈን አልማዝን አይቸ አልማዝን ሳያት ጋሼ ጥላሁን ያለው ያልገባው አልማዝ ያቺ የሰፈሩ ልጅ ሲመስለው የገባው አልማዞች እነገዥዎች መሆናቸውን ያውቃል::እናም ቴዲ ዛሬም ያው ነው ያደነቃችሁት ለገሰ ዜናዊ ሆነ እርሱ የጠፈጠፈው ሀይለመለስ አንድ ናቸው ነው የሚልህ ለዚህም ነው ህዝቡ ለያስተስርያል ልዩ አድናቆት የቸረው::ጥሎብኝ ከጎጃሞቹ ስራዎች ጋር ፍቅር የያዘኝ የገባሮቹን ብሶት ስለሚያስተጋቡ ነው::ፕሮፈሰር ጸደቀ አለማየሁ እንኩዋን ከሙስሊሞቹ የሚያጣላ ለምን አለሰለምኩ ቢጽፉ በሀይማኖት እኩልነት የልብ ወዳጄ ነበሩ::ደርግ አባላት ብዙ ጎጃሜዎች ሆነው አልቻሉትም ያሉትን አስታውሳለሁ::እናም በትክክል ጎጃሜ ከሆንክ ይህን ጸረ ዲሞክርሲ አገዛዝ ተዋጋ በኪነጥበቡም ሳይቀር እንጂ ጸርወያኔውን ዲጎ እያስታከክክህ አትወርፍ!
ለምን ደጉን ለስድብ ትብብር ትጠራለህ ያንተው አይበቃም ወይስ ዲጎን ሲሰድብ ልዩ ደስታህ ይጨምራል? ከንቱ ወያኔ!

ወገን እንስት ይቅርታ አምዱን አቆረፈድኩ አፍቃሪ ወያኔያን እየተከታተሉ ሲጎነትሉኝ ዝም ማለት አልችልም::


ሙዝ1 wrote:ቂቂቂ ዲጎ .... ያገሬ ሰዉ ሲተርት ቱሽም ከፈስ ተቆጠረች? ይላል ... ... ቂቂቂቂ አሁን አንተ ከፖለቲከኛ ተቆጥረህ .... አንተን በምታነሳቸዉ ግራ የተጋቡ የፖለቲካ እይታዎችህን ብቻ በመያዝ ድባቅ መምታት ይቻላል .... ችግሩ ያም ቢሆን ጊዜ ከመፍጀት ያለፈ ትርጉም የለዉም ... ደጉ ምንድን ነበር የሚልህ? ቂቂቂ እና ዲጎ ሰዉ ሆኖ ... ሰዉ ተብሎ ቂም ተቋጥሮበት አርዕስት ዘልዬ የመምታት ሙከራ ላደርግ?

ዲጎ .... ቂቂቂ ቴዲ አፍሮ እጅግ ከማደንቃቸዉና ከምወዳቸዉ የጥበብ ሰዎች እንደሆነ ዋርካ ፍቅር ላይ በግልጽ በቅርቡ ከወንድሜ ከፓንሪዚኮ ጋ ተወያይተንበታል ... ጃ ያስተሰርያልም እንዲሁ የምወደዉ ዘፈን ነዉ ... :wink: ቂቂቂ እኔን ግራ ግብት ያለኝ .... ቆይ ትንሽ ልሳቅና ቂቂቂቂ እኔን ግራ ግብት ያለኝ .... ከላይ የጻፍከዉ በምን ሂሳብ ከተመስገን ገብሬ ጋ እንደተገናኘ ነዉ .... ቂቂቂ ለመሆኑ ተመገን ገብሬ ---- ግንቦት 7 ነበር? ቂቂቂ እስኪ ትንሽ እንሳቅ ... የኔ አፍቃሪ ወያኔ መሆን ከተመስገን ገብሬ ጋ ምን አገናኘዉ .... .... ... ይልቅ የሚረባዉን ላዉራህማ .. ... ... እኔ'ኮ ያልኩኝ በኢትዮጵያዊነት ዙሪያ እንወያይ ነዉ ... .... ቂቂቂቂ ነዉ ይሄም አስተሳሰብ ወያኒያዊ ሆነ? .... ደጉ ባልጩት የሚልህ ሲቀልድ እንዳልሆነ ድሮም ይገባኛል ... .... ለመድገም ቢከብደኝም .... ደጉን ቻሌንጅ ማድረግ ግን አልችልም --- ከመቀበል ዉጭ :wink:

ለሁሉም ሰዉ እንዳይታዘብህ ... የቤቱ ቶፒክ .... የኔ መልስ ... እና ወያኔነት ግኑኝነታቸዉን አስምረህ ማስረዳትህን ስለምጠራጠር ከላይ ያለችዋን ቶሎ አንሳት ... :wink:
ዲጎኔ
ዋና አለቃ
ዋና አለቃ
 
Posts: 4752
Joined: Fri Aug 19, 2005 2:03 am
Location: united states

Postby ሙዝ1 » Wed Oct 24, 2012 2:25 pm

የኮሚኒኬሽን ባርየር ከሚሆኑ ፋክተሮች አንዱ የስታተስ ልዩነት ነዉ .... ቂቂቂቂ .... አሁንም ደግመህ አንብበዉ ...

ክቡ አመሰግናለሁ .... ለነገሩ የነገርከዉ ለዲጎ ነዉ .... መድከም ነዉ ባክህ
አይን ሁሉን ቢያይም አጠገቡ ያለዉን ቅንድብ አይቶ አያዉቅም ...
ሙዝ1
ዋና አለቃ
ዋና አለቃ
 
Posts: 3128
Joined: Wed Feb 22, 2006 9:25 am

Next

Return to Warka Culture and Literature - ዋርካ ባህልና ሥነ ጽሑፍ

Who is online

Users browsing this forum: Google Adsense [Bot] and 3 guests