በአገር ክህደትና በሰብአዊ መብት ጥሰት ወንጀል የተጠረጠሩ የፖሊስ ኮሚሽን የቀድሞ አመራሮች!

[ኳስሜዳ]

ከመንግስት እና ከህዝብ የተጣለባቸውን ከባድ ኃላፊነት ወደ ጐን ትተው መቀመጫቸውን ትግራይ ክልል በማድረግ ፀረ-ሠላም እና ፀረ-ህዝብ ከሆኑ የህዋሃት ከፍተኛ አመራሮች ተልዕኮ በመቀበል በጽንፈኝነት አስተሳሰብ በመነሣት በሀይል ወደ ስልጣን የመምጣት ፍላጎትን ካነገቡ ፀረ-ሠላም ሀይሎች ተልዕኮ በመቀበል በሀገር ውስጥ ሌሎችን በማደራጀት ሀገር ለመበተን ሁከትና ብጥብጥ እንዲፈጠር በማድረግ እና ህገ-መንግስታዊ ሥርዓቱን አደጋ ላይ የሚጥል ተግባር ውስጥ በቀጥታ እና በተዘዋዋሪ መንገድ በመሳተፍ፣ ህዝብ በመንግስት ላይ አመኔታ እንዳይኖረው በማድረግ በአገር ክህደት እና በሰብአዊ መብት ጥሰት ወንጀል የተጠረጠሩ በተለያዩ የአመራር ደረጃ ላይ የነበሩ የአዲስ አበባ ፖሊስ ኮሚሽን አመራሮች የመያዣ ትዕዛዝ ወጥቶባቸዋል ሲል የፌዴራል ፖሊስ ኮሚሽን አስታውቋል፡፡
እንደ ኮሚሽኑ በግለጫ የመያዣ ትዕዛዝ የወጣባቸው ተጠርጣሪዎቹ፡-

1） ኮማንደር ሰለሞን አብርሃ ብስራት
2） ኮማንደር ሀይለማርያም ብርሃኔ ገ/ማርያም
3） ም/ኢ/ር ክብሮም ገብሩ ገ/እግዚአብሄር
4） ም/ኢ/ር አረጋዊ ገ/ሂወት አስፋዉ
5） ረ/ኢንስፔክተር ገዛኢ ገ/ሂወት ገ/ስላሴ
6） ረ/ኢንስፔክተር ተስፋ ኪሮስ ግደይ
7） ረ/ኢንስፔክተር አርአያ ገ/አናንያ ኪዳኑ
8）ረ/ኢንስፔክተር ሰለሞን ወላይ ወ/አብዝጊ
9） ዋ/ሳጅን ሀይላይ ወልዱ ገ/ማርያም
10） ዋ/ሳጅን ሀፍቱ ካህሳይ አብርሃ ናቸው።
መላው የሃገሪቱ ህዝቦች በተለይም ደግሞ ሰላም ወዳዱ የትግራይ ህዝብ፤ እንዲሁም የሀገር መከላከያ ሰራዊት፤ የአገራችን የፖሊስ ሰራዊትና የደህንነት ተቋማት እነዚህን የጁንታው የህዋሃት የጥፋት ቡድን አባላትን አድኖ ለህግ ለማቅረብ እየተደረገ ባለው ጥረት በያሉበት የድርሻቸውን እንዲወጡ ኮሚሽኑ ጥሪ አቅርቧል፡፡
በቀጣይም የጁንታው ቡድን ርዝራዥ የሆኑ ተጠርጣሪዎችን ተከታትሎ በህግ ተጠያቂ እንዲሆኑ የማድረግ ስራው ተጠናክሮ የሚቀጥል መሆኑን የገለፀው ኮሚሽኑ በጉዳዩ ዙሪያ ተከታታይ መረጃዎችን በመገናኛ ብዙሃን በኩል ለህብረተሰቡ ይፋ የሚያደርግ መሆኑንም አስታውቋል።


Ethiopian Broadcasting Corporation