ሀገሬ!

Topics related to cultures, arts, languages, arts such as humor, music, traditional literary genres of poems, ግጥም ፣ ቅኔ ፣ ተረትና ምሳሌ)

ሀገሬ!

Postby ሓየት11 » Thu May 23, 2013 7:49 pm

    ሀገር ማለት የኔ ልጅ


    ሀገር ማለት ልጄ፣ ሀገር ማለት፣
    እንዳይመስልሽ የተወለድሽበት ቦታ ፣ የተወለድሽበት አፈር
    እትብትሽ የተቀበረበት ፣ ቀድመሽ የተነፈሽው አየር፣
    ብቻ እንዳይመስልሽ።
    ሀገር ረቂቅ ነው ቃሉ
    አገር ውስብስብ ነው ውሉ።

    ሀገር ማለት ልጄ ፣

    ሀገር ማለት ምስል ነው ፣በህሊና የምታኖሪው ፣
    ከማማ መህጸን ከወጣሽበት ቀን ጀምሮ ፤
    በጠባሽው ጡት ጡጦ ፣
    በዳህሽበት ደጃፍ በወደቅሽበት ፋፋ
    በተማርሽበት ትምህርት ቤት፣
    በተሻገርሽው ዠረት ፣
    በተሳልሽበት ታቦት ፣ወይ በተማፀንሽው ከራማ ፣
    በእውነትሽ በስሜትሽ ፣
    የምትቀበይው ምስል ነው ፣ በህሊናሽ የምታኖሪው ፣
    ስትወጅ ሰንደቅ ታደርጊው ፣
    ቢያስጠላሽ የማትቀይሪው።

    ሀገር ማለት የኔ ልጅ ፣

    ሀገር ማለት ቋንቋ ነው በአንደበት አይናገሩት፣
    በጆሮ አያዳምጡት ፣
    አማርኛ ፣ኦሮሞኛ ፣ቅማንተኛ፣
    ጉራግኛ ወይ ትግሪኛ ብለው የማይፈርጁት ።

    የኔ ልጅ፣

    አማራው አፋሩ ኦሮሞው ሲዳማው ፣ጉራጌኛሽን ባይሰማ፣
    ያለገባው እንዳይመስልሽ ፣ ሀዘን ደስታሽን ያልተጋራ።
    የየልቦናችንን ሀቅ ፍንትው አድርጎ እያሳየ ፣
    ህዝቦችን ከሰንደቃቸው አስተሳስሮ ያቆየ፣
    ሀገር ቋንቋ ነው ልጄ የሁለንተናሽ መስታወት፣
    ሲከፋሽ ትሽሽጊበት ፣ ሲደላሽ ትኳኳይበት ።

    የኔ ልጅ ፣

    አያት ቅም አያትሽ ፣ሰላም ሲሆን ከወልቂጤ አድማስ ማዶ ሸቅጦ፣
    ሲያቀና ወረቱን ፣
    ለእኔና ለአንቺ መኖሪያ ሲያቀና ቀዬና ቤቱን ፣
    ሀገር ጠላት ሲደፍራት ጦሩን ሰብቆ እየፎከረ፣
    ከኦሮሞው ከትግሬው ከአፋሩ ከወላይታው ከሁሉም የጦቢያ ልጆች ፣
    አጥንቱን እየማገረ ፣
    ሀገር ይሉት መግባቢያ ፣ሰንደቅ ይሉት መለያ ፣ሲያቆይልሽ ፣
    በጉራግኛ የማትገልጭው በጎጥ የማትገድቢው፣ ስንት አለ ታሪክ መስለሽ።

    እና የእኔ ልጅ፣

    ለዚህ ነው ሀገር ይሉት ቋንቋ ላንቺ የሚያስፈልግሽ፣
    ከወልቂጤ አድማስ ማዶ፤ ለተሳሰረ ታሪክሽ፣
    ከወልቂጤ አድማስ ማዶ ፣ለተወጠነው እድገትሽ።
    እና ልብ በይ ልጄ ! ሀገር ማለት ቋንቋ ነው ባንደበት አይናገሩት ፣
    በጆሮ አያዳምጡት።

    ከሁሉም በላይ ልጄ ፣

    ተፈጥሮ ከቸረው በረከት ፣የላቡን ፍሬ የሚበላ፣
    ሀገር ማለት ወገን ነው ፣ የእኔ የምትይው ከለላ።
    ትመኪበት ጥሪት ትደምቂበት ብርሃንሽ፣
    የስብዕናሽ ግማሽ ውል ፣ወገን ነው ማህተምሽ፣
    ዜጋው ነው ልጄ ሀገርሽ።

    መሬትማ የእኔ ልጅ፣

    በእምነትሽ ፣እውቀትሽ፣ከልለሽ ካላበጀሽው፣
    ለእድገትሽ ውጥን ካልሆነ ፣ለተስፋሽ ካልተመገብሽው፣
    መሬትማ ባዳ ነው ላለማው የሚለማ፣
    ለተስማማው የሚስማማ።
    ዥረቱም ግድ የለውም ፣ቦይ ለማሰለት ይፈሳል፣
    ተራራው ደንቆሮ ነው ፣ለቦረቦረው ይበሳል።
    መሬቱ አደለም የኔ ልጅ እድርተኛው ነው ሃገርሽ፣
    ስትቸገሪ ታድጎ ፣ስትታመሚ አስታሞ፣ ስትሞቺ አፈር የሚያለብስሽ።
    በእጅሽ ያለ ብሩህ ጽጌ ፣ሰው ነው ልጄ ሀገርሽ።
    ወገን ነው ልጄ ሀገርሽ።

    እና የእኔ ልጅ ፣
    ሀገር ረቂቅ ነው ቃሉ፣
    ሀገር ውስብስብ ነው ውሉ።


    _________________________

    ታህሳስ 1999፣ ለልጃችን ኬርአለም

    ከዶ/ር በድሉ ዋቅጅራ ፍካት ናፋቂዎች የተሰኘ መፀሐፍ የተወሰደ
ሓየት11
ዋና አለቃ
ዋና አለቃ
 
Posts: 2945
Joined: Sun Apr 06, 2008 7:34 pm
Location: ላን'ሊይ

Return to Warka Culture and Literature - ዋርካ ባህልና ሥነ ጽሑፍ

Who is online

Users browsing this forum: Bing [Bot] and 4 guests